Bible Ṭanchhan Zawhnate Chhânna

Engtin nge naupangte chuan Pathian hmangaih dân an zir theih?

Pa pakhatin a fa chu thil siam aṭanga a zirtîr lai — I fate chu Pathian hriaa hmangaih tûra ṭanpui nân thil siam aṭanga kan hriat theihte zirtîr rawh

I fate chuan Pathian chu a awmin, anni chu a hmangaih tih finfiahna an neih chauhvin Pathian hmangaih dân an zir thei ang. Pathian hmangaih tûr chuan amah an hriat a ngai a. (1 Johana 4:⁠8) Entîr nân, hêngte hi an hriat a ngai a ni: Pathianin mihring a siam chhan chu eng nge ni? Engvângin nge Pathianin hrehawm tawrhna awm a phal? Pathianin mihringte tân eng nge a la tih dâwn? tihte hi.—⁠Philippi 1:9 chhiar rawh.

Pathian hmangaih tûra i fate ṭanpui tûr chuan, nangmah ngeiin Pathian i hmangaih tih i lantîr tûr a ni a. Chu chu an hmuh chuan, i entawn tûr siam chu an zui ngei a rinawm a ni.—⁠Deuteronomy 6:5-7; Thufingte 22:6 chhiar rawh.

Engtin nge i fate thinlung thleng tûra i zirtîr theih ang?

Pathian Thu chuan thil a tithei a. (Hebrai 4:12) Chuvângin, i fate chu Bible zirtîrna bul berte hre tûrin ṭanpui ang che. Isua chuan mite thinlung thleng tûr chuan zawhnate zâwtin a ngaithlâksak a, Pathian Lehkha Thute a hrilhfiah a ni. I fate thinlung thleng tûra zirtîr tûr chuan Isua zirtîr dân kawngte chu i entawn thei a ni.—⁠Luka 24:15-19, 27, 32 chhiar rawh.

Chu bâkah, Pathianin mite a dâwr dân Bible-a chanchinte chuan naupangte chu Pathian hre tûr leh hmangaih tûrin a ṭanpui thei a. Chu mi atâna buatsaih thu leh hla chhuahte chu www.pr418.com-ah hmuh theiin a awm a ni.—⁠2 Timothea 3:16 chhiar rawh. (w14-E 12/01)

Hriat belh nân, Jehova Thuhretute tihchhuah Bible Zirtîrna Dik Tak Chu Eng Nge Ni? lehkhabu bung 14-na hi en ang che

www.pr418.com/lus-ah a hmuh theih a, a nih loh leh a thlâwna hmuh theih nân phêk 2-naa address pakhatah dîlna i thawn dâwn nia