Bible Zirlaite Chu Thutaka Ding Nghet Tûrin Ṭanpui Rawh

1-2. (a) Engvângin nge Bible zirlai ṭhenkhatin thutaka din ngheh an hreh? (b) He thuziakah hian eng nge kan sawiho vang?

JEHOVA Thuhretu rawn ni tûrin hrehna i nei ṭhîn em? I hnathawhpuite, i ṭhiante leh, i chhûngte’n an dodâl che i hlau pawh a ni thei a. A nih loh leh, Pathian tehnate mila nun chu i puitlin i ring lo pawh a ni thei. Chutiang a nih chuan, thutaka ding nghet tûra hrehna nei Bible zirlaite chu i hriatthiampui thei a ni.

² Chutiang hlauhna chuan thlarau lama ṭhan chhohna tûr chu awlsam takin a dâl thei tih Isua’n a hria a. (Mt. 13:20-22) Mahse, a hnung zui tûra hrehna neite chungah a beidawng lo. Chu aiin, a zirtîrte hnênah chutiang mite chu (1) an hmasâwnna dâltu thilte hmu thiam tûr te, (2) Jehova hmangaih lehzual tûr te, (3) an thil ngaih pawimawh siamrem tûr te leh, (4) harsatna an neihte hneh tûrtea ṭanpui dân a zirtîr a. Kan Bible zirpuite chu Chatuanin I Hlim Thei! tih lehkhabu hmanga thutaka ding nghet tûra kan ṭanpui hunah, engtin nge a zirtîrte hnêna Isua thusawite chu kan nunpui ve theih?

I BIBLE ZIRPUI CHU A HMASAWNNA DALTU HMU THIAM TURIN ṬANPUI RAWH

3. Nikodema chuan Isua zirtîr ni tûrin eng dâltu nge a neih mai theih?

³ Juda hruaitu challang tak pakhat, Nikodema chuan Isua zirtîr ni tûra dâltu harsatna a nei a. Isua’n rawng a bâwl ṭan aṭanga thla ruk lek a liam hnuah, Nikodema chuan ani chu Pathian aiawhtu a ni tih a hre thiam a ni. (Joh. 3:1, 2) Mahse, ‘Judate a hlauh’ avângin Isua chu a rûkin a hmu a. (Joh. 7:13; 12:42) Isua zirtîr a rawn nih chuan chân tam tak a nei dâwn niin a ngai pawh a ni thei.a

4. Pathianin a laka a beiseite hre tûrin engtin nge Isua’n Nikodema chu a ṭanpui?

⁴ Nikodema chuan Dân hriatthiamna nei mah se, Pathian Jehova’n a laka a beiseite hre tûrin ṭanpuina a mamawh a ni. Isua’n ani chu engtin nge a ṭanpui? Ani chu inhawng takin zânah a hmu a. Tichuan, a zirtîr ni thei tûra Nikodema tih ngaite chu chiang takin a hrilh a: a sualte a sim a, tuia baptisma a chan a, Pathian Fapa a rinzia a lantîr a ngai a ni.—Joh. 3:5, 14-21.

5. Engtin nge Bible zirlai chu a hmasâwnna dâltu hmu thiam tûra kan ṭanpui theih?

⁵ Bible zirlai pakhat chuan Pathian Thu-ah hriatna eng emaw chen nei mah se, a hmasâwnna dâltu hmu thiam tûrin ṭanpuina a mamawh thei a. Ei zawnna hna, a nih loh leh chhûngte dodâlna chuan a thlarau lam thiltumte a hlenna chu a dâl thei a ni. Chuvângin, i Bible zirpui tân hun insiam rawh. Thingpui in tûrin emaw, lêng tûrin emaw i sâwm thei a. Chutiang hunahte chuan a harsatna neihte sawi chhuak tûrin i ṭanpui thei a ni. I zirpui chu nangmah tilâwm tûr ni lovin, Jehova a hmangaihzia lantîr tûr zâwkin a mamawh insiamremna eng pawh nei tûrin fuih ang che.

