Tute Nge Tûn Laia Jehova Duhzâwng Titute Chu?
Tih Brochure Hman Dân Tûr Bible Zirlaite Inawpna Pâwl Lama Hruai Nâna Siam Brochure Thar
1. Jehova Duhzâwng tih brochure-in a tum thil pathumte chu eng nge ni?
1 Tute Nge Tûn Laia Jehova Duhzâwng Titute Chu? tih brochure thar chu i hmang ṭan tawh em? He brochure-in a tum chu (1) Bible zirlaite kan nihna hriat chhiantîr, (2) kan rawngbâwlna hre tûra ṭanpui, leh (3) kan inawpna pâwlin hna a thawh dânte hmuhtîr hi a ni. Jehova Duhzâwng tih brochure-ah chuan Bible zirna kan zawh hnua minute 5 aṭanga 10 chhûng leka awlsam taka sawi zawh theih tûr, phêk khat awh zirlai-te a chuang a ni.
2. He brochure ruahman a nih dân leh a hmêlhmangte chu sawi rawh.
2 Ruahman A Nih Dân: Brochure chu ṭhen thuma ṭhen a ni a, a chunga kan hmuh tâk angin, Jehova inawpna pâwl hmêlhmang chi hrang hrang chu a târ lang a. Zirlai thupui 28-te chu zawhna anga siam a ni a, a thupui tê hawrawp dum tak bîka ziahte chuan chu zawhna chu a chhâng a ni. Khawvêl pum huapa kan hnathawh dân târ lang tûrin ram 50 chuanga thlalâkte chu târ chhuah a ni bawk. Zirlai tam takah chuan “Hriat Belh Nân” tih bâwm a awm a, chutah chuan i Bible zirpuiin a bawhzui atâna i fuih theih tûr rawtnate a chuang a ni.
3. Engtin nge Jehova Duhzâwng tih brochure chu kan hman theih?
3 I Hman Theih Dân: Zirlai thupuia zawhnate chu hmuhtîrin sawihona chu ṭan ang che. Tichuan, zirlai pakhat chu chhiarin, a thupui tê hawrawp dum tak bîka ziahte chu sawi pawimawh bîk rawh. A tâwpah chuan, a phêk hnuaia ennawnna zawhnate chu sawipui ang che. Zirlai chu vawikhatah i chhiar chhuak vek thei a, a nih loh leh paragraph khat zêl chhiarin i sawipui thei bâwk a ni. Bible châng târ lante zînga chhiar tûr chu i rem hriatna hmangin thlang ang che. A milemte leh “Hriat Belh Nân” tih bâwmte sawiho pui chu theihnghilh suh. A tlângpui thuin, zirlai-te chu a indawta sawipui tûr a ni. Amaherawhchu, a tuizâwng tak thu sawipui theih nân zirlai kal kân chu hreh suh ang che. Entîr nân, inkhâwmpui a awm hnai a nih chuan, zirlai 11-na i zirpui thei a ni.
4. Engvângin nge he brochure thar i neih avânga i lâwm?
4 Tuemaw Bible kan zirpui hian, kan Pa vâna mi nêna inhmêlhriat tûrin kan ṭanpui tihna a ni a. Amaherawhchu, Jehova inawpna pâwl chungchâng kan zirtîr pawh a ngai bawk a ni. (Thuf. 6:20) Chutianga zirtîrna tiawlsamtu he brochure thar kan nei hi kan va lâwm tak êm!