“I Thuhriattîrte Chu Ka Lâwmna A Ni”

“Hmân laia ziak apiangte chu keimahni min zirtîrna tûrin ziak a ni si a.”​—ROM 15:4.

1. Engtin nge Jehova’n a thuhriattîrte chu min pêk a, engvângin nge chûng chu kan mamawh?

JEHOVA chuan hêng hun khirh takte nêksâwrna hmachhawn tûra a mite ṭanpui tûrin thuhriattîrte chu a pe a. Hêng hriattîrna ṭhenkhat hi mahnia Bible chhiarna aṭanga dawn a ni a, a dangte erawh chu Kristian inkhâwmnaa thusawite emaw, chhânnate emaw aṭanga dawn theih a ni. Chûng kan thil chhiar leh ngaihthlâk tam takte chu kan tân thil thar a ni lo va. Chutiang thute chu a hma pawhin kan lo hre tawh ṭhîn mai thei a ni. Mahse, thil kan theihnghilh ṭhin avângin, kan thil hriatte chu Jehova thiltumte, a dânte, leh a kaihhruainate hmanga tihthar reng a ngai a ni. Pathian thuhriattîrte chungah chuan kan lâwm tûr a ni a. Chûngte chuan Pathian duhzâwng nun kawng kan ûm chhante ngaihtuah tûra min ṭanpuina hmangin min tichak a ni. Chuvâng chuan, Jehova hnênah fakna hla phuahtu chu: “I thuhriattîrte chu ka lâwmna a ni,” tiin a zai a ni.​—Sâm 119:24.

2, 3. (a) Engvângin nge Jehova chuan Bible hun laia mite nun kawng chanchin chu tûn thlenga a kawl ṭhat? (b) He thuziakah hian Bible-a eng chanchinte nge ngaihtuah ni dâwn?

² Kum zabi tam tak liam tawha ziak mah ni se, Pathian Lehkha Thu chuan thil a ti thei êm êm a. (Hebrai 4:12) Bible hun laia mite nun kawng chanchin dik tak chu min hrilh a ni. Chu hun aṭang chuan chîn dân leh ngaih dânte chu inthlâk nasa hle tawh mah se, buaina kan tawhte chu an hun laia mi nên a inang fo va. Kan hlâwkpui atâna chhinchhiah Bible-a thuziak tam tak zîngah chuan, harsatna tâwk reng chunga Jehova hmangaih a, a rawngbâwltute chanchin rilru khawih tak takte a tel a. Chanchin dangte erawh chuan Pathian huatzâwng nungchangte chu a târ lang thung. Jehova chuan a ṭha emaw, a ṭha lo emaw pawh ni se, hêng mi mal chanchin zawng zawngte hi min hriattîrtu atân Bible-ah a teltîr a. Chu chu: “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna turin ziak a ni si a,” tia tirhkoh Paula ziah ang chiah chu a ni.​—Rom 15:4.

³ Bible aṭanga hêng chanchin pathum: Davida’n Saula a dâwr dân te, Anania leh Saphiri chanchin te, leh Potiphara nupui laka Josefa nungchang te hi ilo ngaihtuah ang u. Hêngte hian zir tûr hlu tak min pe a ni.

Pathian Ruahmanna Chunga Rinawmna

4, 5. (a) Lal Saula leh Davida inkârah eng thil nge thleng? (b) Davida’n Saula huatna chu engtin nge a chhân lêt?

⁴ Lal Saula chu Jehova chunga a rinawm loh avângin A mite chunga rorêl tlâk a ni tawh lo va. Chuvângin Pathianin a hnâwl a, zâwlnei Samuela chu nakina Israel lal atâna Davida hriak thih tûrin a hrilh a ni. Davida chu sipai huai tak a nih avânga mipuiin an fak chuan, Saula chuan hmêlma anga thlîr ṭanin, thah a tum fo va. Mahse, Jehova’n a awmpui tlat avângin Davida chu a him ziah a ni.​—1 Samuela 18:​6-12, 25; 19:​10, 11.

