“Pioneer Ṭha Tak I Ni Ang Mawle!”
1. Engtin nge unaunu pakhat chuan pioneer thawka a rawngbâwlna chu a ngaih?
1 “Pioneer thawh hian Pathian Jehova nêna inlaichînna ṭha tak nei reng tûrin min ṭanpui a. Pathian Jehova leh a Fapain kan tâna thil an tihte chunga ka lâwmna lantîr theihna hun ṭha leh hlu tak niin ka ngai. Chu chuan hlimna leh lungawina hmu tûrin min ṭanpui a ni,” tiin India ram hmun hrang hranga kum 42 chhûng pioneer thawka thu hril tawh unaunu Mary chuan a sawi. Hunbi kima rawngbâwlna nun a manhlazia ngaihtuahin, tuemaw chuan: “Pioneer ṭha tak i ni ang mawle!” a ti che pawh a ni thei.
2. Thlarau lam thila inhmanna chuan lungawina nasa tak min pêk chhan hrilhfiah rawh.
2 Nun Lungawithlâk Chu: Kan Entawn tûr, Isua chuan a Pa duhzâwng tihna aṭangin thlarau lama chawlh hahdamna dik tak a hmu a. (Joh. 4:34) Chuvângin, a hnungzuitute hnênah Pathian Jehova biakna nêna inkûngkaih thiltih aṭangin lungawina dik tak a awm tih chu tih tak zetin a zirtîr a ni. Kan nunah Pathian Jehova pawm min nihtîr thei hnate kan thawh hian lungawina kan nei ṭhîn. Chu bâkah, mi dangte ṭanpui nâna kan hun te, tha leh zung te, leh kan thil neih te kan hman tam lehzual hian kan hlimna pawh a pung a ni.—Tirh. 20:31, 35.
3. Thu hrilh rawngbâwlnaa hun kan hman tam lehzual hian eng hlimna nge kan tawn ang?
3 Rawngbâwlnaah hun kan hman tam zawh poh leh Bible zirna neih leh kaihhruai avânga hlimna tawn theihna hun remchâng kan nei tam lehzual a. Rawngbâwlnaa thil tawn leh thiamna kan neih chhoh hian, in neitu tam takin ngaihsak lo anga an lanna thu hrilhna bialah pawh beisei aiin kan hlawhtling thei a ni. Pioneer thawkte chuan kum khat vêl an thawh hnuah an tel theihna Pioneer Rawngbâwlna School aṭanga zirtîrna an dawn ṭha takte chu an hmang ṭangkai thei a. (2 Tim. 2:15) Thu kan hril zawm zêl chuan, a hnua rah chhuah tûr thutak chi kan lo tuh reng pawh a ni thei asin.—Thur. 11:6.
4. High school zir zo ṭêp tawh ṭhalai i nih chuan eng nge i ngaihtuah ang?
4 Ṭhalaite: High school kal mêk i nih chuan, i zir zawh hnua i tih tûr chu ṭha takin i ngaihtuah tawh em? Tûn thleng hian, i school hna chuan i hun duan chu a thunun deuh vek a. I zir zawh hnu chuan hun âwl i neihte chu engtin nge i hman dâwn? I ṭhatlai tha zawng zawng chu ei zawnna hnathawh nâna hman ral ai chuan engvângin nge regular pioneer thawk tûra ngun taka i inngaihtuah loh vang? I zir tûr thiamna—mi chi hrang hrangte hnêna thu hrilh te, mahni harsatna hmachhawn theih te, mahni inthunun te, leh zirtîr thiamna lama hma sâwn chhoh te—chu i dam chhûngin i hlâwkpui ang.
5. Engtin nge nu leh pate leh kohhrana mite chuan pioneer thawk tûrin mite chu an fuih theih?
5 Nu leh pate u, in fate chu hunbi kima rawngbâwl tûrin in ṭanpui em? In thusawi leh entawn tûr ṭha tak siam chuan anni chu Lalram zawng hmasa tûrin nasa takin a ṭanpui thei a ni. (Mt. 6:33) High school a zawh hnua pioneer thawk ṭan nghâl Sanjay-a chuan: “Ka nu leh pate chuan pioneer thawhnain nun lungawithlâk a thlen tih engtik lai pawhin an ring tlat a ni,” tiin a sawi. Kohhrana mi zawng zawngte chuan ṭawngkam leh ṭanpuina pein pioneer anga rawngbâwl tûrin mite chu an fuih thei a ni. Spain rama mi Jose-a chuan: “Kan kohhrana mite chuan pioneer thawh chu ṭhalaite tâna hna ṭha ber niin an hria a. Pioneer rawngbâwlna an hlutna ṭawngkamte leh an ṭanpuina ṭangkai takte chuan ka tân pioneer thawh ṭan a tihawlsam phah a ni,” tiin a sawi.