6. Engtin nge i Bible zirpui chu thutaka ding nghet tûra huaisenna nei tûrin i ṭanpui theih? (1 Korinth 16:13)

⁶ Bible zirlai chuan Bible tehnate mila nung tûrin Jehova’n a ṭanpui ang tih rinngamna a neih chuan, a thu zirte nunpui tûrin huaisenna a rawn nei ang. (1 Korinth 16:13 chhiar rawh.) I chanvo chu school zirtîrtu chanvo nên a tehkhin theih a. School i kal lai kha han ngaihtuah lêt ta la, eng ang zirtîrtu nge i ngainat ber? I theihnate chunga inrintâwkna nei chho tûra dawhthei taka ṭanpuitu che kha a ni ngei ang. Chutiang bawkin, Bible zirtîrtu thiam tak chuan Bible zirlai chu Pathianin a laka a beiseite chauh zirtîr lovin, Jehova ṭanpuinain a mamawh insiamremnate chu a nei thei tih a rin nghehtîr bawk a ni. Engtin nge chutianga i tih theih?

I BIBLE ZIRPUI CHU JEHOVA HMANGAIH LEHZUAL TURIN ṬANPUI RAWH

7. Engtin nge Isua’n a thu ngaithlatute chu Pathian hmangaih lehzual tûra a ṭanpui?

⁷ Pathian an hmangaihna chuan a zirtîrte chu an thu zirte nunpui tûrin a chêttîr dâwn tih Isua’n a hria a. Anni chu an Pa vâna mi hmangaih lehzual tûra ṭanpui thei thilte a zirtîr ṭhîn a ni. Entîr nân, Pathian Jehova chu a fate hnêna thil ṭha pe ṭhîntu nên a tehkhin a. (Mt. 7:9-11) Isua thusawi ngaithlatu ṭhenkhat chuan chutiang pa ngilnei tak chu an nei lo pawh a ni mai thei. Fapa tlân bo a kîr leh huna a pain ngilnei taka a lo lawm dân tehkhin thu a sawi laia an rilru awm dân tûr chu han mitthla teh. Leia a fate chunga Jehova lantîr ngilneihna chu an hmu thei ngei ang.—Lk. 15:20-24.

8. Engtin nge i Bible zirpui chu Jehova hmangaih lehzual tûra i ṭanpui theih?

⁸ Nang pawhin, zirna in neih laiin Pathian miziate chu sawi uarin I Bible zirpui chu Pathian hmangaih lehzual tûrin i ṭanpui thei a. Zirna in neih apiangin, a thu zirte leh Jehova hmangaihna inzawm dân chu hre thiam tûrin ṭanpui la. Tlanna chungchâng in zir hunah, mi mal taka a hlâwkpui theih dân chu sawi uar ang che. (Rom 5:8; 1 Joh. 4:10) Mi mal taka Jehova’n a hmangaih dân a hriatna chuan zirlai chu Jehova hmangaih tûra a chêttîr ngei a rinawm.—Gal. 2:20.

9. Engin nge Michael-a chu a nun dân thlâk tûra ṭanpui?

⁹ Indonesia rama chêng Michael-a chungchâng hi han ngaihtuah teh. Thuhretu chhûngkuaa seilian ni mah se, baptisma erawh a chang lo. Kum 18 a nih chuan, ram dangah truck khalhin ei a zawng a. A hnuah chuan nupui a nei a; mahse, ram danga hna thawk chhunzawm tûrin a chhûngte chu a kalsan leh a ni. Chutih lai chuan, a nupui leh a fanu chuan Bible zirin hma an sâwn chho va. A nu a thih hnu chuan, ina kîr leha a pa enkawl a tum a, Bible zirna neih pawh chu a pawm a. Chatuanin I Hlim Thei! tih lehkhabu zirlai 27-naa “Zir Belhin Hmuh Belh Rawh,” tih section chuan a rilru a khawih hle a ni. A Fapa na tuar a thlîr laia Pathian Jehova awm dân tûr chu ngaihtuahin Michael-a chu a ṭap ta hial a. Tlanna chu a ngaihlu lehzual a, chu chuan a nun dân thlâk tûr leh baptisma chang tûrin a chêttîr a ni.

