Rawngbâwlnaah Thiamna Tihmasâwm Rawh—In Neitu Thinur Tak Chu Hmachhawnin

A Pawimawh Chhan: Rawngbâwlnaa kan mi tawh tam takte chu an hawihhâwm hle a. Mahse, Isua chuan mi ṭhenkhatin min haw dâwn tih a sawi lâwk a ni. (Joh. 17:14) Chuvângin, in neitu thinur tak kan tawng fuh a nih chuan mak kan ti tûr a ni lo. In neitu a thinur a nih chuan, a ai kan awh Jehova tilâwm tûr zâwnga chhân lêt chu kan duh a ni. (Rom 12:17-21; 1 Pet. 3:15) Chutianga tihna chuan dinhmun tichhezual lo tûrin min vêng ang. In neitu leh a lo hmutu tuemaw hnênah thu hriattîrna ṭha a nih bâkah, a hnua Jehova Thuhretute’n an tlawh leh hunah pawh ngaihthlâk duhna a neihtîr thei a ni.—2 Kor. 6:3.

A Tih Dân Tûr:

Zahawm tak leh nêlawm takin awm la. Chu chuan boruak zâng tak a awmtîr ang. In neitu chhân lêtna chu thinur nân hmang suh. (Thur. 7:9) A thinur chhan chu a mi mal buaina vâng emaw, a hun lo va i va lên vâng emaw a ni thei. Kan thuchah ken avânga thinrim pawh ni tehrêng se, kan chanchin dik lo taka a lo hriat vâng a ni fo ṭhîn.—2 Kor. 4:4.
Zaidam tak leh khawngaihna tel ṭawngkamin chhâng ang che. (Thuf. 15:1) I va kai tho emaw, i va tibuai emaw em? Kan rawngbâwlna avângin ngaihdam kan dîl ngai lo va; mahse, a remchân loh laia kan va biak avângin inngaitlâwm takin ngaihdam kan dîl thei a ni. A thinrim chhan chu kan chungchânga khual thuthang dik lo a lo hriat vâng a ni em? Chutiang a nih chuan, heti hian i sawi thei a ni: “I thinrim chhan chu ka hre thiam e. Mahse, kan chungchânga i thu hriat chu a dik lo niin a lang. Ka hrilhfiah thei che ang em?” tiin. Kan thurin zînga pakhat, hnawhchhuah chungchâng emaw, thisen chungchâng emaw vâng a ni em? A nih chuan, heti hian i sawi thei ang: “Ka hre thiam e. Mi dangte pawhin chutiang chuan an sawi chhuak ve ṭhîn asin. Chu kan thurinte ṭanchhan Bible châng ka hmuhtîr thei che ang em?” tiin.
A thinurna a sosâng hle a nih chuan, chhân tum kher lo va chhuahsan mai chu a ṭha ber pawh a ni thei ang. Jehova Thuhretute tlawh leh a duh loh thu a sawi chuan, a ngenna chu tihhlawhtlinsak a ni ngei ang tih i tiam thei ang.

Tûn Thla Chhûng Hian Tichhin Rawh:

Chhûngkuaa Pathian Biakna in neih zânah tihchhinna nei ang che.
In neitu thinur tak in chhuahsan hnuah, i kawppui chu ṭha zâwka i chhân lêt theih dân tûr sawipui ang che.