Regular Pioneer Lo Thawk Tawh Ṭhîn I Ni Em?

1. Mi tam takin eng hun remchâng ṭha tak nge an neih a, mahse mi ṭhenkhat tân eng nge tih ngai?

¹ Kum kalta chhûngte khân, mi sâng tam tak chuan hunbi kima rawngbâwltu angin chanchin ṭha “zirtîr leh hrilh” theihna hun remchâng ṭha tak an nei a. (Tirh. 5:42) Mahse, ṭhenkhat chuan chhan chi hrang hrang avângin pioneer rawngbâwlna chu an chhunzawm thei lo a ni. Regular pioneer lo thawk tawh ṭhîn i nih chuan i thawh ṭan leh theih leh theih loh hriat nân tûna i dinhmun chu i enfiah tawh em?

2. Engvângin nge tûn hmaa pioneer thawk tawh ṭhînte chuan tûna an dinhmun chu an ngaihtuah leh ang?

² Dinhmun A Inthlâk Danglam: Pioneer i chawlhsan chhan dinhmun chu tûnah a awm tawh lo pawh a ni thei a. Entîr nân, thla khata dârkâr 90 i hmuh theih loh avânga pioneer thawk zawm thei lo i nih chuan, tûna dârkâr 70 chauh phût a nih tâk hnu hian i thawk leh thei ang em? Pioneer i chawlhsan hnu hian, ei zawnna hnathawh a ngaihna emaw, chhûngkaw lama i mawhphurhna emaw chu a tlêm tawh zâwk em? Tûn hnai maia penson i ni em? A hrisêl lohna a vânga pioneer chawlhsan ta unaunu pakhat chuan kum 89 mi a nihin a thawk zawm leh thei a. Kum khat chuang lai damdawi ina a awm a ngaih loh avângin, a hrisêlnain pioneer thawh a tlin leh niin a hria a ni!

3. Chhûngkaw zînga tuemawin pioneer a thawh theih nân engtin nge mi dangte’n an ṭanpui theih?

³ Mahniin pioneer la thawk ngai lo mah la, in chhûngkaw zîngah chuan nu leh pa tar tawhte emaw, chhûngkaw zînga mi dang emaw a enkawl a ngaih avânga pioneer chawlhsan ta an awm pawh a ni thei. (1 Tim. 5:4, 8) Chutiang a nih chuan, nangmah emaw, mi dang emawin chhûngkuaa pioneer chawlhsan ta chu in ṭanpui belh thei ang em? Chu mi chungchâng chu engvângin nge in sawiho loh vang? (Thuf. 15:22) Chhûngkaw zînga mi pakhatin pioneer a thawh theih nâna an inpuih tlân hian, mi tinte chuan thawh nei ve nia inhriatna an nei ṭheuh thei a ni.

4. Tûnah pioneer thawk leh thei lo ta la, engtin nge ni ta ang?

⁴ Tûna i dinhmun avânga pioneer i thawk leh thei lo a nih pawhin lunghnual mai suh ang che. Thawh leh i inhuamna chuan Jehova a tilâwm a ni. (2 Kor. 8:12) Pioneer i thawh laia i neih thiamnate chu tûna i rawngbâwlnaah hmang rawh. Thawh leh i châkzia chu ṭawngṭaiin Pathian hnênah thlen la, i dinhmunte siam rem tûrin hun remchâng dap reng bawk ang che. (1 Joh. 5:14) Engtik hunah emaw chuan, regular pioneer thawh avânga hlimna i nei leh theih nân Jehova’n “kawngka zau tak leh sâwt tak” a hawnsak che pawh a ni thei asin!—1 Kor. 16:9.