BIBLIOTECA Watchtower
BIBLIOTECA
Watchtower
énná
a̱
  • a̱
  • e̱
  • i̱
  • o̱
  • ñ
  • ʼ
  • BIBLIA
  • XO̱N XI TJÍO
  • KJOAJTÍN
  • es17 p. 88-97
  • Septiembre

Tsín video i̱ página jebi.

Likui nda kjima je video.

  • Septiembre
  • Nyaon nyaon chótʼayajiaan je Biblia 2017
  • Subtítulo
  • Bixine 1 sá septiembre
  • Xoto 2 sá septiembre
  • Taingo 3 sá septiembre
  • Lune 4 sá septiembre
  • Majte 5 sá septiembre
  • Mixkue 6 sá septiembre
  • Xipe 7 sá septiembre
  • Bixine 8 sá septiembre
  • Xoto 9 sá septiembre
  • Taingo 10 sá septiembre
  • Lune 11 sá septiembre
  • Majte 12 sá septiembre
  • Mixkue 13 sá septiembre
  • Xipe 14 sá septiembre
  • Bixine 15 sá septiembre
  • Xoto 16 sá septiembre
  • Taingo 17 sá septiembre
  • Lune 18 sá septiembre
  • Majte 19 sá septiembre
  • Mixkue 20 sá septiembre
  • Xipe 21 sá septiembre
  • Bixine 22 sá septiembre
  • Xoto 23 sá septiembre
  • Taingo 24 sá septiembre
  • Lune 25 sá septiembre
  • Majte 26 sá septiembre
  • Mixkue 27 sá septiembre
  • Xipe 28 sá septiembre
  • Bixine 29 sá septiembre
  • Xoto 30 sá septiembre
Nyaon nyaon chótʼayajiaan je Biblia 2017
es17 p. 88-97

Septiembre

Bixine 1 sá septiembre

Je Abrahán ki ya ʼnde jña kitsole je Niná xi kixi (Gén. 22:3).

Kʼianga kjesa fimijin ya nindo, je Abrahán kao Isaac, i kitsole je choʼndale: “I̱la tiyo jñani séjna je búrró. Je ti kʼoa kao an yala timangínjin yaján, nga jchaxkuínjin Niná, kʼoa sʼa tinroanrʼoenilaijin” (Gén. 22:5). Ánni kʼoakitsosínile je choʼndale Abrahán kʼianga kjoaʼaí ijngokʼani kao je tile. A totsakʼéndisole. Mai. Ya Biblia kʼoatso nga be kʼianga je Jeobá sikjaʼáya ijngokʼanile je Isaac (Heb. 11:19). Bení kʼianga je Niná xokisʼin nga jngo ʼndí kisʼele ninga jejchínga kjoan, je kao chjoónle (Heb. 11:11, 12, 18). Kʼoa kuinga beni nga koa̱nle Niná tojmeni. Ninga tsínlani be jmeni xi koa̱n nga kui nichxin. Ninga kuiyálani je Isaac koankjainle nga sikjaʼáyanile je Jeobá kʼianga kuitjoson jmeni xi tongini kitsole. Kuinga kʼoatsosíni Biblia nga nʼaile mani “ngatsʼi chjota [...] xi makjainle” (Rom. 4:11). w16.02 1:3, 13

Xoto 2 sá septiembre

Xi totʼatsʼe je jaʼaínle, je Jeobá alikui tsjiónkon je naxinandále (1 Sam. 12:22).

Je rey Saúl alikui tikisitjosonnile Jeobá kʼoa je Jeobá alikui tikisasennile nga tojo je xi rey sʼin kʼoéjna ya Israel (1 Sam. 15:17-23). Tonga tojo nkjín nó kitsjoaʼnde nga tojo je Saúl tsakatéxoma. Yaa tsakʼejnason “je yáxilele Jeobá”, tonga nga chʼao kisʼin ñʼai koanle je chjota israelita nga kixi kitʼale je Jeobá (1 Crón. 29:23). Je Jonatán ñaki kixi kitʼale je Jeobá. Jósʼin koa̱n chjénngilee nga kixi kjuintʼalee je Niná. Kuinga si̱tjosonlee je chjotaxá jñani tjen choa̱le. Je Jeobá títsjoáʼndee nga je katabatéxomaná kʼoa nga jchaxkoán je “chjota xi xá tjínle, xi batéxoma” (Rom. 13:1, 2). Machjénní nga jchaxkoán ngatsʼi xi chjotaxá tjenngi ma, ninga tsín nda tjíosʼín kʼoa ninga kʼoasʼin nikjaʼaitsjeen nga tsín bakinle nga jchaxkoán. Je Jeobá kʼoati kui xi mele nga jchaxkoán je chjota xi xá títsjoále ya yaniʼya kʼoa kao ya jinjtín (1 Cor. 11:3; Heb. 13:17). w16.02 3:5, 6, 8

Taingo 3 sá septiembre

Je naxinandáli kao kjoatsjoa tsjoánganʼio (Sal. 110:3).

Je Biblia kʼoatso nga ñaki kao kjoatsjoa tsjoátʼa yaole je choʼndale Niná kʼianga sixále, ninga je xi sʼa xti. Kʼiatsa jemeli kʼuínsʼenngindái, tjínnele nga ñaki ji xi kʼoasʼin meli, nga tsín kjaʼaí xi kʼoakuitsoli. Tjínnele nda si̱kjaʼaitsjenjin ánni nga kʼoasʼianni, kʼoa ngisaa tsa testigole Jeobá ma je familiali. Kʼianga kjimajchíngai tiʼyajin nga tjíofisʼenngindá xi kjaʼaí. Tsakui nichxin jekisʼenngindá je miyoli kʼoa tsa xtindsʼai. Tonga ali kʼoajinsʼin nikjaʼaitsjain tsa tokui nga jekjimajchíngai nga kʼuínsʼenngindáni kʼoa tsa tokuije̱ nga kʼoatjíosʼín xi kjaʼaí. ʼNdele nga tokui kʼoasʼianni, tosa kʼoasʼin jchatokuin je kjoachanisʼenngindá josʼin bekon je Jeobá. Jméni xi koasenkaoli. Chʼa̱sjeʼai nichxin nga tikjaʼaitsjain ánni nga nʼio chjínile je kjoachanisʼenngindá. w16.03 1:11, 12

Lune 4 sá septiembre

Je xi nrʼoé, katatso: Nroai. Kʼoa je xi fatile, katanroa. Kʼoa je xi mele, kataʼbi nandá xi tsjoá kjoabijnachon, xi tokjoatjao (Apoc. 22:17).

