Ṭhalaite U—Thiltum Ûm Tlâkte Chu Ûm Rawh U
1 I nuna i thiltum chu engte nge ni? Ṭhalai tam tak chuan thlarau lam thiltum engmah an insiam lo. Mahse, thlarau lam thiltumte insiam a, chûngte tihhlawhtlinna aṭanga lo awm hlimna neih chu a ṭha hle a ni lâwm ni?
2 Kan ṭhalaite zînga tam tak chuan zirna sâng ûmna lam pawh tiamin, khawvêl hausakna lam thiltumte ûm chu engmah a nih lohzia an hmu tawh a. Anni chuan thil hlauhawm an tawn theih tûrte ngaihtuahin chutiang thiltumte chu ûm tlâk an ti lo a ni. Amaherawhchu, Pathian zirtîrna mila theocratic thiltumte ûmna chuan tûna lungawina mai bâkah nakina chatuan chhandamna min thlen ang.—Thur. 12:1, 13.
3 Theocratic Thiltumte: Ṭhalai i nih angin, hriatna hlu tak chu i zawng em? Thufingte 2:1-5-ah chuan “Pathian hriatna” chhar chhuak tûra fuih kan ni a. A Thu i zir a nih chauh loh chuan Pathian hriatna chu i chhar chhuak thei ngai lo vang. Mahnia inzirna i neih ziah chuan Jehova hnaihtîr lehzual tûr chea duan Pathian Lehkha Thute chu i rilru leh thinlungah i tuh nghet lehzual ang a. Thil i zir tam sawtin, i hre tam sawt bawk ang. Chu chuan thil pawimawh tak i tawn huna thu tlûkna dik siam thei tûrin a ṭanpui ang che.
4 Hêng zawng zawng hi ni khat thil thua tih zawh mai theih a ni lo. Thlarau lama puitling chho tûr chuan hun leh dawhtheihna neih a ngai a. Mahse, mi mala thiltum i insiam a, hma i sâwn zêl chuan, thlarau lamah i puitling thei a ni.
5 Kristian rawngbâwlnaa chanvo neih tumin ṭan i la em? In tin kalnaah chawlhkâr tina dârkâr hmuh zât tûr i insiam em? Tlawhkîr leh in lama Bible zirpuinaa zirtîrtu thiam lehzual nih chu i thiltum a ni em? Zirlai ṭhenkhat chuan school chawlh an neih chhûnga thla khat emaw, a aia tam emaw chu auxiliary pioneer thawh tumin kum khat chhûng atân thiltum an insiam a ni. Nakum emaw, chu mi hnu emawah eng nge nih i duh? Regular pioneer thawh emaw, Bethel-a awm emaw chu i thiltum a ni em? Unaupa la upa vak lo i nih chuan kohhranho rawngbâwltu nih emaw, Nupui Nei Lo Unaupate Tâna Bible School kal emaw, leh engtik hun emawa kohhran upa la nih emaw chu i tum em? Thiltum chiang tak nei a, chu mi tipuitling tûra taima taka i thawh chuan, i nun chu a ṭangkai zâwngin i kaihruai thei dâwn a ni.
6 I thiltumte chu a chhawr tlâkin, i puitlin theih ngei a ni tûr a ni a. Chûng thlarau lam thiltumte i hlen chhuah hian Pathian Jehova i tihlim tih hria ang che. Chûng thiltumte chu theihtâwp chhuah tum tlatna nên hlen chhuah tum ang che. Chu chuan i thawhrim a phuin, tûnah leh hun lo la awm tûr atâna malsâwmna nasa tak a thlen dâwn che a ni.—Phil. 4:13.