Pathian Min Pêk Chanchin Ṭha! Tih Brochure Hman Dân Tûr
Tlawhkîr leh Bible Zirpui Nei Tûra Min Pui Tûra Siam Brochure Thar
1. “I Thinlung Vêng Ṭha Rawh!” tih District Inkhâwmpuiah khân tlawhkîr leh Bible zirpui neih nâna min ṭanpuitu tûra siam eng brochure thar nge kan dawn?
1 “I Thinlung Vêng Ṭha Rawh!” tih District Inkhâwmpuiah khân, tlawhkîr leh Bible zirpui neih nâna min ṭanpuitu tûr brochure thar chu lâwm takin kan dawng a. Pathian Min Pêk Chanchin Ṭha! tih chu a ai a awh tâk Phût brochure nên a inang a, chutah chuan zir tûr thuziakte chu a tâwi hlawm hle a ni. Chuvângin, kawtkaia Bible zirpui neih nân a ṭangkai hle. Amaherawhchu, Phût brochure chu Bible zir tharte tâna pawm harsa thei tûr Kristiante thiltih tûr sawihona a nih laiin, he brochure thar erawh hi chuan Bible-a chuang chanchin ṭhate a thlûr zâwk a ni.—Tirh. 15:35.
2. Engvângin nge Chanchin Ṭha tih brochure chu tihchhuah a nih?
2 Chu brochure chu engvânga tihchhuah nge a nih? Khawvêl puma unaute chuan thutak lama mite hîp tûr leh Bible zirpui nâna kan hman ber Bible Zirtîrna bu lama awlsam taka min pakaitîr theitu tûr lehkhabu tluangtlam tak neih an duh thu an sawi a ni. Lehkhabu hmanga Bible zirna neih hrehtute chuan brochure hmanga Bible zirna neih chu an duh zâwk ṭhîn a. Chu bâkah, brochure chu ṭawng chi hrang tam taka lehlin a awlsam lehzual bawk a ni.
3. Engtin nge he brochure hi zir tûra siam thu leh hla chhuah dangte laka a danglam?
3 Ruahman A Nih Dân: Zir tûra siam kan thu leh hla chhuah tam takte chu a chhiartuin ṭanpui ngai lova a hriatthiam mai theih tûra ziah a ni hlawm a. Mahse, he brochure hi chu a danglam a ni. Zirtîrtu nêna Bible zirna neih dân kawhhmuh nâna ziak a ni a. Chuvângin, tuemaw hnêna i pêk chhuah hunah paragraph pahnih khat vêl chhiara sawipui chu a ṭha a ni. A paragraph-te hi a sei loh avângin, an kawtkaiah emaw, an hna thawhna hmunah emaw pawh sawiho theih a ni ang. Zirlai 1-na chu ṭan nân ṭha hle mah se, brochure khawi lai aṭang pawhin Bible zirna kan ṭan thei reng a ni.
4. Engtin nge brochure chuan Bible aṭanga zirtîr tûra min ṭanpui?
4 Kan thu leh hla chhuah tam takahte chuan, zawhnate chhânna chu paragraph-ah hmuh theihin a awm a. Amaherawhchu, he brochure-ah hi chuan, a chhânnate chu Bible-ah hmuh theih a ni tlângpui a ni. Mi tam tak chuan kan thu leh hla chhuah aṭanga zirna neih aiin, Bible aṭanga zir chu an duh zâwk a. Chuvângin, Bible châng târ lan chhûnga thu awmte chu lâk chhuah a ni meuh lo. Chungte chu Bible aṭang ngeia chhiar tûr a ni. Hei hian, zirlaite chu an thil zirte chu Pathian hnên aṭanga lo chhuak a ni tih hre tûrin a ṭanpui a ni.—Is. 54:13.
5. Engvângin nge a kaihruaitu tân zir dâwn apianga ṭha taka inbuatsaih chu a pawimawh?
5 Brochure chuan Bible châng zawng zawngte chu a hrilhfiah vek lo. Engvângin nge? Zirlai chu zawhnate zawh châkna neihtîr tûr leh a kaihruaituin a zirtîr thiamna hmantîr thei tûra ruahman a nih vâng a ni. Chuvângin, zir tûr apiangte atâna ṭha taka lo inbuatsaih lâwk chu a pawimawh hle. Fîmkhur a ngaihna chu: Ṭawng tui tam lutuk suh ang che. Bible chângte hrilhfiah chu nuam kan ti a. Mahse, zirlai chu Bible châng chungchânga a ngaih dânte sawi tûra kan sâwm hian kan hlawhtling lehzual ṭhîn a ni. Zawhnate thiam taka hmangin, Bible chângte awmzia hre thiam tûrin kan ṭanpui thei a ni.—Tirh. 17:2.