Nga chjotale Cristo maa, jméni xi sʼiaan nga si̱tjosoán én jebi nga kʼoakʼuínlee je chjota xi fatile nga “kataʼbi nandá xi tsjoá kjoabijnachon”. Tsa mená si̱tjosoán je xá jebi, tjínnele nga jtín sʼin kuiyoaa kʼoa si̱xájtián ya jinjtín (Efes. 4:16). Kʼianga koa̱n koakoyasonlee chjota je Énle Niná tjínnele ñaki ndasʼin sʼe̱ndajin. Je xi basenkaoná kui jmeni xi ʼmiyaná ya jinjtín. Tobʼelañá, je kjoajtín xi satíoná kʼianga bitjokʼinyasoán basenkaoná nga ʼmiyasoán jngo tjíjtsa sonʼnde kʼoa nga nikáyolee chjota je xo̱n xi Énle Niná faʼaitʼa. Kʼoati sakʼoa kʼoaʼminá nga kʼoainganʼioá kʼianga sʼe campaña kʼianga sakóyason Énle Niná. Kʼianga ʼmiyasoán, ñatjen tinixáñá kao ndsʼee xi miyón mani xi kʼoati tjíosʼín jngo tjíjtsa sonʼnde. Kʼoati ñatjen tinixá kao ánkje, nga̱ jé binyakaoná kʼianga ʼmiyasoán je Énle Niná (Apoc. 14:6). w16.03 3:4, 5

Majte 5 sá septiembre

Kitjoʼai je xo̱n xi kjioxkóya (Apoc. 20:12, TNM).

Je Biblia kʼoatso nga ya sonʼnde chjotse, kjaʼaí “xo̱n xi kjioxkóya” tjóʼaingi. Xo̱n jebi kjaʼaí kjoatéxoma tjítʼa kʼoa kui koandiaaná nga jeya tiyoaa ya sonʼnde chjotse. Jméni xi koa̱n kʼianga jetjóxʼángi xo̱n jebi. Kʼianga chótʼayá xo̱n jebi, ñá kʼoa kao xi kjoaʼáyale, kʼiajin jchaa jmeni xi sijéná je Niná. Ngatsʼiaa ngisaa nda koa̱njinná josʼin síkjaʼaitsjen je Jeobá kʼoa ngisaa nda koa̱njinná jmeni xi tso je Biblia kao xo̱n xi kʼia tjóxʼángi. Kʼoa kui xi koasenkaoná nga koakolee kjoatsjoacha kao kjoaxkóntokon je xíngiaa (Is. 26:9). Nʼiojin tse jmeni xi koa̱njinná kʼoa kʼuínyalee je xi ngikʼa nga jeya tiyoaa ya sonʼndenaxó kʼianga je Jesucristo jekoatexoma. Kʼiatsa koanngíntjenngiaa jmeni “xi tjíotʼa ya xo̱n” jebi kʼoa kixi kjuintʼalee je Jeobá kʼianga chótʼayakaoná xi tofetʼani, yaa sʼe̱tʼa jaʼaínná je xo̱n “xi tsʼe kjoabijnachon” kʼoa koaan tjoéná kjoabijnachon xi tsínkʼia fetʼa. w16.03 4:19, 20

Mixkue 6 sá septiembre

Jiní je kjoachoyana, ji Jeobá xi batexomalai ngayeje, ji tisinʼiotʼale saʼnda nga sʼa xtia (Sal. 71:5).

Nʼio nkjín chjotajchínga xi kʼoatso kʼianga nʼio chjíle nga kʼia binyakoaa je ndsʼee nga sʼa ʼndí kjoan. Koaan kʼoaile xá xi koa̱n kʼoasʼin ya jinjtín. Ánni nga nʼio machjénsíni nga kʼia kʼoainganʼiole kʼianga sʼa ʼndí kjoan. Kuinga kui kuinyakao nga kuenta sʼin jmeni xi mele kuichotjenngi nga jekoa̱njchínga kʼianga jekui kʼoetʼale jmeni xi chon sonʼnde (Sal. 71:17). Je xi chjotajchínga sʼin tjío ali tsa tokuijin kʼoakuitsole je ndsʼee jmeni xi sʼin. Kʼoati kʼoakuitsole ánni nga nʼio chjísínile nga kʼoasʼin. Je Jesús kʼoakisʼin kʼianga kisikatíonda xi kjaʼaí. Kʼoakitsole je pastrole nga katafitsoyason. Tonga títjon kjoanla kʼoakitsole ánni nga tjínnesínile sitjoson. Kitsole: “Ngayije kjoatéxoma kitsʼaina ngʼajmi, kʼoa i̱ sonʼnde. Tangíon, tinyaʼao ngatsʼi naxinandá, tikinjao chjota tʼatsʼan” (Mat. 28:18, 19). wp15 1/4 2:5, 6

Xipe 7 sá septiembre

Jé Nainá tsakʼejnakaona. Kitsjoana nganʼio. Jitjontjaile tsʼoa xa (2 Tim. 4:17).

