Chanchin Ṭha Thehdarh Nân Tract Hmang Rawh
1. Engtin nge Pathian mite’n tract an lo hman ṭhin?
1 Jehova mite chuan chanchin ṭha thehdarh nân Bible tract hi kum rei tak chhûng an lo hmang tawh a. Kum 1880-ah khân, C.T.Russell-a leh a pawlte chuan Bible Students’ Tract tih chu an tichhuak ṭan a, chu chu Vênnainsâng chhiartute hnênah vântlâng hnêna an sem chhuah atân an pe a ni. Tract chu ngaih pawimawh hle a ni a, chuvângin kum 1884-a C.T.Russell-a’n Lalram hmasâwn nâna hlâwkna ûm lo pâwl a din hmingah pawh “tract” tih a telh a ni—Zion’s Watch Tower Tract Society tiin. Chu pâwl chu tûnah chuan Watch Tower Bible and Tract Society of Pennsylvania tia hriat a ni. Kum 1918 a thlen meuh chuan, Bible Zîrlaite chuan tract maktaduai 300 chuang an sem chhuak tawh a. Tract-te hi thu hrilhna hmanraw ṭangkai tak a la ni zawm zêl a ni.
2. Engvângin nge tract hi a ṭangkai?
2 A Ṭangkai Chhan: Tract-te chu mawi tak leh mit la tak a ni hlawm a. A chhûnga thu tawi tak chuangte chu mi rilru la tak leh bengvârthlâk tak a ni. Lehkhabu emaw, magazine emaw chhiar huphurh in neitute tân a ṭha lehzual a ni. Tract chu thuchhuahtu tharte leh naupangte tân pawh sem chhuah a awlsam a. Chu bâkah, a phêk a len vak loh avângin, ah chhuah a awlsam bawk a ni.
3. Tract hlutna târ langtu mi mal thiltawn emaw, thu leh hla chhuaha chuang emaw chu sawi rawh.
3 Mi tam tak chuan tract aṭangin thutak an hmêlhriat ṭan a ni. Entîr nân, nu pakhat chuan kalkawngah kan tract pakhat a hmu a. A chharin, a chhiar a, “Thutak ka hmu ta!” tiin a sawi chhuak a ni. A tâwpah chuan, Kingdom Hall-ah a kal a, Bible a zir ṭanin baptisma a chang ta a, chu zawng zawng chu tract-a a hmuh Pathian Thu thiltithei tak vâng a ni.
4. Tract sem chhuah thlaa kan tum ber tûr chu eng nge ni?
4 In Tin Kalnaah: Tract hi thu hrilhna hmanraw ṭangkai tak a nih avângin, November thla aṭanga inṭanin thla khat chhûnga thu leh hla sem chhuah tûrte zîngah a khât tâwka telh ṭhin a ni tawh ang. Kan tum chu mite hnêna ṭract pâwngpaw pêk chhuah ni lovin, inbiak ṭan nâna hman hi a ni. In neitu chuan kan tlawh hmasak ber emaw, kan tlawhkîr leh hunah emaw tuina a lantîr chuan, Bible Zirtîrna bu emaw, zir tûr thu chhuah dangte emaw hmangin Bible zirpui dân kan entîr thei a ni. A nih leh, in tin kalnaah engtin nge tract kan sem chhuah ang? Tract-te hi a inang lo va, chuvângin kan sem chhuah tûrte chu kan hriat chian a ngai a ni.
