Zawhna 3: Engvângin Nge Pathianin Hrehawm Ka Tawrh A Phal?

IAN-A pa chu zu heh tak a ni a. Ian-a chu rethei hran lo mah se, a pa hnên aṭanga a thil duh tak, rilru lama ṭanpuina chu a dawng lo va. Heti hian a sawi a ni: “Ka pa hi ka ngaina êm êm hran lo va; a chhan bul ber chu a zu in ṭhin leh ka nu chunga a ṭhat loh vâng a ni,” tiin. Ian-a chuan a lo upat deuh hnu chuan Pathian a awm tih a ringhlel ṭan ta a. “‘Pathian a awm tak tak a nih chuan, engvângin nge mite’n hrehawm an tawrh a phal?’ tiin ka ngaihtuah a ni,” tiin a sawi.

Engvângin he zawhna hi a lo chhuah? I nunah harsatna i tâwk lutuk lo a nih pawhin, pawi sawi lote’n an tuar i hmuh hunah chuan i thin a rim hle thei a. Mahse, Ian-a anga harsatna i tawh emaw, i hmangaih tak a dam loh emaw, a thih emaw hian, hrehawm tawrhna chungchânga zawhna chuan awmzia a nei lehzual a ni.

Mi ṭhenkhatte’n a chhânna nia an sawi chu eng nge ni? Mi ṭhenkhat chuan Pathianin inngaihtlâwmna leh khawngaihna neih dân min zirtîr nân hrehawm kan tawrh a phal niin an hria a. Mi dangte erawh chuan, nun hmasaa thil sual an tih avânga tûna hrehawm tuar niin an hre bawk a ni.

An chhânnain a sawi tum chu eng nge ni? Mihringte hrehawm tawrhna hian Pathian rilru a khawih lo va, chu chuan Amah hmangaih chu a tiharsa. Pathian chu a nunrâwng a ni.

Bible zirtîrna chu eng nge ni? Bible chuan mihringte hrehawm tawrhnaah hian Pathian mawhpuh tûr a ni lo tih chiang takin a sawi a. “Tuman fiahna an tawh laiin, ‘Pathian fiah ka ni,’ ti suh se; Pathian chu suala fiah rual a ni lo, amah pawhin tumah a fiah ngai lo.” (Jakoba 1:13, The Bible in Basic English) A nihna takah chuan, hrehawm tawrhnaa Pathian mawhpuh chu Bible-in Pathian mizia a sawite nên chuan a inrem lo a ni. Engtin nge?

Pathian mize langsar berte zînga pakhat chu hmangaihna a ni a. (1 Johana 4:8) Chu mi chungchâng sawi uar nân, Bible chuan Pathian chu nu, nau pawmin a neih rilru put hmang nei angin a târ lang a ni. “Hmeichhiain a fapa, a rîla rah chu, khawngaih lohna tûrin a nau a hnute hne lai chu a theihnghilh thei em ni?” tiin zawhna a siam a. Amah vêk chuan: “Chûngte chuan an theihnghilh a ni thei e, nimahsela kei chuan ka theihnghilh lo vang che,” a ti a ni. (Isaia 49:15) Hmangaihna ngah tak nu ber chu a fa tina lui angin i mitthla thei em? Chutih ahnêkin, hmangaihtu nu leh pate chuan an fate hrehawm tawrhna tihrehsak chu an tum zâwk ang. Chutiang bawkin, Pathian chuan pawi sawi lote chungah hrehawm tawrhna a thlentîr lo a ni.—Genesis 18:25.

Chuti chung pawhin, pawi sawi lo mite chuan hrehawm an la tuar zêl a. ‘Pathianin min ngaihsak a, thil engkimtithei a nih si chuan, engvângin nge hrehawm tawrhna thlentîrtu hi a nuai bo mai loh?’ tiin i ngaihtuah mai thei a ni.

Pathianin chhan ṭha tak avângin tûn thlenga hrehawm tawrhna awm chu a la phal a ni. Thil pakhat chauh lo ngaihtuah ta ila: Mite chunga hrehawm tawrhna thlentîrtu chu mihringte bawk an ni fo ṭhîn. Mi dangte tihduhdah leh hnehchhiah hmangte chu an insiam ṭha duh ṭhîn lo bawk. Chuvângin, hrehawm tawrhna tibo tûr chuan a thlentîrtu, chûng mite chu Pathianin a tihboral a ngai ang.