Je chjotale Cristo xi tsakatio ya naxinandá Roma kʼianga siglo 1 nʼio xkón tsakatio. Je chjota romano ñaki totaon tsabe kʼoa nʼio kitjenngike. Kʼoati kitsoa je pastro Pablo. Tsakui nichxin kui kisikjaʼaitsjen je Pablo tsa koasenkao je chjotale Cristo xi ngikʼa kʼoa tsa mai. Ánni. Ñandia kʼianga nʼio ñʼai kjoa jaʼatojin aliʼya xi tsakasenkao. Tonga je Pablo kʼoakitso nga je Jesús kisichjén je Jeobá nga kitsjoale nganʼio xi koanchjénle (2 Tim. 4:16). Je Pablo ñaki kʼoatsakʼé kon nga koa̱n sinʼiotʼa je Jeobá. Nga̱ kui kisikjaʼaitsjen josʼin tsakasenkao ngasʼa. Alikui jao kisʼele nga je tsjoále nganʼio xi machjénle nga ska̱le je kjoa xi tífaʼatojin kʼoa xi kjoaʼatojinsa nga koa̱nskanni. Ñaki kʼoatsakʼé kon nga je Nainá kʼoasjentjai tojmeyeje kjoa xi kjoaʼatojin (2 Tim. 4:18). Ñaki kʼoatsakʼé kon nga je Jeobá kao Jesús koasenkao ngantsjai ninga tsín koasenkao je ndsʼe̱. wp15 1/4 4:1-3

Bixine 8 sá septiembre

Je, yaa jkui koase̱nne (Gén. 3:15).

Kʼianga kitsin je Jesús, je Na̱i alikui kisasenle. Bení nga je xi Mesías koa̱n kʼianga jekoa̱njchínga. A kʼoasʼin kisikjaʼaitsjen je Na̱i kʼianga chʼaotjín tsa jngo ʼndí sikʼien. Majain. Alikui fini je Na̱i jmeni xi ndatjín kʼoa jmeni xi chʼaotjín. Sasa tsakásjainile jokisʼin kʼianga sikʼien je Jesús. Kʼianga kisʼejinle je rey Herodes nga jekitsin “je chjotatítjonle chjota judíos”, nʼio koanjtile kʼoa koanmele nga sikʼien (Mat. 2:1-3, 13). Kuinga kʼoakitsosíni nga katanikʼien ngatsʼi xtiʼndí xi sʼa jao nóle kʼoa kao xi ngisa ʼndí kjoan ya naxinandá Belén kʼoa kao ʼnde xi tjíondaile (Mat. 2:13-18). Je Jesús tsʼangi. Tonga jméni xi bakóyaná jebi xi tʼatsʼe Na̱i. Kuinga tsín chjí bekon je kjoabijnachonle chjota ninga tsʼe xtiʼndí. Je Na̱i ñaki kui mangóson jngo xa xi tíbaté (1 Ped. 5:8). Alikui si̱chajiaan kʼianga nʼio tsʼen. wp15 1/5 1:10, 12, 13

Xoto 9 sá septiembre

Likui kitjoele xi kitso Niná, tokjin kiskotsennile kʼoa koantsjoale joni tsa kikʼáyandiaa (Heb. 11:13).

Ñá xi chjotaa ma chaniyaa jkoaa jmeni xi kje ʼyajián. Kʼoa jebi basenkaoná nga nikjaʼaitsjeen je kjoanda xi tichoyalee nichxin xi nroaján. Kʼoati basenkaoná nga tongini bʼendajiaan jmeni xi sʼiaan kʼoa nga kui xi ndatjín chjoéjiaan. Je Énle Jeobá kʼoatsoná nga nʼio tse kjoanda sʼe̱ná nichxin xi nroaján. Ningalani kje kʼoamajin, koaan cha̱niyaa jkoaa kʼoa kʼoakʼoé tokoán nga ñaki kuitjoson (2 Cor. 4:18). Je Ana, male Samuel kʼoakitsole je Jeobá nga ya koaikao ʼndíle ya ndʼianajñole Jeobá nga ya sixákao je naʼmi. Je Ana kiskaniya jko̱ nichxin kʼianga koaikao je Samuel. Kʼoa kui xi tsakasenkao nga kisitjoson én xi kitso (1 Sam. 1:22). Ñá kʼoati koa̱n cha̱niyaa jkoaa jmeni xi tso Jeobá nga sʼin nga̱ ʼyañá nga sitjoson (2 Ped. 1:19-21). Nʼio nkjín je choʼndale Niná xi tsakatio nichxin kjoatse xi kiskaniya jko̱ jmeni xi sʼin je Niná. wp15 1/5 3:1-3

Taingo 10 sá septiembre

Je kjoanyinále chjotanyiná jngoyale xjáo xi séjnachjoale ya jinkjoafaʼaitsjenle (Prov. 18:11).

Je Biblia kʼoati tso nga kui si̱kjaʼaitsjeen jmeni xi mele Jeobá kʼoa nga tsínkui si̱kjaʼaitsjeen nga tse tao̱n si̱kinjee. Je Jesús kʼoakitso kʼiatsa jngo chjota xi nʼio bʼénele yaole nga tse tao̱n kuinje̱le kʼoa kui títjon síkʼéjna tikʼoajinni je Jeobá to chjotachininí. Ninga tísʼele tao̱n tonga “ali nyinájin tʼatsʼe Niná” (Luc. 12:16-21). Ngisaa chjíle nga kʼoénelee yaoná nga kui kʼoasʼiaan jmeni xi mele Niná nga̱ jngoyale kui tibʼejnatjoá “kjoanyiná ya ngʼajmi” (Mat. 6:20). Kʼoasʼin nga tsjoa sʼe̱ya tokoán kʼoa tsjoa kʼoé kon je Jeobá (Prov. 27:11). Nga miyole Jeobá maa ngisaa nʼio chjíle tikʼoajinni jotjín tao̱n tjín i̱ Sonʼnde. Kʼiatsa mená nga nyiná koaan i̱ Sonʼnde, nʼio tse kjoanikjaojin sʼe̱ná (Mat. 6:19). Je Jesús kʼoakitso nga nʼio ñʼai koa̱nná nga je Jeobá si̱kʼéjnatítjoán kʼiatsa tokui tinikjaʼaitsjeen ngantsjai je tao̱n (Mat. 13:18, 19, 22). wp15 1/5 4:15, 16

Lune 11 sá septiembre

Tokoanxkónle chjota nga tsabe nga koan kinchja̱ je xi yo̱ma̱, kʼoa nga koanndani je xi tjíoxkóya ntsja, nga koan tsakʼemani je xi chjiʼngé kʼoa nga koan kiskotsenni je xi xka̱ (Mat. 15:31).

