Chanchin Ṭha Hril Rawh—Remhriatna Nên
1 Tirhkoh Paula chuan rinna leh ṭobul inang lote hnêna chanchin ṭha kan hrilh hunah remhriatna hman a pawimawhzia a sawi uar hle a. Tûn laiah, ṭhenkhat chu sakhaw mi nia an inchhâl laiin, mi dangte chuan thlarau lam thil an ngaihven lo va, an ngaihlu hek lo. Chanchin ṭha puangtute kan nih angin, remhriatnain Lalram thuchah chu “mi zawng zawng” tâna duhawm takah kan siam tûr a ni.—1 Kor. 9:19-23.
2 In Neitute Hre Thiam Rawh: Thlawhhma rawngbâwlnaa remhriatna hmang tûr chuan in neitute tuizâwng mila kan thusawite siam rem a ngai a. Chutianga ti thei tûr chuan inbuatsaihna ṭha tak neih a ngai a ni. Thuchhuahtute chuan kan lehkhabute leh magazine-tea chuang thu chi hrang hrangte an hriat bel chuan chanchin ṭha chu kawng chi hrang hranga sawi tûrin an inpeih thei ang. Upa lam te, thalai te, chhûngkaw lû te, nu ber te, hnathawktu hmeichhia te, leh mi dangte kan biak hian an mi mal dinhmunte kan ngaihtuah telin, remhriatna nên kan thusawi tûr chu kan thlang tûr a ni.
3 In neitute i va pan hian, in leh a chhehvêla thil awmte chu chîk ang che. In neitu chu fa nei a nih leh nih loh te, a sakhaw vawn te, in leh a chhehvêl enkawlna lam ngaihsak mi a nih loh te, leh thil dang dangte chu i hre thei mai thei a. Chu i thil hriat chu ṭanchhanin, in neitu dinhmun leh tuizâwng mil tûr thuhmahruaite chu i sawi thei ang. Remhre tak leh thiam takin zawhna zâwt la, an chhânna chu ngun takin ngaihthla rawh. Chutianga i tih chuan in neitu thurin leh rilru veizâwngte i hre thei ang a, thusawi zawm dân tûr ṭha ber chu i thlang thei ang.
4 I Thusawi Dân Siam Rem Rawh: In lam i pan hunah naupang emaw, an inkhualtelemna emaw i hmuh chuan heti hian i be ṭan thei ang: “Kan vêng chhûnga nu leh pate chu an fate hnêna an pêk kaihhruaina chungchâng kan sawipui a. Nu leh pa tam tak chuan an fate school kalnaa nungchang lama kaihhruaina an dawng lo chu an vei hle a ni. Chu chu buaina tling niin i hria em?” tiin. In neitu chhân lêtna chu ngaithla la. A chhân dân chuan a tui a ni tih a lantîr chuan, heti hian i chhunzawm thei ang: “Bible chuan nu leh pate leh naupangte’n kaihhruaina fing tak an dawn a ngai tih a sawi a, chu chu a ngaihvenawm hle. Thufingte 14:12-na thu hi han ngaithla teh,” tiin. Bible châng i chhiar hnuah: “Tûn hnai mai khân kan tâna Bible thurâwnte a ṭangkaizia ka chhiar asin,” tiin i sawi zawm thei ang. Bible Zirtîrna lehkhabu phêk 134-na chu keuvin, chuta paragraph inâwm takte chu sawipui ang che.
5 Ṭha taka inbuatsaih a, rawngbâwlnaa remhriatna kan hman chuan, tirhkoh Paula angin kan sawi ve thei ang: “Eng emaw ti tala ṭhenkhatte tal ka chhandam theihna tûrin mi zawng zawng hnênah engkim ka ni tawh,” tiin.—1 Kor. 9:22; Thuf. 19:8.