“Hei Hi Ti Ṭhîn Rawh U”
April 5-ah Hriatrengna Hun Serh Hman A Ni Ang
1. Engvângin nge Hriatrengna hun serh hman hi a pawimawh êm êm?
1 “Mi hriat reng nân hei hi ti ṭhîn rawh u.” (Lk. 22:19) Hêng thute hmang hian Isua chuan inthawi nâna a thih hriatrengna hmang tûrin a zirtîrte chu a hrilh a ni. Tlanna thil hlen chhuahte han ngaihtuah hian Kristiante tân kum tina kan neih Hriatrengna hun serh aia ni pawimawh zâwk leh hlu zâwk dang a awm thei lo. Kumin April 5-a hun serh hman tûr kan hnaih rualin, Jehova chunga kan lâwmzia engtin nge kan lantîr ang?—Kol. 3:15.
2. Engtin nge Hriatrengna kan ngaihhlutzia chu zirna leh chhût ngunna hmanga kan lantîr theih?
2 Inbuatsaihin: Kan thil ngaih pawimawhte tân chuan kan inbuatsaih tlângpui ṭhîn a. Isua leia a nun tâwp dâwn lama thilthlengte chhûngkuaa ngaihtuahna leh chhût ngunna hmangin, Hriatrengna hun atân kan thinlung kan buatsaih thei a ni. (Ezr. 7:10) Bible châng ṭhenkhat chu calendar-ah leh Nî Tina Pathian Lehkha Thu Belh Chianna bu-ah hmuh theih a ni a, a famkim zâwk leh Greatest Man (English) lehkhabua a chanchin chuanna lai kawhhmuhna chu February 1, 2011, chhuak Vênnainsâng, (English) phêk 23-24-ah hmuh theihin a awm a ni.
3. Engtin nge Hriatrengna kan ngaihhlutzia chu rawngbâwlnaa inhman tam lehzualna hmanga kan lantîr theih?
3 Thu Hrilin: Kan ngaihhlutzia chu thu hrilhnaa inhmang tam lehzualin kan lantîr thei bawk a. (Lk. 6:45) Hriatrengnaa tel ve tûra sâwmna campaign chu khawvêl pumah March 17, Inrinni aṭanga neih ṭan a ni ang. Auxiliary pioneer ang emawa rawngbâwlnaa inhmang tam lehzual tûrin i hun duan i siamrem thei ang em? Chu mi chungchâng chu Chhûngkuaa Pathian Biakna in neih leh hunah engvângin nge in sawiho loh vang?
4. Hriatrengna hun hmanna aṭangin eng hlâwkna nge kan dawn theih?
4 Kum tina Hriatrengna hun serh hman chu kan va hlâwkpui tak êm! Tlanna atâna a Fapa mal neih chhun min pêkna aṭanga lang Jehova thilphalzia ngaihtuahna chuan kan hlimna leh amah kan hmangaihna a tipung a ni. (Joh. 3:16; 1 Joh. 4:9, 10) Chu chuan mahni tâna nung tawh lo tûrin min chêttîr a. (2 Kor. 5:14, 15) Vântlâng hmaa Jehova chawimawi châkna min neihtîr bawk a ni. (Sâm 102:19-21) Dik takin, Jehova chhiahhlawh lâwmna châng hriate chuan April 5 Hriatrengna hun serha ‘Lalpa thihna entîr,’ a nih loh leh puanchhuah theihna hun remchâng an neih tûr chu an nghâkhlel hle a ni.—1 Kor. 11:26.