Ni Hnih Chhûng Thlarau Lama Intihchakna
1. Kumin district inkhâwmpui aṭangin eng nge dawn kan inbeisei theih?
1 Thlarau lama nguina hmun he Setana khawvêlah hian, Jehova chuan a chhiahhlawhte chu a tichak reng a ni. (Is. 58:11) Pathian Jehova’n min tihchak dân pakhat chu kum tina district inkhâwmpui hmangin a ni. Kumin atâna inkhâwmpui kan hnaih rualin, thlarau lam chakna dawng tûr leh pe chhuak tûrin engtin nge kan inbuatsaih theih?—Thuf. 21:5.
2. Eng inbuatsaihna nge kan zawh fel ngai?
2 Ni hnih inkhâwmpui atâna i la inbuatsaih lo a nih chuan, i mi mal leh i hna thawh dân hun duan chu siam rem tum ṭan ang che. Nî tina inkhâwmpui ṭan hmaa ṭhut hmun i rem fel theih nân, zin kawnga i hun hman zât tûr chu i chhût tawh em? Jehova’n kan tâna a buatsaih thlarau lam chaw mi tichak thei takte hmaih chu kan duh lo hle ngei ang! (Is. 65:13, 14) Thlen in tûr leh kal dân tûrte chu i ruahman fel tawh em?
3. Inkhâwmpuia thusawite mi mal ang leh chhûngkua anga hlâwkpui tak zet tûrin eng nge kan tih theih?
3 Inkhâwmpui chhûnga thusawite ṭha taka ngaithla tûrin engin nge ṭanpui ang che? A theih chuan, inkhâwmpui chhûng chu zâna mut hma tûr a ni a. Thu sawitu chu en la, Bible châng a sawi apiang chu keu ve zêlin, tawi têin lo ziak chhuak ṭhîn ang che. Nu leh pate chuan an fate’n ṭha taka thu ngaithla tûra an ṭanpui theih nân chhûngkuate chu an ṭhu tlâng tûr a ni. (Thuf. 29:15) Tlai tinin chhûngkua angin in thu ngaihthlâk a pawimawh laite chu sawiho theih a ni anga. Inkhâwmpui zawh tawh hnuah pawh in chhûngkua in intihchak chhoh zêl theih nân Chhûngkuaa Pathian Biakna neih zânah chhûngkua anga in nunpui theih tûr thute sawihona hun telh theih a ni ang.
4. Engtin nge kan kohhrana mi dangte chu thlarau lam ruai ṭhehnaa chakna hmu tûrin kan ṭanpui theih?
4 Chakna Hmu Tûrin Mi Dangte Ṭanpui Rawh: Mi dangte’n thlarau lama chakna an hmuh chu kan duh bawk a. Kohhranah kum upa tawh emaw, inkhâwmpuinaa tel thei tûra ṭanpui ngai dang emaw an awm em? Anmahni ṭanpui thei dinhmunah i ding em? (1 Joh. 3:17, 18) Upate, a bîk takin group overseer-te chuan ṭanpui ngai thuchhuahtute chu an mamawh ṭanpuina an dawntîr ngei tûr a ni.
5. Engtin nge inkhâwmpui sâwmna chu kan sem ang? (Phêk 5-naa bâwm pawh en rawh.)
5 Tûn hma ang bawkin, inkhâwmpui ṭan hma chawlhkâr thumah, inkhâwmpui sâwmna campaign kan nei leh ang a. Kohhrante chuan sâwmna an dawn zât sem zawh tumin, an thu hrilhna bial hrût chhuah chu an tum tûr a ni. Dodâltu awmna bialah chuan, sâwmna kan pêk chhuah hmain in neituin tuina a neih leh neih loh kan chian hmasa phawt tûr a ni. Campaign zawh hnuah pawh sâwmna in la nei a nih chuan inkhâwmpuina hmuna tawn chawp thu hrilhnaa in hman atân in rawn keng tûr a ni. He mi chungchânga hriat belh ngaite chu Inrinni thusawiahte târ lan a ni ang a. Chhûngkua angin inkhâwmpui chhûnga in hman zawh loh tûr nia lang sâwmnate chu inkhâwm enkawltute hnênah pêk tûr a ni. Chawlhni thusawi hnuhnûng ber chhûnga i la mamawh dâwn avângin, copy khat chu i tân dah ṭha ang che.
