Hriatrengna Atân Thinlung Hlim Takin Inbuatsaih Rawh
1. Hriatrengna hun chu eng tih nâna hun ṭha tak nge a nih?
1 March 26, Thawhlehni-a neih tûr Hriatrengna inkhâwm chuan, chhandamna min pêk nâna Pathian thiltih chunga lâwmna lantîr theihna hun remchâng ṭha tak min pe a ni. (Is. 61:10) He hun a lo thlen hma pawh hian, thinlung hlim tak chuan ṭha taka inbuatsaih tûrin min ṭanpui ang. Engtin nge?
2. Hriatrengna hun serh atâna inbuatsaih tûrin engin nge min chêttîr?
2 Hun Serh Atâna Inbuatsaihna: Lalpa Zanriah hi awmze thûk tak nei, hun serh mâwlmang tak si a ni a. Chutih rualin, thil pawimawhte hmuh hmaih a nih loh nân inruahman lâwk a ngai a ni. (Thuf. 21:5) A hun leh a hmun inâwm tak chu thlan tûr a ni a. Entîrna hman tûr inâwm takte chu neih a ngai a ni. Inkhâwmna hmun tûr chu tihfai a, lo peih sa thlap a ngai bawk. Thusawitu tûra ruat chu ṭha takin a inbuatsaih tûr a ni a, entîrna semtu tûrte leh inkhâwm enkawltu tûrte chuan kaihhruaina chiang tak an nei bawk tûr a ni. Hêngte zînga a tam zâwk hi tihfel tawh a ni ngei ang. Chhandam theihna nei tlanna chunga lâwmna chuan he hun serh pawimawh tak atâna ṭha taka inbuatsaih tûrin min chêttîr a ni.—1 Pet. 1:8, 9.
3. Engtin nge Lalpa Zanriah atâna kan thinlung kan buatsaih theih?
3 Thinlung Buatsaihna: Hriatrengna awmzia zawng zawng hre thiam tûrin kan thinlung kan buatsaih a pawimawh bawk. (Ezr. 7:10) Chu mi atân chuan, Hriatrengna atân bîka Bible chhiar tûrte chhiar nân leh Isua lei lam nun tâwp lam ngaihtuah nân hun kan insiam tûr a ni. Isua inpêkna rilru puthmang ngaihtuahna chuan amah entawn tûrin min chêttîr ang.—Gal. 2:20.
4. Tlanna aṭanga kan hmuh hlâwkna eng berin nge hlimna nasa ber pe che?
4 Krista thihna chuan Jehova Lal chungnunna chu thiam a chantîr a. Chu chuan sual leh thihna ata min chhuah zalên a ni. (1 Joh. 2:2) Pathian nêna inlaichînna muanawm tak leh chatuan nunna kawng chu min hawnsak bawk a ni. (Kol. 1:21, 22) Tin, Jehova hnêna kan inpumpêkna thutiam hlen chhuah kan tumna tichak tûr leh Krista zirtîrte anga ding nghet tlat tûrin min ṭanpui bawk. (Mt. 16:24) Lo awm tûr Hriatrengna atâna i inbuatsaih a, i tel hian, i hlimna chu pung zual rawh se!