Kan Inkhâwmpuite—Thutak Hriattîrna Thiltithei Tak
1. Israel mite kût hman ṭhin khân eng thlarau lam thutak chhût leh sawiho theihna hun remchâng nge a pêk?
1 Hmân lai Israel mite chu kût hmang tûrin kum khatah vawi thum an inhmukhâwm ṭhîn a. Chuta tel tûr chuan mipate chauh phût ni mah se, chu inkhâwmpui hlimawm tak hmang tûr chuan chhûngkuain Jerusalem-ah an zin tlângpui ṭhîn. (Deut. 16:15, 16) Chûng hunte chuan thlarau lam thutak pawimawh tak chhût leh sawiho theihna hun remchâng a pe a ni. Chûng thutak ṭhenkhat chu engte nge ni? Pakhatah chuan Jehova chu phal tak leh hmangaih taka Petu a ni tih hi a ni a. (Deut. 15:4, 5) A dang lehah chuan Jehova chu min kaihruaitu leh min vênghimtu atâna rintlâk a ni tih hi a ni. (Deut. 32:9, 10) Israel mite chuan Jehova hming pu, a mite an nih angin, a felna chu an lan chhuahtîr tûr a ni tih pawh an ngaihtuah thei bawk. (Deut. 7:6, 11) Tûn laiah pawh, kum tina kan inkhâwmpuite chu chutiang bawk chuan kan hlâwkpui a ni.
2. Engtin nge district inkhâwmpui thusawi tûrte chuan thutak êng a en chhuahtîr ang?
2 Thusawite Chuan Thutak Eng A Enchhuahtîr: Kan inkhâwmpuiahte chuan Bible thutak pawimawh tak ên chhuahtîrtu thusawi te, lemchan te, lemchan tâwi te, leh biakbiakna te kan ngaithlain, kan hmu ṭhîn a. (Joh. 17:17) Tûnah pawh, inkhâwmpui lo awm tûr atân nasa taka inbuatsaih a ni leh tawh a ni. Jehova inawpna pâwl chuan khawvêl pum puia mite mamawh chi hrang hrang phuhrûk nâna duan thusawi tûrte a buatsaih a ni. (Mt. 24:45-47) Thusawi leh lemchante en leh ngaihthlâk chu i châk tawh em?
3. Thusawite hlâwkpui tûrin eng nge kan tih ang?
3 Inkhâwmpuinaa kan tel kim vek a, kan rilru zawng zawng kan pêk chuan kan hlâwkpui hle ngei ang. I hnathawhna pu hnêna chawlh i la dîl lo a nih chuan, tûnah be nghâl ang che. Thusawi laia harhvâng taka i awm theih nân zânah mu hma ṭhîn ang che. Thusawitu en karna leh tâwi têa thusawi lo chhinchhiahna chuan mi tam tak chu rilru pe reng thei tûrin a ṭanpui a ni. I cell phone emaw, pager emaw chuan nangmah leh mi dangte a tibuai tûr a ni lo. Thusawi laia sms thawn chîng lo la, hrisêl lohna emaw, khaw lum lutuk emaw vâng a nih loh chuan thil ei leh in insûm bawk ang che.
4. Engtin nge nu leh pate chuan inkhâwmpui hlâwkpui tûra an fate an ṭanpui theih?
4 Sabbath kumahte chuan, Bâwkte Kût chhûnga Dân chhiarte ngaithla tûra Israel chhûngkuate an kal khâwm rêng rêngin, an “fanau tê tê te” pawhin “an ngaihthlâk a, an zir” ve theih nân an hruai tel ṭhîn a ni. (Deut. 31:12) Inkhâwmpui chhûnga chhûngkuate ṭhu tlâng a, naupangte pawh harhvâng tak leh thusawi ngaihsak taka an awm hmuhna chuan min va tichak tak êm! Engvângin nge tlai tinin, thusawia ṭha in tih lai in ziah chhuahte chu ennawn a, in sawiho loh vang? ‘Naupang thinlungah chuan âtna a beh tlat avângin, nu leh pate chuan tleirâwl chhuak tawhte pawh tiamin, an fate chu “thlahthlam” lovin, chhûn chawlh lai te, hotel-a an thlen laite pawhin an vêng reng tûr a ni.—Thuf. 22:15; 29:15.
