Inhuatna Nuaibo Theih Dân Kawng Awm Chhun

“Hlauhna tel lo inhuatna a awm lo. . . . Kan hlauh chu kan hua a; chuvangin, inhuatnaah chuan hlauhna a awm thîn.—Cyril Connolly, Literary Critic And Editor.

MIHRING khawsakphung zîrmite chuan inhuatna hian mihringte thinlungah zung a kaih tlat niin an hria a. “Inhuatna tam tak” chu mihring ziaah “a intuh nghet tlat a ni” tiin political scientist pakhat chuan a sawi bawk.

Mihring nunzia zîrmite’n chutianga thu tâwp an siam chu an thiamawm hle. An thu zir ber chu thâwk khum Bible sawi angin, mihring chu “khawlohnaa din” leh ‘suala’ piang an nih thu a ni miau si a. (Sâm 51:5) Mihring famkim lohzia chu, kum sangbi engemaw zât liam tawhah khân, min siamtu ngei chuan, “leiah hian mihring sualzia chu nasa tak a ni tih leh, an rîlru suangtuahzia rêng rêng chu sual hlîr a ni fo mai tih a lo hria,” a ni.—Genesis 6:5.

Inpâwngpaw ngeina te, inthliar hranna te, leh an rahchhuah inhuatna te hi mihringte rochun mahni hmasialna leh ṭhat famkimlohna avânga lo awm a ni. (Deuteronomy 32:5) Lungchhiatthlâk takin, mihring thinlunga chutiang thilawmte chu mihring sawrkâr te leh an ruahmannate hian a siam danglam thei lo. Ram dang chanchin thar la khâwmtu Johanna McGeary-i chuan: “Bosnia te, Somalia te, Liberia te, kashmir te, leh Caucasus hmun tea thisen chhuahna awmtîrtu inhuatna chu sipai ṭha ber pawhin a nuaibo thei lo,” tiin a sawi a ni.

Mahse, a chinfel dân kan zawn hmain, inhuatna lantîrna phêna awm chu kan hriat hmasak a ngai a ni.

Hlauhna Avânga Awm Inhuatna

Inhuatna chi hrang hrang a awm neuh neuh va. Thu ziaktu Andrew Sullivan-a chuan: “Hlauh huatna a awm a, inhmuhsitna mai inhuatna a awm bawk; thiltihtheihna lantîr ṭhîn inhuatna a awm a, thiltihtheih lohna aṭanga lo awm inhuatna a awm bawk; phuba lâkna leh îtsîkna avânga inhuatna a awm bawk a ni. . . . Mi hnuaichhiahtute huatna leh a tuartute huatna a awm a. Zâwi têa alh inhuatna a awm a, reh bo thei inhuatna a awm bawk. Tin, inhuatna puakkeh thei a awm a, kângkai thei lo inhuatna a awm bawk” tiin thiam takin a kaitawi a ni.

Rinhleh rual lovin, kan huna inhuatna avânga buaina tichhuaktu bul berte zînga ṭhenkhat chu vantlângah leh sumdawnnaah a awm a ni. Inpâwngpaw ngeina leh inhuatna nasa tak chu mi hausa an tlêm zâwkna hmunah a chhuak fo va. Tin, ram dang mi lo lûtte’n khawtlâng khawi emaw lai nunphung pângngai a tihderthawnna hmunah hian inhuatna a chhuak fo bawk.

Ṭhenkhatte chuan chûng lo awm tharte’n hnaah an el ang a, hlawh tlêm zâwkin an thawk ang a, a nih loh leh an ram thil chhuak hlutna tihniam tûrah an ngai mai thei. Chutiang hlauhthawna chu a thiamawm nge awm lo tih chu thu dang a ni leh a ni. Sumdâwnna tlâkchhiat hlauhna leh khawtlang dinhmun leh nunphung chhiat hlauhna te chu huatna leh inpâwngpaw ngeina tawrhhlelhawm tak awmtîrtu a ni.

Inhuatna nuaibo nâna rabi hmasa ber chu eng nge ni ang? Rilru put hmang thlâk thleng hi a ni.

Rilru Put Hmang Thlâk Thleng

“Inthlâk thlengna tak tak chu, a kaihhnawih mite duhthlannaah chauh a innghat a ni,” tiin McGeary-i chuan a sawi a. Engtin nge mite duhthlanna chu thlakthleng a nih theih ang? Inhuatna awm tûr do theihna thiltithei ber, mi chêttîr thei ber, leh daihrei ber chu Pathian Thu, Bible-ah a awm tih thiltawn chuan a târ lang. ‘Pathian thu chu a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuahna leh tumte a hriat nghâl theih’ vâng a ni.—Hebrai 4:12.

Hai rual lovin, inpâwngpaw ngeina leh inhuatna zung phâwi chu vawi lehkhata tihtheih a ni lo va, zan khat thil thua thleng thei a ni bawk hek lo. Mahse, nuaibo theih dân a awm a ni. Thinlung chêttîrtu leh chhia leh ṭha hriatna ṭha pe theitu Isua Krista chuan mite chu a inthlâkthlengtîr thei a ni. A thurawn fing tak: “In hmêlmate chu hmangaih ula, a tiduhdahtu che u chu ṭawngṭai sak rawh u,” tih zâwmtu mi muai tam takte chu inhuatna nuaibona kawngah chuan an hlawhtling a ni.—Matthaia 5:44.