6. Inkhâwmpuiah eng kawngin nge hawihhâwmna kan lantîr theih?
6 Hawihhâwmna Chuan Mi A Tichak Ṭhîn: Mi tam tak chu “mahni inhmangaihtu” leh mi dangte ngaih dân pawi sa lote an nih laia hawihhâwmna lantîr tum Kristian unaute kara awm chu a va nuamin, min va tichak tak êm! (2 Tim. 3:2) Zîng dâr 8:00-a kawngkâ hawn a nih huna innêk buai lova lûtin leh ṭhutna pawh in khata kan chênpuite emaw, motor-a kan chuanpuite emaw, a nih loh leh kan Bible zirpuite emaw tân chauh hauhsakin hawihhâwmna kan lantîr a ni. Hun inṭan dâwn apianga chairman-in ṭhut hmun inremfela rimawi ngaithla tûra a tih hunah a kaihhruaina kan zâwm ang a. Cell phone emaw, pager emaw, chutiang chi thil dangte inkhâwm chhûnga mi dangte tibuai lo tûra dah chu hawihhâwmna chi khat a ni. Inkhâwmpui chhûnga ṭawng lovin emaw, sms thawn lovin emaw, thil ei lovin emaw, a nih loh leh vei chhuak sek lova ngaithlain hawihhâwmna kan lantîr thei bawk.
7. Engtin nge unaute nêna inkawmna aṭangin chakna kan dawn a, kan pêk chhuah theih?
7 Mi Tichak Thei Inkawmhona: Inkhâwmpuite chuan mi tichak thei kan Kristian inlungrualna leh inunauna hlimawm tak neih theihna hun remchâng min pêk belh a ni. (Sâm 133:1-3) Engvângin nge kohhran dang aṭanga lo tel unaute chu “inhawng” taka biak hmasak kan tum loh vang? (2 Kor. 6:13) Nî tina chhûngkaw thar pakhat emaw, mi thar pakhat emaw hmêlhriat chu kan tum thei a ni. Chu mi atân chuan chhûn chawlh lai hi hun remchâng ṭha tak a ni. Chuvângin, chhûn chaw ei tûra inkhâwmpuina chhuahsan ai chuan mi dangte nêna inkawm paha inkhâwmpuina hmuna ei theih tûr chaw samkhai tak keng ang che. Ṭhian thar leh nghet i neih phah mai thei asin.
8. Engvângin nge inkhâwmpuinaah hnathawk tûrin kan inpêk ang a, chutianga inpe tûrin eng nge kan tih theih?
8 Rawngbâwlna thianghlima unaute thawhpuina chuan min va tichak tak êm! Department engemaw ber ṭanpui tûr emaw, in kohhranin hmun tifai tûra chanvo a neih ṭanpui tûr emawin i inpe thei ang em? (Sâm 110:3) Inkhâwmpuiah thawh tûr i la nei lo a nih chuan Volunteer Service Department-a inpêk chu ngaihtuah ang che. Mi tam tak nêna hna thawh chu a hlimawmin, a hahthlâk lo a ni.
9. Engvângin nge inkhâwmpui chhûngah kan nungchang leh lan dân kan ngaihsak lehzual ang?
9 Kan Nungchangin Thlîrtute A Tihlim: Inkhâwmpui neih chhûng chauh ni lovin ni hnih chhûng zawng chu inkhâwmpui palaite kan ni a. Inkhâwmpuina khuaa kan awm chhûnga min lo hmutute’n Thuhretu ni lo te laka kan danglamna chu an hmu thei tûr a ni. (1 Pet. 2:12) Inkhâwmpuina te, kan thlen in te, leh restaurant-tea kan silhfên leh inchei dân chuan Jehova a chawimawi tûr a ni. (1Tim. 2:9, 10) Badge kan inbel reng chuan min hmutute’n Thuhretute kan ni tih an hria ang a. Chu chuan inkhâwmpui chungchâng sawi theihna leh thu hrilh theihna hun remchâng min pe thei ang.