5. Engtin nge hotel-a kan thlen laia kan nungchang ṭha chuan thutak a cheimawi ang?
5 Kan Nungchang Ṭha Chuan Thutak A Cheimawi: Inkhâwmpuina hmuna kan nungchang ṭha chuan thutak a cheimawi a. (Tit. 2:9, 10) Thuhretute’n hotel dânte an zawm a, hotel-a hnathawkte chunga dawhtheihna leh khawngaihna an lantîr hian hotel hna thawhtute chuan an hmuh hmaih lo a ni. (Kol. 4:6) Branch office aiawhtute’n ni kuma hotel pakhat an dâwrin, hotel director chuan: “In mite chu an fel êm avângin kan hotel-a lo thleng tûrin kan duh lutuk alâwm. An nungchang a mawiin, ngil an nei a, hotel-a hnathawkte an zahthiamin, hotel bungruate pawh uluk takin an cheibâwl a ni,” tiin a sawi a ni.
6. Inkhâwmpuina khuaa kan châm chhûngin engtin nge kan inthuam dân hmanga thutak kan cheimawi theih?
6 Inkhâwmpui badge kan vuah hian, chu chuan inkhâwmpui a tlângzarh a, inkhâwmpui chhimtu dangte’n min hriat theih phah bâkah, mi dang min lo hmutute hnêna thu hrilh theihna hun remchâng min siam a ni. Inkhâwmpuina khuaa mite chuan inkhâwmpui badge vuahtute chu khawvêla inchei dân lâr êm êm fel fai lo tak leh mipat hmeichhiatna lama mi hîp thei zâwng ni lo va, fel fai tak leh zahawm taka an inchei zâwkzia an hmu thei bawk ang. (1 Tim. 2:9, 10) Chuvângin, hotel-a kan va thlen hun pawh tiamin, inkhâwmpuina khuaa kan awm chhûng zawng chuan kan silhfên leh inchei dânah kan fîmkhur hle tûr a ni. Kekawr bûl leh T-shirt ha chunga va thlen chu a zahawm lo a ni. Inkhâwmpuina hmun chu open-air stadium a nih pawhin, kan incheina chu a zahawm tho tûr a ni a. Inkhâwm bânah restaurant kal tûra thawmhnaw kan thlâk duh a nih pawhin, inkhâwmpui chhim kan la ni tho tih hre rengin, ho lam lutukin kan inchei tûr a ni lo.
7. Inkhâwmpui chhûnga kan Kristian inpumkhatna kan hlimpui theih dân kawng khat chu eng nge ni?
7 Israel mite chuan kût an hman lai chuan khawvêl hmun hrang hrang aṭanga lo kal Pathian chibai an bûkpuite nêna inkawmna mi tichak thei tak an nei ṭhîn a, chu chuan inpumkhatna a siam a ni. (Tirh. 2:1, 5) District inkhâwmpui chhûng hian kan Kristian inunauna duhawm tak chu târ lan a ni ṭhîn. He kan thlarau lam paradis pêng duhawm tak hian thlîrtute rilru a hneh fo va. (Sâm 133:1) Chhûn chawlh laia chaw lei tûra kal chhuah ai chuan chhûn chaw samkhai tak pai a, kan bula ṭhu unaute nêna inkawm khâwm chu a va ṭha zâwk tâk êm!
8. Kan dinhmunin a zir chuan hna thawk tûra kan inpêkna tûr chhan eng nge awm?
8 Kan inkhâwmpuite ṭha tak leh fel taka ruahman a nihna chuan thlîrtute rilru a hneh thei hle a, hna zawng zawng chu mahnia inpete thawh a ni tih an hriat hian an rilru a hneh lehzual a ni. Inkhâwmpuinaa hna thawk tûrin ‘mahni duhthuin i inpe’ ve thei em? (Sâm 110:3) Chhûngkuate chuan mi dangte ṭanpui tûra an fate zirtîr nân an chhûngin hna thawk tûrin an inpe ṭhîn. Mi zakzum tak i nih chuan, inkhâwmpuinaa hnatlânga inpêk chu inkhâwmpui chhim ve dangte nêna inhmêlhriat theihna kawng ṭha tak a ni. Unaunu pakhat chuan heti hian a sawi: “Kan chhûngkaw zînga mi leh ṭhian ṭhenkhat tih bâk chu hmêlhriat ka nei lo rêng rêng a. Mahse, hmun vêl tifai tûra ka inpêk hnu chuan unau tam tak ka hmêlhriat ta a. Nuam ka ti khawp mai!” tiin. Inkhâwmpuinaa hna thawhna hmanga ṭhian siam belh tûra inhawnna chuan hlimna nasa tak min thlen ang. (2 Kor. 6:12, 13) Hna thawk tûra la inpe ngai lo i nih chuan, upate hnênah ṭanpui tûra i tlin theih dân zâwt ang che.
