Kan Lâwmzia I Lantîr Ang U
April 17-ah Hriatrengna Hman A Ni Ang
1. Hriatrengna hun lai hian fakna hla phuahtu rilru put hmang ang neih chu engvângin nge thil inâwm lehzual a nih?
1 Fakna hla phuahtu chuan Jehova zahngaihna leh chhan chhuahna nasa tak chunga a lâwm avângin: “Ka chunga a thiltih ṭhat zawng zawng avâng hian LALPA chu eng nge ka pêk ve thung ang?” tiin a zâwt a. (Sâm 116:12) Tûn laiah, Pathian chhiahhlawhte chuan lâwm chhan tûr an nei lehzual a ni. He thâwk khum thu ziak a nih hnu kum zabi tam takah, Jehova chuan mihringte hnêna thilpêk ropui ber—tlanna—chu a pe a. April 17-a Krista thih hriatrengna hmang tûra kan inbuatsaih hian, lâwm nachâng hriat chhan tûr ṭha tak kan nei a ni.—Kol. 3:15.
2. Tlanna kan hlut chhan ṭhenkhat chu eng nge ni?
2 Tlanna Avânga Malsâwmnate: Tlanna avângin “kan sualte ngaihdamna” kan nei thei a. (Kol. 1:13, 14) Chhia leh ṭha hriatna thiang nên Jehova kan be thei bawk a. (Heb. 9:13, 14) Tin, ṭawngṭaia amah kan pan hunah Jehova chu zalên tak leh huai takin kan be thei a. (Heb. 4:4-16) Chu bâkah, tlanna ringtute chuan chatuana nunna beisei tûr ropui tak an nei bawk!—Joh. 3:16.
3. Tlanna avânga Jehova chunga kan lâwmzia engtin nge kan lantîr theih?
3 Lâwmna Kan Lantîr Dân: Lâwmna kan lantîr theih dân kawng khat chu Hriatrengna atâna Bible chhiar tûrte chu nî tina chhiar a, ngun taka chhût hi a ni. Tlanna kan hlutzia chu Jehova hnênah tih tak zeta ṭawngṭaiin kan hrilh thei a ni. (1 Thes. 5:17, 18) Isua thupêk zâwma Hriatrengna hun serha kan telna hian kan lâwm tak zetzia a lantîr a. (1 Kor. 11:24, 25) Chu bâkah, Jehova hmangaihna huap zau thei tak chu entawnin, mi a tam thei ang berte kan ruala rawn tel tûrin kan sâwm thei a ni.—Is. 55:1-3.
4. Eng nge tih kan tum tlat ang?
4 Lâwm nachâng hria Jehova chhiahhlawhte chuan Hriatrengna hun serh hi inkhâwm dang satliah ang maiin an thlîr lo. Kum khat chhûnga nî pawimawh ber a ni! Hriatrengna hun a hnaih rual hian: “Aw ka nunna, LALPA chu fak la, a thiltih ṭhat zawng zawng chu theihnghilh suh,” tih ziaktu fakna hla phuahtu thiltum ang hi i tum ve tlat ang u.—Sâm 103:2.