Rawngbâwlnaah Thiamna Tihmasâwn Rawh—Bible Zirpuite Chu Mahnia Inzirna Ṭha Nei Tûra Zirtîrin

Rawngbâwlnaah Thiamna Tihmasâwn Rawh—Bible Zirpuite Chu Mahnia Inzirna Ṭha Nei Tûra Zirtîrin

A Pawimawh Chhan: Thlarau lama puitling chho tûr chuan, Bible zirpuite tân an rilru leh thinlung chu Pathian Thu zirtîrna bulpui berte mai aia tama châwm a ngai a. (Heb. 5:⁠12–6:⁠1) Zirna nei tûr chuan ṭan lâk a ngai a. Chutah chuan kan thu hriat tawhsate leh kan thu hriat tharte thlunzawm a, chu mi hlut dân chhût ngun a tel a ni. (Thuf. 2:1-6) Mahnia zir bingna neih dân zirna chuan zir lai chu kan Kristian thu leh hla chhuahte hmanga Bible zawhnate chhânna hmu tûrin a ṭanpui ang. An thil zirte nunpui tûra nasa taka ṭan an lâkna chuan Kristiante tawh tûr fiahnate chu hmachhawn thei tûrin anni chu a thuam nghet ang.—⁠Lk. 6:47, 48.

A Tih Dân Tûr:

• Inzirna neih dâwn apianga ṭawngṭaia Jehova hnêna ṭanpuina dîl a pawimawhzia sawi uar rawh.—⁠Joh. 14:26; 1 Kor. 2:10.

• Atîr aṭangin, i Bible zirpui chu zirna atâna inbuatsaih lâwk tûrin fuih la. I lehkhabu chu hmuh la, a thu pawimawh lai târ langtu thumal emaw, ṭawngkauchheh emawte chauh i rîn dân leh chhinchhiah dânte chu zirtîr bawk ang che.

• I zirpui chu ama ir-âwm chhuak ngeiin zawhnate chhântîr la. Zirna chu zirlaiin lehkhabua a chhânna awmsa a chhiar chhuahna zawhna leh chhânna tuiawm lo takah chantîr suh ang che.

• I zirpui chu nî tina Bible chhiar tûrin fuih la. A tih theih dân tûr târ langtu jw.org-a Bible chhiarna hun duan chu hmuh rawh. Nî tina Bible chhiar chu chîn ṭhana nei chho tûr chuan tum ruhna neih a ngai ang a; mahse, chu chu tih manhla tak a ni ang.—⁠Sâm 1:2, 3.

• I zirpui chu Watchtower Library a nih loh leh Watchtower ONLINE LIBRARY hmanga Bible zawhnate chhânna a zawn hmuh theih dân entîr la. Kohhran inkhâwmnaa kan hman ṭhin thu leh hla chhuah lam tâwite chu hre thiam tûrin ṭanpui bawk ang che.

Tûn Thla Chhûng Hian Tichhin Rawh:

• Thupui tê, a nih loh leh bung khat tâwpah chuan, i Bible zirpui chu a thu zir tawhte tâwi têin khaikhâwmtîr la. Zirpui i nei lo a nih chuan, i thu chhiarte i hriatthiamna tihmasâwn tûrin Bible emaw, Vênnainsâng emaw aṭanga paragraph pakhat chu tihchhin nân khaikhâwmna nei ṭhîn ang che.