I BIBLE ZIRPUI CHU A THIL NGAIH PAWIMAWHTE SIAMREM TURIN ṬANPUI RAWH

10. Engtin nge Isua’n a zirtîr hmasate chu an thil ngaih pawimawhte siamrem tûra a ṭanpui? (Luka 5:5-11) (Milem en bawk rawh.)

¹⁰ Zirtîr hmasate chuan Isua chu thutiam Messia a ni tih hre thiam thuai mah se, rawngbâwlna chu ngai pawimawh ber tûrin ṭanpuina an mamawh a. Isua’n Petera leh Andria chu hunbi kima a hnung zui tûra a sâwm khân, hun eng emawti chhûng a zirtîrte an lo ni reng tawh a ni. (Mt. 4:18, 19) Anni chuan Jakoba leh Johana te nên thawkhovin, sangha mana ei zawnna hlawhtling tak an nei a. (Mk. 1:16-20) Petera leh Andria’n Isua hnung zui tûra ‘an lênte an hnutchhiah’ khân, an chhûngte enkawl zui an nih theih nân ruahmanna an siam ngei a rinawm. An thil ngaih pawimawhte siamrem tûrin engin nge chêttîr? Luka bu chuan Pathian Jehova’n an mamawhte a pe thei tih an rinna tinghet tûrin Isua’n thil mak a tih thu a târ lang a ni.—Luka 5:5-11 chhiar rawh.

11. Engtin nge kan thiltawnte hmanga kan zirpuite rinna kan tihchak theih?

¹¹ Isua angin thil mak tih theihna nei lo mah ila, Jehova’n an nuna a duh zâwng dah hmasatute a ṭanpui dânte chu kan zirpuite hnênah kan hrilh thei a. Entîr nân, inkhâwmnaa i tel ṭan laia Jehova ṭanpui dân che kha i la hre thei em? I hnain i inkhâwm hun a tihbuai avângin, i hnathawhna pu hnênah hnathawh hunbi pângngai aia tam i thawh theih tawh loh tûr thu i hrilh tawh pawh a ni thei a. I zirpui hnêna i thiltawnte i hrilh hunah, Jehova’n i nuna amah biakna dah pawimawh tûra i thu tlûkna siam avânga a chhawmdâwl dân che chu i sawi lang thei a ni.

12. (a) Engvângin nge thuchhuahtu hrang hrangte chu kan Bible zirnaa tel tûra kan sâwm ang? (b) Engtin nge i zirpui chu video-te hmangin thiam taka zirna i neihpui theih? Entîrna pe rawh.

¹² Chu bâkah, i zirpui chuan Kristian dangte’n an thil ngaih pawimawhte an siamrem dân hriat chu a hlâwkpui dâwn a. Chuvângin, ṭobul hrang hrang nei unaute chu in Bible zirnaa tel tûrin sâwm la. Thutak an rawn hmuh chhoh dân leh Jehova rawngbâwlna chu an nuna thil pawimawh ber an nihtîr dân te chu sawi tûrin sâwm ang che. Chu bâkah, i zirpui chu Chatuanin I Hlim Thei! tih lehkhabua “Zir Belhin Hmuh Belh Rawh,” tih leh “Hriat Belh Nân,” tih section-tea video-te chu enpui ang che. Entîr nân, zirlai 37-na in sawiho hunah Jehova’n Kan Mamawhte Min Phuhrûksak Ang tih video-a thu bulte chu i târ lang thei a ni.

I BIBLE ZIRPUI CHU HARSATNATE HNEH THEI TURIN ṬANPUI RAWH

13. Engtin nge Isua’n a zirtîrte chu dodâlna atâna a buatsaih?

¹³ Isua chuan a hnungzuitute hnênah an chhûngte pawh tiamin, mi dangte hnên aṭanga dodâlna an tawh tûr thu a hrilh nawn fo va. (Mt. 5:11; 10:22, 36) A rawngbâwlna tâwp lamah, a zirtîrte chu thihna an hmachhawn theih thu a vaukhân bawk a ni. (Mt. 24:9; Joh. 15:20; 16:2) Chu bâkah, an rawngbâwlnaah fing thiam tûrin a fuih a. Anmahni lo dodâltute hnial buai lo tûr leh thu an hrilh chhunzawm theih nâna an thusawi leh thiltiha fîmkhur tûrin thu a râwn bawk.

