Kxeltoq tiʼn junlo kyaje xjaw tuʼn kyviajarin judiy tuʼn kypon toj tnam Israel ex nya fácil kʼelel jlu te kye. Pero xi ttziyen Jehová kye qa kʼeleltoq tiʼn alkyexku tiʼ jaku tzʼok te jun tolsabʼil toj kybʼe. Aqeju judiy kukx in che ajbʼentoq te Jehová, kubʼ kyximen qa mas nimtoq kyoklen kʼiwlabʼil tuʼn tzaj kykʼamoʼn aj kymeltzʼaj toj tnam Israel kywitz qe tiʼchaq tuʼn t-xi kynajsaʼn. Jun kyxol qe kʼiwlabʼil lu, at toklen tukʼil kykʼulbʼil te Jehová. Mintiʼtoq jun templo te Jehová toj Babilonia. Ax ikx, mintiʼ xi kyqʼoʼn israelita chojbʼil ik tzeʼn tzaj tqʼamaʼn Tley Moisés tuʼnju mintiʼ e ten altar nix qe pal. Ex mas nim kybʼet qeju e kʼulin kywitz nya ax tok dios kywitz qeju e nimen te Jehová. Tuʼntzunju, kubʼ kyximen judiy in che nimen te Jehová tuʼn kymeltzʼaj toj kytxʼotxʼ ex tuʼn tten kʼulbʼil axix tok juntl maj. w23.05 14, 15 párr. 3, 4

Tuʼn kukx qten «tuj spikʼun», nim toklen tuʼn ttzaj qkʼamoʼn onbʼil in tzaj tqʼoʼn xewbʼaj xjan. ¿Tiquʼn? Tuʼnju kwest tuʼn qten saq toj ambʼil jaʼlo tuʼn nim nya bʼaʼn at twitz Txʼotxʼ (1 Tes. 4:​3-5, 7, 8). Ax ikx, jaku tzʼonin xewbʼaj xjan qiʼj tuʼn miʼn tok qqʼoʼn qwiʼ tiʼj kyximbʼetz xjal, aʼyeju mintiʼ kyoklen tukʼil tajbʼil Jehová. Ex jaku tzʼonin «tuʼn qbʼinchante bʼaʼn, ex tuʼn qbʼet tuj tumelxix, ex tuʼn qyolin axix tok» (Efes. 5:9). Tqʼama Jesús qa ktzajel «tqʼoʼn [Jehová] aju Xewbʼaj Xjan kye qeju in che qanin te» (Luc. 11:13). Jaku tzaj qkʼamoʼn xewbʼaj xjan qa ma t-xi qqanin te Jehová toj naʼj Dios. Ax ikx, jaku tzaj qkʼamoʼn aj tjaw qnimsaʼn kyoj chmabʼil junx kyukʼil erman (Efes. 5:​19, 20). Tuʼn tonbʼil xewbʼaj xjan, jaku qo anqʼin ik tzeʼn taj Jehová. w24.03 23, 24 párr. 13-15

Qa taja mas tpasensa, jaku txi tqanina onbʼil te Jehová. Ex jaku kanet pasens quʼn kyxol qe tbʼanel mod in tqʼoʼn xewbʼaj xjan (Gál. 5:​22, 23). Tuʼntzunju, jaku txi qqanin te Jehová tuʼn ttzaj tqʼoʼn xewbʼaj xjan qe ex tuʼn tonin qiʼj tuʼn kyten tbʼanel qmod in tqʼoʼn. Qa in qo ok weʼ twitz jun nya bʼaʼn ex kwest in nela toj qwitz tuʼn tten qpasens, kukx qqaninx te Jehová tuʼn ttzaj tqʼoʼn xewbʼaj xjan qe (Luc. 11:13). Ax ikx, jaku txi qqanin te tuʼn tonin qiʼj tuʼn tten qximbʼetz ik tzeʼn te. Otoqxi qo naʼn Dios, tbʼanel tuʼn tok tilil quʼn tuʼn tkubʼ qyekʼin qpasens tkyaqil qʼij. Qa kukx ma txi qqanin onbʼil te Jehová ex qa ma tzʼok tilil quʼn tuʼn tkubʼ qyekʼin qpasens, kʼokel qqʼoʼn qwitz tiʼj qa chebʼe chebʼe kbʼel qyekʼin tbʼanel mod lu. Ax ikx, jaku qo ximen kyiʼj techel in yolin Biblia tiʼj. In yolin Biblia kyiʼj nim xjal kubʼ kyyekʼin kypasens. Qa ma qo xnaqʼtzan tiʼj tbʼanel techel kubʼ kyqʼoʼn, jaku tzʼonin qiʼj tuʼn tkubʼ qyekʼin qpasens. w23.08 22 párr. 10, 11