Bible Ṭanchhan Zawhnate Chhânna
Tute nge vânah kal ang a, engvângin nge?
Mi maktaduai tam takin vâna nun an châk a. Isua chuan a tirhkoh rinawmte chu chutah chuan an awm dâwn tih a sawi a ni. A thih hmain, a Pa vâna mi hnêna an awm theih nân hmun a buatsaihsak dâwn tih a tiam a ni.—Johana 14:2 chhiar rawh.
Engvângin nge mite chu vân nunna chang tûra an thawh leh ang? Chutah chuan eng nge an tih ang? Isua’n a tirhkohte hnênah lal an nih tûr thu a hrilh a. Anni chuan leiah hian ro an rêl ang.—Luka 22:28-30; Thu Puan 5:10 chhiar rawh.
Mi ṭha zawng zawng vânah an kal vek em?
Ram tam takah chuan, rorêltu chu mi tlêm tê chauh an ni ṭhîn. Isua’n leia rorêl tûrin mite chu vân nunna chang tûra a kaihthawh dâwn avângin, anni chu mi tlêm tê chauh an nih kan beisei thei a ni. (Luka 12:32) Bible chuan Isua nêna rorêl tûr zât chiah chu a sawi lang a ni.—Thu Puan 14:1 chhiar rawh.
Isua’n a hnungzuitu mi ṭhenkhat tân vânah an awmna tûr hmun a buatsaih a. Chuta an thiltih tûr chu i hria em?
Vâna kalte chauh chu lâwmman dawngtu awmchhun an ni lo vang. Isua Rama khua leh tui rinawmte chuan leia paradis din tharah chatuanin nun an chên ang. (Johana 3:16) Ṭhenkhat chu he khawvêl suaksual tihboralna ata dam khawchhuakin Paradis-ah an lût ang a. Mi dangte erawh chu thawhlehna hmangin an lût thung ang.—Sâm 37:29; Johana 5:28, 29 chhiar rawh. (w13-E 11/01)