6. Engtin nge he brochure hi (a) mite’n Pathian leh Bible an rinhlelhnaah kan hman theih? (b) intin kalnaah kan hman theih? (c) tlang taka Bible zirpui tûra sâwmnaah kan hman theih? (d) tlawhkîrna neih hunah, kan hman theih?
6 Thla tina sem chhuah tûr chu eng pawh ni se, Bible zirna atâna kan hman thuchhuah dangte ang bawkin, he brochure hi engtik hunah pawh sem chhuah theih a ni a. Mi tam tak chuan kawtkaia Bible zirna neih ṭan nâna hman chu nuam an ti hle ang. Chu bâkah, district inkhâwmpuia târ lan tawh angin, tuina neite tlawhleh huna he brochure hmanna chuan, “tlawhkîrna neih a tiphûrawm thei tak zet a ni!”—Phêk 6-8-a bâwmte en rawh.
7. Engtin nge brochure hmanga Bible zirna i kaihhruai theih?
7 Zirna Kaihhruai Dân Tûr: Sawihona chu number pêk hawrawp dum tak bîka ziah zawhnate chhiarin kan ṭan thei a. Tichuan, paragraph leh hawrawp âwna ziak Bible chângte chu chhiar ang che. Zawhnate thiam taka hmangin, in neitu chu Bible châng awmziate hre thiam tûrin ṭanpui rawh. Chutah, zawhna danga pakai hmain, in neitu chuan a hre thiam ngei a ni tih tihchian nân hawrawp dum tak bîka ziah zawhna chu zâwtin chhântîr ang che. Tlawhkîrna kan neih hmasak lam ṭum hnih thum vêlah chuan, hawrawp dum tak bîka ziah zawhna pakhat chauh sawipui chu a ṭha ber mai thei. A hnuah, zirlai pakhat a puma sawipui nân sawihona chu kan tirei deuh zâwk thei pawh a ni thei a ni.
8. Engtin nge Bible chângte kan hmêlhriattîr ang a, engvângin nge?
8 “Chhiar rawh,” tihin a zui Bible châng târ lante chuan hawrawp dum tak bîka ziah zawhna chu tlang takin a chhâng deuh tlângpui a. Bible châng i hmêlhriattîr hian, “Tirhkoh Paula ziak” ti emaw, “Jeremia hrilh lâwkna hi lo chhinchhiah rawh,” ti emawa sawi chu pumpelh rawh. In neitu chuan kan thu chhiar chu mihring thu ve maiah a ngai thei a ni. Chuvângin, “Pathian Thuin a sawi dân chuan” ti emaw, “Bible hrilh lâwk hi lo chhinchhiah rawh,” ti emawa sawi chu a ṭha zâwk a ni.
9. Bible châng târ lan zawng zawngte chu zirna kan neih chhûnga chhiar vek tûr a ni em?
9 Bible châng târ lan zawng zawng kan chhiar tûr nge ni a, “chhiar rawh” tihte chauh kan chhiar zâwk dâwn? Chu chu dinhmun azir a ni ang. Bible châng târ lan zawng zawngte chu chhan neia dah vek a ni a. Bible châng tinte chu sawiho phu vek a ni. Mahse, zirlaiin hun leh tuina emaw, lehkha chhiar thiamna emaw a tlâk chham chuan, Bible châng “chhiar rawh” tihte chauh chu kan chhiarpui thei a ni.
10. Eng hunah nge Bible zirna chu Bible Zirtîrna bu-a kan pakaipui theih?
10 Bible Zirtîrna Bu-a Pakai Hun Tûr: Vawi tam tak kan sawiho theih tawh a, hun bi neia kan zir tawh chuan, Bible Zirtîrna bu-ah kan pakai thei a, a nih loh pawhin Chanchin Ṭha brochure chu a zawh thlengin kan zirpui thei a. Pakaitîr hun chungchângah thuchhuahtute thu tlûkna siam tûr a ni. Bible Zirtîrna lehkhabua kan pakai chuan, a bul aṭanga ṭan ngei ngei tûr a ni em? Hetah hian tih dân bîk a awm chuang lo. Mite chu an in ang lo va. Amaherawhchu, zirlai a tam zâwkte chuan thu inang kimchang lehzuala Bible Zirtîrna bu aṭanga zir chu an hlâwkpui a ni.
