Ṭhalaite U—Thlarau Lamah Hma In Sâwn Em?

HIDEOA chuan, junior-high-school a kal lai chanchin chu heti hian a sawi a: “Kristian inkhâwmnaah tel ṭhîn mah ila Jehova rawngbâwl châkna tak tak ka nei ngai lo. Ka pâwlpuite zînga lâr tak nih leh inchhuang taka kawtthlêra ka bialnu lênpui vêl chu ka suangtuah fo ṭhîn. Thiltum mumal ka nei lo va, thlarau lama hma sâwn châkna rêng ka nei lo,” tiin. Hideoa ang bawk hian, ṭhalai tam tak chu tum nei lêm lo leh hmasâwn châkna rêng nei lovin an awm mai mai niin a lang.

Ṭhalai i nih chuan, infiamna emaw, i tuizâwng thiltih emawa tel chu i phûr hle ang. Mahse, thlarau lam thiltiha tel chu i phûr lêm lo mai thei. Thlarau lam thiltum neih chu a phûrawm thei ang em? Fakna hla phuahtu ṭawngkam chhuak: “LALPA thuhriattîr chu a rinawm a, mi mâwl a tifing ṭhîn a, . . . LALPA thupêk chu a thianghlim a, mitte a tivâr ṭhîn,” tihte hi han ngaihtuah teh. (Sâm 19:​7, 8) Pathian Thu chuan “mi mâwl” chu ‘a mitte tivârin,’ fing takin a chêttîr thei a. Ni e, thlarau lam thilte chu i hlimpui thei a ni. Mahse, chutianga hlimpui tûr chuan eng nge i tih ngai? Khawi aṭangin nge i ṭan ang?

Pathian Rawngbâwl Tûra Chêttîrin Awm Rawh

A hmasa berin, chêttîrin i awm tûr a ni. Juda Lal naupang tak Josia chungchâng hi ngaihtuah teh. Jehova Dân bu chu biak ina hmuh chhuah a nih chuan, Josia chuan mi a chhiar chhuahtîr a, chuta a thil hriatte chuan a rilru a khawih êm êm a. Chuvângin, “Josia chuan, Israel ramin a huam zawng zawng ata thil tenawm zawng zawng chu a thehthang bo” a ni. (2 Chronicles 34:​14-21, 33) Pathian Thu chhiarna chuan Josia chu biakna thianghlim tihmasâwnnaah thawk lehzual tûrin a chêttîr a ni.

Nang pawhin Bible i chhiar ziah a, i chhiarte i ngaihtuah bawk chuan Jehova rawngbâwl châkna chu i nei ve thei a. Chu chu Hideoa chêttîrtu pawh a ni. Ani chu Jehova Thuhretu zînga hun bikima rawngbâwl, pioneer thawk upa lam tawh nên an inkâwm ngeih ṭan a. Chu pioneer chu Bible zirlai taima tak, Bible thu zirtîrte nunpui tum tlat mi a ni. Pioneer entawntûrsiamchuannasatakaatihthatho avângin, Hideoa chuan pioneer a thawk ve ta a, Pathian rawng leh mi dangte rawngbâwlsak châkna nasa tak chu a nei ve ta a ni. A thlarau lam hma sâwnna chuan nun awmze nei tak a neihtîr ta a ni.

Nî tina Bible chhiar chu ṭhalaite tân chêttîrtu a ni thei a. Takahiroa chuan: “Ka mut hnua chu mi nî atâna ka Bible chhiar tûr ka la chhiar lo tih ka hriat chhuah apiangin, ka tho va, ka chhiar leh ṭhîn. Chutianga ka tih avângin, Jehova kaihhruaina ka dawng a ni. Nî tina Bible ka chhiarna chuan thlarau lam hma sâwnna min neihtîr a ni. Jehova rawngbâwlnaa tel tam lehzual ka tum avângin, high school ka zawh hnu rei lo têah regular pioner ka thawk nghâl a. Chu rawngbâwlna chu nuam ka ti êm êm a ni,” a ti.

