“Mi Zawng Zawng Nên Inremin Awm Rawh U”
1. In neitu lungni lote kan tawh hunah eng Bible thu nge kan nunpui ang?
1 Jehova mite chuan remna an ngaina a, kan rawngbâwlna hi remna hna chi khat a ni. (Is. 52:7) Mahse, a châng chuan, kan va tlawh avânga lungni lo ṭhenkhat an awm a. Chutiang dinhmunah chuan remna siamtu ni tûrin engin nge min ṭanpui ang?—Rom 12:18.
2. Engah nge ngaihruat thiamna neih a pawimawh?
2 Ngaihruat Thiamna Nei Rawh: Mi ṭhenkhat chuan thutak an dodâl avângin thinur takin chhâng lêt mah se, mi dangte chu kan thuhrilh nêna inkungkaih lo thil dang avânga lungni lo an ni. An remchân loh laiin kan va tlawh pawh a ni mai thei a. In neitu chu mi mal harsatna avânga lungni lo pawh a ni thei bawk. A thinur chhan chu chanchin ṭha avâng pawh lo ni tehrêng se, hruai bova a awm avânga chutianga chhâng lêt a ni thei tih kan hre reng tûr a ni. (2 Kor. 4:4) Ngaihruat thiamna chuan thinur lêt lo tûr leh, kan chunga thinur a ni lo tih hre tûrin min ṭanpui ang.—Thuf. 19:11.
3. Engtin nge in neitu chungah zahna kan lantîr theih?
3 Zahna Lantîr Rawh: Thuhrilhna biala mi tam takte chuan thurin vawn ngheh tlat an nei a. (2 Kor. 10:4) Anni chuan an ngaihthlâk dâwn leh dâwn loh chungchângah duh an thlang thei a ni. In neitu rinna chu kan hmuhsitsak ngai tûr a ni lo va, a aia hre zâwk angin kan inlantîr ngai tûr a ni hek lo. Chhuak tûra tih kan nih chuan, zahna lantîr chungin kan chhuahsan mai tûr a ni.
4. Khawngaihna tel ṭawngkam hmang tih awmzia chu eng nge ni?
4 Khawngaihna Tel Ṭawngkam: Ṭawngkam ṭha lo taka min lo chhawn a nih pawhin, zaidam tak leh khawngaihna telin kan chhâng lêt tûr a ni. (Kol. 4:6; 1 Pet. 2:23) Inhnial ai chuan kan inlungrual theihna lai tûr zawn hmuh chu tum zâwk rawh. In neitu min hnial chhan chu zaidam takin kan zâwt thei a. Amaherawhchu, amah tihthinur lehzual loh nân, inbiakna tihtâwp nghâl mai chu a châng chuan a ṭha ber a ni.—Thuf. 9:7; 17:14.
5. Rawngbâwlnaa remna siamtu nihna aṭangin eng hlâwknate nge lo awm ṭhîn?
5 Remna siamtu kan nih chuan, in neitu chuan kan chhân lêt dân chu a chhinchhiah reng theiin, a hnua Thuhretu dangin thu a hrilh hunah pawh a lo ngaithla thei a ni. (Rom 12:20, 21) Min dodâl tlat angin lang hial pawh ni se, engtik nîah emaw chuan kan unaupa a la rawn ni thei a ni. (Gal. 1:13, 14) Thutakah a tui emaw, a tui ngai lo emaw a nih pawhin, insumtheihna kan neih a, remna siamtu kan nihzia kan lantîr chuan, Pathian Jehova leh a zirtîrna kan chawimawi a ni ang.—2 Kor. 6:3.