Chanchin Ṭha Brochure Hmangin Zirtîr Rawh
1. Chanchin Ṭha brochure chu eng atâna siam nge ni?
1 Kan Lalram Rawngbâwlna July thla chhuaka kan sawiho tawh angin, kan zirtîrna hmanraw bâwma tel hmanraw pawimawh tak pakhat chu Pathian Min Pêk Chanchan Ṭha! brochure hi a ni a. Bible chângte chu ziak lang lova târ lan chauh a nih avângin, in neitute chuan Bible aṭang ngeiin an chhiar thei a ni. Zir atâna siam kan thu leh hla chhuah tam takte chu chhiartuin amaha a inzir theih tûra siam ni mah se, he brochure hi chu kaihruaitu nêna sawiho atâna siam a ni thung. Chuvângin, he brochure hi kan sem hunah, in neituin Bible aṭanga chanchin ṭha zir a phûrawm dân a hmuh theih nân Bible zir dân chu entîr kan tum tûr a ni.—Mt. 13:44.
2. Tlawh hmasak ber ṭumah Chanchin Ṭha brochure chu engtin nge kan hman theih?
2 Tlawh Hmasak Ber Ṭumah: Heti hian i sawi thei ang: “Mite hian nakina thil lo thleng tûrte an ngaihven avângin kan lo lêng a. Dinhmun hian ṭhat lam a pan chhoh i ring em? [A chhânna nghâk rawh.] Bible-ah chuan beiseina min petu chanchin ṭha a chuang a. Hetah hian Bible-in chhânna a pêk zawhna ṭhenkhat a awm a ni,” tiin. In neitu hnênah brochure chu pe la, a kâwm hnung lama zawhna pakhat thlantîr ang che. Tichuan, a thlan chu keu la, paragraph hmasa ber hmangin zirna neih dân entîr rawh. Tih theih dân dang chu, zirlai i thlan sa ṭanchhanin in neitu tuina chawktho thei zawhna pakhat zâwt la, tichuan brochure-in Bible aṭanga a chhânna hmu tûra a ṭanpui theih dân entîr ang che. Chu zirlai chuan jw.org-ah video en tûr a neih chuan, thuchhuahtu ṭhenkhat chuan an thusawinaah an chhuahsak thei a ni.
3. Chanchin Ṭha brochure hmanga Bible zirna kaihhruai dân tûr sawi rawh.
3 Zirna Kaihhruai Dân: (1) In neituin thu pawimawh laite a ngaihven theih nân numbar pêk hawrawp dum tak bîka ziah zawhnate chu chhiarsak rawh. (2) Chu mi zawhah paragraph chu chhiar rawh. (3) Hawrawp âwna ziak Bible chângte chu chhiar la, in neituin numbar pêk zawhnate Bible-in a chhân dân hre thiam tûra ṭanpui nân zawhnate thiam takin hmang rawh. (4) Zawhna hnuaiah paragraph dang a awm chuan, step 2-na leh 3-na hi tinawn rawh. Chu zawhna chu video pakhat nêna a inmil a, i la chhuahsak lo a nih chuan, sawiho laiin chhuahsak ang che. (5) A tâwpah, a hre thiam tih i chian theih nân, in neitu chu number pêk zawhna chhâng tûrin sâwm ang che.
4. He hmanraw ṭangkai tak hi thiam taka hmang tûrin engin nge min ṭanpui ang?
4 He hmanraw ṭangkai tak hi hre bel la. Hun remchâng a awm apiangin hmang rawh. Zirna i kaihhruai hmain, Bible zirlai leh zir tûra awm Bible chângte hmanga i chhûtpui theih dân tûr ṭha ber chu ngaihtuah ziah ang che. (Thuf. 15:28; Tirh. 17:2, 3) Chutianga i tih chuan thiltawn leh thiamnate i lo nei ang a, he brochure hi mite thutak zirtîr nâna i hmanraw duh berte zînga pakhat a lo ni ngei ang!