Jehova Thuhriattîrte Chu I Ngaina Hle Em?
“Ka nunna hian i thuhriattîrte chu a zâwm ṭhîn a; ka ngaina êm êm a ni.”—SAM 119:167.
1. Jehova thuhriattîrte sawinawnna chu khawiah nge a bîk takin kan hmuh tam ber?
JEHOVA chuan a mite chu hlim se a duh a. Hlimna dik tak nei thei tûr chuan Pathian dân leh a thununna thute kan zâwm tûr a ni. Chumi atân, thuhriattîrna min pe a. Chûng chu, Pathian Lehkha Thu-ah sawinawn fo a ni a, a bîk takin, Judai ram Lal fapa Hezekia phuah nia hriat, Sâm 119 hian a sawi zîng hle a ni. He hla mawi tak hi heti hian a inṭan a: “Kawnga mi ṭha famkimte chu an eng a thâwl e, LALPA dân zawhtute chu. A thuhriattîrte zâwmtute chu an eng a thâwl e, thinlung zawng zawnga zawngtute chu,” tiin.—Sâm 119:1, 2.
2. Pathian thuhriattîrte leh hlimna inlaichîn dân chu eng nge ni?
2 A Thu hriatna dik la lût a, kan nunna kan chhawrna hmangin ‘Jehova dân kan zâwm’ a ni. Mahse, ṭha famkim lo kan nih avângin, hriatnawntîr kan ngai a. “Thuhriattîrte” tia lehlin Hebrai thu mal chuan Pathianin, a dân te, a thununna thu te, a thuruat te, leh a thupêk te kan rilru-ah a kokîr leh tih a kâwk a ni. (Matthaia 10:18-20) A thuhriattîrte zawmna chuan chhiatna leh lungngaihna min thlen thei thlarau lam tlûk chhiatna min pumpelhtîr thei a; chuvângin, a thuhriattîrte kan zawm chauhvin kan hlim reng thei ang.
Jehova Thuhriattîrahte Bet Tlat Rawh
3. Sâm 119:60, 61 ṭanchhanin eng rinna nge kan neih?
3 Jehova thuhriattîrte chu fakna hla phuahtu tân a hlu êm êm a. Ani chu: “I thupêkte zâwm tûrin ka hmanhmawh a, rei ka rial lo. Mi suaksualho hruihrualte chuan mi zem hlâwm reng a; nimahsela i dân chu ka theihnghilh lo,” tiin a zai a ni. (Sâm 119:60, 61) Kan Pa, vâna mi chuan min phuartu hmêlmate khuahkhirhna hrui chu a tichat thei tih kan rin avângin, Jehova thuhriattîrte chuan tihduhdahna tuar chhuak tûrin min ṭanpui a. A hun têah chuan, Lalram thuhrilh rawngbâwlna kan chhunzawm theih nân, chûng harsatnate ata chu min tizalên a ni.—Marka 13:10.
4. Pathian thuhriattîrte chu eng anga chhân lêt tûr nge ni?
4 Jehova thuhriattîrte chuan min zilh châng pawh a awm a. Fakna hla phuahtu angin chutiang zilhna chu i hlut ang u. Ani chuan tih tak zetin Pathian hnênah: “I thuhriattîrte chu ka lâwmna a ni a, . . . I thuhriattîrte chu ka ngaina a ni,” tih a hrilh a ni. (Sâm 119:24, 119) Fakna hla phuahtu ai mahin Pathian thuhriattîrte kan nei tam zâwk a. Hebrai Pathian Lehkha Thu-a (Thuthlung Hlui) thuziak, Grik Pathian Lehkha Thu-a (Thuthlung Thar) lâk chhâwn tam takte chuan Dân Thupêk hnuaia Jehova’n a mite a kaihhruainate bâkah, Kristian kohhran tâna a thil tumte chu min hriatnawntîr a ni. A dân thute chungchânga hriatnawntîrna min pêk hian, min kaihhruaina avângin kan lâwm a. Tin, ‘Jehova thuhriattîrahte bet tlatin’ min Siamtu tilâwm lo thei leh kan hlimna la bo thei sual thlêmnate chu kan pumpelh a ni.—Sâm 119:31.
5. Jehova thuhriattîrte chu engtin nge kan ngainat êm êm theih?
5 Jehova thuhriattîrte engti fakauva ngaina tûr nge kan nih? “Ka nunna hian i thuhriattîrte chu a zâwm ṭhîn a; ka ngaina êm êm a ni,” tiin fakna hla phuahtu chu a zai a ni. (Sâm 119:167) Min ngaihsaktu kan Pa hnên ata fuihna anga kan thlîr chuan, Jehova thuhriattîrte chu kan ngaina êm êm ang. (1 Petera 5:6, 7) A thuhriattîrte chu kan mamawh a, mi a tihsâwt dân kan hriat chuan chûng chu kan ngaina ang.