⁵ Davida chu kum tam tak chhûng râl tlân anga a awm a ngai a. Saula thah theihna hun remchâng a lo inher chhuah khân, a ṭhianpa chuan a hnênah Jehova’n a hmêlma chu a kutah a pêk thu hrilhin, that tûrin a fuih a ni. Mahse, Davida chuan a that duh lo. A chhan chu Jehova chunga a rinawmna leh Pathian mite chunga lal tûra hriak thih a nihna a zahsak vâng a ni. Jehova chuan Saula chu Israel lalah a ruat a ni lâwm ni? Ṭûl a tih hunah chuan a bân leh mai dâwn a ni. Chuvângin, Davida chuan a lo inrawlh chhan tûr awmin a hre lo. Saula’n amah a huatna tinêp tûra a theih ang apiang a tih hnuah, Davida chuan: “LALPA chuan a chungah kut a thlâk ang chu: a nih loh vêk leh a thih ni a lo la thleng mai ang a, a nih loh vêk leh indonaah a kal ang a, a boral mai ang. LALPA hriak thiha chungah chuan kut ka thlâk loh tûrzia mai chu,” a ti a ni.​—1 Samuela 24:​3-15; 26:​7-20.

6. Engvângin nge Davida leh Saula chanchin ngaihtuah chu kan tân a pawimawh?

⁶ He chanchinah hian zir tûr pawimawh tak a awm a. Kristian kohhranah buaina a chhuah chhan i ngaihtuah ngai em? Tuemawni chuan âwm lo takin thil a ti pawh a ni thei a. A thiltih chu thil sual khûnkhân tak ni lo mah se, chu chuan a tibuai che pawh a ni thei. Engtin nge i tih ang? Kristian unaute i ngaihsakna avâng leh Jehova chunga i rinawmna avângin, buaina tiveng tûra ngilnei taka amah biak chu i thlang thei a ni. Mahse, buaina chu veng thei lo ta se, engtin nge ni ang? I tihtheih âwm apiang i tih hnu chuan, buaina chu Jehova kutah i dah thei a. Chutiang chiah chuan Davida’n a lo ti a ni.

7. Rorêl dik lohna emaw, huatna emaw kan tâwk a nih chuan, Davida entawnin engtin nge kan chhân lêt ang?

⁷ A nih loh leh khawtlâng rorêl dik lohna emaw, sakhaw inhuatna emaw avângin buaina i tâwk pawh a ni thei a. Tûnah rih chuan tihtheih i nei mang lo emaw, i nei lo hulhual emaw pawh a ni thei. Chûng dinhmunte tawrh chhuah chu a harsa hle mai thei a; mahse, Davida’n rorêl dik lohna a hmachhawn dân chuan thil min zirtîr a ni. Davida ziah fakna hla rilru khawih takte zîngah hian, Saula kut tuar lo tûra Pathian hnêna tih tak zeta ṭawngṭaina chauh ni lovin, Jehova laka a rinawmna leh Pathian hming chawimawina a ngaihsakzia pawh a tel a ni. (Sâm 18:​1-6, 25-27, 30-32, 48-50; 57:​1-11) Saula chuan Davida chungah kum emaw zât chhûng dik lo taka thil a ti chung pawhin, Davida chu Jehova chungah a rinawm reng a ni. Keini pawhin dik lo taka thiltih engpawh tuarin, mi dangte’n engpawh ti mah se, Jehova leh a inawpna pâwl chungah kan rinawm reng tûr a ni a. Jehova chuan dinhmun chu a hre chiang hle tih kan ring tlat thei a ni.​—Sâm 86:2.