Kʼianga kitsʼaile nganʼiole Niná je Jesús, nʼio nkjín kjoaxkón tsakatío. Ali tsa tojejin xi kisindaya xi tjíofiʼndojon yaole, kisindayaa chjota xi kjaʼaísa chʼin tjínle. Nichxin xi tiyoaa ndʼaibi, je chjinexki sakʼoaa kui machjénle nga kjaʼaí chjota tsjoá órganole kʼianga ʼya xi síndaya. Tonga je Jesús alikui kʼoakisʼin. Koanle nga tiʼakʼia kisindayani tojñani nga chʼin tjínle je chjota. Saʼnda koanle kisindaya ninga kjin tjío je chjota (Juan 4:46-54). Jméni xi bakóyaná. Kuinga koa̱nle kʼoa mele nga tondiaa kjoaʼaxin je chʼin. Kʼianga ʼyaa josʼin tsabekon chjota je Jesús kui bakóná nga skoe̱ma̱ “je xi nangi tíjna kʼoa je xi ma̱ tísíjchá yaole” kʼianga jekjoaʼaí je ʼNdenaxó (Sal. 72:13). Ñaki mele nga sindaya ngatsʼi je xi kjoañʼai tjíofaʼá. wp15 1/6 2:6

Majte 12 sá septiembre

Kataʼyaxkón jaʼaínli (Mat. 6:9).

Nʼio nkjín chjota xi be jotso je padrenuestro. Ñá xi testigole Jeobá maa, kjitʼaa nokjoakaoñá chjota xi tʼatsʼe kjoabʼetsʼoa jebi kʼianga ʼmiyasonlee. Tobʼelañá, nichjénñá je én xi “katjinroa kjoatéxomali” tso kʼianga ʼmiyalee chjota nga Chjotaxále Niná xotsole kʼoa nga jeme ʼndenaxó sikao je Sonʼnde. Kʼoati nichjén je én xi “kataʼyaxkón jaʼaínli” tso kʼianga ʼmiyalee chjota nga tjínle jaʼaín je Niná kʼoa nga tjínnele jchaxkoán nga̱ tsjení (Mat. 6:9). Nʼio nkjín chjota xi to jenya jko̱ jotso je padrenuestro kʼoa kui bʼéxkia kʼianga bʼétsʼoale Niná. Tonga a kui xi kitso Jesús nga kʼoasʼiaan. Mai. Je Jesús kitso: “Kʼia nga bʼetsʼoai, ali tikuijinni én nichjain” (Mat. 6:7). Kʼoa ngindia kʼianga kui tsakakóyangánile Jesús je chjotale josʼin kʼoetsʼoa, kui kisikʼaxki̱ngáni je padrenuestro tonga kjaʼaí én kisichjén (Luc. 11:1-4). Jebi kui xi bakóyaná nga kui kitsoya Jesús jmeni xi si̱jé kʼianga kʼoétsʼoaa. wp15 1/6 4:1, 2

Mixkue 13 sá septiembre

Je xi kʼoasʼin síkjaʼaitsjen nga nʼio kixi tíjna, katasíkuinda yaole nga tsín ska̱ (1 Cor. 10:12).

Kui nganʼiotsjele Jeobá síchjén nga basenkaoná nga tsínkui katatsaoyaa je che̱n xi síkatíobasen je Na̱i. Kʼoati síchjén je Biblia kʼoa kao je jtín nga tongini kʼoatso jmeni xi xkón tíjna. Tobʼelañá, kʼoatsoná nga tsín toya si̱kjejinlee je nganʼioná, je nichxinná kao tao̱nná jmeni xi tsínni machjénná. Je Espen kao Janne, jao mani ʼndíxtile kʼoa itso: “Nga jetsín tikʼoakjimaninajin nga tse tinixálaijin Niná, kjitʼaa kʼoaʼmilaijin nga katabasenkaonajin nga tsínkui katatsaoyaijin je che̱n xi satíobasennajin. Kʼoaʼmilaijin nga katabasenkaonajin nga nʼio katasʼejna kjoamiyo xi tjínnajin kao je kʼoa nga tosi tonda kao kjoatsjoa kʼuínyasuinjin”. Ijngosa che̱n xi si̱kuindalee yaoná kui pornografía. Tjínkʼa xi pornografía kotsenle kʼoa kui kʼoamani nga tsín xin síkʼéjna tsa jmeni xi chʼaotjín tísíkjaʼaitsjen. Nʼio nkjín ndsʼee xi tsín tjíotsjoáʼndele yaole nga kui kjoa tjíotsaojin. Kʼoati koa̱n sʼiaan tsanda ñá (1 Cor. 10:13). wp15 1/6 5:15, 16

Xipe 14 sá septiembre

Je chjotatítjonle sonʼnde, kao xi nyiná kao xi kapitán, kao xi nʼio tjínle nganʼio, kao ngatsʼi choʼnda kao xi ndaí tjío, kikatioʼmangi ngijao kao ngina̱xi̱ xi tjíojin jñájchá (Apoc. 6:15).

Kʼianga jesi̱kjeson relijión ndiso tjínnele koakoá tsa ñaki kjoaixi nga tsjoachaa je Jeobá. Me ngatsʼi chjota nga ya koasjai nganʼio ya “ngina̱xi̱ xi tjíojin jñájchá”, xi tsonile, je jtín xi tjío sonʼnde. Tonga ñá jé nganʼiole Jeobá kjoásjee nga koasenkaoná. A koaan kʼoasʼin si̱kjaʼaitsjeen nga kʼia choʼndale Jeobá koa̱n je chjota. Mai. Ya Jerusalén, kʼianga kisʼejñáʼnyo je nichxin, me ngatsʼi je chjota judío nga tsín chjotale Cristo koan. Je xi jechjotale Cristo ma nga kʼia, kisitjosonle Jesús kʼoa kitjoo ya naxinandá. Tikʼoasʼinni ndʼaibi, kʼianga sʼe̱jñáʼnyo nichxin nga tínikjeson je relijión ndiso nʼiojin tokʼa xi ya koaijin je relijión xi ñaki kixi. Nga kui nichxin, tjínnele koakoá nga tsjoachaa je Jeobá kʼoa nga bʼainganʼiolee xi ya koai ngʼajmi (Mat. 25:34-40). wp15 1/7 2:7

Bixine 15 sá septiembre

Nda sasénle Niná, tsa jngo xi totʼatsʼe kjoafaʼaitsjenle Niná, síkjaínle kjoañʼai xi tsín tsa bakinle (1 Ped. 2:19).

