Tract Lan Dân Thar Phûrawm Tak!
1. Rawngbâwlna atâna hman tûr engin nge lan dân thar phûrawm tak nei?
1 Kum 2013-a “Pathian Thu Chu Thutak A Ni!” tih District Inkhâwmpuiah khân tract thar chi nga tihchhuah a ni a. Chu bâkah, Lalram Chanchin Thar No. 38-na, “Mitthite Hi An Nung Leh Thei Tak Tak Ang Em?” tih thupui nei tract pawh chu chûng tract inzawmte zîngah chuan telh a ni bawk. Hêng tract parukte hian lan dân thar phûrawm tak a nei a. Chutianga siam a nih chhan chu eng nge ni? In tina kan sem hunah, engtin nge a lan dân thar chu kan hman ṭangkai theih?
2. Lan dân thar neia siam a nih chhan chu eng nge ni?
2 Engvângin Nge Lan Dân Thar Neia Siam A Nih?: In tina ṭha taka thu sawi tûr chuan tih tûr pali a awm a: (1) Inbiak ṭan nân ngaih dân sawitîr thei zawhna pakhat zâwt rawh. (2) Chu mi chungchâng Bible sawi dân hrilh rawh. (3) In neitu chhiar atân thu leh hla chhuah pe chhuak rawh. (4) Nakina chhân tûr zawhna pakhat hnutchhiahin, tlawhkîr dân tûr ruahmanna siam rawh. Tract-te lan dân thar avângin, kan sawi tâk tih tûr palite chu awlsam takin kan ti thei a ni.
3. Engtin nge rawngbâwlnaah tract thar chu kan pêk chhuah theih?
3 A Hman Dân Tûr: (1) In neitu chibai i bûk hnuah, tract phêk khatnaa rilru la tak duhthlan tûr zawhnate chu hmuhtîrin, a engemaw ber thlantîr rawh. (2) Tract chu keu la, “Bible Sawi Dân Chuan,” tih hnuaia thu awm chu sawipui rawh. A remchân chuan, Bible aṭang ngeiin Bible chângte chu chhiarpui ang che. In neituin hun a neih chuan “I Ṭangkaipui Theih Dân” tih thu chu sawipui rawh. (3) Tract chu pe la, a hman huna lo chhiar chhuak tûrin fuih bawk rawh. (4) I chhuahsan hmain, a hnung lama “Ngaihtuah Tûr” tih hnuaia zawhna awm chu hmuhtîr la, kal leh huna Bible chhânna sawipui tûrin ruahmanna siam ang che.
4. Tract tharte chu tlawhkîr hunah engtin nge kan hman theih?
4 Tlawhkîr neih pawh a awlsam hle bawk a. I tlawh hnuhnûn bera i hnutchhiah tâk zawhna chhâng tûrin tract hnung lama Bible châng târ lante chu hmang ang che. I chhuahsan hmain Chanchin Ṭha brochure lem chu kawhhmuh la, in neitu chu brochure tak tak hmuhtîrin an thusawiho lai chanchin tam zâwk hmuh theihna tûr zirlai bung pakhat i kawhhmuh hnuah brochure chu pe ang che. Rem a tih chuan, tlawh leh hunah chu chu sawipui tûrin ruahmanna siam rawh. Chutianga i tih chuan Bible zirna i ṭan daih tawh tihna a nih chu! Brochure pêk chhuah aiin tract dang pawh i pe thei a, chu mi sawiho tûra tlawh leh tûrin ruahmanna i siam thei bawk a ni.
5. Kan rawngbâwlnaah tract chuan eng hlutna nge a neih?
5 Tract hi kan rawngbâwlnaah kum 130 chuang hman a ni tawh a. Pian hmang leh size chi hrang hrang nei mah se, thu hrilh nâna hmanraw ṭangkai tak a ni vek a ni. Khawvêl puma Bible hriatna a darh zêl nân lan dân thar nei hêng tract-te hi i hmang ṭangkai hle ang u.—Thuf. 15:7a.