Jehova Chaknaah Thlamuang Rawh

“Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn.”—SAM 94:19.

THLAMUANNA thlaleltu zawng zawngte tân Bible chuan thlamuanna thu a nei a. Chuvângin, The World Book Encyclopedia-in “buaina leh harsatna an tawn hunah chuan, mi tam takte chu thlamuanna, beiseina, leh kaihhruaina hmuh nân Bible lam an hawi ṭhîn” a ti pawh hi thil mak a ni lo. Engvângin maw?

Bible chu “thlamuanna zawng zawng Pathian,” ‘kan hrehawmna zawng zawnga min thlamuantu,’ hmangaihnaa khat min Siamtu thlarauva thâwk khum a nih vâng a ni. (2 Korinth 1:3, 4) Ani chu ‘thlamuanna petu Pathian’ a ni. (Rom 15:5, NW) Jehova chuan kan zavai tâna inchhâwkzangkhaina tûr siamna kawngah entawn tûr a siam a. Ani chuan a Fapa mal neih chhun, Isua Krista chu beiseina leh thlamuanna min pe tûrin leiah a rawn tîr a ni. Isua ngeiin, heti hian a zirtîr a ni: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin. (Johana 3:16) Bible pawhin Jehova chu “kan phur ni tina min phurhsaktu, min chhandamtu Pathian” tiin a sawi bawk. (Sâm 68:19) Chuvângin, Pathian ṭih mite chuan inringtâwk takin, “LALPA chu ka hmâah ka awmtîr fo va: ka ding lama a awm avângin ka nghîng lo vang,” an ti thei a ni.—Sâm 16:8.

Hêng Bible chângte hian, Pathian Jehova’n keini mihringte min hmangaihzia a târ lang a. Min thlamuan nân leh mangan huna min chhâwk tûrin thiltihtheihna leh châkna a nei a ni tih a chiang a ni. Ani chuan: “Chau hnênahte chuan thiltihtheihna a pe ṭhîn a; chakna rêng nei lote chu a tichak ṭhîn.” (Isaia 40:29) A nih leh, engtin nge Jehova chaknaah chuan thlamuanna kan hmuh theih ang?

Jehova Ngaihsaknain a Thawi Dam Theih Chu

Fakna hla phuahtu chuan heti hian a ziak a: “I rit phurh chu LALPA chungah nghat la, tichuan anin a tichak ang che; mi fel chu engtikah mah tihnghîn a phal lo vang,” tiin. (Sâm 55:22) Ni e, Jehova chuan mihringte min ngaihsak a ni. Tirhkoh Petera chuan kum zabi pakhatna Kristiante chu: “Anin [Pathianin] a ngaihsak ṭhîn che u” tiin a thlamuan a. (1 Petera 5:7) Isua Krista pawhin Pathianin mihringte a hlutzia heti hian a sawi a: “Chawngzawng panga dâr tangka pahnihah an hralh ṭhîn lo vem ni? nimahsela an zînga pakhat mah Pathianin a hmaih ngai si lo. In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zâwk a ni,” tiin. (Luka 12:6, 7) Kan chungchâng chipchiar taka a hriat khawpin Pathian tân chuan kan hlu a ni. Mi tin min ngaihsak êm avângin, kan chungchâng kan hriat lohte pawh a hre vek a ni.

Jehova min ngaihsakna hriat chhuah chu thuziak hmasaa kan sawi tâk nawhchizuar Svetlana-i tân thlamuantu a lo ni a. Mahnia intihhlum a tum laiin, Jehova Thuhretute nên a inhmu fuh a. Tichuan, Bible zir chu a rem ti a, chu chuan Jehova chu a chungchâng ngaihsaktu, mi tak tak a ni tih hre tûrin a ṭanpui a ni. A thil zir chuan a rilru a khawih hle a, a nun kawng a thlâktîrin, Pathian hnênah a inpumpêktîr ta a ni. Chu bâkah, harsatna a nei reng chung pawha nun thar neih theih nâna a mamawh mahni inhlutna nei tûrin a ṭanpui bawk. “Jehova’n min thlahthlam ngai lo vang tih ka ring nghet tlat a, 1 Petera 5: 7-a thu awm: ‘Anin a ngaihsak ṭhin che u avângin in manganna zawng zawng [Jehova] chungah nghat vek rawh u’ tih chu a lo thleng dik a ni tih ka hmu chhuak ta,” a ti thei hial tawh a ni.

