Indona leh Hrehawm Tawrhna Phêna Awm A Mawhphurtu Dik Tak

November 11, 1918 khân Khawvêl Indopui I-na chu a tâwp a. Sumdâwnnate khâr a ni a, mite chu kawtthlêrahte an lâm vêl a. Mahse, an lâm rei lo. Thil hlauhawm dang—silai aia hlauhawm zâwk--chuan khawvêl indopui chu a rawn zui ta zat mai.

Hrilêng hlauhawm tak Spanish flu tia hriat chuan France rama indona hmun chu June 1918 khân a rûn a. Chu hri hlauhawmzia chu a lang ta thuai a. Entîr nân, thla rei lo te chhûngin chu hri chuan hmêlmate’n France rama America sipai awmte an kah hlum aia tam chu a tihlum hman a ni. Tin, indo tâwpa sipaite an rama an haw leh chuan, hri chu khawvêl pumah a darh chhuak chak hle a ni.

Indo hnu kumte pawh chu ṭâmna leh ei leh bâra harsatnain a khat a. Kum 1918-a indona a tâwp chuan Europe ram tam takte chu an ṭâm a. Kum 1923-ah German ram pawisa chuan hlutna rêng a nei ta lo. Kum ruk a han liam leh chuan khawvêl pum sum leh pai dinhmun chu a tlu chhe ta vek a. A tâwpah, kum 1939-ah khawvêl indopui pahnihna chu a inṭan a—kawng ṭhenkhatah chuan khawvêl indopui pakhatna chhunzawmna a ni. He chhiatna inzawm râpthlâk takte phênah hian eng nge awm le?

NI HNUHNUNG CHHINCHHIAHNA

Bible hrilh lâwkna chuan thilthleng engemaw phêna thil awm chu hmu thei tûrin min ṭanpui a, a bîk takin Khawvêl Indopui I-na phêna awm chu hmu thei tûrin min ṭanpui a ni. Isua Krista chuan ‘hnam hrang leh hnam hrang an indo va,’ ṭâm tla leh lîr nghingte’n lei pum pui a tuam hun a awm tûr thute a sawi lâwk a ni. (Matthaia 24:3, 7; Luka 21:10, 11) Chûng chhiatnate chuan ni hnuhnûng chhinchhiahna a siam tûr thu a zirtîrte chu a hrilh a. Thu Puan bu chuan kimchang lehzualin a sawi a, chu chuan leia chungpikna leh vâna indona chu a thlunzawm a ni.—“Leia Indona leh Vâna Indona,” tih bâwm chu en rawh.

He Bible bu tho hian sakawr chungchuang pali chungchâng a sawi a. Hêng zînga pathumte hian Isua lo sawi lâwk tawh chhiatna—indo, ṭâm tla, leh hri lêng chu an entîr a ni. (“Sakawr Chung Chuang Palite Chu An Tlân Chhuak Tak Zet Em?” tih bâwm chu en rawh.) Khawvêl indopui pakhatna tihchhuah hrehawmna chu a la reh chuang lo tih a chiang hle. Bible chuan Setana chu a bul ṭantu a ni tih a târ lang a ni. (1 Johana 5:19) A thiltihtheihna chu a tâwp ngai ang em?

Thu Puan bu chuan Setana’n “hun tlêm tê” chauh a nei tawh tih min hrilh bawk a. (Thu Puan 12:12) Chuvângin, a thinur êm êm a, leiah chungpikna tam tak a thlentîr a ni. Buaina kan hmuhte hian Setana’n hun a neih tlêm tawhzia a târ lang bawk.

DIABOLA HNATHAWHTE TIBORALIN

Khawavêl Indopui I-na chu khawvêl thlâk danglamtu indona a ni tak zet a. Chu chuan chakai kaw tâwpa ṭang anga indona, sawrkâr thlâk tumna leh mihring hruaitute rin lohna hun a thlentîr a ni. Setana chu vân aṭanga paih chhuah a ni tih finfiahna chiang tak a pe bawk. (Thu Puan 12:9) Tin, hmuh theih lohva khawvêl rorêltu hian lal nunrâwng tak, hun tlêm tê chauh a nei tawh tih inhre rântu angin thil a ti a ni. Chu a hun neih a tâwp hun chuan, Khawvêl Indopui I-nain harsatna a tihchhuahte chu a tâwp hlen tawh ang.

Bible hrilh lâwkna aṭangin, vâna kan Lal, Isua Krista chuan ‘Diabola hnathawhte chu a tiboral’ thuai dâwn tih rin nachhan tûr i nei a ni. (1 Johana 3:8) Mi tam takte chuan Pathian ram lo thleng tûrin an ṭawngtai reng a. Nang, i ṭawngṭai ve em? A tâwp a tâwpah mi rinawmte chuan Lalram zârah leiah hian Setana duhzâwng ni lovin, Pathian duhzâwng tih a ni chu an hmu ang. (Matthaia 6:9, 10) Pathian Ram hnuaiah chuan, khawvêl indona—a nih loh leh indona rêng rêng—a thleng leh ngai tawh lo vang! (Sâm 46:9) Chu Ram chanchin chu zir la, remnaa lei a khah hun chu hmu ang che!—Isaia 9:6, 7. (w14-E 02/01)