Qa atz taʼya toj jun congregación jatumel at nim kybʼaj erman, bʼalo kwest tuʼn ttzaj qʼoʼn jun teya tcomentario. Pero miʼn tzaj bʼaj tkʼuʼja ex kukx qʼonka tilil tuʼn tjaw tiʼn tqʼabʼa. Bʼinchama ttena tiʼj tkyaqil xnaqʼtzbʼil tuʼntzun t-xi tqʼoʼna jun tyola. Qa ma bʼant jlu tuʼna, jaku comentarina kyoj junjuntl párrafo qa mintiʼ saj qʼoʼn jun tyola tnejel maj. Aj t-xnaqʼtzana tiʼj uʼj Xqʼuqil, ximana tiʼj tiʼ toklen junjun párrafo tukʼil tbʼi xnaqʼtzbʼil. Iktzun tten jaku txi tqʼoʼna jun tyola toj alkyexku ambʼil. Juntl tiʼ jaku bʼant tuʼna, bʼaʼn tuʼn t-xnaqʼtzana kyiʼj párrafo in yolin kyiʼj junjun xnaqʼtzbʼil mas kwest tuʼn tel qnikʼ kyiʼj. Tuʼnju kwest tuʼn tel qnikʼ kyiʼj xnaqʼtzbʼil lu, mintiʼxix in jaw kyiʼn erman kyqʼabʼ tuʼn kycomentarin. ¿Yajtzun qa mintiʼ in tzaj qʼoʼn ambʼil teya tuʼn tcomentarina maske otoq tzʼok tilil tuʼna? ¿Tiʼ jaku bʼant tuʼna toj ambʼil lu? Bʼaʼn tuʼn tyolina tukʼil ermano in nex qʼonte xnaqʼtzbʼil naʼmxtoq tok chmabʼil ex qʼamanxa te alkye párrafo taja tuʼn tcomentarina toj. w23.04 21, 22 párr. 9, 10

Ok José te jun tbʼanel chmilbʼaj tuʼnju kukx ok tilil tuʼn tuʼn tok lepeʼ tiʼjju tzaj tqʼamaʼn Jehová te. Xi tqʼamaʼn Jehová te oxe maj tiʼ tuʼn t-xi tbʼinchaʼn kyukʼil toj tja. Ex jun rat xi tbʼiʼn José tyol maske nya fácil (Mat. 1:20; 2:​13-15, 19-21). Tuʼnju nimen José te Jehová, onin tiʼj tuʼn tok t-xqʼuqin María. Tuʼn jlu, maslo ok tkʼujlaʼn María tchmil ex ok tqʼoʼn mas toklen. Aqeye chmilbʼaj, ¿tiʼ jaku bʼant kyuʼne tuʼn tel kykanoʼne tiʼj José? Jaku t-xi kyjyoʼne qe consej toj Biblia tuʼntzun tonin kyiʼje tuʼn kyxqʼuqine kyiʼj toj kyjaye. Aj tkubʼ kyqʼoʼne toj xnaqʼtzbʼil maske il tiʼj tuʼn tbʼant junjun chʼixpubʼil kyuʼne, in kubʼ kyyekʼine qa kʼujlaʼn kyxuʼjile kyuʼne. Ex tuʼn jlu jaku ten kymejebʼleʼn mas kyuw. Tqʼama jun ermana te Vanuatu jlu, aju o tzikʼ mas te 20 abʼqʼi tkubʼlen mojeʼ: «Aj tok nkeʼyine qa in jyon nchmile onbʼil tukʼil Jehová ex in nok lepeʼ tiʼj, mas in nok nqʼoʼne toklen. In kubʼ nnaʼne bʼaʼn ex in nok qeʼ nkʼuʼje tiʼjju in kubʼ t-ximen». w23.05 21 párr. 5

Kykyaqil qeju judiy i etz toj Babilonia tuʼn kymeltzʼaj toj Jerusalén, e ok te «jun nasyon paʼnmaj tuʼn Qman Dios» (Deut. 7:6). Pero nya a t-xilen jlu qa nya iltoq tiʼj tuʼn kybʼant junjun chʼixpubʼil kyuʼn tuʼntzun ttzalaj Jehová kyiʼj. Chʼixmi kykyaqil judiy e ul itzʼj toj tnam Babilonia, otoq che ok lepeʼ tiʼj kyximbʼetz ex kymod xjal te lugar aju. Tej tikʼ ambʼil tmeltzʼaj tnejel grupo judiy toj tnam Israel, jaw labʼin gobernador Nehemías tej tok tkeʼyin qa ya mintiʼ in che yolin kykʼwal toj yol hebreo (Deut. 6:​6, 7; Neh. 13:​23, 24). Qa ikju, ¿tzeʼn jakutoq tzʼok kykʼujlaʼn Jehová ex tzeʼn jakutoq che kʼulin te qa mintiʼtoq in nel kynikʼ tiʼj Biblia? (Esd. 10:​3, 44). Tuʼntzunju, iltoq tiʼj tuʼn kybʼant chʼixpubʼil kyuʼn. Mas nya kwest jakutoq bʼant jlu kyuʼn qa ma che anqʼin toj tnam Israel, jatumel chebʼe chebʼe ten juntl maj kʼulbʼil axix tok (Neh. 8:​8, 9). w23.05 15 párr. 6, 7