Pathian Thilpêk Ropui Ber Avânga Lâwmna Kan Lantîr Theih Dân
1. Engvângin nge Pathian Jehova lakah a bîk taka kan lâwm?
1 Pathian Jehova’n “thilpêk ṭha” min pêk tam tak zîngah chuan tlanna atâna a Fapa min pêk chu a ropui ber a. (Jak. 1:17) Chu chuan kan sualte ngaihdamna pawh tiamin, malsâwmna tam tak min dawntîr a ni. (Eph. 1:7) Chu mi avâng chuan engtiklai mai pawh hian kan lâwm a. Hriatrengna hun lai hian, a bîk takin he thilpêk hlu tak hi ngun takin kan ngaihtuah a ni.
2. Engtin nge kei mahni leh kan chhûngkuaah tlanna ngaihhlutna kan neih theih ang?
2 Ngaihhlutna Neihtîr Rawh: In chhûngkuaa ngaihhlutna in neih theih nân, March 30-a Hriatrengna hun hma chawlhkâra Chhûngkuaa Pathian Biakna in neih hunte chu engvângin nge tlanna chungchâng sawiho nân in hman loh vang? Tin, chhûngkua angin Hriatrengna hun atâna a bîk taka Bible chhiar tûrte chu chhiarho bawk ang che u. Tlanna i hlâwkpui dân leh chu chuan Pathian Jehova, nangmah, mi dangte, leh i hma lam hun i thlîr dânte a nghawng dân chu ngaihtuah ang che.—Sâm 77:12.
3. Engtin nge kan lâwmzia kan lantîr ang?
3 Lâwmna Lan Chhuahtîrna: Tlanna avânga lâwmna chuan Pathian Jehova chungchâng leh a hmangaihna nasa tak avânga a Fapa leia a rawn tirh chungchâng mite hnêna hrilh tûrin min chêttîr a. (Sâm 145:2-7) March, April, leh May thlaahte hian chhûngkaw ṭhenkhatte chuan an chhûngkuaa pakhat talin auxiliary pioneer a thawh theih nâna ruahmanna siamin tlanna avânga an lâwmzia chu an lantîr a ni. Chutianga i ti thei lo a nih pawhin, rawngbâwlnaa tel tam lehzual thei tûrin ‘remchânnate i lei’ thei ang em? (Eph. 5:16) Kan lâwmna chuan mi dangte Hriatrengnaa lo tel ve tûra ṭanpui tûrin min chêttîr bawk ang. (Thup. 22:17) I sâwm tûr i tlawhkîr te, Bible zirpui te, chhûngkhat te, hna thawhpui te, leh ṭhenawm te hming chu ziak chhuakin, a bîk taka Hriatrengnaa sâwmna campaign-ah chuan theih tâwp chhuahin tel ang che.
4. Eng kawngin nge Hriatrengna hun chu fing takin kan hman ang?
4 Hriatrengna hun hian mihringte hnêna Pathian Jehova thilpêk kan ngaihhlutzia lantîr theihna hun thar min pe a. He hun hi tlanna leh “Krista hausakna chhui chhuah rual lohte” avânga kan lâwmna tihpun nân leh lantîr nân i hmang ang u.—Eph. 3:8, 9.