Pathian Thuhriattîrte Kan Mamawh Chhan
6. Jehova thuhriattîrte kan mamawh chhan pakhat chu eng nge ni a, engin nge chûng chu min hriat chhuahtîr ang?
6 Pathian thuhriattîrte kan mamawh chhan pakhat chu thil kan theihnghilh ṭhin vâng a ni. The World Book Encyclopedia chuan: “A tlângpui thu-in mite chuan hun a liam rualin thil an theihnghilh ṭhîn a. . . . Mi hming emaw, chanchin engemaw chu hre âwm taka lang siin, hriat chhuah theih loh châng i neih tawh a rinawm. . . . Chutianga thil hriatna hloh zawkna lo awm ṭhîn chu hamhaihna a ni a. Mi thiamte chuan chu chu pindan hnawk tak kâra a hmun ni lova dah thil engemaw zawn chhuah tumna nên an tehkhin a ni. . . . Thil hriatrengna tûra tih theih ṭha tak chu, hre bel hle nia i inhriat aṭanga hun tam tak liam hnua zir hi a ni,” tiin a sawi a ni. Taima taka zir leh zirnawn fona chuan Pathian thuhriattîrte min hriat chhuahtîr ang a, kan ṭhatna tûra zâwm tûrin min ṭanpui ang.
7. Pathian thuhriattîrte chu tûn hma zawng aiin engvângin nge mamawh a nih?
7 Mihring chanchina suahsualna hluar lai bera kan awm avângin, Jehova thuhriattîrte chu tûn hma zawng aiin kan mamawh zual a ni. Pathian thuhriattîrte kan ngaihsak chuan khawvêl suahsualna kawngte pumpelh tûra kan mamawh hriatthiamna kan nei ang. Fakna hla phuahtu chu: “Min zirtîrtu zawng zawng aiin finna ka nei zâwk a ni; i thuhriattîrte hi ka ngaihtuah a nih ṭhin avângin. Tarte ai chuan ka hre thiam zâwk a ni, i thununna thute hi ka vawn ṭhat avângin. I thu ka zawm theihna tûrin kawng sualah rêng rêng chuan ka kete hi pêk ka phal lo,” tiin a zai a ni. (Sâm 119:99-101) Pathian thuhriattîrte zawmna hmangin ‘kawng sual rêng rêng’ kan pumpelh ang a, ‘Pathian nunna laka ṭhena lo awm, hriatnaa thim,’ khawvêl mi tam tak ang kan lo ni lo vang.—Ephesi 4:17-19.
8. Engtin nge rinna fiahna hneh thei tûra thuamṭhat kan nih theih?
8 Pathian thuhriattîrte chuan ‘tâwpna huna’ harsatna tam tak tuar thei tûrin min tichak a, chuvângin chûng chu kan mamawh bawk a ni. (Daniela 12:4) Chutiang thuhriattîrnate a awm loh chuan ‘ngaithla a, theihnghilh leh mai ṭhîntute’ kan lo ni ang. (Jakoba 1:25) Mahse, “bawi rinawm, fing tak” chhuah, thu leh hlate ṭanpuina zâra Pathian Lehkha Thu taima taka a mi mal ang leh kohhran anga zirna chuan rinna fiahna chu hneh tûrin min ṭanpui ang. (Matthaia 24:45-47) Chutiang thlarau lam châwmnate chuan fiahna hnuaiah Jehova tihlâwm nâna kan tih tûrte min hriattîr ang.
Kan Inkhâwmnate Pawimawhna
9. Tute nge ‘mihringte hnêna thilpêkte’ chu ni a, an rinpuite chu engtin nge an ṭanpui?
9 Kristian inkhâwmnaa thusawi tûra ruat unaupate min zirtîrna kan dawnte chu kan mamawh Pathian thuhriattîrte kan hmuh theihna kawng khat a ni. Tirhkoh Paula chuan, Isua chu “chung lama a han chhoh lai khân mante chu salah a hruai a, mihringte hnênah pawh thilpêkte a pe a,” tiin a ziak a. Tichuan: “[Krista chuan] ṭhenkhatte chu tirhkoh atân te, ṭhenkhatte chu zâwlnei atân te, ṭhenkhatte chu chanchin ṭha hriltu atân te, ṭhenkhatte chu kohhran châwmtu leh zirtîrtu atân te a pe a,” tiin a belh a ni. (Ephesi 4:8, 11, 12) Chûng ‘mihringte hnêna thilpêkte’—upaa ruatte—chuan kan inkhâwm hunah Jehova thuhriattîrte min ngaihtuahtîr avângin a va lâwmawm tak êm!