Bible chhiar bâkah, eng dangin nge Jehova fak châk lehzualtîr thei che? Tomohiroa chu a nuin Bible thutak a zirtîr a. Ani chuan: “Kum 19 mi ka niha nunin awmzia a neihzia ziakna lehkhabu, Life Does Have a Purpose tih ngun taka ka zir hnuah chauh Jehova hmangaihna leh Isua tlanna inthawinain ka rilru a khawih êm êm a. Chu Pathian hmangaihna chunga ka lâwmna chuan Jehova rawng bâwl nasa lehzual tûrin min chêttîr a ni,” tiin a sawi. (2 Korinth 5:​14, 15) Tomohiroa angin, ṭhalai tam takte chu taima taka mahnia Bible zirna hmanga thlarau lamah hma sâwn zêl tûra fuih an ni.

Chutiang ti chung pawha Jehova rawngbâwl duhna tak tak i la nei lo cheu a nih chuan engtin nge ni ang? Ṭanpuina i zawnna tûr tuemaw a awm em? Tirhkoh Paula chuan: “Tih tum [“thawk châk, NW] tûr leh bei [“thawk,” NW] tûra nangmahnia thawktu chu Pathian a ni si a,” tiin a ziak a. (Philippi 2:​13) Jehova hnênah a ṭanpuina dîla i ṭawngṭai chuan, phal takin a thlarau thianghlim a pe ang che a, chu chuan ‘thawk tûr’ mai ni lovin, “thawk châk tûr” pawhin a tichak ang che. A awmzia chu Pathian thlarau thianghlim chuan Jehova rawngbâwl i châkna chu a tipung ang a, thlarau lama ṭhang tûrin a ṭanpui dâwn che tihna a ni. Chuvângin, Jehova thiltihtheihna chu ring nghet tlat la, i thinlung thuam nghet sauh ang che!

Thiltum Insiam Rawh

Jehova rawng nasa lehzuala bâwl i tum hnuah chuan, thlarau lama hma i sâwnna tûrin mi mal thiltum i insiam a ngai a. Kristian hmeichhe naupang pakhat Manai chuan: “Tum insiam chu ka tân a sâwt tak zet a ni. Hnungtawlh ahnêkin, huaisen takin hma lam ka pan theih phah a. Ka thiltum rilrua vawng rengin, Jehova kaihhruaina dîlin tih tak zetin ka ṭawngṭai a, tibuaitu nei miah lovin hma ka sâwn thei a ni,” a ti.

I thiltum chu âwmtâwk tak leh hlen ngei theih a ni tûr a ni. Nî tina Bible bung khat chhiar ziah chu thiltum inâwm tak a ni thei. Zir bingna pawh i nei ṭan thei bawk a. A tih dân tûr chu Sâpṭawnga hmuh theih thil engemaw hmangin hrilhfiah ta ila, Watch Tower Publication Index-a “Jehovah” tih a thupui hnuaia thupui tê “Qualities by Name” (Miziate A Indawtin) tih ṭanchhanin Jehova miziate chu i zir thei a ni. Zir tûr chi hrang 40 vêl a awm a, chutianga zir bingna chuan Jehova a hnaihtîr chein, atâna inhmang tam lehzual tûrin a chêttîr ngei ngei ang che. Thiltum hlen ngei theih chi dang lehte chu Kristian inkhâwmnaa ngaithlatute chhân theih hun apianga chhânna pakhat tal pêk ṭhin te, inkhâwm apianga kohhrana mi pakhat tal kawm chian lehzual te, Jehova hnêna ṭawngṭai lo leh a chanchin mi dangte hrilh lova ni khat mah liamtîr loh te a ni.

Theocratic Rawngbâwlna School-a i la inziaklût lo a nih chuan, chu pawh chu thiltum ṭha tak a ni ang. Vântlâng rawngbâwlnaah i tel tawh em? I la tel loh chuan, baptisma la chang lo thuchhuahtu nih tumin ṭan lâk i duh mai thei bawk. Chutah, Jehova nêna in inlaichînna ngun taka ngaihtuah leh a hnêna inpumpêk chu i rahbi dawtleh tûr a ni. Ṭhalai tam tak chuan hun bikima rawngbâwltu nihna hmangin an inpumpêkna thutiam chu hlen an tum a ni.

Nuna thiltum insiam chu a ṭhat rual rualin, inelna rilru lo awmthei lakah fîmkhur ang che. Mi dang nêna i inkhaikhin loh chuan i thiltihah hlimna i hmu lehzual ang.​—Galatia 5:26; 6:4.