9. Engtin nge inkhâwmpuia lo kal tûrin mi dangte kan sâwm ang?
9 Mi Dangte Chu Thutak Ngaithla Tûrin Sâwm Rawh: Kum hmasatea kan lo tih tawh angin, inkhâwmpui ṭan hma chawlhkâr thum aṭangin inkhâwmpuinaa mi dangte sâwmna beihpui thlâk a ni dâwn a. Kohhrante chuan thuhrilhna biala mi a tam thei ang ber sâwm chu an duh ngei ang. (“Engtin Nge Sâwmna Kan Sem Chhuah Ang?” tih bâwm en rawh.) Sâwmna chuangte chu inkhâwmpuinaah rawn ken leh tûr a ni a. Inkhâwmpui chhima rawn kalte’n an châm chhûnga tawnchawp thuhrilh nân an hmang thei dâwn a ni.
10. Kum tina sâwmna beihpui thlâknain rah ṭha a chhuah tih târ langtu thiltawn sawi rawh.
10 He kum tina beihpui thlâk hi mite’n an chhâng lêt em? Inkhâwmpui pakhatah, attandant chuan nupa tuak khat chu ṭhutna a zawnpui a. Anni chuan sâwmna an dawn thu leh, “tel ve an châk” avânga lo kal an nih thu an hrilh a ni. Inkhâwmpui rawn chhim tûr chuan mêl 200 aia hla aṭangin an rawn kal a nih chu! Hmun dangah pawh unaunu pakhat chuan a in tin kalnaah inkhâwmpui chungchâng ngaihven deuh anga lang pa pakhat hnênah sâwmna a pe a. Sâwmnaa thu chuangte chu hun pein a sawipui ta a ni. Chu mi hnu ni engemaw zâta inkhâwmpuinaah chuan unaunu chuan chu pa leh a ṭhian pakhat chu thu leh hla chhuah tharte zînga pakhat kengin a va hmu a ni.
11. Engvângin nge kum tinin district inkhâwmpuiah kan tel ziah ang?
11 Israelte’n kum tina kût an hman ṭhinte chu ‘tih tak zet leh dik taka’ a rawng an bâwl theih nâna hmangaih taka Jehova ruahmanna a ni a. (Jos. 24:14) Chutiang bawkin, kum tina kan district inkhâwmpuite chuan ‘thutaka awm zêl’ tûra min ṭanpui bâkah, kan biakna pêng pawimawh tak a ni bawk a ni. (3 Joh. 3) Inkhâwmpuinaa lo tel tûr leh chu mi hlâwkpui ngei tûra thutak ngainatu zawng zawngte ṭan lâkna chu Jehova’n malsâwm rawh se!
[Phêk 4-naa thu lâk chhuah]
Inkhâwmpuina khuaa kan nungchang ṭha chuan thutak a cheimawi
[Phêk 5-naa thu lâk chhuah]
Inkhâwmpui ṭan hma chawlhkâr thum aṭangin inkhâwmpuinaa mi dangte sâwmna beihpui thlâk a ni ang
Kum 2012 District Inkhawmpui Hriattirnate
◼ Inkhâwm Hun: Inkhâwm chu a ni hnihin zîng dâr 9:20-ah ṭan a ni ang. Inkhâwmpuina hmun kawngkapui chu zîng dâr 8:00-ah hawn a ni ang. Inkhâwmpui ṭanna rimawi ngaithla tûra puan a nih hian, hun chu zahawm taka ṭan a nih theih nân mahni ṭhutna tûr hmunah kan ṭhu ṭheuh tûr a ni. Inkhâwm chu Inrinni chuan tlai dâr 4:55-a tihtâwp a ni ang a, Chawlhni-ah erawh chuan tlai dâr 3:40-a tihtâwp a ni thung ang.