10. Hotel leh restaurant-a hna thawktute’n kan inkhâwmpui chu a ṭha zâwnga an hmuh theihna tûrin eng nge kan tih theih?
10 Engtin nge hotel leh restaurant-a thawktute chu kan puih theih ang? Kan mamawh zât aia tam hotel room kan hauh tûr a ni lo; mi dangte’n an chan loh phah theih bâkah hotel neitute tân lah chânna a ni bawk si a. Hotel-a kan luh hun leh kan chhuahsan dâwn hunah hotel-a mite an buai lai a nih chuan dawhtheihna leh zaidamna kan lantîr tûr a ni. (Kol. 4:6) Tih ṭhin a nih angin, restaurant-a thawkte leh kan thawmhnaw phurtu hotel-a hna thawktu te, kan room tifaitu te, thil min tihsaktu mi dangte tân lâwmman tlêm azâwng pêk ṭhin tûr a ni.
11. Kan Kristian nungchangin thu hriattîrna ṭha a awmtîr tih eng thiltawnte’n nge târ lang?
11 Inkhâwmpui chhûnga kan nungchang ṭhatna chuan eng angin nge mi dang te a nghawng? Chanchinbu-a thuziak pakhat târ lan dânin, inkhâwmpui kan neihna hmun hotu pakhat chuan: “An hawihhâwm hlawm hle a. Kum tina anmahni hmantîr chu kan châk hle a ni,” tiin a sawi. Ni kum khân inkhâwmpui palaite thlenna hmunah Thuhretu ni lo mi pakhatin a pawisa ip a ti bo va. Pawisa ip chu a chhûnga thil awm zawng zawngte nêna hotel manager hnêna an rawn dah kîr leh chuan manager chuan a neitu hnênah: “Jehova Thuhretu inkhawmpui lai leh hotel-ah pawh an mahni deuh vek an nih lai a ni chu i vânnei a nih hi. Chuti ni lo se chuan i pawisa ip hi i hmu leh tawh lo vang,” tiin a sawi a ni.
12. Inkhâwmpui a hnaih rualin eng nge tih kan tum tlat ang a, engvângin nge?
12 Kumin inkhâwmpui chu a hnai sâwt tawh hle a. Hun leh tha tam tak sêngin, thusawi leh inkhâwmpui boruak chu mi tichaktu a nih theih nâna siam a ni. Inkhâwmpuia tel kim tum tlatin, Jehova leh a inawpna pâwlin i tâna a buatsaih chu dawng ngei tûrin inbuatsaih rawh. Hawihhâwmna te, hlim taka inkawmna te, leh nungchang ṭhatna te hmanga mi dangte tihchak chu tum tlat rawh. Tichuan, nang leh mi dangte chuan, “Hei aia lungawithlâk zâwk ka tawn lai ka hre ngai lo!” tia ziaktu nikum inkhâwmpui palai pakhat thiltawn ang chu kan tawng ve thei ang.
[Phêk 4-naa thu lâk chhuah]
Tûn hma ang bawkin, inkhâwmpui ṭan hma chawlhkâr thumah, inkhâwmpui sâwmna campaign kan nei leh ang
[Phêk 6-naa thu lâk chhuah]
Inkhâwmpuina te, kan thlen in te, leh restaurant-tea kan silhfên leh inchei dân chuan Jehova a chawimawi tûr a ni
[Phêk 7-naa thu lâk chhuah]
Hawihhâwmna te, hlim taka inkawmna te, leh nungchang ṭhatna te hmanga mi dangte tihchak chu tum tlat rawh
[Phêk 4-naa bâwm]
Kum 2011 District Inkhâwmpui Hriattîrnate
◼ Inkhâwm Hun: Inkhâwm chu a ni hnihin zîng dâr 9:20-ah ṭan a ni ang. Inkhâwmpuina hmun kawngkapui chu zîng dâr 8:00-ah hawn a ni ang. Inkhâwmpui ṭanna rimawi ngaithla tûra puan a nih hunah, hun chu zahawm taka ṭan a nih theih nân mahni ṭhutna tûr hmunah kan ṭhu ṭheuh tûr a ni. Inkhâwm chu Inrinni chuan tlai dâr 4:40-ah a tâwp ang a, Chawlhni-ah erawh tlai dâr 4:10-ah a tâwp thung ang.
