In Neitu Chu Chhût Tûrin Ṭanpui Rawh
1. Rawngbâwlnaah eng tih dân nge ṭangkai ber?
1 Rawngbâwlnaah mahni thurin ṭan tlat mai nge ṭangkai ang a, in neituin thu tâwp dik tak a siam theih nâna chhût tûra ṭanpui chu ṭangkai zâwk ang? Tirhkoh Paula chuan Thessalonika khuaa Judate a biak khân tih dân hnuhnûng zâwk chu a hmang a, chuvângin, “an zînga ṭhenkhatin an ring” ta a ni. (Tirh. 17:2-4, C.L. Re-edited) Mi dangte chhûtpuinaah chuan eng nge tel?
2. Chanchin ṭha kan hrilhnaah engtin nge Paul entawn tûr siam chu kan zui theih?
2 An Veizâwng leh An Thurin Chu Ngaihtuah Rawh: Kan bial chhûnga mite chhûtpui tûr chuan an thurin leh veizâwngte kan hriat a ngai a. Paul chuan Areopagi-a Grik ring lo mite hnêna thu a sawi khân an hriat zâwng leh pawm zâwng tûr thute hmangin a ṭan a ni. (Tirh. 17:22-31) Chuvângin, thusawi dân tûr i inpuahchah hunah in bial chhûnga mite thurin leh huat zâwng tlângpuite chu ngaihtuah rawh. (1 Kor. 9:19-22) In neituin a hnial kalh che a nih chuan, in pawm tlân theih tûr zâwng thu sawi tum la, chu mi lam hlîr chu sawipui ang che.
3. Engtin nge zawhna thiam taka hmangin mi dangte chu chhût tûra kan ṭanpui ṭhat lehzual theih?
3 Zawhnate Thiam Takin Hmang Rawh: Khualzin tuemaw chu a thlen chin kan hriat loh chuan a kal duhna hmun thleng tûrin kawng kan kawhhmuh thei lo vang. Chutiang bawkin, in neitu ngaih dân dik tak kan hriat loh chuan thu tlûkna dik siam tûrin kan ṭanpui thei lo vang. Isua chuan a thu ngaithlatute chu a chhûtpui hmain, an ngaih dân hriat nân zawhna a zâwt ṭhîn. Entîr nân, mi tuemawin, “Chatuana nun neihna tûrin engtin nge ka tih ang?” tia a zawh khân, Isua chuan a chhân hmain a ngaih dân hriat hmasak a tum a ni. (Lk. 10:25-28) Ṭum dang leha Petera’n chhânna dik lo a pêk pawh khân, Isua chuan a ngaihtuahna siam ṭha tûrin thiam takin zawhna a hmang bawk. (Mt. 17:24-26) Chuvângin, in neituin zawhna a zawh emaw, ngaih dân dik lo a sawi chhuah emaw chuan thil awm dân chhût thiam tûra ṭanpui nân zawhna kan hmang thei a ni.
4. Engvângin nge in neitu chu chhût tûra kan ṭanpui ang?
4 Chhût tûra in neitu kan ṭanpui hian, Zirtîrtu Ropui Isua leh kum zabi khatnaa thiam taka chanchin ṭha hriltu dangte kan entawn tihna a ni a. In neitu kan chawimawiin, kan zahna kan lantîr tihna a ni bawk. (1 Pet. 3:15) Chutianga kan tih chuan, in neitu chuan va tlawh leh pawh a remtih mai thei a ni.