Tsakui nichxin nʼio tsjoachaa naxinandáná kʼoa tsín nanda tsjoachaa je chjota xi xin naxinandále, xi kjaʼaí kostumbre tjínle, xi kjaʼaí én nchja̱ kʼoa xi kjaʼaísʼin tsen yaole. Je choʼndale Jeobá alikui koa̱n kʼoasʼin sikjaʼaitsjen. Tonga tsa kʼoamaa, jmé xi koasenkaoná nga si̱kʼantjaiyaa kjoafaʼaitsjenná. Si̱kjaʼaitsjeen josʼin síkjaʼaitsjen Jeobá tʼatsʼe chjota xi nʼio ngʼa basje naxinandále kʼoa xi kʼoasʼin síkjaʼaitsjen nga ngisa chjíle je tikʼoajinni xi ngikʼa. Kuijnyísjee je xo̱n xi nichjén xi kui tínchja̱ni kʼoa kʼoétsʼoalee Jeobá nga katabasenkaoná nga kʼoasʼin jchatokoán chjota josʼin bekon je (Rom. 12:2). Nga nitjosoán kjoatéxomale Jeobá, bení je chjota ndainiʼyaná, xíngiaa, xi ñatjen nixá kʼoa tsa je xi ñatjen mangián skuela nga tsín kʼoanʼia josʼín chjota xi ngikʼa. wp15 1/7 3:14, 15

Xoto 16 sá septiembre

Je Jonás tsakʼétsʼoale je Jeobá Ninále saʼnda ya yatsʼoa̱ je jti̱ (Jon. 2:1).

Je Jeobá nrʼoéná kʼoa machoyale jmeni xi matʼeen ninga tsín ʼya xi tjíobe. Kʼianga tsjoáná jmeni xi nijélee kao kui ʼyañá nga nʼio tsjoakená. Je kjoabʼetsʼoa xi faʼaitʼa ya Biblia nʼio tse xi bakóyaná. Machjénní nga sakʼoa kui chótʼayá nichxin nga chotʼayajtían Énle Niná ya niʼyaná. Tobʼelañá, koaan chótʼayá je kjoabʼetsʼoa xi tsakʼéjna Jonás kʼianga tíjnaya yatsʼoa̱ je jti̱ (Jon. 1:17–2:10). Kʼoati koa̱n chótʼayajiaan je kjoabʼetsʼoa xi tsakʼéjna Salomón kʼianga tsakʼaitʼale Niná je yo̱ngo̱ (1 Rey. 8:22-53). Kʼoati si̱kjaʼaitsjenjiaan je kjoabʼetsʼoa xi tsakakóya Jesús (Mat. 6:9-13). Kʼoa alikui koa̱n si̱chajiaan nga nʼio machjén nga kjitʼa kʼoétsʼoaa. Kʼoa “je kjoanyʼántakonle Niná xi ñaki faʼatole ngayije kjoafaʼaitsjenle chjota” kui sikuinda kjoafaʼaitsjenná kao ni̱ma̱ná (Filip. 4:6, 7). wp15 1/8 1:11, 12

Taingo 17 sá septiembre

Nangi tiyolao je xi bándiaano (Heb. 13:17).

Kʼiatsa mená nga ya kuiyoaa ya ʼNdenaxó, machjénní nga si̱tjosonlee ndʼaibi je naxinandále Jeobá. Ánni nga machjénsíni nga kʼoasʼiaan. Kuinga kʼoati sʼe̱ndiaaná ya ʼNdenaxó nga naskánasi̱choaan kʼoa nga kuinyakoaa je chjota xi kjoaʼáyale nga katabe xi tʼatsʼe Jeobá. Nʼio tse xá sʼe̱ nga kʼia. Kuinga chjónangisínilee yaoná: “Kʼiatsa je naxinandále Jeobá kʼoakuitsona nga jme xi sʼian xi tsín tsjoake̱, a sitjosonle kʼoa a ñaki kao kjoatsjoa kʼoasʼian je xá xi tíbánena”. Kʼianga tjen kuiyondalee nga kuiyoaa ya ʼNdenaxó, machjénní nga tsjoa katasatíoná jmeni xi tinʼia ndʼaibi kʼoa nga kʼoainganʼioá jmeni xi sʼendajin. Tobʼelañá, kʼiatsa xin sikasénná je naxinandále Niná, bʼenelee yaoná nga nitjosoán kʼoa tsjoa bʼe tokoán. Kʼiatsa si̱ngalee yaoná nga kʼoainganʼioá ndʼaibi, ngisaa choa ñʼai koa̱nná nga si̱tjosoán ya ʼNdenaxó. wp15 1/8 3:6, 7

Lune 18 sá septiembre

Je yánchjínle kiskenʼndóbʼakjá ni̱ma̱le kʼianga kjaʼaí niná kitjenngile, kʼoa je Salomón kui kʼoakisʼin jmeni xi chʼaotjín ngixko̱n Jeobá (1 Rey. 11:4, 6).

Ninga nʼio chjine koan je Salomón alikui tikixi kitʼanile Jeobá xi totʼatsʼe yánchjínle (1 Rey. 11:1-6). Kʼoati koaan tsanda ñá tsa tsín si̱kuindaa yaoná. Kuinga tsín koa̱n je kuixankaosíñá jngo chjota xi tsín tsjoake Jeobá. Kʼiatsa jngo xi toje chixan nga testigole Jeobá koa̱n, jmé xi sʼin. Je Biblia itso: “Nangi tiyolao xʼinno, jméni nga je xʼinno xi tsín makjainle je énle Niná kuinje̱tʼasínile Cristo, ali totʼatsʼe énle yánchjínlejin, tokui kjoa nga nda fikao yaole je yánchjínle” (1 Ped. 3:1). Ninga je xi yánchjín tínchja̱ni én jebi kʼoati machjén nga kui koaitjenngi je xi xʼin. Kʼiatsa kʼoenele yaole nga nda sʼin kʼoa koaitjenngi kjoafaʼaitsjen xi tsjoá je Biblia, tsakui nichxin skoe̱ je xʼinle kʼoa tsa chjoónle nga tísíndaya yaole kʼoa kʼoati testigole Jeobá koa̱n tsanda je. Nkjín chjota xi jechixan xi jesa kʼoakoan. wp15 1/8 4:15, 16

Majte 19 sá septiembre

Toʼyani xi tsín nkjín kon tomakjainyejele tojme énni, tonga je xi sínkjínle kon kosonnile josʼin binyá ndso̱ko̱ (Prov. 14:15).