◼ Lîrthei Dahna: Lîrthei dah dân chunga thu kan neih theihna inkhâwmpui hmunahte chuan, a thleng hmasa apiang hnênah dah man chawi lova hmun chantîr a ni ang. Lîrthei dahna hmun hi a zau lêm loh ṭhin avângin, lîrthei pakhatah a theih anga tam chuanho hrâm tûr a ni.
◼ Ṭhutna Hauh: Ṭhutna chu motor-a i chuanpuite emaw, in khata i chênpuite emaw, a nih loh leh i Bible zirpuite emaw tân chauh hauhsak theih a ni ang.—1 Kor. 13:5.
◼ Chhûn Chaw: Chhûn chawlh chhûnga chaw ei tûra inkhâwmpuina hmun kalsan ai chuan, chhûn chaw samkhai tak chu rawn keng ang che u. Ṭhutna hnuaia dah theih tûr chaw kennate chu a hman theih ang. Chaw kenna lian leh thil kenna keh thei chi rêng rêng chu inkhâwmpuina inah ken luh phal a ni lo. Chaw leh ei chawp tûr thil dang chu inkhâwmpui ngaihtuahtu pâwlin a buatsaih tel lo vang.
◼ Thawhlâwm: District inkhâwmpui ruahmanna avânga kan lâwmzia chu inkhâwmpuinaa khawvêl pum huap rawngbâwlna atâna thawhlâwm bâwmah phal taka thawhin kan lantîr thei a. Cheque hmanga thawhlâwm thawh eng pawh chu “The Watch Tower Bible and Tract Society of India” hminga dawn theih tûra siam tûr a ni.
◼ Tawhsual leh Rîkrum Thil: Inkhâwmpuina hmunah damdawi lam thila rîkrum thil a thlen chuan, i bul hnaia awm inkhâwm enkawltu (attendant) chu hriattîr rawh, ani chuan First Aid Department a hriattîr nghâl ang a, inkhâwmpuinaa awm kan mi thiamte’n a hlauhawm dân chhûtin ṭanpuina pêk dân tûr an ngaihtuah nghâl ang. A ṭûl a nih chuan, a hmuna awm first-aid department-a mite chuan ambulance chu an ko ang. Hei hian emergency-response service-a mite’n phone dawng ṭeuh lo tûrin a ṭanpui ang.
◼ In Enkawl Mêkte: Inenkawl mêk i nih chuan, inkhâwmpuinaah damdawi hmuh theih a nih dâwn loh avângin i mamawh tûr âwm tâwk rawn keng ang che.
◼ Pheikhawk: Kum tinin pheikhawk leh a kaihhnawih thil avânga intihpalhna a thleng deuh nual ṭhîn a. Kailâwn leh hmun hrang hranga him taka i kalpui theih tûr pheikhawk i bun tâwk leh mawihnai tak bun chu a ṭha ber a ni.
◼ Rimtui Inhnawih Chite: Inkhâwmpui tam tak chu khâwl hmanga boruak fîm lak luhna hmun inkhâr ûp taka neih a ni a. Chuvângin, thâwk lam pang leh a kaihhnawih lam thila harsatna neite’n buaina an tawh loh nâna rimtui inhnawih chi rim na lutuk rêng rêng hman loh chu ngilneihna lantîrna a ni ang.—1 Kor. 10:24.
◼ Please Follow Up (S-43) Form: Please Follow Up form chu inkhâwmpui chhûnga tawnchawp thu hrilhna kan neih aṭanga tuina lantîrtute chungchâng hriattîrna ziak nâna hman tûr a ni. Thuchhuahtute chuan inkhâwmpuinaah form pahnih khat vêl chu an keng tûr a ni a. Form kimchang taka ziak khah chu Book Room-ah emaw, i haw hunah i kohhran secretary hnênah emaw an bawhzui atân i theh lût thei ang.—November 2009 Kan Lalram Rawngbâwlna, p. 3 en rawh.
