Hun Remchângah I La Ang Em?
Hriatrengna Lo Awm Tûrah Lâwmna Kan Lantîr Thei
1. Hriatrengna hun lai hian eng hun remchâng ṭha tak nge awm?
1 April 14-a neih tûr Hriatrengna chuan Jehova ṭhatna avânga lâwmna nei tûr leh târ lan theih nân hun remchâng ṭha tak min pe a. Luka 17:11-18-na chuan lâwm nachâng hriatna chungchânga Jehova leh Isua thlîr dân a târ lang a ni. Phâr tihdam tâk sâwm zînga pakhat chauhvin lâwm thu a sawi chu a lungchhiatthlâk hle. Nakin lawkah chuan, tlanna thilpêk chuan natna zawng zawng tihdamna leh chatuan nunna chu a rawn thlentîr ang! Chutih hunah chuan nî tin Jehova hnênah lâwm thu kan sawi ngei tawh ang. Mahse, chawlhkâr lo awm tûrahte hian kan lâwmzia chu engtin nge kan lantîr theih?
2. Engtin nge tlanna avânga lâwmna kan neih theih?
2 Lâwmna Nei Rawh: Lâwmna hi ngaihtuahna aṭanga lo awm a ni tlângpui a. Tlanna kan ngaihhlut theih nân Hriatrengna atân bîka Bible chhiar tûrte chu revised New World Translation appendix B12-naah te, calendar-ah te, leh Nî Tina Pathian Lehkha Thu Belh Chianna-ahte hmuh theih a ni. Engvângin nge chu chu chhûngkuaa in chhiarho loh vang? Chutianga tihna chuan tlanna avânga kan lâwmna a tizual ang a. Chu chuan kan nungchangah nghawng ṭha tak a nei ang.—2 Kor. 5:14, 15; 1 Joh. 4:11.
3. Hriatrengna hun laiin eng kawngtein nge kan lâwmna kan lantîr theih?
3 Lâwmna Lantîr Rawh: Lâwmna chu thiltiha târ lan a ni a. (Kol. 3:15) Phâr chu a lâwm avângin Isua hmu a, lâwm thu hrilh chu a tum ta tlat a ni. Ani chuan mak taka tihdam a nih dân chu mi dangte hnênah phûr takin a hrilh ngei bawk ang. (Lk. 6:45) Tlanna avânga lâwmna chuan Hriatrengna puan chhuahna campaign-ah ṭhahnem ngai taka tel tûrin min chettîr ang em? Hriatrengna hun laia Auxiliary pioneer thawh emaw, rawngbâwlnaa kan inhman tam lehzual emaw chu kan lâwmzia lantîr theih dân kawng dang ṭha tak a ni. Hriatrengna neih zânah chuan, thinlung taka kan lâwmna chuan lo inkhâwmte chu lo lâwm tûr leh an zawhnate chhâng tûrin min chêttîr ang.
4. Engtin nge he Hriatrengna hi inchhîrna nei lova kan siam theih?
4 He Hriatrengna hi kan hman hnuhnûng ber a ni ang em? (1 Kor. 11:26) Chu chu kan hre lo. He Hriatrengna hi a hnuhnûng ber a nih dâwn chuan, lâwmna lantîr theihna hun remchâng ṭha dang chu kan nei tawh dâwn lo tih erawh kan hria a ni. Chu chu remchângah i la ang em? Kan kâ aṭanga lâwmna thu chhuakte leh kan thinlunga ngaihtuahnate chuan phal taka tlanna Petu, Jehova chu tilâwm rawh se.—Sâm 19:14.