Nichxin xi tiyoaa ndʼaibi, tjín chʼin xi tsín xkile. Tsakui nichxin tjínkʼa chjota xi kʼoakuitso nga be xkile chʼin jebi. Tonga si̱kuindalee yaoná. Je Pablo kʼoakitso nga nda katasíkjaʼaitsjen je chjotale Cristo (Filip. 4:5, TNM). Kʼiatsa kjuintjenngiaa kjoafaʼaitsjen jebi, alikui tokui nʼio si̱kjájonlee yaoná tsa jme chʼin jekakatʼaná xi tsín xkile kʼoa tsín tikoa̱nndosinniná je xále Jeobá. Tsa kʼoasʼiaan tochale to yaonása si̱kjaʼaitsjeen (Filip. 2:4). Kʼianga chjotajée maa, toxá sʼeniná je chʼin. Kuinga kui títjon si̱kʼéjnasíñá xi ndatjín, xi tsonile, nga ngisa tjínle kjoandosin nga Jeobá si̱xálee (Filip. 1:10). Kʼoa tʼatsʼe josʼin si̱xkilee yaoná ñá xi kuixónñá nga jngó jngoá jmeni xi sʼiaan kʼoa jetoñá bʼakaoná josʼin kuichomani. wp15 1/9 2:8, 10

Mixkue 20 sá septiembre

Tinikasénní je kjoaʼisenli kao kjoakixili. Kui katabándiaana (Sal. 43:3).

Je Jeobá jéní “Niná xi ñaki kixi” (Sal. 31:5). Je Jeobá nʼio tsjoakená kʼoa bakóyaná jokjoantjínni xi tʼatsʼe kʼoa kʼoatsoná josʼin jchaxkoán. Kʼoati tsoyaná josʼin nga nda kjuinkoaa yaoná. Jméni xi tíbakóyaná je Jeobá kʼoa jósʼin bakó nga tsjoakená. Xi títjon, je Jeobá bakóyaná xi tʼatsʼe, kui xi mele nga kataʼyaxkoaan (Sant. 4:8). Kuinga kʼoatsoniná joʼmi, kʼoa ya Biblia kui jaʼaínle Niná xi nʼio nkjín kʼa faʼaitʼa tikʼoajinni xi kjaʼaí jaʼaín. Je Jeobá kʼoati bakóyaná jokjoan. Kʼoasʼin síchriantʼaniná, kʼoa ñá kʼoati machriantʼalee. Je Jeobá kʼoati bakóná jokjoan. Tobʼelañá, kʼianga chotsenlee jmeni xi kisinda, yaa ʼyañá nga nʼio chjine kʼoa nga nʼio tse nganʼio tjínle (Rom. 1:20). Kʼoa nga bʼexkiaa je Biblia, ʼyañá nga kixi je Jeobá kʼoa nga nʼio tsjoakená. Kʼianga sa ʼya sa ʼyaa je Jeobá ngisaa machriantʼasalee. wp15 1/9 4:8, 9

Xipe 21 sá septiembre

Ñaki skoee je ntsja Jeobá je choʼndale (Is. 66:14).

Nichxin xi tiyoaa ndʼaibi, nkjín chjota xi kʼoasʼin síkjaʼaitsjen nga tsín mandosinle Niná jmeni xi nʼia kʼoa kao kjoa xi bitjatojiaan. Tobʼelañá, kʼianga sá noviembre nó 2013, jngo kjoaxkón xi supertifón ʼmi kichone ya Filipinas. Kʼianga jekicho kjoaxkón jebi, jngo alcaldele naxinandá xi kʼoakitso nga tsín ale Niná kʼoa nga tokjaʼaíla xá tísʼín kʼoa kuinga tsín tsakasenkaoni je chjota. Kʼoa tjínkʼa chjota xi kʼoasʼin síkjaʼaitsjen nga tsín be Niná jmeni xi nʼia (Is. 26:10, 11; 3 Juan 11). Kʼoakoan nga tsakʼejna je pastro Pablo. Je Pablo kʼoakitso nga tsakatio chjota xi tsín kuenta kisʼin Niná. Chjota jebi tsʼen koan, ché koan kʼoa xkaiʼa koan (Rom. 1:28, 29). Tonga ñá, ʼyañá nga be Jeobá ngayeje jmeni xi nʼia. Ninga kʼoalani, koaan chjónangilee yaoná: “A ñaki makjainna nga mandosinle Niná xi tʼatsʼan. A tiʼbeña josʼin tíbasenkaona je Niná”. wp15 1/10 1:1-3

Bixine 22 sá septiembre

Koakole josʼin nga makjainna nga̱ ndatjín xána (Sant. 2:18).

