Qe tbʼanel noticia kubʼ ttzʼibʼin Juan

11 Ex attoq jun xinaq* yabʼ aju Lázaro tbʼi. Atztoq in nanqʼin toj jun aldea Betania tbʼi junx kyukʼil tanabʼ aju Marta ex María. 2 Atzun María lu ok tqʼoʼn aseyt kʼokʼj tperfumil tiʼj tqan Qajaw ex el tsuʼn tukʼil ttzmal twiʼ. Ex yabʼtoq taʼ Lázaro aju t-xibʼin. 3 Tuʼntzunju xi kyqʼamaʼn tanabʼ Lázaro te jun xjal tuʼn t-xiʼ qʼamalte te Jesús: «Tat, ma tzaj yabʼil tiʼj tamiwa kʼujlaʼn tuʼna». 4 Pero tej tok tbʼiʼn Jesús jlu, xi tqʼamaʼn: «Mlay kyim Lázaro tuʼn yabʼil lu, sino kʼajbʼel tuʼn tjaw nimsaʼn Dios ex tuʼn tjaw nimsaʼn Tkʼwal Dios».

5 Kʼujlaʼntoq Marta, María ex Lázaro tuʼn Jesús. 6 Pero tej tok tbʼiʼn qa yabʼtoq taʼ Lázaro, kyaj ten kabʼe qʼijtl toj lugar jatumel taʼ. 7 Yajxitl xi tqʼamaʼn kye tdiscípulo: «Qoʼqe juntl maj toj Judea». 8 Pero xi kyqʼamaʼn tdiscípulo te: «Xnaqʼtzal,* ¿tiquʼn tajbʼila tuʼn t-xiʼya juntl maj toj Judea? Porke kʼitzqeku kyajbʼiltoq xjal tuʼn tok kyxoʼn abʼj tiʼja». 9 Xi ttzaqʼweʼn Jesús kye: «¿Nyapetzun 12 or spikʼun at toj jun qʼij? Qa in bʼet jun xjal qʼijtl, mlay jaw tolj porke in nok tkeʼyin spikʼun at twitz txʼotxʼ. 10 Pero aju xjal in bʼet qonikʼen in jaw tolj, porke mintiʼ spikʼun toj tbʼe».

11 Ex tqʼamatl Jesús jlu tej tbʼaj yolin: «Ma tzikʼ jtan qamiw Lázaro, pero ma chinxe tukʼil tuʼn tjaw nkʼasune». 12 Entonces xi kyqʼamaʼn discípulo te: «Tat, qa in jtan Lázaro, ok kbʼantel». 13 Pero tajtoq Jesús tuʼn t-xi tqʼamaʼn kye qa otoq kyim Lázaro. Atzun kye discípulo kubʼ kyximen qa ikʼ jtan Lázaro tuʼn tojlan jun rat. 14 Tuʼntzunju xi tqʼamaʼn Jesús klar kye: «Ma kyim Lázaro, 15 ex in chin tzalaje kyiʼje tuʼnju mintiʼ ma chinxe tuʼntzun tok qeʼ kykʼuʼje wiʼje. Qoʼqe jatumel taʼ». 16 Tej tok tbʼiʼn Tomás jlu, aju ax ikx ok qʼoʼn tbʼi te el Gemelo, xi tqʼamaʼn kye mastl discípulo: «Ax ikx qe, qoʼqe tuʼn qkyim junx tukʼil».