10. Hebrai 10:24, 25-a thu pawimawh ber chu eng nge ni?
10 Pathian châwmna avânga kan lâwmna chuan chawlhkâr khata kan inkhâwmna chi ngaah tel tûrin min chêttîr ang. Inkhâwm ziah a ṭûlna chu Paula chuan a sawi pawimawh hle a ni. Ani chuan: “Hmangaih leh thil ṭha tiha inchawk tho tûrin inngaihtuah tawn ang u: ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawh nasa lehzual sauh rawh u,” tiin a ziak a ni.—Hebrai 10:24, 25.
11. Chawlhkâr tina kan inkhâwmna chi tinte chuan engtin nge min tihsâwt?
11 Kan inkhâwmnate’n thil min tihsak chu i hre thiam em? Chawlhkâr tina Vênnainsâng Zirna chuan kan rinna a tinghet a, Jehova thuhriattîrte zâwm tûrin min ṭanpui a, “khawvêl thlarau” lakah min humhim a ni. (1 Korinth 2:12; Tirhkohte 15:31) Vântlâng Inkhâwmah chuan thusawitu chuan, Jehova thuhriattîrte leh Isua thusawi mak tak, “chatuana nunna thu” tiamin Pathian Thu aṭanga inzirtîrna thu a sawi a ni. (Johana 6:68; 7:46; Matthaia 5:1–7:29) Kan zirtîr thiamna chu Theocratic Rawngbâwlna School hmangin tah hriam a ni bawk. Tin, Rawngbâwlna Inkhâwm chuan in tinah te, tlawhkîrah te, in lama Bible zirpuinaah te, leh kan rawngbâwlna pêng dang dangah te thusawi dân thiam tûrin min ṭanpui a ni. Tichuan, mi tlêm zâwka zir ṭhin, Kohhran Lehkhabu Zirna Inkhâwm chuan Pathian thuhriattîrte tel fona chhânnate pe tûrin hun ṭha tak min pe a ni.
12, 13. Asia khawmual ram pakhata Pathian mite chuan Kristian inkhâwmna an hlut zia engtin nge an târ lan?
12 Kohhran inkhâwmnaa tel rengna chuan Pathian thupêkte min hriattîr a, indona te, ei leh bâr harsatna te, leh rinna fiahna te kan hmachhawn huna thlarau lama chak tûrin min ṭanpui a ni. Asia khawmual ram pakhata awm Kristian 70-te chuan indona avângin an in leh lo an thlânchhiatsan a, ram pilril takah an khawsa a ni. Anni chuan inkhâwmna an ngai pawimawh tak zet a. Chuvângin, an inkhâwm chhunzawm theih nân, indona awmna an khuaah kîr lehin, an Kingdom Hall chu an ṭhiat a, ram hnuaiah an sa a ni.
13 Chu mi ram vêk hmun dangah chuan, kum tam tak indona hnuaia an awm hnuah pawh, Jehova mite chuan phûr takin rawng an la bâwl reng a ni. Chu mi biala upa pakhat hnênah: “Unaute hmun khata awmtîr nân eng nge ṭangkai ber?” tia zawh a ni a. Engtin nge a chhân? “Kum 19 chhûngin inkhâwm vawikhatmah kan ṭhulh ngai lo va. A châng chuan bomb thlâk avâng emaw, harsatna dang avâng emawin unau ṭhenkhat chu inkhâwmna hmun an lo thleng thei lo va, mahse inkhâwmna chu kan nei tho tho a ni,” tiin a chhâng. Hêng unaute hian ‘inkhâwmnate bânsan loh’ a pawimawhzia an hre chiang hle a ni.
14. Anni tar tawh tak hnên aṭangin eng nge kan zir theih?
14 Kum 84-a upa Anni chuan ‘Pathian biak in a kalsan ngai lo va.’ Chuvângin, a pian hnu rei lo têa nausên Isua chu biak ina an rawn hruai khân a lo hmu ve a ni. (Luka 2:36-38) Inkhâwm pelh loh chu i tum em? Assembly leh Inkhâwmpui session tinahte chuan tel tumin theihtâwp i chhuah em? Chutiang kalkhâwmnaa thlarau lam inzirtîrna ṭangkai tak tak kan dawnte chuan kan Pa, vâna miin min ngaihsakzia a tilang chiang hle a ni. (Isaia 40:11) Chûng hunte chuan hlimna a thlen bâkah, kan va telna chuan Jehova thuhriattîrte kan hlutzia a tilang a ni.—Nehemia 8:5-8, 12.
