Inhuatna Hri Lêng

“An mi huatte hre thiam tumah an awm lo.”—James Russel Lowell_a, Thu Ziaktu Leh Ram Palai.

EAST Timor te, Kosovo te, Liberia te, Littleton te, leh Sarajevo tih hming te kan hriat hian kan rilruah chuan thil kângchhe bâng te, ruang an paihkhâwmna thlân laih thar te, mitthi ruang chhiarsên lohte chu a lo lang uar uar ṭhîn. Chûng buainate leh tharum thawhna zawng zawngte chu inhuatna avânga lo awm a ni. Hnam dang hmuhsitna leh huatna alang apauva tilangtu neo-Nazi an tih ang pâwlte leh pâwl dang dangte chu tûn lai khawvêlah hmuh tûr a tam tawh hle.

Inhuatna te, buaina te, leh tharum thawhna te awm lohna duhthusâm suangtuahna chu tihchhiatin a awm ta. French president nupui boral tawh, Danielle Mitterand-i chuan a tleirawl lai hre chhuakin: “Mite chuan an mi rinte nêna inngeih dial diala awm te; an zîngah leh mi dangte nêna thlamuang taka khawsak te; khawvêl dinhmun ṭha tak enkawlna hnuaia hrisêl tak, thlamuang tak leh zahawm taka nun te chu an suangtuah ṭhîn,” tiin a sawi a. Chûng duhthusâm suangtuahnate chu engtin nge a awm tâk? “Kum sawmnga hnuah kan duhthusâm suangtuahna chuan beihna a tuar ta a ni,” tiin lunghnual takin a sawi belh a ni.

Inhuatna lo so sâng tharleh hi ngaihthah theih rual a ni lo. Hmêlhmang bâwraw tak takin a darhzau zêl a ni. Tûn hma aia inhuatna thiltih râpthlâk zâwkte hian mi vaibelchhe tam takte’n an hlut loh mi mal himna chu a tiderthawng a ni. Chuvangin, inhuatna chu kan inchhungkhûrah emaw, kan ram chhungah emaw a la awm lo a nih pawhin, khawi emaw laiah chuan inhuatna chuan min lo châng ru reng a ni. Television-a chanchin thar leh thil thleng tihchhuahte aṭangin chu mi fiahna chu kan hmu thei a. Chûng zînga ṭhenkhat phei chu Internet aṭang pawhin a hmuh theih a ni. Entîrna ṭhenkhat han ngaihtuah ta ila.

Kum sawmbi kal liam ta khân ram hmangaihna chu nasa takin a lo pung a. Joseph S. Nye, Jr., Harvard Center for International Affairs-a director chuan, “Ram hmangaihna chu khawvêl hmun tinah hian a pung tial tial a ni. Chuvangin, khawvêl chhûngkaw khat anga inrem taka awm aiin, an inṭhendarh a. Chu chuan buaina a tipung zual a ni,” tiin a sawi a ni.

Inhuatna dangte chu a hlauhawm zâwk a, ram chhûngah emaw, vêng chhûngah emaw a awm ru tlat a ni. Canada ramah tleirâwl pa-ngain Sikh pa pakhat tar lam deuh an that a, chu thil thleng chuan “hnam chi hrang hrang inngeih dial diala an awm avânga fak hlawh ṭhîn ramah pawh inhuatna avânga dân bawhchhiatna a lo so sâng tharleh tih a târ lang a ni.” Germany ramah chuan, mi firfirkte chawh chhuah hnam inkâra intihbuaina chu 1997 kum hma lam chuan a tlêm tawlh tawlh a; mahse, 1997 kum chuan zâ zêla 27 laiin a pung chholeh a ni. Minister Manfred Kanther-a chuan: “Chu chu hmasâwnna lungchhiatthlâk tak a ni,” a ti hial a ni.

Albania hmâr lama report pakhat chuan naupang 6,000 chuang zet chu an chhûngkaw hmêlmate kah hlum an hlauh avângin lung in tâng an ang hial a ni. Chûng naupangte chuan “chhûngkaw sâng tam takte nun tibuai ṭhîntu,” chi leh chi inhalna kut an tuar a ni. Federal Bureau of Investigation (FBI) sawi dânin, United States-ah chuan, “1998 kuma FBI-in report an dawn, inhuatna avânga dân bawhchhiatna 7,755 zînga a chanve aia tam chu hnam inhuatna avânga lo inṭan a ni.” Inhuatna avânga dân bawhchhiatna dangte awmtîrtu ṭhenkhat chu sakhuana avâng te, chi leh chi inhuatna emaw, pian leh mûrna ram emaw avâng te, leh rualban loh avâng tea in pâwng huatna te a ni.

Chu bâkah, chanchinbu thupuite chuan, ni tinin ram dang mite hlauhna leh huatna thu a târ lang a; chûng chu, a bîkin tun laia râltlan mi maktaduai 21 aia tamte mi huat hlawhna tûra tih a ni a. Lungchhiatthlâk takin, chutia ram dang mite huatna tilangtu tam tak chu ṭhalaite an ni. Anni chu zâwng vânga ngau tuartîr tûr zawngtute leh chûng inhuatna avânga mawhphur thei lo ram hruaitute fuihpawrha an awm vâng a ni. Chu inhuatna hmêlhmang in phûm ru-ahte chuan in rin lohna te, in ngaitheih lohna te, leh mi dang nihphung tûr lo ngaihruatna te a tel a ni.

He inhuatna hri lo lên chhan ṭhenkhat hi eng nge ni? Tin, Inhuatna nuaibo nân eng nge tihtheih awm? Thuziak dawtleh hian he zawhnate a chhâng ang. (w00 8/15)