6. Pioneer thawh châkna kan la nei lo a nih chuan eng nge kan tih theih?
6 Harsatnate Hmachhawn Theiin: Mahse, ‘Pioneer thawh ka châk hlei nêm,’ i ti pawh a ni thei. Chu chu i ngaih dân a nih chuan, ṭawngṭaiin Pathian Jehova hnênah i rilru chu, ‘Pioneer thawh hi ka tui chiah lo va; mahse, i lâwm zâwng tih chu kan duh ve bawk si,’ tiin hrilh ang che. (Sâm 62:8; Thuf. 23:26) Tichuan, a Thu leh a inawpna pâwl hmanga a kaihhruaina pêk chu zawng rawh. Regular pioneer thawk tam tak chuan atîrah auxiliary pioneer an thawk “chhin” pawt a, an hlimna hmuh chuan hunbi kima rawngbâwl tûrin a chêttîr ta ṭhîn a ni.—Sâm 34:8.
7. Thla tina tlin ngai dârkâr 70 neih theih loh hlauhna chu engtin nge kan hmachhawn theih ang?
7 Thla tina tlin ngai dârkâr 70 i hmuh theih inring chiah lo ta la, engtin nge ni ang? Engvângin nge i dinhmun anga ding pioneer thawkte chu i biak râwn loh vang? (Thuf. 15:22) Tichuan, hman theih tûr hun duan engemaw zât chu ziak chhuak rawh. Thil pawimawh lo zâwk tih nâna hun i hmante rawngbâwl nâna hman chu atîra i ngaih aiin a awlsam zâwk thei a ni.—Eph. 5:15, 16.
8. Engvângin nge kan dinhmun chu kan bih chian leh ṭhin ang?
8 I Dinhmunte Chu Bih Chiang Leh Rawh: Kan dinhmunte chu a inthlâk fo ṭhîn a. Chuvângin, a châng chânga dinhmun inbih chian leh ṭhin chu a ṭha a ni. Entîr nân, i hna aṭangin i pension ṭêp tawh em? Pioneer a thawh theih nâna a hnathawh lai bânsantu Krishnan-a chuan: “He thu tlûkna hian ka nupui nên regular pioneer min thawh ṭantîr theiin, rawngbâwltu mamawh lehzualna hmuna insawn a, rawngbâwl theihna hun remchâng min pe a ni. Hetiang rênga thlarau lama lâwmman nei leh hlimna nasa tak min petu hna dang hi ka hmu tawh ngai lo vang,” tiin a sawi.
9. Nupate chuan eng nge an ngaihtuah ang?
9 Nupa ṭhenkhat chuan ṭha taka an dinhmun an bih chian hnuah an pahnihin hunbi kima hna an thawh a ngai lo tih an hmu chhuak a. Chutianga ti tûr chuan an nun dân an tihsamkhai a ngai ngei ang; mahse, chutianga inpêk chu a manhla a ni. John-a nupui chuan rawngbâwlna a zauh duh avângin tûn hnai mai khân a hnathawh chu a chawlh san a. A pasal chuan: “Ka nupuiin thlarau lam thiltih nân a hun zawng zawng a hmang tih hriat aliama rilru hlimna ka nei lo,” tiin a sawi a ni.
10. Engin nge Kristiante chu pioneer thawh ngaihtuah tûra chêttîr?
10 Hmangaihna leh Rinna Târ Lanna: Pathian Jehova chuan kan vaia kan thawh theih thu hrilhna chu hna pawimawh berah a dah a. He khawvêl hlui hi a boral ṭêp tawh a, Pathian Jehova hming lamtute chauh chu chhandamin an awm ang. (Rom 10:13) Amah hmangaih tak zetna leh kan tâna a thiltih tawhte chunga lâwmna chuan taima taka thu hril tûra a Fapa thupêk chu zâwm tûrin min chêttîr ang. Chu bâkah, ni hnuhnûngah kan nung tawh tak zet tih rinna pawh chuan khawvêl hi hmang lutuk lo va, hun a la awm chhûnga rawngbâwlnaa theih tâwp chhuaha inhmang tûrin min chêttîr ang.—1 Kor. 7:29-31.
11. Tuemawin, pioneer ṭha tak i ni ang mawle, min tih chuan chu chu engtin nge kan thlîr ang?
11 Regular pioneer thawh chu inawpna pâwl ruahmanna siam chhân lêtna mai a ni lo; Pathian hnêna kan inpumpêkzia târ lanna a ni. Chuvângin, tuemawin, pioneer ṭha tak i ni ang mawle, tia an fak che chuan, chu chu la thutak ang che. Tichuan, hetiang Pathian rawngbâwlna lungawithlâk taka thawktute zawm ve dân chu ṭawngṭaina nên ngun takin ngaihtuah ang che.
[Phêk 2-naa Thu Lâk Chhuah]
Nu leh pate u, in fate chu hunbi kima rawngbâwl tûrin in ṭanpui em?
[Phêk 3-naa Thu Lâk Chhuah]
Pathian Jehova chuan kan vaia kan thawh theih thu hrilhna chu hna pawimawh berah a dah