Rawngbâwlnaah Thiamna Tihmasâwn Rawh—Inbiakna Tihtâwp Tumte Chhâng Lêtin

A Pawimawh Chhan: Leilung chhiatna thleng mai tûr hria angah han inchan teh. Mite chu hmun hima an tlân loh chuan an thi dâwn a ni. I ṭhenawmah vaukhân tûrin i kal a, ani chuan a buai thu sawiin i thu sawi chu a lo pawt chat a. I ṭanpui tumna chu i chawlhsan nghâl mai lo ang tih a chiang hle! Kan thu hrilhna biala mi tam tak chuan nun chhanhim nâna kan thuchah ken hlutna chu hre lovin, min hnar ṭhîn a ni. Kan va tlawh lai chuan an lo buai hle thei a. (Mt. 24:37-39) A nih loh leh thuthang dik lote avângin min lo pawngpaw huat pawh a ni thei. (Mt. 11:18, 19) Anni chuan rah ṭha lo chhuahtu sakhuate lakah danglamna nei lo angin min ngai thei bawk. (2 Pet. 2:1, 2) In neitu chuan tuina a nei lo va, a dodâl hran loh chuan kan chawlhsan nghâl mai tûr a ni lo.

A Tih Dân Tûr:

In tina thu i hrilh hmain, i tawn mai theih inbiakna tihtâwp tumte chungchâng leh thiam taka chhân lêt dân tûr ngaihtuah nân hun tlêm hmang ang che.
Muhîl kaihthawhnaah dîm taka kaihthawh chu a duhawm ṭhin ang bawkin, thlarau lama muhîlte kaihthawhnaah pawh chutiang tho chu a ni. Entîr nân, mi tuemaw chuan i va tlawhna chu thinrim takin a lo chhâng lêt che a nih chuan, ngilnei takin amah i hriat thiamzia hrilh la, a rilru tlang taka a sawi chhuah avângin lâwmthu i hrilh hnuah ṭha takin kalsan ang che. (Thuf. 15:1; 17:14; 2 Tim. 2:24) A châng chuan, in neitu rilru hriat thiamna chuan thu a hrilh zawmtîr thei mai thei che a. Entîr nân, ka buai a tih chuan heti hian i sawi thei a ni: “Ka hre thiam e. Mahse, ka kalsan hma chein, he hi ka pe duh che a,” tiin. Tih theih dân dang leh chu, in neituin ka tuizâwng a ni lo a tih chuan zawhna zawh hi a ni. “Bible-ah tuina i nei lo nge ni a, sakhuana hrim hrim hi i ngaihsak vak lo zâwk? tiin i sawi thei a. Thiam tak leh ngilnei taka i tih zêl chuan, in neitu chu a thlarau lam thil ngaihvenna kaihthawhsak thei zawhna rilru la tak i zawh theih a rinawm a ni.—Kol. 4:6.
Remhriatna hmang rawh. Jehova chuan mite chu a thu ngaithla tûrin a tilui lo tih hre reng ang che. (Deut. 30:19) Mi tinte chuan an thlarau lam mawhphurhna an phur ṭheuh tûr a ni a. (Gal. 6:5) In neituin a rilru a sawt sawn lo emaw, Bible thuchah engpawh duh lo anga a lan emaw chuan kalsan mai chu a ṭha ber a. A ngaih dânte zahna lantîrna chuan, a hnuah thuchhuahtu dangte tân thu hrilh theihna kawng kan hawnsak thei a ni.—1 Pet. 3:15.

Tûn Thla Chhûng Hian Ti Chhin Rawh:

In biakna tihtâwp tumte in tawn a, in neitu in chhuahsan hnuah, i thawhpui nên chuan ṭha lehzuala in chhân lêt theih dân tûr chu sawi dûn ang che u.