A zirtir ang ngeiin Isua chuan, Judate’n an huat leh an hnâwl, chhiahkhawntu lo ni ṭhîn Matthaia chu a ṭhian rin berte zîngah a telh a. (Matthaia 9:9; 11:19) Chu bâkah, tûn hmaa an lo huat leh an hnâwl Jentailte tel theihna tûr, biakna thianghlim a din bawk. (Galatia 3:28) Tichuan, chutih laia ram zawng zawnga mite chu Isua Krista hnungzuite an lo ni ta a. (Tirhkohte 10:34, 35) Anni chu an inhmangaihna dang lam tak avânga hriat an ni bawk. (Johana 13:35) Mi huatnaa khat mipuiin Isua hnungzui Stephana lunga an dênhlum khân, ani chuan amah hawtute tân duhsakna sâng ber hlânin: “Lalpa, hei an thil tihsual hi an chungah mawh phurhtîr suh ang che,” a ti a, chu chu a thusawi hnuhnûng ber a ni.—Tirhkohte 6:8-14; 7:54-60.

Chutiang bawkin, tun lai Kristiante chuan an Kristian unaute lakah mai ni lovin, anmahni hawtute lak pawha thil ṭha ti tûra Isua fuihna chu an zâwm a ni. (Galatia 6:10) Tin, an nuna mi huatna nasa tak chu nuaibo tumin an bei ṭâng ṭâng bawk. An zinga inhuatna awmtîr thei thil engemaw chak tak a awm thei tih hriain, inhuatna chu hmangaihnaa thlâk an tum tlat a ni. Ni e, chu chu hmân lai mi fingin, “huatnain inhauna a chawk chhuak a, hmangaihna erawh chuan bawhchhiahna zawng zawng a khuh ṭhîn,” a tih ang chiah a ni.—Thufingte 10:12.

Tirhkoh Johana chuan: “Tupawh a unau hua chu tualthat a ni: tualthattu tumah chatuana nunna pai reng rêng an awm lo tih in hre si a,” a ti a. (1 Johana 3:15) He thu hi Jehova Thuhretute chuan an ring nghet tlat a. Chuvângin, hnam hrang te, ze hrang te, sakhaw hrang leh ram hranga mi zawng zawngte chu pâwl pakhatah an lo inzawmkhâwm a, inhuatna awm lo khawvêl pum huap inunauna tak tak an nei a ni.—A belhchhahna bâwmte en rawh.

Inhuatna Chu Nuaibo a Ni Ang!

‘Chu mi pâwla telte tân, chu chu inhuatna nuaibo theihna a ni thei ang. Mahse, chu chuan khawvêla inhuatna awm zawng zawng hi a nuaibo thei lo vang’ i ti mai thei. A dik alâwm, huatna thinlung pu lo mahla, mi dang huat i hlawh thei tho mai. Chuvangin, he khawvêl pum pui buaina tiveng tûrin Pathianah kan innghah a ngai a ni.

Pathianin he khawvêla inhuatna awm zawng zawng chu nuaibo a tum a. Chu chu a van lam sawrkâr inawpna hmangin a rawn tihlawhtling ang. Isua’n: “Kan Pa vâna mi, i hming zahawm rawh se, i ram lo thleng rawh se, i duhzâwng vâna an tih angin leia mi’n ti rawh se,” tia ṭawngṭai tûra min zirtîr avângin.—Matthaia 6:9, 10.

He ṭawngṭaina hi a taka chhân a nih hunah chuan, inhuatna awmtîrtu dinhmunte chu nuaibo a ni ang a, a awm leh tawh ngai lo vang. Mi dang tihchhiat nâna ngaihdân dik lo theh darhna te, hriatna neih lohna te, leh inpâwngpaw ngeina te chu hriat fiahna te, thutak te, leh felna tea thlâk thleng vek a ni ang. Pathian chuan “an mit ata mittui zawng zawng a hrufai ang.” Chuti chuan, “thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.”—Thu Puan 21:1-4.

Chanchin lâwmawm lehzual chu hei hi a ni; hai rual lovin, ‘ni hnuhnûngah’ kan awm tawh tih hi! Chuvângin, rei lo têah inhuatna chu leilung ata nuaibo a ni dâwn tih kan ring nghet thei a. (2 Timothea 3:1-5; Matthaia 24:3-14) Pathian tiam khawvêl tharah chuan, ṭhat famkimnaa hlân kai kan nih dâwn avangin, inunauna dik tak a awm tawh ang.—Luka 23:43; 2 Petera 3:13.

Mahse, inunauna dik tak i neih nân chu hun i lo nghah khêr a ngai lo. Dik tak chuan, a belhbâwm thuziakin a târ lan angin, Kristian inhmangaihna chuan inhuatnaa khat tûr mi nuai tam takte thinlungah hmun a chang tawh a ni. Chuvangin, nang ngei pawh chu inunaunaa tel ve tura sâwm i ni. (w00 8/15)

[Phêk 7-naa milem]

Pathian Lalramah chuan inhuatna zawng zawng chu leilung ata nuaibo a ni ang