Sakhua Chungchânga Chanchin Ṭha Chu Eng Nge Ni?

1. Sakhua zawng zawng hi a ṭha vek em?

Sakhua zawng zawngah hian mi rilru ṭha tam tak an awm a. Pathianin chûng mite chu a hmuin a ngaihsak bawk tih chu chanchin ṭha a ni. Mahse, sakhuana chu thil ṭha lo tih nâna hman a ni hi a pawi hle. (2 Korinth 4:​3, 4; 11:​13-15) Chanchin thar chuan sakhaw ṭhenkhat chu firfiaka chêtnaah te, hnam insuatnaah te, indonaah te, leh naupang khawih chingpennaah an inhnamhnawih hial tih a târ lang a. Hei hian tih tak zeta Pathian ringtute chu a va tilungngai tak êm!—Matthaia 24:​3-5, 11, 12 chhiar rawh.

Sakhaw dikin Pathian a chawimawi laiin, a dik lo erawh chuan amah a tilâwm lo va. Sakhaw dik lo chuan Pathian chungchâng leh mitthite chungchânga zirtîrna dik lote pawh tiamin, Bible-a tel lo ngaih dânte chu a zirtîr a. Mahse, Pathian Jehova chuan mite’n a chungchâng thutak an hriat chu a duh a ni.—Thuhriltu 9:​5, 10; 1 Timothea 2:​3-5 chhiar rawh.

2. Sakhua chungchânga chanchin ṭha chu eng nge ni?

Pathian chu amah hmangaih anga inchhâl si a, Setana khawvêl hmangaih zâwk sakhuate buma a awm lo chu a lâwmawm hle. (Jakoba 4:⁠4) Bible chuan sakhaw dik lo zawng zawng chu “Babulon Khaw Ropui” tiin a ko va. Babulon chu Nova hun lai Tuilêt hnua sakhaw dik lo inṭanna hmân lai khawpui a ni. Nakin lawkah chuan Pathianin mihringte bum a, awp bettu sakhuate chu a rawn tiboral ang.—Thu Puan 17:​1, 2, 5, 16, 17; 18:8 chhiar rawh.

Chanchin ṭha dang pawh a la awm a. Jehova chuan khawvêl puma sakhaw dik lo chhûnga awm mi rilru ṭhate chu a theihnghilh lo, tih hi. Chûng mite chu thutak zirtîrna hmangin a tilungrual mêk a ni.—Mika 4:​2, 5 chhiar rawh.

3. Mi rilru ṭhate’n eng nge an tih ang?

Jehova chuan thil dik leh ṭha ngainatute chu a ngaihsak a, sakhaw dik lo chhuahsan tûrin a tur a ni. Pathian hmangaihtute chuan amah tihlâwm nâna inthlâkthleng chu an duh a ni.—Thu Puan 18:4 chhiar rawh.

Kum zabi khatnaah khân, mi rilru ṭha pute’n tirhkohte hnên aṭanga chanchin ṭha an hriat chuan lâwm takin an pawm a. Jehova hnên aṭangin thiltum leh beiseina nei nun kawng thar leh hlimawm zâwk chu an zir a ni. An nuna Jehova dah hmasaa chanchin ṭha an chhân lêt avângin, tûn laiah kan tân entawn tûr ṭha tak an ni.—1 Thessalonika 1:​8-10; 2:13 chhiar rawh.

Pathian Jehova chuan sakhaw dik lo chhuahsantute chu amah betu a chhûngkuaah a lâwm lût ṭhîn a. A sâwmna duhawm tak i pawm chuan, a ṭhian nihna te, Jehova betu hmangaihna nei chhûngkaw thara tel theihna te, leh chatuana nunna te i nei dâwn a ni.—Marka 10:​29, 30; 2 Korinth 6:​17, 18 chhiar rawh.

4. Engtin nge Pathianin ram tinah hlimna a rawn thlentîr ang?

Sakhaw dik lo chunga rorêlna lo thleng tûr chu chanchin ṭha tak a ni a. Chu chuan khawvêl puma mite chu rah behna ata a rawn chhuah zalên ang. Sakhaw dik lo chuan mite a hruai bovin, a ṭhen darh leh tawh ngai lo vang. Mi nungdam tawh phawt chu Pathian dik awmchhun biaknaah chuan an inlungrual tawh zâwk ang.—Thu Puan 18:​20, 21; 21:​3, 4 chhiar rawh.