8. Engtin nge Mozambique rama Jehova Thuhretute chuan Jehova laka an rinawmna fiahna chu an chhân lêt?

⁸ Mozambique rama Kristiante chu fiahna tawh laia Jehova lakah rinawm tlat tûn laia entawn tûr kan neih zînga mi an ni a. Kum 1984-ah chuan râlthuam keng pâwl pakhat chuan, an awmna khaw tête chu a rawk a, inte hâlin, mite a that a. Chûng Kristian dikte chuan mahni invên nân tihtheih an nei tlêm hle. Chuta awm mite chu râlthuam kenga do tûra thlêm emaw, kawng danga thlâwp tûra tihluih emaw an ni a. Jehova Thuhretute chuan chutiang thila tel chu Kristian tualdâwih an nihna nên inmilin an hre lo va. An hnialna chuan chu pâwl chu a tithinrim hle a ni. Chu dinhmun râpthlâk takah chuan Thuhretu 30 lai chu tihhlum an ni a; mahse, thihna meuh pawhin Pathian mite rinawmna chu a tichhe thei lo.a Davida angin rorêl dik lohna chu tuar mah se, a tâwpah chuan hnehna an chang a ni.

Vaukhânna Atâna Hriattîrna

9, 10. (a) Engtin nge Bible-a entîrna ṭhenkhat chu kan hlâwkpui theih? (b) Anania leh Saphiri thiltih chu eng nge a dik lohna?

⁹ Bible-a târ lan mi ṭhenkhat chuan pumpelh tûr nungchangte min hriattîr a. Bible-ah chuan Pathian chhiahhlawhte zînga mi ngei pawh tiamin, mi tam takte thil sual tih leh a rahchhuah an sengte chungchâng chu a tel a ni. (1 Korinth 10:11) Chûng zînga pakhat chu kum zabi khatnaa Jerusalem Kristian kohhrana awm Anania leh Saphiri te nupa chanchin hi a ni.

¹⁰ C.E. 33, Pentikost hnuah chuan, tirhkohte nêna inkawmna hlâwkpui tûra Jerusalema châm bâng ring tharte tisa lam mamawh pêk chu a lo ṭûl a. Kohhrana mi ṭhenkhat chuan tlachham an awm loh nân an in leh lote chu an hralh a ni. (Tirhkohte 2:​41-45) Anania leh Saphiri chuan an lo ram chu an hralh a, an hralhna zawng zawng pe anga insawiin, a ṭhen an dah hran hnuah tirhkohte hnênah an rawn keng a. Anania leh Saphiri chuan an duh zât zât an pe thei reng a; mahse, an rilru put hmang chu a ṭha lo va, an thiltih chu a verther a ni. Hming ṭha neih an duhin, an tih ai bâka tam ti anga lan chu an tum a. Thlarau thianghlim hriattîrnain tirhkoh Petera chuan an rinawm lohna leh an vervêkna chu a phawrh chhuak a; tichuan Jehova’n a tihlum ta a ni.​—Tirhkohte 5:​1-10.

11, 12. (a) Rinawmna chungchâng thuhriattîrna ṭhenkhat chu eng nge ni? (b) Rinawmnain eng hlâwknate nge a pêk?

¹¹ Mi dangte’n min ngaih sân nâna thu dik herh kawi duh châng kan nei a nih chuan, Anania leh Saphiri chanchin hi vaukhânna thiltithei tak ni rawh se. Kan mihringpuite chu kan bum hlawhtling mai thei a; mahse, Jehova chu kan bum theih rual a ni lo. (Hebrai 4:​13) Felna khawvêlah chuan dawthei an awm dâwn loh avângin, Bible chuan thu dik tak inhrilh tawn tûrin min fuih nawn fo a ni. (Thufingte 14:2; Thu Puan 21:8; 22:15) Felna lei thara an awm dâwn loh chhan chu a chiang hle tûr a ni; thu dik lo zawng zawng thehdarhtu chu Diabol-Setana a ni si a.​—Johana 8:44.