Bible Ṭanchhan Beiseinain Mi a Thlamuan

Pathianin Bible hmangin mi a thlamuan ṭhîn a, chutah chuan nakin hun beiseina mak tak a awm a ni. Tirhkoh Paula chuan: “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna tûrin ziak a ni,” a ti a. (Rom 15:4) Ani’n: “Pathian kan Pa, min hmangaihtu . . . khawngaihna avânga chatuana thlamuanna leh beiseina ṭha min petu chuan, in thinlungte chu tithlamuangin, thil tihṭhat leh thusawi ṭhat tinrêngah tinghet rawh se,” a tih pawh khân, beiseina dik leh thlamuanna inzawm dân a tifiah a ni. (2 Thessalonika 2:16, 17) He “beiseina ṭha” hian lei paradis-a ṭhat famkimna te, hlimna te, leh tâwp nei lo nun beiseinate a huam tel a ni.—2 Petera 3:13.

Chutiang beiseina chiang leh duhawm tak chuan thuziak hmasaa kan sawi tâk, zeng zungawl vei Laimanis-a chu a tiphûr hle mai a. Jehova Thuhretute Bible ṭanchhan thu leh hlate chu chhiarin, a hrisêlna ṭhat lehna tûr Pathian Lalram thar chu a hre ta a, hlim namên lovin a hlim ta a ni. Bible aṭang chuan mak taka tihdamna thutiam duhawm tak: “Chumi hnuah chuan mitdelte mit chu tihmenin a awm ang a, bengngawngte beng chu tihvârin a awm ang. Chumi hunah chuan ke baite chu sakhi angin an zuang ang a, ṭawngtheilote lei chu hlim takin a zai ang,” tih thute chu a chhiar bawk a. (Isaia 35:5, 6) Chu Paradis-a a awm ve theih nân, Laimanis-a chu nasa takin a inthlâk danglam a ni. A zu in chu a bânsan tawh a, a ṭhenawmte leh a hmêlhriatte’n mak an ti hle a ni. Tûnah chuan Bible zirpui engemaw zât neiin, Bible ṭanchhan beiseinain a pêk thlamuanna chu mi dangte a hrilh ve a ni.

Ṭawngṭaina Hnathawh

Chhan engemaw avânga kan rilru a nat chuan, Jehova hnêna ṭawngṭaiin thlamuanna kan nei thei a. Chu chuan kan phur rit a paih bo thei a ni. Kan ṭawngṭai laiin, Pathian Lehkha Thua thu awmte kan hre chhuak thei a, chu chuan min thlamuan thei a ni. Bible-a fakna hla sei ber chu ṭawngṭai hla mawi tak a ni a. A phuahtu chu: “Aw LALPA, hmasânga i rorêlte chu ka hre reng a, ka inthlamuan ṭhîn,” tiin a zai a ni. (Sâm 119:52) Dinhmun harsa tak leh khirh tak, a bîk takin miin hrisêlna lama harsatnaa a tawhin, tihkian mai theih a ni lo fo va. Kan chakna mai chuan khawi lam hawi tûr nge tih kan hre lo thei a ni. Mihring theih chin tih hnua, ṭawngṭaia Pathian lam hawina chuan nasa taka thlamuanna min pe a, a châng chuan chhuahna kawng a thlen thei tih chu mi tam takin an hria a ni.—1 Korinth 10:13.

Damdawi in emergency room-a hmanmawh taka lâkluh Pat-i chuan ṭawngṭainain mi a thlamuanzia a takin a tawng a ni. A dam leh hnuah chuan: “Jehova kutah ka nun ka dah a ngai tih ka hria a, ka chungah a duhzâwng thlentîr tûrin a hnênah ka ṭawngṭai a. Chutih lai chuan, ka thla a muang a; Philippi 4:6, 7-a Pathian thlamuanna chu ka dawng a ni,” a ti a ni. He Bible châng hi kan za atân thlamuantu a va ni êm! Chutah chuan Paula chuan: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin min fuih a ni.