17 Tej tpon Jesús, ok tbʼiʼn qa otoq tzikʼ kyaje qʼij tkuʼxlen maquʼn Lázaro. 18 Atztoq taʼ tnam Betania nqayin tiʼj Jerusalén, junlo oxe kilómetro* kyxol. 19 Ex otoq che pon nim judiy tukʼil Marta ex María tuʼn t-xi kyqʼuqbʼaʼn kykʼuʼj porke otoq kyim kyxibʼin. 20 Tej tok tbʼiʼn Marta qa chʼinxtoq tpon Jesús, xiʼ kanolte, atzunte María ax kyaj ten toj ja. 21 Entonces xi tqʼamaʼn Marta te Jesús: «Tat, noqwit ma tena qukʼile mintiʼwtlo ma kyim nxibʼine. 22 Pero bʼiʼn wuʼne qa tkyaqilju in xi tqanina te Dios, ktzajel tqʼoʼn Dios teya». 23 Xi ttzaqʼweʼn Jesús te: «Kjawil anqʼin t-xibʼina». 24 Atzunte Marta xi tqʼamaʼn te: «Ojtzqiʼn wuʼne qa kjawel anqʼin juntl maj toj bʼajsbʼil qʼij». 25 Xi tqʼamaʼntl Jesús te: «Aqine chwinqlal ex wuʼne in che jaw anqʼin kyimni. Alkye ma tzʼok qeʼ tkʼuʼj wiʼje maske ma kyim kʼanqʼil juntl maj. 26 Ex alkye jun xjal itzʼ ma tzʼok qeʼ tkʼuʼj wiʼje, mlay kyim. ¿In xipe tokslaʼna jlu?». 27 Xi ttzaqʼweʼn Marta te: «Ikju Tat, in xi wokslaʼne qa aya Cristo, aju Tkʼwal Dios iltoq tiʼj tuʼn tul twitz txʼotxʼ». 28 Tej tbʼaj yolin Marta, xi txkolte María aju terman ex xi tjasun te: «Ma tzul Xnaqʼtzal ex in txkon tiʼja». 29 Tej tok tbʼiʼn María jlu, jaw weʼ ex xiʼ keʼyilte Jesús.

30 Atzunte Jesús naʼmxtoq tokx toj aldea ex atztoq taʼ toj lugar jatumel kanet tuʼn Marta. 31 Tej tok kykeʼyin judiy xi kyqʼuqbʼaʼn tkʼuʼj María qa jaw weʼ ex etz bʼet toj ja, e xi lepeʼ tiʼj porke kubʼ kyximen qa xiʼ oqʼel twitz panteón. 32 Entonces pon María jatumel taʼ Jesús, kubʼ ẍmejeʼ t-xe tqan tej tok tkeʼyin ex xi tqʼamaʼn te: «Tat, noqwit ma tzula qukʼile mintiʼwtlo ma kyim nxibʼine». 33 Tej tok tkeʼyin Jesús qa in noqʼ María ex qe judiy e pon tukʼil, kubʼ tnaʼn bʼis ex tzaj choʼn toj tanmi. 34 Xi tqanin Jesús kye: «¿Jatumel ma kubʼ kyqʼoʼne?». Xi kytzaqʼweʼn te: «Tat, tzaja qukʼile tuʼn tok tkeʼyina». 35 Ex jaw oqʼ Jesús. 36 Tej tok kykeʼyin junjun judiy jlu, kyqʼama: «¡Kykeʼyinxe, nimtoq kʼujlaʼn Lázaro tuʼn!». 37 Pero atzun junjuntl kyqʼama: «Qa jaqet twitz jun xjal moẍ tuʼn xinaq lu, ¿tiquʼn mintiʼ ma bʼant jun tiʼ tuʼn tuʼn miʼn tkyim Lázaro?».