¹² Rinawmna nun kawng zawhna chuan hlâwkna tam tak min pe a. Chûng zîngah chuan chhia leh ṭha hriatna thiang leh mi dangte rin hlawh avânga lungawinate a tel a ni. Hmun tam takah chuan, Kristiante chuan an rinawm avângin hna an hmu emaw, an hnathawh lai chu an chelh reng thei emaw bawk a. Mahse, hlâwkna pawimawh ber chu rinawmnain Pathian Engkimtitheia ṭhian min nihtîr hi a ni.​—Sâm 15:​1, 2.

Nungchang Thianghlimna Vawngin

13. Eng dinhmunah nge Josefa chu a awm a, engtin nge a chhân lêt?

¹³ Thlahtu Jakoba fapa Josefa chu kum 17 mi a nihin sala hralh a ni a. A tâwpah chuan Aigupta ram hotu pakhat Potiphara inah a awm a, chutah chuan a pu nupui mit chu a la hle a ni. Ani chuan tlangvâl hmêl ṭha tak Josefa chu a ît hle a, achhûn azânin: “Min mutpui rawh,” tiin a ngên ṭhîn a. Josefa chu a chhûngte hnên aṭanga hla tak, hmêlhriat tumah awm lohna ramah a awm a. Mi dang hriat miah lohvin, awlsam takin a pu nupui chu a mutpui thei reng a ni. Mahse, a tâwpa Potiphara nupuiin a silhfêna a man chuan, Josefa chuan a tlânchhiatsan a ni.​—Genesis 37:​2, 18-28; 39:​1-12.

14, 15. (a) Engvângin nge Josefa chanchin chu kan ngaihven? (b) Engvângin nge Kristian hmeichhia pakhat chu Pathian thuhriattîrte a ngaihsak avânga a lâwm?

¹⁴ Josefa chu Pathian ṭih chhûngkuaa sei lian a ni a, nupui pasal ni lo inkâra mipat hmeichhiatna hman chu a dik lo tih a hria a. “Engtin nge he sual lian tak hi tiin Pathian chunga thil ka tihsual theih ang?” tiin a zâwt a ni. A thu tâwp siam chu Eden huana mihringte tâna târ lan nupui pasal pakhat chauh nei tûra Pathian tehna siam a hriatnain a kaihruai a ni ngei ang. (Genesis 2:24) Tûn laia Pathian mite chuan Josefa’n chu dinhmun a chhân lêt dân ngaihtuahna chu an hlâwkpui thei a. Hmun ṭhenkhatah chuan, inphalraina a nasat êm avângin nungchang bawlhhlawhnaa inhnamhnawih duh lo ṭhalaite chuan ṭhiante nuihzat an hlawh a ni. Puitlingte zîngah chuan uirêna hi thil pângngai tak a ni a. Chuvângin, Josefa chanchin chu kan tân a hun taka hriattîrna a ni. Inngaihna leh uirêna chu Pathian tehnaah chuan sual a la ni reng a. (Hebrai 13:4) Dân lo anga mipat hmeichhiatna hmang tûra nêksâwrna hnuaia tlâwm tam tak chuan, hman miah loh chhan tûr a awm tih an pawm a ni. A rah chhuah duhawm lo takte zîngah chuan mualphona te, inthiam lohna te, thîkna te, naupaina te, leh mipat hmeichhiatna hman avânga inkai theih natna te a tel a ni. Bible-in min hriattîr ang chiahin, inngaih hmang mi chuan “ama taksa chungah thil a tisual a ni.”​—1 Korinth 5:​9-12; 6:​18; Thufingte 6:​23-29, 32.

