BIBLE ṬANCHHAN ZAWHNATE CHHANNA
Mitthite hi an nung leh ang em?
Nunna siamtu chuan nunna a pe leh thei tih a chiang
Pathian Jehova chu nunna Hnâr a ni a. (Sâm 36:9) Chuti chu, amah vêk chuan mitthite hnênah nunna a pe leh thei tih chu thil inâwm tak a ni lâwm ni? Bible chuan chu chu a la ti ngei dâwn tih min tiam a ni. (Tirhkohte 24:15 chhiar rawh.) Engvângin nge a tih ang?
Leia chatuana nun chu min Siamtuin atîra a thiltum a ni a. (Genesis 1:31; 2:15-17) Chu chu mihringte tân a la duhsak reng a ni. Tûna kan tawn mêk nun—rei lo tê dam a, buainaa khat—a hmuhna hian a rilru a tina a ni.—Joba 14:1, 14, 15 chhiar rawh.
Mitthi tho lehte chu khawiah nge an awm ang?
Pathianin mihringte chu vâna awm tûrin a siam em? Siam lo. Vântirhkohte chu vâna awm tûrin a siam a. Mihringte erawh chu leia awm tûrin a siam a ni. (Genesis 1:28; Joba 38:4, 7) Chu chu hre rengin, Isua’n mitthi a kaihthawhte kha han ngaihtuah teh. Leia nung leh tûrin a kaitho a ni. Chutiang bawkin, nakin huna tho leh tûr a tam zâwkte chu leia nung tûr an ni ang.—Johana 5:28, 29; 11:44 chhiar rawh.
Mahse, Pathian chuan mi tlêm tê chu vân nunna changa tho leh tûrin a thlang a, anni chuan thlarau taksa an nei ang. (Luka 12:32; 1 Korinth 15:49, 50) Vân nunna changa tho lehte chuan Krista nên lal niin leiah ro an rêl dâwn a ni.—Thu Puan 5:9, 10 chhiar rawh. (wp15-E 11/01)