Thlamuantu ang Thlarau Thianghlim

A thih hma zân khân, Isua chuan a tirhkohte hnênah a kalsan thuai tûr thu a hrilh chiang a. Hei hian anni chu a tibuai a ni. (Johana 13:33, 36; 14:27-31) Thlamuan an mamawhzia hriain, Isua chuan: “Pa ka dîl ang a, ani chuan thlamuantu dang a pe ang che u, chatuana in hnên awm tûrin,” tih a tiam a ni. (Johana 14:16) Heta Isua sawi chu Pathian thlarau thianghlim hi a ni. Thil dang zawng aiin, tirhkohte’n harsatna an tawh laiin Pathian thlarau chuan a thlamuan a, Pathian duhzâwng tichhunzawm tûrin a tichak a ni.—Tirhkohte 4:31.

Chêtsualna râpthlâk tak avânga a pasal a thih ṭêp khân, Angie-i chuan, a dinhmun manganthlâk tak chu a hmachhawn thei a ni. Engin nge ani chu ṭanpui? “Jehova thlarau thianghlim ṭanpuina tel lo chuan kan tuar chhuak thei lo vang a, tûn angin kan chak thei bawk lo vang. Jehova chakna chu kan chak lohnaah a lo lang chiang hle a, ani chu mangan huna kan inhumhimna kulhpui a ni,” tiin, a sawi a ni.

Inunauna Thlamuanawm

Miin eng dinhmun pawh tawngin, eng ang lungngaihna pawh lo thleng mah se, Jehova kohhrana inunaunaah hian thlamuanna a nei thei tûr a ni. He inunauna hian chumi ṭawmpuitute chu thlarau lama ṭanpuina leh chhawmdâwlna a pe ṭhîn a. Chutah chuan, mangan laia min hnêm tûr leh min ṭanpui tûra inhuam mi hmangaih, mi ngaihtuah, leh thlamuantu ṭhiante chu hmuh theih a ni.—2 Korinth 7:5-7.

Kristian kohhran zînga mite chu ‘mi zawng zawng chunga thil ṭha ti tûr leh rinna chhûngte chunga ti lehzual’ tûra fuih an ni a. (Galatia 6:10) Chûng Bible ṭanchhan zirtîrna an dawnte chuan unaute inhmangaihna leh inlainat tawnna lantîr tûrin anni chu a chêttîr a. (Rom 12:10; 1 Petera 3:8) Chuvângin, kohhrana thlarau lam unaunute leh unaupate chu an inkhawngaih a, an inthlamuan a, an inlainat a ni.—Ephesi 4:32.

Vânduaithlâk tak maia an fapa chân ta, Joe-a leh Rebecca-i te chuan, chutiang thlamuanna leh chhawmdâwlna chu Kristian kohhran mite hnên aṭangin an dawng a. “Jehova leh mi hmangaihna nei a kohhran chuan chhiat kan tawh chhûng zawngin min ṭanpui a. Card-te, lehkha thawnte, leh telephone tam tak kan dawng a ni. Hei hian kan inunauna hlutzia min hriatthiamtîr a. Tawhsual avânga kan mangan laiin, tualchhûng kohhran mi tam tak chuan min ṭanpui a, châwte min pe hlawm a, kan in pawh min tihfaisak a ni,” tiin an sawi a ni.

Thlamuang Rawh!

Lungngaihna chhûmpui rawn zîngin, nunrawnna leh manganna tinrêngin min tlâkbuak reng mah se, Pathian chu min hum a, min hnêm tûrin a inpeih reng a ni. Pathian humhimna leh thlamuanna chu fakna hla pakhat chuan heti hian a sawi a ni: “A thlain a khuh ang chia, a thla hnuaiah chuan i tlu lût ang,” tiin. (Sâm 91:4) Hetah hian Pathian humhimna chu hlauhawm lo thleng tûr a hriat avânga a fate humhim tuma an chunga a thla zâr ṭhîn mupui nên a tehkhin a nih hmêl hle. Jehova chu chûng aia nasa zâwk daiha amaha inhumhimna zawngtute Humtu dik tak a lo ni.—Sâm 7:1.

Pathian mizia, a thiltumte, leh thlamuanna a pêk theihnate chungchâng hriat belh i duh chuan, a Thu zir tûrin kan sâwm che a. Chu mi ti tûrin Jehova Thuhretute chuan ṭanpui che an châk hle a ni. Ni e, nang ngei pawh Jehova chaknaah i thlamuang thei a ni! (w00 4/15)

[Phêk 7-naa milem]

Bible ṭanchhan hmabâk beiseina chuan thlamuanna min pe thei