◼ Lîrthei Dahna: Lîrthei dah dân chunga thu kan neih theihna inkhâwmpuina hmunahte chuan, inkhâwmpuinaa tel tûr a lo thleng hmasa apiang hnênah dah man chawi lova hmun chantîr a ni ang. Lîrthei dahna hmun hi a zau lêm loh ṭhin avângin, lîrthei pakhatah a theih anga tam chuanho hrâm tûr a ni.
◼ Ṭhutna Hauh: Ṭhutna chu motor-a i chuanpuite emaw, in khata i chênpuite emaw, a nih loh leh i Bible zirpuite tân chauh hauhsak theih a ni ang.—1 Kor. 13:5.
◼ Chhûn Chaw: Chhûn chawlh chhûnga chaw ei tûra inkhâwmpuina hmun kalsan ai chuan, chhûn chaw samkhai tak chu rawn keng ang che u. Ṭhutna hnuaia dah theih tûr chaw kennate chu a hman theih ang. Chaw kenna lian leh thil kenna keh thei chi rêng rêng chu inkhâwmpuina inah ken luh phal a ni lo.
◼ Thawhlâwm: District inkhâwmpui ruahmanna avânga kan lâwmzia chu inkhâwmpuinaa khawvêl pum huap rawngbâwlna atâna thawhlâwm bâwmah phal taka thawhin kan lantîr thei a. Inkhâwmpuinaa cheque hmanga thawhlâwm thawh eng pawh chu “The Watch Tower Bible and Tract Society of India” hminga dawn theih tûra siam tûr a ni.
◼ Tawhsual leh Rîkrum Thil: Inkhâwmpuina hmunah damdawi lam thila rîkrum thil a thlen chuan, i bul hnaia awm inkhâwm enkawltu (attendant) chu hriattîr rawh, ani chuan First Aid Department a hriattîr nghâl ang a, inkhâwmpuinaa awm kan mi thiamte’n a hlauhawm dân chhûtin ṭanpuina pêk dân tûr an ngaihtuah nghâl ang. A ṭûl a nih chuan, a hmuna awm first-aid department-a mite chuan ambulance chu an ko ang. Hei hian emergency- response service-a mite’n phone dawng ṭeuh lo tûrin a ṭanpui ang.
◼ In Enkawl Mêkte: In enkawl mêk i nih chuan, inkhâwmpuinaah damdawi hmuh theih a nih dâwn loh avângin i mamawh tûr âwm tâwk rawn keng ang che. Zunthlum neite chuan an inchiuna hriaute chu inkhâwmpuina leh hotela bawlhhlawh bâwmah te paih mai lovin, a paihna hmun tûr dik takah an paih tûr a ni.
◼ Pheikhawk: Kum tinin pheikhawk leh a kaihhnawih thil avânga intihpalhna a thleng deuh nual a. Kailâwn leh hmun hrang hranga him taka i kalpui theih tûr pheikhawk i bun tâwk leh mawihnai tak bun chu a ṭha ber a ni.
◼ Bengngawngte Tân: Inkhâwmpuina hmun ṭhenkhatah chuan thusawite chu sign language pawha neih a ni ang.
◼ Baptisma Chan: Baptisma chang tûrte chu Inrinni zîng lama baptisma chan tûr thusawina neih laiin an ṭhutna tûra ruat tlar hmaah an ṭhu tûr a ni a. Baptisma chang tûrte chuan tower leh inbualna thawmhnaw mawihnai pângngai ken ṭheuh tûr a ni. Hriat ngai dang a awm chuan puan lâwk a ni ang a, attandant-te leh Information Department te’n an hre bawk ang.
◼ Rimtui Inhnawih Chite: Inkhâwmpui tam tak chu khâwl hmanga boruak fîm lak luhna hmun inkhâr ûp taka neih a ni a. Chuvângin, thâwk lam pang leh a kaihhnawih lam thila harsatna neite’n buaina an tawh loh nâna rimtui inhnawih chi rim na lutuk rêng rêng hman loh chu ngilneihna lantîrna a ni ang.—1 Kor. 10:24.