11. Engvângin nge he brochure thar hi kan hman ṭangkai ang?
11 Chanchin ṭha hriat tûr a awm meuh lohna khawvêlah hian, chanchin ṭha awm theite zinga ṭha ber—Pathian Ramin ro a rêl tawh a, felna khawvêl thar a rawn thlentîr thuai ang tih chanchin ṭha—puan chhuah theihna chanvo ropui tak chu kan nei a ni! (Mt. 24:14; 2 Pet. 3:13) He thuchah hretu tam takte chuan he thâwk khum thu: “Tlângahte chanchin ṭha thlena, remna thu tlângaupuia, thil ṭha chanchin ṭha a thlena, chhandamna thu tlângaupuia, Zion hnêna ‘I Pathian chu lalah a ṭhu,’ titu kê chu a va mawi em!” tih hi an pawm ngei kan ring tlat a ni. (Is. 52:7.) He brochure thar hi kan thu hrilhna biala Pathian thua tuihâlte hnêna Pathian min pêk chanchin ṭha thlen nân i hmang ang u!
[Phêk 6-naa milem]
Pathian leh Bible Chungchânga Rinhlelhna Neitute Hnênah:
● Hmun ṭhenkhatah chuan, thuchhuahtute’n “Pathian” “Isua,” tih leh “Bible” tih thu malte chu inbiakna titâwptu a ni tih an hria a. Chutiang dinhmunah chuan, kan lên luh hmasak ber ṭumah tualchhûnga mite ngaihven hlawh tûr, sawrkâr ṭha neih a ṭûlzia te, chhûngkuate tâna ṭanpuina ṭangkai tak hmuhna tûr te, leh nakin huna thil lo thleng tûrte ang chi sawipui chu a ṭha ber thei ang. A nih loh leh, Pathian a awm tih kan hriat theih dânte leh Bible rin tlâkziate sawiho va, vawi tam tak kan inbiak hnuah, Chanchin Ṭha brochure chu kan hmêlhriattîr thei bawk.
[Phêk 7-naa milem]
In Tin Kal Hunah:
● “Pathianin kan hrehawm tawrhna ata min chhan chhuah dâwn leh dâwn loh hi i ngaihtuah ngai em? [A chhânna nghâk rawh.] Hemi chungchânga Bible sawi dân ṭhenkhat chu ka hmuhtîr thei che ang em? [In neituin tuina a neih chuan chhunzawm rawh.] He brochure hian chu zawhna chhânna Bible-a i hmuh theihna lai chu a târ lang a ni. [Brochure chu pe la, zirlai 1-na, paragraph 1-na leh Jeremia 29:11 chu chhiarsak rawh.] Heta ṭang hian, Pathianin nakin hun ṭha zâwk nei tûrin min duh a ni tia thu tâwp siam chu a inâwm i ti ve em? [A chhânna nghâk rawh.] I duh chuan, he brochure hi i nei thei ang. Ka rawn kal leh hunah, ‘Engtin nge Pathianin hrehawm tawrhna awmtîrtu lakah mihringte a chhan chhuah ang?’ tih zawhna Bible chhân dân hmu tûrin paragraph 2-na hi kan sawiho dâwn nia.” In neitu chu tlawhkîr hmasak ber ṭuma hun nei tam thei anga a lan chuan, paragraph 2-na chhiara sawipuiin, Bible châng pathumte chu i chhiarsak thei bawk ang. Zawhna pahnihna sawiho tûra tlawhkîr leh tûrin ruahmanna siam ang che.