Jehova Thuhriattîrte’n Min Lahrang
15, 16. Jehova thuhriattîrte zawmna chuan engtin nge kan nungchang a nghawng?
15 Pathian thuhriattîrte zawmna chuan he khawvêl suaksual lak ata inlahrang tûrin min ṭanpui a ni. Entîr nân, Pathian thuhriattîrte ngaihsakna chuan mipat hmeichhiatna lama nungchang bawlhhlawhna ata min vêng a ni. (Deuteronomy 5:18; Thufingte 6:29-35; Hebrai 13:4) Dâwt sawi tûr te, rinawm lo tûr te, a nih loh leh rûk ru tûr tea thlêmnate chu Pathian thuhriattîrte zawmna hmangin a hneh theih a ni. (Exodus 20:15, 16; Leviticus 19:11; Thufingte 30:7-9; Ephesi 4:25, 28; Hebrai 13:18) Jehova thuhriattîrte zawmna chuan phuba lâkna te, thinurna pai reng te, a nih loh leh mi rêl te chu min pumpelhtîr bawk.—Leviticus 19:16, 18; Sâm 15:1, 3.
16 Pathian thuhriattîrte ngaihsakna hmangin, a rawngbâwl tûrin kan intithianghlim, a nih loh leh kan inlahrang thei a ni. He khawvêl ata inlâk hran chu a va pawimawh tak êm! A hringnun tâwp dâwn zâna Jehova hnêna a ṭawngṭainaah, a zirtîrte tân Isua chu heti hian a ṭawngṭai a ni: “I thu an hnênah ka pe ta e; tin, khawvêlin anni chu an hua a, khawvêla mi an nih loh avângin, kei khawvêla mi ka ni lo ang bawk hian. Nangin anni chu khawvêl ata i lâk chhuah tûra ngên ka ni lo va, mi sual lakah chuan i hum tûr ka ti zâwk a ni. Anni chu khawvêla mi an ni lo, kei khawvêla mi ka ni lo ang bawk hian. Anni chu thutakin tithianghlim rawh, i thu chu thutak a ni,” tiin. (Johana 17:14-17) A rawngbâwl tûra mi tihrangtu Pathian Thu chu i hlut zêl ang u.
17. Pathian thuhriattîrte kan ngaihthah chuan eng thil nge lo thleng thei a, chuvângin eng nge kan tih ang?
17 Jehova chhiahhlawh kan nih avângin, a rawngbâwl tlâk nih reng kan duh a ni. Mahse, Pathian thuhriattîrte kan ngaihthah vaih chuan he khawvêl thlarau hian min hneh mai ang. Khawvêl thlarau chu ṭawngkamah te, thu leh hlaah te, intihhlimnaah te, leh nungchangah te a hluar hle a ni. Tin, tangka ngainatu te, intivei te, chapo te, lâwm nachâng hre lo te, rinawm lo te, mi kawlhsen te, thuhnudâwn lo te, inngaihlu te, Pathian hmangaih aia mahni lâwmna hmangaih zâwktu te nih chu kan duh lo ngei ang. Chûng chu Pathian lak ata inmihrangte ze ṭhenkhat chauh a ni. (2 Timothea 3:1-5) He kal hmang suaksual ni hnuhnûngah hian kan lût thûk tawh hle a, chuvângin ‘a thu ang zêla kan awm dân kan vên ṭhat’ theihna tûra Jehova thuhriattîrte kan zawm zêl theih nân Pathian ṭanpuina i dîl reng ang u.—Sâm 119:9.
18. Pathian thuhriattîrte zawmna chuan eng thil ṭhate nge min tihtîr?
18 Jehova thuhriattîrte chuan kan tih loh tûrte chauh min hriattîr lo. A thuhriattîrte zawmna chuan thil ṭha ti tûrin, Jehova chu rinchhan tlat a, kan thinlung zawng zawng, kan thlarau zawng zawng, kan rilru zawng zawng, leh kan chakna zawng zawnga hmangaih tûrin min chêttîr a ni. (Deuteronomy 6:5; Sâm 4:5; Thufingte 3:5, 6; Matthaia 22:37; Marka 12:30) Pathian thuhriattîrte chuan kan vêngte hmangaih tûrin min chêttîr bawk. (Leviticus 19:18; Matthaia 22:39) A bîk takin, Pathian duhzâwng kan tih a, nunna pe thei “Pathian hriatna” mi dangte kan hrilhna hmangin, Pathian hmangaihna leh vêngte hmangaihna kan lantîr a ni.—Thufingte 2:1-5.