14. Engtin nge kan Bible zirpui chu dodâlna hmachhawn thei tûra kan buatsaih theih? (2 Timothea 3:12)

¹⁴ Kan Bible zirpui chu a hnathawhpuite, ṭhiante leh, chhûngte hnên aṭanga a hmachhawn mai theih thilte chu hrilhfiahin dodâlna atân kan buatsaih thei a. (2 Timothea 3:12 chhiar rawh.) A nun dân thar chu a hnathawhpuite’n fiamthu thawh nân an hmang thei a ni. A chhûngkhat hnaivaite pawh tiamin, mi dangte chuan Bible ṭanchhan a rinna chu an sawisêl thei a. Chutiang atâna kan zirpuite chu kan buatsaih hma poh leh, dodâl an nih hunah ṭha lehzualin an hmachhawn thei dâwn a ni.

15. Engin nge Bible zirlai chu a chhûngte dodâlna hmachhawn thei tûra ṭanpui thei?

¹⁵ I Bible zirpuiin chhûngte dodâlna a tâwk a nih chuan, dodâl a nih chhan ngaihtuah tûrin fuih ang che. A chhûngte chuan ani chu rinna dik lo zirtîr niin an ngai emaw, Jehova Thuhretute chungchângah ngaih dân dik lo an nei emaw a ni thei a. Isua ngei pawhin a chhûngte hnên aṭangin chhân lêtna ṭha lo tak a dawng a ni. (Mk. 3:21; Joh. 7:5) Chuvângin, i Bible zirpui chu a chhûngte pawh tiamin, mi dangte lakah dawhthei tak leh fing thiam taka awm tûrin zirtîr ang che.

16. Engtin nge kan Bible zirpui chu a rinna chungchâng fing thiam taka hrilhfiah thei tûra kan ṭanpui theih?

¹⁶ A chhûngte’n ngaihvenna an lantîr hunah pawh, Bible zirlai tân a thil hriatte sawi nghâl vek chu a finthlâk lo va. A sawi nghâl vek a nih chuan, a chhûngte tân hriatthiam a harin, sawihona neih leh an hreh phah thei a ni. Chuvângin, i Bible zirpui chu a chhûngte nên sawihona dang nei leh thei tûr zâwnga a rinna hrilhfiah tûrin fuih ang che. (Kol. 4:6) Entîr nân, jw.org tlawh tûrin a hrilh thei a. Chu chuan a chhûngte chu mahni ngeia Jehova Thuhretute chungchâng hre thei tûrin a ṭanpui dâwn a ni.

17. Engtin nge i zirpui chu mi dangte’n Jehova Thuhretute chûngchânga ngaih dân dik lo an neih theihte hrilhfiah thiam tûra i chher theih? (Milem en bawk rawh.)

¹⁷ I zirpui chu jw.org-a “Zawh Fo Ṭhin Zawhnate,” tih thuziak inzawm hmangin, a chhûngte leh a hnathawhpuite’n an zawh mai theih zawhnate atâna inbuatsaih tûrin i ṭanpui thei a. (2 Tim. 2:24, 25) Bible zirna in neih zawh apiangin, Chatuanin I Hlim Thei! tih lehkhabua “Mi Ṭhenkhat Sawi Dân,” tih section chu i hmang thei bawk a ni. Chuta zawhnate ṭha taka a chhân lêt theih nâna tihchhinna nei tûrin fuih la. A ṭûl a nih chuan, ṭha lehzuala a chhân lêt theih dân thurâwnte pêk hreh suh ang che. Chutianga tihchhinna chuan, inrintâwkna nei taka a rinna hum thei tûrin a ṭanpui ang.