● “Mi tam tak chuan, a bîk takin harsatnate an neih hian ṭawngṭai an duh ṭhîn a. I ṭawngṭai ve ṭhîn em? [A chhânna nghâk rawh.] Pathianin ṭawngṭaina zawng zawng a ngaihthla niin nge i hriat a, ṭawngṭaina ṭhenkhatin amah a tilâwm lo zâwk? [A chhânna nghâk rawh.] Hemi chungchânga Bible sawi dân ṭhenkhat ka hmuhtîr thei che ang em? [In neituin tuina a neih chuan chhunzawm rawh.] Hêng zawhnate chhânna Bible-a hmuh theih dân târ langtu brochure pakhat ka nei a. [Brochure chu pe la, zirlai 12-naa paragraph hmasa ber leh “chhiar rawh” tih Bible chângte chu chhiarin, sawipui ang che.] Pathianin kan ṭawngṭaina a ngaithla duh tih hriat chu a mak hle a ni lâwm ni? Mahse, ṭawngṭaina hlâwkpui tak zet tûr chuan, Pathian kan hriat chian a ngai a ni. [Zirlai 2-na keu la, a thupui tête chu entîr rawh.] Rem i tih chuan, he brochure hi ka pe ang che a, ni dangah hêng zawhna tuiawm takte Bible chhân dân kan chhiar dûn leh thei ang.”
● “Mite hian he khawvêlin a pan lam an ngaihven êm avânga lo kal ka ni a. Kan dinhmunte hi a ṭhat chhoh theih i ring em? [A chhânna nghâk rawh.] Hemi chungchânga Bible sawi dân ṭhenkhat chu ka hmuhtîr thei che ang em? [In neituin tuina a neih chuan chhunzawm rawh.] Mi tam tak chuan Bible-ah beiseina min pe thei chanchin ṭha a chuang a ni tih hriat chu mak an ti hle a. Hetah hian Bible-in chhânna a pêk zawhna ṭhenkhat a awm a ni.” Brochure chu pe la, a kâwm hnung lama a tuizâwng ber zawhna pakhat thlang tûrin sâwm ang che. Tichuan, zirlai a thlan chu keuvin, zirna neih dân entîr rawh. A dawta zawhna sawiho leh tûra tlawhkîr leh tûrin ruahmannate siam bawk ang che.
[Phêk 8-naa milem]
Tlang Takin Sâwm Rawh (Bible zahna neitute hnênah):
● “Bible zir dân thar chungchâng hrilh tûr chea lo lêng lût lawk ka ni a. He brochure-ah hian zirlai 15 a awm a, chûng chuan zawhna pawimawh tak takte chhânna chu i Bible ngeia i hmuh theih dân a târ lang a ni. [A kâwm hma lam leh hnung lam chu entîr ang che.] Bible hriatthiam i lo tum tawh ngai em? [A chhânna nghâk rawh.] Zirlaite hriatthiam awlsam tak a ni tih ka hmuhtîr ang che aw. [Zirlai 3-naa zawhna 3-na paragraph hmasa ber leh Thu Puan 21:4, 5 chu chhiarin, sawipui rawh. A rem chuan, a dawt chiaha paragraph leh “chhiar rawh,” tih Bible chângte chu chhiarin, sawipui ang che.] I duh chuan he brochure hi ka hnutchhiah thei che a ni. Vawikhat tal Bible zir chhin rêng rêng tûrin kan fuih duh che a. I duh chuan, i chhunzawm thei ang. Kan lo kal leh hunah, zirlai pakhatna hi kan sawiho leh dâwn nia. Phêk khat lek a nih hi.”
[Phêk 8-naa milem]
Tlawhkîrna Neih Hunah Brochure Thâr Hmêlhriattîr Rawh:
● Tuina lantîrtu tuemaw kan tlawh leh hunah, heti hian kan sawi thei a ni: “Kan in hmu leh chu a va lâwmawm ve. Zawhna ngaihven awm tak takte Bible chhân dân târ langtu he brochure hi ka rawn ken sak che a. [Brochure chu pe la, a kâwm hnung lam en tûrin sâwm ang che.] A eng ber hi nge hriat i duh? [A chhânna nghâk la. Tichuan zirlai a thlan chu keuvin enpui ang che.] Bible chhân dân hmu tûra he brochure hman theih dân chu ka’n entîr ang che aw,” tiin. Paragraph pahnih khat vêl leh “chhiar rawh,” tia târ lan Bible chângte sawihona hmangin Bible zirna kaihhruai a nih dân entîr ang che. Hetiang hian, awlsam takin Bible i zirpui tihna a ni nghâl der mai! In neitu chu brochure hnutchhiah la, tlawhkîr leh tûrin ruahmannate siam ang che. Chu zirlai pakhat in zir zawh hunah, in neitu thlan zirlai dang emaw, brochure ṭantîr aṭangin emaw i sawipui thei a ni.