◼ Restaurant-ah: Hotel leh restaurant-a i nungchang mawi hmangin Pathian Jehova hming chawimawi rawh. Tih ṭhin dân a nih chuan lâwmman tlêm azâwng hnutchhiah ang che.
◼ Hotel-ah:
(1) Mamawh zât tûr aia tam pindan hauh suh la, an phal zât aia tam khawsa suh ang che u.
(2) Rîkrum thil vâng a nih loh chuan i pindan hauh lâwk tawh chu cancel suh la; chutiang thil a thleng a nih chuan a rang thei ang berin hriattîr ang che.—Mt. 5:37.
(3) Hman i inpeih hunah chauh bungraw nawrna nawrlirh chu lain, i hman zawh veleh dah lehnghâl ṭhîn rawh.
(4) Ei rawng bâwl theihna pindanah chauh ei rawng bâwl rawh.
(5) Hotel hna thawktute’n i thuamhnaw an phurhsak che hunah leh in chhûng tifaitu tân nî tin sum tlêm azâwng lâwmthu sawi nân hnutchhiah ṭhîn rawh.
(6) Hotel-a thlengte tâna a thlâwna an pêk zîng chaw, coffee, a nih loh leh vûr te chu mi dang tân la suh.
(7) Hotel-a hna thawkte nêna in indâwrnaah thlarau rah lantîr reng rawh. Anni chuan mikhual tam tak an enkawl ṭhin avângin ngilneihna, dawhtheihna, leh nunnêmna kan lantîr chu an hlut ṭhîn a ni.
(8) Hotel Luah Theih Ziak Chhuahna-a târ lan luah man chu ni khat chhûng luah man tûr a ni a, chu mi bâkah chuan chhiah chawi a ngai bawk a ni. I thil hman loh emaw, i dîl loh emaw atâna man chawi belh tûra tih i nih chuan, chûng chu pe lo la, inkhâwmpuinaa Rooming Department chu a rang thei ang berin hriattîr ang che.
(9) I thlenna hotel room chungchânga buaina i neih chuan, an ṭanpui theih nân che inkhâwmpuinaa i awm chhûng ngeiin Rooming Department hriattîr ang che.
(10) Hotel-a i luh hunah debit card emaw, credit card emaw i hmang a nih chuan, i account aṭangin i pindan luah man bâkah, i cham chhûnga thil tihchhiat palh awm theite phuhru thei tûr khawp sum hrên a ni ṭhîn. Chûng i hman tak tak bâk an hrênte chu hotel i chhuahsan hnua bank lama sum tihfel a nih hma loh zawng i hmang thei lo vang.
◼ Tlâwmngaia Rawngbâwlna: A ṭûl apiang thawk tûra kan inpêk chuan, inkhâwmpui aṭanga hlimna kan hmuh chu a nasa lehzual ang. (Tirh. 20:35) Chutianga inpe duh tupawh chuan Volunteer Service Department-ah an inhriattîr tûr a ni. Kum 16 hnuai lam naupangte pawhin an nu leh pa emaw, enkawltu emaw, a nih loh leh anni’n an ruat puitling pakhat emaw enkawlna hnuaiah thawkin ṭanpuina hlu tak an pe ve thei a ni.
[Phêk 5-naa bâwm]
Engtin Nge Sâwmna Chu Kan Pêk Ang?
Kan thu hrilhna bial hrût chhuak thei tûr chuan kan ṭawng tuitam tûr a ni lo. Hetiang hian kan sawi thei ang: “Chibai. Khawvêl pumah he sâwmna sem chhuah beihpui kan thlâk a. Nang pawh kan pe ve ang che aw. Sâwmnaah hian chanchin kimchang zâwk i hmu thei ang,” tiin. Sâwmna chuan tuina a chawktho thei hle a; chuvângin i pêk chhuah hunah in neitu hmuh theih tûr zâwng ngeiin pe ang che. Phûrna lantîr rawh. Chawlhkâr tâwpa sâwmna sem chhuah hunah a theih chuan magazine-te sem chhuak tel bawk ang che.