18. Engtin nge i Bible zirpui chu rawngbâwlnaa a rinna chungchâng mi dangte hnêna hrilh tûra i fuih theih? (Matthaia 10:27)

¹⁸ Isua’n mite hnêna chanchin ṭha hril tûrin a zirtîrte chu thu a pe a. (Matthaia 10:27 chhiar rawh.) Bible zirlai chuan mi dangte hnêna a rinna chungchâng a hrilh hma poh leh, Jehova rinchhan dân a hre hma lehzual ang. Engtin nge chu chu thiltuma nei tûra i Bible zirpui chu i ṭanpui theih? Thu hrilhna campaign a awm dâwn a nih chuan, thuchhuahtu nih tling tûra hma a lâk theih dân ngaihtuah tûrin fuih la. A tlângpuiin, campaign chhûng hian thu hrilh a awlsam lehzual tih hrilh bawk ang che. Chu bâkah, chawlhkâr chhûng inkhâwma school chanvo nei ṭan tûrin thiltum a insiam thei bawk a. Chu a thiltum a ûm zêl rualin, a rinna chu inrintâwkna nei taka hrilhfiah dân a zir thei ang.

I ZIRPUI CHU I RIN NGAMZIA LANTIR RAWH

19. Engtin nge Isua’n a zirtîrte chu a rin ngamzia a lantîr a, engtin nge ani chu kan entawn theih?

¹⁹ Isua’n vâna a chhoh hmain a zirtîrte hnênah an awmho leh tûr thu a hrilh a. Vâna an lâwn tûr thu Isua’n a sawi tih an hre thiam lo a ni. Chuti chung pawhin, an rin ngam lohna ni lovin, an rinawmna chu a ngaihven zâwk a. (Joh. 14:1-5, 8) Vân lam beiseina ang chi thil ṭhenkhat hre thiam tûr chuan hun an mamawh tih a hria a. (Joh. 16:12) Keini pawhin, kan zirpuite’n Jehova tihlâwm an duhna chungah rinngamna kan lantîr ve thei a ni.

20. Engtin nge Malawi rama unaunu pakhatin a zirpui chu a ring ngam tih a lantîr?

²⁰ Kan zirpuiin thil ṭha tih duhna a neih kan beisei tlat a. Entîr nân, Malawi rama unaunu Chifundo-i chungchâng hi lo ngaihtuah ta ila. Catholic tleirâwl Alinafe-i nên Chatuanin I Hlim Thei! tih lehkhabu hmangin Bible zirna an nei a. Zirlai 14-na an zir zawh chuan, a zirpui hnênah Pathian biaknaa milem hman chungchânga a ngaih dân chu a zâwt a ni. Alinafe-i chuan lungni lo takin, “Mi mal duh thlanna alâwm!” tiin a chhâng a. Chifundo-i chuan an Bible zirna chu a tâwp mai a ring a. Mahse, Alinafe-i chuan engtikah emaw a hre thiam ang tih beisei chungin dawhthei takin zirna chu a neih zawmpui a ni. Thla rei lo te hnuah, unaunu chuan a zirpui hnênah zirlai 34-naa: “Engtin nge Bible leh Pathian dik Jehova chungchâng i zirte chu i hlâwkpui tawh?” tih zawhna chu a zâwt a. Alinafe-i chhân lêt dân chu heti hian a sawi a ni: “Thu ṭha tak tak a târ lang a, chûng zînga pakhat chu Thuhretute chu Bible-in a dem chîn dânteah an inhnamhnawih lo tih hi a ni,” tiin. Chumi hnu rei lo têah, Alinafe-i chuan biaknaa milem hman chu a tâwpsan a; tichuan, baptisma a chang thei ta a ni.

21. Engtin nge kan zirpuiin thutaka din ngheh a duhna chu kan tihnghehsak theih?

²¹ Pathian Jehova chu “a ṭhantîrtu” ni mah se, kan Bible zirpui hmasâwn chhohnaah tih ve theih kan nei a. (1 Kor. 3:7) Pathianin a laka a beiseite hrilh mai aia tam kan ti thei a. Jehova hmangaihna thûk tak nei chho tûrin kan ṭanpui thei a ni. A thil ngaih pawimawhte siamremna hmanga Pathian a hmangaihzia lantîr tûrin kan fuih thei bawk a. Chu bâkah, harsatna a tawh huna Jehova rinchhan dân kan zirtîr thei bawk a ni. Kan zirpui hnêna amah kan rin ngamzia hrilhna hmangin, Jehova tehnate milin a nung thei tih leh thutakah a ding nghet tlat thei tih a rinna chu kan tihnghehsak thei a ni.