Jehova Thuhriattîrte Zawm Chu Nunna!
19. Jehova thuhriattîrte ngaihsak chu a sâwtin, a chhawr tlâk a ni tih mi dangte hnênah engtin nge kan lantîr theih?
19 Jehova thuhriattîrte kan zawm a, mi dangte pawh zâwm ve tûra kan ṭanpui chuan, keimahni leh mi ngaithlatute chu kan chhandam ang. (1 Timothea 4:16) Jehova thuhriattîrte ngaihsak chu a sâwtin, a chhawr tlâk hle a ni tih mi dangte chu engtin nge kan hriattîr ang? Bible thu bulte kan nuna hmangin kan hriattîr thei a ni. Tichuan, “chatuana nun duhna rilru dik tak nei apiang” chuan Pathian Thu zawm hi nunkawng ṭha ber a nih ngeizia finfiahna an nei ang. (Tirhkohte 13:48, NW) ‘Pathian kan zîngah a awm tak zet’ tih an hmu bawk ang a; tin, Lal Chungnungbera Jehova chibai kan bûknaah lo telve tûra chêttîrin an awm ang.—1 Korinth 14:24, 25.
20, 21. Pathian thuhriattîrte leh a thlarau chuan eng nge min tihtîr thei?
20 Pathian Lehkha Thu zirna chhunzawm a, kan zirte a taka hmang bawk a, Jehova thlarau lam châwmnate aṭanga hlâwkna kan têl chuan, Pathian thuhriattîrte chu kan ngaina êm êm thei ang. Kan zawm chuan, hêng thuhriattîrte chuan ‘thutak felna leh thianghlimnaa Pathian anga siam, mihring thara’ inthuam tûrin min ṭanpui bawk ang. (Ephesi 4:20-24) Jehova thuhriattîrte leh a thlarau thianghlim chuan, Setana thu thua awm he khawvêl miziate nêna inkalh tlat, hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te min neihtîr thei ang. (Galatia 5:22, 23; 1 Johana 5:19) Chuvângin, mi mal Bible zirna te, upa te, leh kan inkhâwmnate, assembly-te, leh inkhâwmpuite aṭanga Jehova thil min phûtte hriattîr kan nih hian kan lâwm a ni.
21 Jehova thuhriattîrte kan zawm avângin, felna avânga kan tawrh châng pawhin kan hlim thei a ni. (Luka 6:22, 23) Dinhmun hlauhawm tak ata min chhanchhuak tûrin Pathian lam kan hawi a ni. Hnam tin chu Har–Magedon-a ‘Pathian Engkimtitheia ni ropuia indonaah’ an kalkhâwm tawh avângin chutianga Pathian lam hawi chu a pawimawh lehzual a ni.—Thu Puan 16:14-16.
22. Jehova thuhriattîrte chungchângah eng thutlûkna nge kan siam ang?
22 Phu loh thilthlâwnpêk, chatuana nunna chang tûr chuan, Jehova thuhriattîrte kan ngaina êm êmin, thinlung zawng zawngin kan zâwm tûr a ni. Tin, “I thuhriattîrte chu kumkhua atân a fel a ni: hriat thiamna mi pe ang che, tichuan ka nung reng ang,” titu fakna hla phuahtu rilru ang chu i nei ang u. (Sâm 119:144) Chuvângin, fakna hla phuahtu thu: “Ka ko ṭhîn chia; mi chhandam ang che. Tichuan i thuhirattîrte chu ka zâwm dâwn nia,” tiha lang thutlûkna ang chu i lantîr ang u. (Sâm 119:146) A ni, ṭawngkam leh thiltihin, Jehova thuhriattîrte kan ngaina hle tih i târ lang ang u.
Engtin Nge I Chhân Ang?
• Jehova thuhriattîrte chu fakna hla phuahtu chuan engtin nge a thlîr?
• Pathian thuhriattîrte chu engvângin nge kan mamawh?
• Pathian thuhriattîrte chungthu-ah kan inkhâwmnate chuan eng chanvo nge a neih?
• Jehova thuhriattîrte chuan engtin nge he khawvêl ata min lâkhran?
[Phêk 13-naa milem]
Fakna hla phuahtu chuan Jehova thuhriattîrte a ngaina hle
[Phêk 14, 15-naa milemte]
Anni entawnin, inkhâwm pelh loh i tum em?
[Phêk 16-naa milem]
Jehova thuhriattîrte ngaihsakna chuan pawm tlâka a rawngbâwl tûra thianghlim tûrin min lahrang