Kʼianga ʼmiyasoán, bakoñá nga tjínná kjoamakjain. Ánni. Nga̱ kʼoasʼin bakoñá nga makjainná nga jemachrianle kjoafetʼa kʼoa nga “likui sikʼachxin” (Hab. 2:3). Kʼiatsa mená jchaa tsa nʼio tíjna kjoamakjainná, koaan chjónangilee yaoná: “A nʼio mandosin kjoaixina nga xinyasoan. A bʼenele yaona nga fakaoña xi tʼatsʼe Niná tojokji chjotani. A tibasjaisale josasʼin nga ngisasa tse xínyasoan” (2 Cor. 13:5). Kʼianga kʼoénelee yaoná nga kʼuínyasoán, kʼoasʼin koakoñá nga nʼio tíjna kjoamakjainná (Rom. 10:10). Ijngosa koya josʼin bakoá nga tjínná kjoamakjain kʼianí nga kaná je kjoa xi bitjatojiaan nga nyaon nyaon. Kʼiatsa tíkaná nga ma̱ tinijchá yaoná, tsa chʼin tjínná, tsa tínroajen tokoán, tsa depresión tjínná kʼoa tsa jmesa kjoa tibitjatojiaan, je Jeobá kao Jesús si̱nʼiotʼaa nga̱ jé xi “koasenkaoná kʼia nga koa̱nchjénná” (Heb. 4:16). Kʼiatsa si̱jélee nganʼio je Jeobá, koakoñá nga makjainná xi tʼatsʼe. wp15 1/10 2:12-14

Xoto 23 sá septiembre

Jé Espíritu Santo sikjaʼaitsjenno ngayije jokixinno (Juan 14:26).

Tsa tjóʼaná Biblia, alikui koa̱nle chjota kjoaʼaxin jinkjoafaʼaitsjenná jmeni xi jeya tsakinyaa, jolani tsa testole Biblia kʼoa kao kjoajnda xi jekoanná xi tsʼe Niná (Hech. 16:25). Je Jeobá tsjoáná nganʼiotsjele nga kjoaʼaítsjenná jmeni xi jekoanná kʼoa koasenkaoná nga kixi koaan. Jméni xi koasenkaoná nga nyaon nyaon kʼoéxkiaa je Biblia. Jngola koya jchaa jmeni xi koa̱n sʼiaan. Koaan jngo jao nichxin chjoéjiaan kʼianga jngo xomana nga kʼoéxkiaa jñani maxkia Biblia xi tsʼe Skuela xi síchjine choʼndale Niná kʼoa si̱kjaʼaitsjenjiaan jmeni xi tibʼexkiaa. Kʼoa nga kjaʼaí nichxin koaan kʼoéxkia choaa je Evangelio xi tsʼe Mateo, Marcos, Lucas kao Juan kʼoa si̱kjaʼaitsjeen jmeni xi kisʼin je Jesús kʼoa jmeni xi kitsoya (Rom. 10:17; Heb. 12:2; 1 Ped. 2:21). Kʼoa nga nda koa̱njinná koaan si̱chjén je xo̱n xi kjioná jolani tsa je libro El hombre más grande jñani kʼoatso jmeni xi kisʼin je Jesús (Juan 14:6). wp15 1/10 4:11, 12

Taingo 24 sá septiembre

Miyo kixinno, nga̱ kʼoasʼin kixinyano ngayije kjoa xi kinrʼoele Nʼaina (Juan 15:15).

Je chjota xi choʼnda kisʼele nichxin kjoatse alikui tsakʼéyanajmíle jotjío kon kʼoa tsa jomale. Tonga je Jesús alikui kʼoakisikao je pastrole. Kʼoakitsole nga tsín tsa jo choʼnda sʼin tsabekon, nga miyole koanni. Nʼio tsjoake koan je chjotale kʼoa kʼoasʼin tsakakónile nga kisikʼayale nichxin kʼoa nga kao kjoatsjoa tsakʼéyanajmíle jme xi kisikjaʼaitsjen kʼoa jotjín kon. Kʼoa nda kinrʼoéle je chjotale kʼianga tsakʼéyanajmíle jmeni xi kisikjaʼaitsjen kʼoa jotjío kon (Mar. 6:30-32). Nga kʼoakisʼin je Jesús kui xi tsakinyakao je chjotale nga kisimiyo Jesús kʼoa nga koan kitjosonle je xá xi kisʼin nga koanskanni. Je Jesús be nga tsjoa sa̱tíole je chjotale nga sixále Jeobá tsa ñaki tokui xá sʼin nga kuitsoyason. Kuinga kʼoakitsonile nga katatsoyason kʼoa nga je koasenkao (Mat. 28:19, 20). wp15 1/11 2:3, 5

Lune 25 sá septiembre

Katamatsjoachai xikʼa joni yaoli (Mat. 22:39).

Je xi ngisa bakó je Jeobá kuiní je kjoatsjoacha (1 Juan 4:16). Kʼoa je Jesucristo kʼoati kjoan jokjoan je Nʼaile. Je Jesús jé títjon koannda tikʼoajinni ngayeje, kʼoa jemiyón nó tjínle nga tíjna ya ngʼajmi kao Niná. Kʼoa tsabee nga nʼio bakó kjoatsjoacha je Jeobá (Col. 1:15). Je Jesús kʼoatisʼin tíbakó je kjoatsjoacha jokji tse jetíjna. Kuinga tsín jao tjínniná nga kao kjoatsjoacha koatexomaná je Jesús kao Jeobá. Ñandia nga jngo chjota kui kiskonangile Jesús jñánile je kjoatéxoma xi ngisa chjíle. Je Jesús i kitsole: “Katamatsjoachai Naili Nináli. Katamatsjoachani ngayije ni̱ma̱li, kao ngayije kjoatsjoali, kʼoa kao ngayije kjoafaʼaitsjenli. Jébi xi títjon, xi ngisa ngʼa kjoatéxoma. Kʼoa je xi majaoni kʼoatisʼinni jebi: Katamatsjoachai xikʼa joni nga tijini” (Mat. 22:37-39). Nʼio chjíle nga tsjoacha koaan ngatsʼi chjota. Je Jesús kʼoakitso nga tjínnele tsjoacha koaan je Jeobá kao xíngiaa. wp15 1/11 4:1-3

Majte 26 sá septiembre

Je kjoa xi kichji ngasʼa, kui xá kichjini nga koakoyaná (Rom. 15:4).