38 Tzaj tbʼis Jesús juntl maj ex yajxitl xiʼ jatumel taʼ panteón. Bueno, nyatoq jun panteón, sino jun jul ex tok jun abʼj ttzi. 39 Xi tqʼamaʼn Jesús kye: «Kyimele abʼj». Atzunte Marta, aju tanabʼ qtzan Lázaro, xi tqʼamaʼn te Jesús: «Tat, ma tzuwix porke ma tzikʼ kyaje qʼij tkyimlen». 40 Xi ttzaqʼweʼn Jesús te: «¿Mintiʼpe ma txi nqʼamaʼne teya qa jaku tzʼok tkeʼyina tipumal* Dios qa ma tzʼokslana?». 41 Tuʼntzunju el kyiʼn abʼj. Entonces jaw tkeʼyin Jesús twitz kyaʼj ex tqʼama: «Nman, in xi nqʼoʼne chjonte teya porke ma chin tzaj tbʼiʼna. 42 Ojtzqiʼn wuʼne qa kukx in chin tzaj tbʼiʼna, pero ma txi nqʼamaʼne jlu tuʼn tel kynikʼ xjal ateʼ ntxlaje qa aya ma tzaj samante weye». 43 Tej tqʼama Jesús jlu, jaw tiʼn tqʼajqʼajel twiʼ ex tqʼama: «¡Lázaro, ku tetza!». 44 Etztzun bʼet Lázaro aju xjal otoq kyim. Bʼalqʼiʼntoq tqʼabʼ ex tqan kyuʼn piẍ tela ex potzin twitz. Xi tqʼamaʼntl Jesús kye: «Kyimele tela tiʼj ex kytzoqpinxe».

45 Kyxol judiy e pon visitarilte María, nim qe ok qeʼ kykʼuʼj tiʼj Jesús tej tok kykeʼyin aju bʼant tuʼn. 46 Pero ateʼ junjuntl kyxol e ikʼ bʼet ex xi kyqʼamaʼn kye fariseo aju otoq bʼant tuʼn Jesús. 47 Tuʼntzunju ok kychmon kyibʼ pal nim kyoklen ex qe fariseo tukʼil Sanedrín ex xi kyqʼamaʼn kye: «¿Tiʼ kbʼantel quʼn? Porke in che bʼant nim milagro* tuʼn xinaq lu. 48 Qa kukx ma kyaj qqʼoʼn ikju, kʼokel qeʼ kykʼuʼj kykyaqil xjal tiʼj. Entonces che ul xjal te Roma ex kʼelel kyiʼn templo qeʼ ex aju qtnam». 49 Pero tqʼama Caifás jlu, aju nejenel kye pal toj abʼqʼi aju ex jun kyxol qeju otoq che pon: «Mintiʼ in nel kynikʼe tiʼj. 50 ¿Mintiʼpe in nel kynikʼe tiʼj qa mas bʼaʼn kyeye tuʼn tkyim jun xjal te kyxel kykyaqil judiy twitzju tuʼn tkubʼ xiten tkyaqil tnam?». 51 Pero mintiʼ tqʼama Caifás jlu porke a kubʼ ximente. Como atoq nejenel kye pal toj abʼqʼi aju, ajbʼen tuʼn Dios tuʼn ttzaj tqʼamaʼn qa kkyimel Jesús te kyxel kykyaqil judiy. 52 Ex nya oʼkx kyim te kyxel judiy, sino ax ikx tuʼn kyok tchmoʼn tkʼwal Dios e tzaj kyoj junjuntl lugar ex tuʼn kyok te junx grupo. 53 Ex toj qʼij aju kubʼ kyximen tuʼn tkubʼ kybʼyoʼn Jesús.

54 Tuʼntzunju ya mintiʼ bʼet Jesús kyxol judiy ex xiʼ toj jun tnam Efraín tbʼi, aju tok nqayin tiʼj desierto ex atz kyaj ten kyukʼil tdiscípulo toj lugar aju. 55 Chʼinxtoq tpon ambʼil tuʼn tkubʼ kyikʼsaʼn judiy Pascua. Ex nim qe xjal in che anqʼin kyoj aldea, e xiʼ toj Jerusalén tuʼn tbʼaj kylimpiarin kyibʼ ik tzeʼn tzaj tqʼamaʼn Ley naʼmxtoq txi tzyet Pascua. 56 Entonces e ok ten xjal jyolte Jesús ex kyqʼama kyxolx toj templo: «¿Tiʼ kyxime tiʼj? ¿Tzulpe toj fiesta moqa miʼn?». 57 Pero otoq tzʼetz jun orden kyuʼn pal nim kyoklen ex qe fariseo tuʼn t-xi kyqʼamaʼn xjal kye jatumel taʼ Jesús qa ma kyil tuʼntzun ttzyet kyuʼn.