Pathianin thil dik lo titute a tihboral hrih loh chhan sawifiahin tirhkoh Petera chuan: “Mi ṭhenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zâwk e,” tiin a ziak a. (2 Petera 3:9) Pathian Jehova dawhtheihna chu hmangaihna leh zahngaihna a ngahzia târ lanna a ni.

Amaherawhchu, Pathian Jehova chu a rawn che thuai dâwn a. Ani chuan pawi sawi lote chunga ‘hrehawm tawrhna thlentute chu hrehawmnain a thungrûl ang.’ Dik lo taka hrehawm tawrhna thlentîrtute chuan “hrem an tuar ang, . . . chatuana boralna chu.”—2 Thessalonika 1:6-10.

Kan sawi tâk Ian-a chuan awrhna chungchânga a zawhnate chhânna lungawithlâk tak chu a hmu a. Chu chuan nunna a thlîr dân chu a thlâk dang lam ta a ni. (w12-E 11/01)

Pathianin hrehawm tawrhna awm a phal chhan leh chu mi chungchânga a la tih tûrte hriat belh i duh chuan, Bible Zirtîrna Dik Chu Eng Nge Ni? tih lehkhabu bung 11-na chu en ang che. Chu chu he Web site aṭang hian download theih a ni.www.pr418.com

[Phêk 9-naa bâwm]

Isua’n Hrehawm Tawrhna Chungchângah Eng Nge A Sawi?

Hrehawm tawrhnain a hual vêl avângin Isua chuan Pathian a dem lo va. Chu ai mahin, a hnuaia mi ang hian thil a ti zâwk a ni.

Isua chuan Pathianin pawi sawi lote chu hrehawm tawrhtîrna hmangin a hrem lo tih a târ lang. Ani chuan dam lo te, kebai te, leh mitdel te chu a tidam a. (Matthaia 15:30) A thilmak tihte chuan thil pawimawh tak pahnih min zirtîr a ni: A pakhatnaah, Isua chuan Pathian thiltihtheihna chu hrehawm tawrhtîr nân ni lovin, chhâwkzângkhai nân a hmang a. A pahnihnaah chuan, Isua’n mite chu lainatna tel lovin a tidam mai lo. Mite’n hrehawm an tuar a hmuh chuan a “khawngaih êm êm” zâwk a ni. (Matthaia 20:29-34) Isua chuan hrehawm tawrhna chungchânga a Pa rilru put hmang chu a lantîr chiang hle a. Chuvângin, Isua thusawi leh thiltihte aṭangin Pathianin hrehawm tawrhnate a hmuh hian a lungngaiin, tihrehsak a duhzia kan hre thei a ni.—Johana 14:7, 9.

Isua chuan mihringte hrehawm tawrhna nasa takte awmtîrtu bul ber chu Diabol-Setana a ni tih a hria. Isua’n: “Ani chu atîr ata tualthat a ni,” a ti. (Johana 8:44) Ani chuan Diabol-Setana chu “khawvêl lal” leh “khawvêl zawng zawng bumtu” tiin a sawi bawk a ni.—Johana 12:31: Thu Puan 12:9.

Isua chuan hrehawm tawrhna zawng zawng tâwp hun tûr beiseina min pe. Amah zuitute chu hetianga ṭawngṭai tûrin a zirtîr a: “Kan Pa vâna mi, . . . I ram lo thleng rawh se. I duhzâwng vâna an tih angin leia mi’n ti rawh se,” tiin. (Matthaia 6:9, 10) Pathian Ram a lo thlen hunah chuan, vânah hrehawm tawrhna a awm loh ang bawkin, he leiah pawh hian hrehawm tawrhna a awm tawh lo vang.

Tirhkoh Johana hnêna inlârna a pêkah Isua chuan Pathian Rama nungte awm dân tûr a sawi a. Chu tih hunah chuan, Pathianin “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral” tawh ang.—Thu Puan 1:1; 21:3, 4.