INHUATNA THLENG LEH ṬHIN TIHTAWP DAN

4 | Pathian Ṭanpuinain Inhuatna Hneh Rawh

Bible Zirtîrna:

“Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te a ni zâwk e.”—GALATIA 5:22, 23.

A Awmzia:

Pathian ṭanpuinain huatna chu hneh theih a ni a. A thlarau thianghlim chuan mahnia kan neih theih ngai loh tûr miziate nei tûrin min ṭanpui thei a ni. Chuvângin, mahni chaknaa huatna hneh tum aiin, Pathian pêk ṭanpuina chu kan rinchhan zâwk tûr a ni a. Chutianga kan tih chuan: “Mi tichaktuah chuan engkim ka ti thei,” tia ziaktu tirhkoh Paula ang chu kan ni ve thei a ni. (Philippi 4:13) Chu bâkah: ‘Mi ṭanpuina chu LALPA hnêna mi a ni,’ tiin kan sawi thei ang.—Sâm 121:2.

I Tih Theihte:

“Jehova chuan mi nunrâwng tak aṭangin mi zaidam tak ni tûrin min ṭanpui a ni.”—WALDO-A

Jehova hnênah a thlarau thianghlim dîlin tih tak zetin ṭawngṭai la. (Luka 11:13) I nunah a miziate lantîr thei tûrin a ṭanpuina dîl ang che. Bible-in huatna hneh theitu nia a sawi hmangaihna te, remna te, dawhtheihna te, leh insûmtheihnate ang chi miziate chu zir la. Chûng miziate i nuna i lantîr theih dân kawngte chu zawng ang che. Chutiang miziate lantîr tumtute chu kâwm bawk ang che. Chutiang mite chuan ‘hmangaih leh thil ṭha ti tûrin an chawk tho’ thei che a ni.—Hebrai 10:24.

Nuna Thiltawn—WALDO-A

Huatna Thinlung Chu A Hneh

Waldo-a chu dinhmun hrehawm tak hnuaia seilian a nih avângin huatna thinlungin a khat a. Ani chuan: “Ruihhlo zuartute nên kan insual fo va . . . Ṭum khat chu, mi sual pâwl pakhat chuan min that tûrin tualthat ṭhîn mi pakhat chu an ruai a; mahse, ka tâl chhuak thei hrâm a, chhe tê chauh ka inhliam a ni,” tiin a sawi.

Waldo-a chu a nupuiin Jehova Thuhretute nêna Bible an zir chuan a lâwm lo hle a. Ani chuan: “Thuhretute chu ka hua a, ṭawngkam na tak takin vawi tam tak ka ânkhum ṭhîn. Mahse, zaidam takin min chhâng lêt ziah a ni,” tiin a sawi.

A tâwpah, Waldo-a pawhin Bible a zir ve ta a. Ani chuan: “Ka thu zirte nunpui chu a awlsam lo khawp mai. Ka thinchhiatna hi ka thunun theih ka ring ngai lo,” tiin a sawi. Mahse, Bible aṭanga a thu zir pakhat chuan nasa takin a thlâk danglam ta a ni.

Waldo-a chuan: “Ni khat chu, Bible min zirtîrtu Alejandro-a chuan Galatia 5:22, 23 min chhiartîr a. . . . Alejandro-a chuan chûng miziate chu mahni chakna ni lovin, Pathian thlarau thianghlim ṭanpuinaa neih theih a ni tih min hrilh a. Chu thutak chuan ka thlîr dân chu a thlâk danglam chiang hle!” tiin a sawi.

Waldo-a chuan Pathian ṭanpuina a rinchhan avângin mi dangte a huatna chu a bânsan thei ta a. Ani chuan: “Ka chhûngkhat lainate leh ṭhian hluite chuan ka inthlâk danglam nasatzia an hmuhin awih harsa an ti hle a. Jehova chuan mi nunrâwng tak aṭangin mi zaidam tak ni tûrin min ṭanpui a ni,” tiin a sawi.