Eng Hunah Nge Tâwpna A Lo Thlen Ang? Isua Sawite

TAWPNA CHUNGCHANGA ISUA THUSAWI PAHNIH HI NGAIHTUAH RAWH:

“Chutichuan, ngaihven rawh u, a ni leh a hun chu in hre si lo va.”—MATTHAIA 25:13.

“Fîmkhur ula, inring renga awmin ṭawngṭai rawh u; a hun chu in hre si lo va.”—MARKA 13:33.

Chuvângin, tu mahin khawvêl tâwp hun tûr chiah chu an hre lo. Mahse, Pathianin tâwpna a lo thlen hun tûr “chumi ni leh hun” chu ‘a ruat’ tawh a ni. (Matthaia 24:36) Chu chu tâwpna a hnai tawh tih hriat theih dân kawng a awm lo hulhual tihna a ni em? Ni lo ve. Isua chuan a zirtîrte hnênah tâwpna a hnai tawh tih târ langtu khawvêl thilthlengte ngaihven tûrin a hrilh a ni.

CHHINCHHIAHNA

Chûng thilthlengte chu “khawvêl tâwpna” chhinchhiahna a ni ang. Isua chuan: “Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah ṭâmte a tla ang a, lîrte a nghîng ang,” tiin a sawi. (Matthaia 24:3, 7) Chu bâkah, “hrite” nasa takin a lêng ang tih a sawi bawk. (Luka 21:11) Isua sawi lâwk chûng thilthlengte chu i hmu em?

Tûn laia mi tam tak chuan indona te, ṭâm te, lîrnghîng te, leh natna chi hrang hrangte avângin hrehawm an tuar a. Entîr nân, kum 2004 khân, Indian Tuipui-ah lîr nasa tak a nghîng avângin, mi 2,25,000 vêl nunna latu tsunami a chhuak a. Kum thum chhûngin, COVID-19 hrilêngin khawvêl pumah mi maktaduai 6.9 nunna a la bo bawk. Isua chuan chûng thilthlengte chu khawvêl tâwpna a hnai tih târ langtu a ni ang tih a sawi a ni.

‘NI HNUHNUNGTE’

Bible chuan tâwpna a thlen hma lawk hun chhûng chu ‘ni hnuhnûngte’ tiin a sawi a. (2 Petera 3:3, 4) Timothea thawn hnih 3:1-5-na chuan ni hnuhnûngahte chuan mite chuan nungchang ṭha chungchânga tehnate chu an hnâwl ang tih a sawi bawk. (“Khawvêl Tâwp Hma Lawk,” tih bâwm chu en rawh.) Mite chu mahni hmasial tak te, mi duhâm te, mi nunrâwng te, leh hmangaihna nei lote an ni tih i hmu em? Chûngte chu khawvêl tâwp dâwn ṭêpah kan nung tawh tih finfiahna a ni bawk.

Ni hnuhnûng chu engtianga rei nge a nih ang? Bible sawi dân chuan, ‘hun tlêmte’ chauh a ni ang. Chumi hnuah, Pathianin “lei tichhetute” chu a tiboral ang.—Thu Puan 11:15-18; 12:12.

LEI PARADIS A HNAI!

Pathian chuan he khawvêl sual tak a tihtâwp hun tûr chu a ruat fel tawh a. (Matthaia 24:36) Mahse, chanchin ṭha dang pawh a awm—Ani chuan ‘tu ma boral a duh lo va.’ (2 Petera 3:9) Mihringte chu a duh zâwng hre tûr leh a thu âwih tûrin hun remchâng a pe a ni. Engvângin nge? He khawvêl tâwp huna dam khawchhuak tûr leh lei paradis khawvêl thara nung tûra a duh vâng a ni.

Pathianin a Lalram rorêlna hnuaia khawvêl thar khua leh tuite nih theih dân zir tûra mite ṭanpui nân khawvêl pum huap zirtîrna a ruahman a. Isua chuan Pathian Ram chanchin ṭha chu “khawvêl zawng zawngah” hriattîr a nih tûr thu a sawi a ni. (Matthaia 24:14) Khawvêl pum puiah, Jehova Thuhretute chuan mite hnênah Bible-a beiseina thuchah hrilh nân leh zirtîr nân dârkâr tlûklehdingâwn tam tak an hmang a. Isua chuan chu thu hrilh hna beihpuithlâkna chu tâwpna a thlen hmain khawvêl pum puiah hrilh a ni ang tih a sawi a ni.

Mihring sawrkârte rorêl hun hi a tâwp ṭêp tawh a. Mahse, chanchin ṭha chu khawvêl tâwpna a lo thlen hunah i dam khawchhuak theiin, Pathian tiam lei Paradis-ah i awm thei hi a ni. A dawta thuziakah chuan chu khawvêl thara i awm theih dân chungchâng sawiho a ni ang.