Thlan Tûr I Hria Em?
Khawvêl puma damdawi lam hmunpuiahte chuan thisen tel lova dam lo zai an uar ta tawlh tawlh a. Thisen tel lo damdawi lama inenkawlna thlan tûr awmte chu i hre chiang em? Damdawia inenkawlna leh inzaipui chungchânga thu tlûkna dik i siam theih nân chûng chu i hriat a ngai a ni. No Blood—Medicine Meets the Challenge tih video chu en ang che. Sâpṭawng thiam lote chuan, he thuziak paragraph tâwpa râwn tûr thuziak târ lante chu anmahni ṭawngin an chhiar tûr a ni. Chu mi hnuah chuan, a hnuaia zawhnate hmang hian i thil hriatte chu ngun takin ṭawngṭaina nên ennawn rawh.—Chhinchhiah tûr: He video-ah hian inzai lai tawi tê tê a tel avângin, nu leh pate chuan an fate an enpui hunah remhriatna an hmang tûr a ni.
(1) Jehova Thuhretute’n thisen inthun an duh loh chhan bul ber chu eng nge ni? (2) Damdawi hmanga inenkawlna chungchângah, Jehova Thuhretute duhthusâm chu eng nge ni? (3) Damlote’n dikna eng nge an neih tlat? (4) Thisen them te tak tê tête chu engte nge ni? (5) Engvângin nge Kristian ṭhenkhat chuan (a) thisen them te tak tê tête an pawm? (b) thisen aṭanga siam damdawi rêng rêng an hnâwl? (6) Kristiante chuan engtin nge thisen inpêk leh a hnua mahni hman atâna thisen dah ṭhat te chu an thlîr ang? (7) Thisen tela inenkawlna ṭhenkhat chu engte nge ni? Hrilhfiah rawh. (8) Thisen tela inenkawlna chungchângah Kristiante chuan eng mawhphurhna lian tak nge an neih ṭheuh? (9) Thisen aia hman theih chi damdawite chungchângah eng nge hriattîr nih i duh? (10) Thisen thun lovin inzaipui khirhkhân tak takte chu tih theih a ni em?
Video-a tel inenkawl dân ṭhenkhatte pawm leh pawm loh chungchângah chuan, miin a Bible zirtîr chhia leh ṭha hriatna nêna inmilin thu a titlu tûr a ni. Nangmah leh i fate tâna thisen aiawh inenkawlna i pawm theih tûrte chu i thlang fel tawhin, Advanced Health Care Directive chu i ziak khat vek tawh em? He mi chungchâng kimchang taka sawiho nân, July 1, 2004 Vênnainsâng (Mizo) leh October 15, 2000, Vênnainsâng (English), “Chhiartute Zawhna” chu ngun takin en rawh. Chu mi hnuah, November 2006 Kan Lalram Rawngbâwlna kârzeh-a awm work sheet, “Thisen Them Te Tak Tê Tête leh Mahni Thisen Hmanga Inenkawl Chungchâng Engtin Nge Ka Thlîr Ang?” tih chu thisen i pawm dâwn leh dâwn loh chungchânga i mi mal duh thlanna siam nân hmang ang che. A tâwpah chuan, Advance Health Care Directive card-ah i duh thlanna siamte chu dik takin ziak kim vek ang che. Rîkrum thila biak pawh atâna i thlante leh i chhûngte zînga Thuhretu ni lote hnênah i thu tlûkna siamte chu kim chang taka hriattîr tûr a ni.