¹⁵ Jehova Thuhretu nula Jenny-ib chuan Pathian thuhriattîrte chunga lâwm chhan tûr a nei a ni. A hnathawhnaah, a thawhpui tlangvâl hmêl ṭha tak chuan a ngaizâwng a. Jenny-i’n a chhân lêt loh chuan, a ngaihsak zual sauh va. Jenny-i chuan: “Mipain min ngaihsak chu thil nuam tak a nih avângin, nungchang thianghlimna vawn chu ka tum hrâm hrâm a,” tiin a sawi a ni. Mahse, chu pa chuan a hmeichhe mutpui zât belhchhah nân mai a hmang duh tih a hria a. Tlâwm lek leka a inhriatin, Jehova hnênah chuan A chunga rinawm reng tûra ṭanpui tûrin a ṭawngṭai a ni. Jenny-i chuan Bible leh Kristian thu leh hla chhuahte a zir bingna aṭanga a thu zirte chu fîmkhur tûra tithathotu hriattîrna ang mai a nih thu a sawi a ni. Hêng hriattîrnate zînga pakhat chu Josefa leh Potiphara nupui chanchin a ni a. “Jehova ka hmangaihzia ka inhriattîr reng chhûng chuan, he sual lian tak hi tiin a chungah thil ka ti sual ang tih ka hlauh a ngai lo,” tiin a thusawi chu a titâwp a ni.

Pathian Thuhriattîrte Ngaihsak Rawh!

16. Engtin nge Bible-a târ lan mite nun kawng chanchin ennawnna leh chhût ngunna chu kan hlâwkpui theih?

¹⁶ Pathianin kan tân Bible-a thuziak ṭhenkhat a chhinchhiah chhan hriatthiam tumna hmangin, Jehova tehnate kan hlutna chu kan tipung thei ṭheuh va. Chûng chuan eng nge min zirtîr? Bible hun laia mite lantîr eng miziate leh rilru put hmangte nge kan entawn ang a, engte nge kan pumpelh ngai? Mi za têlte chanchin chu Pathian Thu-ah a chuang a. Pathian kaihhruaina ngainatu zawng zawngte chuan nun chhanhim thei finna neih châkna chu an nei tûr a ni a. Chûng nun chhanhim thei finna zîngah chuan Jehova’n fîmkhur taka a dah ṭhat entîrna aṭanga kan thu zir theihte pawh a tel a ni. He magazine hian zirtîr nei chutiang mite chanchin chu a chhuah fo va. Chûngte chu hun insiamin ennawn ang che.

17. Jehova thuhriattîrte chu engtin nge i ngaih a, engvângin nge?

¹⁷ Jehova’n a duhzâwng tih tum tlatte a ngaihsak avângin kan va lâwm tak êm! Bible-a târ lan mipa leh hmeichhiate ang bawkin, keini pawh mi ṭha famkim lo kan ni a. Amaherawhchu, an thiltih chanchin chhinchhiahte chu kan ṭangkaipui hle. Jehova thuhriattîrte ngaihsakna hmangin, thil sual khûnkhân tak tih kan pumpelh thei a, felna kawng zawhtute entîrna ṭha chu kan entawn thei a ni. Chutianga kan tih chuan fakna hla phuahtu rualin: “[Jehova] thuhriattîrte zâwmtute chu an eng a thâwl e, thinlung zawng zawnga zawngtute chu. Ka nunna hian i thuhriattîrte chu a zâwm ṭhîn a; ka ngaina êm êm a ni,” tiin kan zai ve thei dâwn a ni.​—Sâm 119:​2, 167. (w06 6/15)

[Footnote-te]

Engtin Nge I Chhân Ang?

• Saula chunga Davida rilru put hmang aṭangin eng nge kan zir theih?

• Anania leh Saphiri chanchin chuan eng nge min zirtîr?

• Engvângin nge Josefa nun kawng chanchin chu tûn laiah ngaihsak bîk a nih?

[Phêk 18-naa milem]

Engvângin nge Davida’n Saula chu a thah duh loh?

[Phêk 19-naa milem]

Anania leh Saphiri chanchin aṭangin eng nge kan zir?

[Phêk 20-naa milem]

Engin nge Josefa chu nungchang bawlhhlawhna hnâwltîr?