5. Engtin nge in tin kalnaah tract kan sem chhuah theih?
5 Kan thu hrilh dân chu tualchhûng dinhmun leh kan sem chhuah tûr tract azirin kan siam rem tûr a ni. In neitu hnênah tract pakhat pein inbiakna chu kan ṭan thei a. A kâwma lem mawi tak chuan a tuina a chawktho thei a ni. A nih loh leh, in neitu chu kan tract chi hrang hrangte hmuhin a duh ber kan thlantîr thei bawk. Mite ina kan luh theih lohna hmunah thu kan hrilduh a nih chuan, in neitu hmuh theih tûrin tract chu kan keng lang thei a, a nih loh leh a ngaih dân hriat kan duh thil pakhat chungchânga tract chu kawngka hnuaia rawlh lût tûrin a phalna kan dîl thei a ni. Tract thupui chu zawhna a nih chuan, chu mi chungchânga a ngaih dânte sawi tûrin kan sâwm thei a. A nih loh leh, in neitu tuina chawk tho va, inbiak duhna neihtîr thei tûr zawhna kan siam chawp thei bawk. In neitu nên chuan tract chhûng thu ṭhengkhatte chu kan chhiar thei a, thuziaka zawhna awmna laiah chuan châwlin in neitu chu a ngaih dân sawi tûrin kan sâwm thei bawk. Bible châng pawimawh zualte chu Bible aṭanga chhiar theih a ni a. Thu ṭhenkhat kan sawiho hnuah tlawh nawn leh tûra ruahmanna nghet siamin sawihona chu kan titâwp thei a ni. In neitu awm lohna inah kohhranin thu leh hla chhuahte a hnutchhiah ṭhîn a nih chuan, tract chu mi dang hmuh theih loh tûrin kan hnutchhiah thei ang.
6. Engtin nge kawtthlêra thu hrilhnaah tract kan hman theih?
6 Kawtthlêra Thu Hrilhna: Kawtthlêra thu hrilhnaah tract i hmang tawh ngai em? Kawnga kal mi ṭhenkhat chu an hmanhmawh êm avângin ding khaw muanga titipui chu an duh lo va. Chutiang mite tuina neih chen hriat chu a harsa mai thei. Chuvângin, an chhiar ngei ang tih hre si lova magazine chhuak thar berte pêk ai chuan engvângin nge tract pakhat chu i pêk zâwk loh vang? Tract kâwm chu mit la tak a nih bâkah, a thute a tawi fel êm avângin, mite chuan hriat châkna an nei thei a; chu chuan hun tlêm tê an neih huna chhiar tûrin a chêttîr thei a ni. An hmanhmawh loh chuan, a chhûng thu ṭhenkhatte chu kan sawipui thei a. Mahse, vengva takin awm la, buaina siam thei âwm mite chu pumpelh ang che.
7. Tawn chawpa thu hrilh huna tract hman dân tûr târ langtu thiltawnte chu sawi rawh.
7 Tawn Chawpa Thu Hrilhna: Tract hmanga tawn chawpa thu hrilhna neih chu a awlsam a ni. Unaupa pakhat chuan in aṭanga a kal chhuah apiangin a iptêah tract tlêm a ak ṭhîn a. Dâwr nghâktu ang chi mi ṭhenkhat a tawn hunah chhiar tûr engemaw pêk a duh thu sawiin, tract chu a pe ṭhîn a ni. Nupa tuak khat chuan khawpui pakhat an fanna tûrah ram hrang hranga mite an tâwk dâwn tih an hria a. Chuvângin, ṭawng dang hmangte hnêna thu hrilh theih nâna buatsaih Nations tih lehkhabutê leh tract engemaw zât chu ṭawng chi hrang hrangin an keng ta a. Tichuan, kawng sîra thil zuartute emaw, park-a an kianga ṭhute emaw, a nih loh leh an thil eina hmuna mi emawte’n ṭawng dang an hmang a ni tih an hriat hunah, anmahni ṭawnga tihchhuah tract chu an pe ṭhîn a ni.
8. Eng kawngin nge tract-te hi chi ang a nih?
8 ‘I Chi Tuh Rawh’: Tract hi thlai chi nêna tehkhin theih a ni a. Lo neitu chuan a eng ber hi nge ṭiak dâwn tih a hriat loh avângin, kut sûm hlek lovin thlai chi a theh ṭhîn. Thuhriltu 11:6 chuan: “Zîngah i chi tuh la, tlaiah i kut sûm suh; i hre si lo, a ṭhang ṭha tûr khawii nge, hei hi nge, kha kha nge, an ṭha ve ve dâwn,” tiin a sawi a ni. Chuvângin, he thu hrilhna hmanrua ṭangkai tak hmang hian ‘hriatna i tidarh’ zêl ang u.
[Phêk 3-naa thu lâk chhuah]
Tract hi thu hrilhna hmanraw ṭangkai tak a nih avângin, November thla aṭanga inṭanin thla khat chhûnga thu leh hla sem chhuah tûrte zîngah a khât tâwka telh ṭhin a ni tawh ang