Thiltawn nei lo i intiin, thiltum inâwm tâwk insiam chu harsa i ti a ni thei. Chutiang i nih chuan, he Bible zilhna hi zui ang che: “I beng chhî la, mi fing thu ngaithla rawh,” tih hi. (Thufingte 22:17) I nu leh pa emaw, Kristian mi puitling dang emaw te ṭanpuina dîl rawh. He mi kawngah hian nu leh pa leh mi dangte chu nunnêm tak leh mi fuih thiam tak an nih a ngai a. Mi dangin thiltum an siamsakte hlen tûra tihluihna chuan ṭhalaite hlimna chu a tibo theiin, thiltum insiam chhan ber pawh a nuaireh hial thei a ni. Chu chu hmeichhe pakhatin a tawng a. Heti hian a sawi: “Ka nu leh pate chuan thiltum tam tak, Theocratic Rawngbâwlna School-a inziahluh te, thlawhhma rawngbâwlnaa tel te, baptisma chan te, leh pioneer thawh ang chite min siam sak a. A vaia tlin tumin theihtâwp ka chhuah a ni. Pakhat ka hlen chuan, ka nu leh pate chuan mi fak chuang lovin, thiltum dang min tuksak leh a. Chuvângin, thiltum hlen tûra tihluih niin ka inngaih reng phah a ni. Ka chauvin, hlawhtling nia inhriatna pawh ka nei lo a ni,” tiin. Hetah hian eng nge dik lo awm? Thiltum zawng zawngte chu a ṭha vek a; mahse, chûngte chu ama thua a siam a ni lo. He mi kawnga hlawhtling tûr chuan, i tâna thiltum insiam tûrin nangmah ngei chêttîrin i awm tûr a ni.

Isua Krista hi ngaihtuah teh. He leia a rawn kal lai khân, a Pa, Jehova’n ti tûra a beisei chu a hria a. Jehova duhzâwng tih chu Isua tân thiltum mai a ni lo, a hlen chhuah ngei tûr a hna a ni. Chu hna chu engtin nge Isua’n a ngaih? Heti hian a sawi: “Mi tîrtu duhzâwng tih leh, a hna thawh zawh tûr hi ka chaw a ni,” tiin. (Johana 4:34) Isua chuan Jehova duhzâwng tihah hlimna a hmu a, a Pa beisei ang ngei chu a tlin a ni. Isua tân chuan Pathianin a thawh zawh atâna a beiseite hlen chhuah chu chaw ang a ni a, hlimna leh lungawina a hmu a ni. (Hebrai 10:​5-10) Nang pawh, i nu leh pate’n ti tûra an fuih che ti tûra chêttîr tak zet i nih chuan hlimna i hmu ve thei ang.

Thil Ṭha Tih Ning Suh

Thiltum i insiam tawh chuan, tihhlawhtlin ngei tumin taima takin thawk ang che. Galatia 6:9 chuan: “Thil ṭha tih i ning suh ang u; kan inthlahdah loh zawngin a hun takah chuan kan seng dâwn si a,” a ti a ni. I chakna leh i theihna ringawtah innghat suh. Harsatna i tâwk ngei dâwn a, a châng phei chuan hlawhchham maia inngaih châng pawh i nei hial ngei ang. Mahse, Bible chuan: “I kawng zawng zawngh amah [Pathian] hre reng la, i kawngte chu a kawhhmuh zêl ang che,” tih min tiam a ni. (Thufingte 3:6) Jehova chuan i thlarau lam thiltum hlen tuma theihtâwp i chhuahnaah a ṭanpui zêl ang che.

Ni e, Jehova rawngbâwl châkna neihna hmangin leh thlarau lam thiltum hlen chhuah tumna hmangin, ‘i sâwtna chu mi zawng zawng hmuhah i tilang’ thei dâwn a ni. (1 Timothea 4:15) Tichuan, Pathian rawngbâwl nun awmze nei tak i nei dâwn a ni. (w03 4/1)

[Phêk 9-naa milem]

Bible chhiar leh i chhiarte ngaihtuahna chuan Jehova rawngbâwl tûrin a chêttîr ang che

[Phêk 10-naa milem]

Isua chu a Pa beisei ang chiahin a nung