◼ Please Follow Up (S-43) Form: Please Follow Up form chu inkhâwmpui chhûnga tawnchawp thu hrilhna kan neih aṭanga tuina lantîrtute chungchâng hriattîrna ziak nâna hman tûr a ni. Thuchhuahtute chuan inkhâwmpuinaah follow-up form pahnih khat vêl chu an keng tûr a ni a. Form kimchang taka ziak khah chu Book Room-ah emaw, i haw hunah i kohhran secretary hnênah emaw an bawhzui atân i theh lût thei ang.—May 2011 Kan Lalram Rawngbâwlna p. 3 en rawh.
◼ Restaurant-ah: Hotel leh restaurant-a i nungchang mawi hmangin Pathian Jehova hming chawimawi rawh. Tih ṭhin dân a nih chuan lâwmthu tlêm azâwng hnutchhiah ang che.
◼ Hotel-ah:
(1) Mamawh zât tûr aia tam pindan hauh suh la, an phal zât aia tam khawsa suh ang che u.
(2) Rîkrum thil vâng a nih loh chuan i pindan hauh lâwk tawh chu cancel suh la; chutiang thil a thleng a nih chuan a rang thei ang berin hotel hriattîr ang che.
(3) Hotel-a i luh hunah debit card emaw, credit car emaw i hmang a nih chuan, i account aṭangin i pindan luah man bâkah, i châm chhûnga thil tihchhiat palh awm theite phuhru thei tûr khawp sum hrên a ni ṭhîn. Chûng i hman tak tak bâk an hrênte chu hotel i chhuahsan hnua bank lama sum tihfel a nih hma loh zawng i hmang thei lo vang.
(4) Hman i inpeih hunah chauh bungraw nawrna nawrlirh chu la la, i hman zawh vêleh mi dangin an hman ve theih nân dah lehnghâl ṭhîn rawh.
(5) Hotel hna thawktute’n i thawmhnaw an phurhsak che hunah leh in chhûng tifaitu tân nî tin sum tlêm azâwng lâwmthu sawi nân hnutchhiah ṭhîn rawh.
(6) Ei rawng bâwl theihna pindahah chauh ei rawng bâwl rawh.
(7) Hotel-a thlengte tâna a thlâwna an pêk zîng chaw, coffee, a nih loh leh vûr te chu mi dang tân la suh.
(8) Hotel-a hna thawkte nêna in indâwrnaah thlarau rah lantîr reng rawh. Anni chuan mikhual tam tak an enkawl ṭhin avângin ngilneihna, dawhtheihna, leh nunnêmna kan lantîr chu an hlut ṭhîn a ni.
(9) Nu leh pate chuan hotel-a an thlen chhûng chuan hotel swimming pool-ah te, inkawm khâwmna hmunah te, exercise lâkna hmunah te, leh hmun dang dangahte chuan an fate chu ngun takin an enkawl reng tûr a ni.
(10) Hotel Luah Theih Ziak Chhuahna-a târ lan luah man chu ni khat chhûng luah man tûr a ni a, chu mi bâkah chuan chhiah chawi a ngai bawk a ni. I thil hman loh emaw, i dîl loh emaw atâna man chawi belh tûra tih i nih chuan, chûng chu pe lo la, inkhâwmpuinaa Rooming Department chu a rang thei ang berin hriattîr ang che.
(11) I thlenna hotel room chungchânga buaina i neih chuan, an ṭanpui theih nân che inkhâwmpuinaa i awm chhûng ngeiin Rooming Department hriattîr ang che.
◼ Tlâwmngaia Rawngbâwlna: A ṭûlna apianga thawk tûra inpe duh apiangte chu Volunteer Service Department-ah an inhriattîr tûr a ni. Kum 16 hnuai lam naupangte pawhin an nu leh pa emaw, enkawltu emaw, a nih loh leh anni’n an ruat puitling pakhat emaw enkawlna hnuaiah thawkin ṭanpuina hlu tak an pe ve thei a ni.
[Phêk 6-naa bâwm]
Engtin Nge Sâwmna Kan Sem Chhuah Ang?
Kan bial chhûng tuam chhuak thei tûr chuan tawi têa thu kan sawi a ngai mai thei a. Hetiang deuh hian kan sawi thei ang: “Chibai. He sâwmna hi khawvêl pum puiah kan sem chhuak a. Hei hi ka rawn pe ve a che. A chhûngah hian thu kimchang lehzual a chuang a ni,” tiin. Phûrna lantîr ang che. Kâr tâwpa sâwmna i sem chhuah hunah, a rem chuan magazine pawh pe tel ang che.