Kʼianga tsakjákao Jeobá je chjota nichxin kjoatse alikui tsa to én hebreo kisichjén. Kʼianga jetsakationdaí je chjota israelita xi tsakationʼio ya Babilonia, nʼio nkjín xi én arameo jenchja̱. Tsakui nichxin kuinga én arameo kiskini je Daniel, Jeremías kao Esdras je én xi faʼaitʼa Biblia. Nga koanskanni, je Alejandro Magno, rey xi tsʼe Grecia, nʼio nkjín naxinandá tsakánentsja jñani én griego male chjota. Kʼoati nʼio nkjín chjota judío xi kʼoati én griego kinchja̱. Kʼoa nga kʼoakoan, kuinga én griego jaʼatoyani je Escrituras Hebreas. Kʼoa Septuaginta sʼin tsaʼyale nga jejaʼatoya. Kui Biblia jebi xi títjon jaʼatoya, kʼoa nʼio ʼyachjí Biblia jebi. Je chjotachjine kʼoatso nga 72 chjota kisikʼatoya. Tjío xi ñaki xki̱ én kisikʼatoya kʼoa tjío xi mai. Ninga kʼoalani, je chjota judío xi én griego koanle kʼoa kao chjotale Cristo tojo Énle Niná sʼin tsabekon je Septuaginta. wp15 1/12 1:4-6

Mixkue 27 sá septiembre

Nda tsa toʼi̱tsé lʼí, ali tokʼoakji jñájchá baká (Sant. 3:5).

Je Santiago kʼoakitso nga “je nijeen jo lʼíní” (Sant. 3:6). Joma je lʼí nga nʼio tse kjoa bajngi, kʼoati ma jmeni xi bixoán, koaan sikiʼaon xi kjaʼaí. A kui xi tsonile nga tsínkʼia koa̱n jokuixoán. Mai. Tobʼelañá, je lʼí nichjénñá ninga xkón tíjna. Koaan si̱chjén tsa tsojmi kʼoéndaa, tsakui kʼoétsee nga katamasoná kʼoa tsakuije̱ nga siʼisenná. Tikʼoasʼinni je nijeen, je Biblia kʼoatso nga koa̱n sikiʼaon xi kjaʼaí jmeni xi bixoán kʼoa tsa maije̱ koaan koasenkao (Prov. 18:21). Kuinga nda chósonsínilee jmeni xi kuixoán. Tobʼelañá, koaan kʼoasʼin si̱chjén je nijeen nga chʼa̱sjengʼaa je Jeobá kʼoa nga kuinyakoaa xi kjaʼaí (Sal. 19:14). Toxá kʼoasʼin tsakʼéndaniná je Jeobá nga kʼoabixoán jmeni xi nikjaʼaitsjeen kʼoa jotjío tokoán, tsa ñaki kuinókjoaa kʼoa tsa tokao én seña kʼoakuixoán. Koaan si̱chjén je nijeen nga kuinyakoaa xi kjaʼaí (Sant. 3:9, 10). wp15 1/12 3:1-3

Xipe 28 sá septiembre

Sítiʼndano je Lucas, je chjinexki xi kjaínga tjaoke̱ (Col. 4:14).

Je Lucas chjinexki koan kʼoa kikao sakʼoa je Pablo nga kjin kikakóyason. Tsakui nichxin je kisixkile Pablo kʼoa kao chjotale Cristo xi ngikʼa kʼianga kitjochʼinle (Gál. 4:13). Tojo kitso je Jesús, je xi tjíomʼe machjénle nga chjinexki sixkile (Luc. 5:31). Je Lucas ñaki nda kjoafaʼaitsjen xi kitsjoa nga̱ ñaki chjinexki koan. Kuinga kui kisikʼaxki̱ kʼani én xi síchjén chjinexki kʼoa kisikʼaxki̱ kʼani josʼin kisindaya chjota je Jesús kʼianga kiski libro xi tsʼe Lucas kʼoa kao Hechos. Je Biblia alikui jotso jñani kiskotʼaya Lucas kʼoa kʼiani kiskotʼaya nga chjinexki koan. Tsakui nichxin ya Laodicea kiskotʼaya, ya chrianle naxinandá Colosas. Tsakui nichxin kuinga kisikʼaxki̱ni Pablo je Lucas kʼianga kiskile karta je chjotale Cristo xi tjío ya Colosas kʼoa nga kʼoakitsonile nga kjoatiʼnda kisikasénle. wp15 1/12 4:11, 12

Bixine 29 sá septiembre

Kjoanda katabʼaile Niná tʼatsʼe kjoatjao xi kitsjoa xi tsín ʼya xi majinle (2 Cor. 9:15).

Je Jeobá nʼio tsjoakená nga kisikasén i̱ Sonʼnde je ʼNdíle (Juan 3:16; 1 Juan 4:9, 10). Kui kjoatjao jebi xi ngisasa nʼio chjíle xi kitsjoaná Niná. Je pastro Pablo kʼoakitso nga tsín ʼya xi majinle. Je Pablo be nga kuinga kʼien je Jesús nga kuitjosonni ngayeje jmeni xi tso Niná (2 Cor. 1:20). Je kjoatjao xi kitsjoa Niná “xi tsín tsa ʼya xi majinle” kui je kjoabʼechjíntjaile Jesús kʼoa kao je kjoatsjoacha xi bakóná je Niná. Jótjínnele sʼe̱ tokoán nga kitsjoaná Niná kjoatjao jebi. Tsakui nichxin koa̱n si̱kʼantjaiyaa josʼin timangínkoaa yaoná nga ngisa nda sʼiaan. Tsakui nichxin ngisasa koakolee kjoanda kao kjoatsjoacha xi kjaʼaí kʼoa tochale kʼoati si̱chatʼalee je xi totaon tsabená. Si̱kjaʼaitsjeen nga je kjoabʼechjíntjaile Jesucristo kui xi ngisasa bakó jokji tsjoakená je Jeobá (1 Ped. 3:18). w16.01 2:1, 2, 4, 5

Xoto 30 sá septiembre

Je ntjao̱ tojñani kjonajonní kʼoa noʼyalai nga fane, tonga likui ʼyai jña nroani, ni jña fi. Kʼoasʼin ma ngatsʼi xi tʼatsʼe Espíritu Santo kitsinni (Juan 3:8).

Tsakui nichxin kʼoakuitso jngo xi ya ngʼajmi koai ánni nga je kitjoejinsíni nga tsín tosa kjaʼaí xi kitjoejinsíni. Tsakui nichxin kui sikjaʼaitsjen tsa kuitjosonle xá jebi. Je xi tsín jao tjínle kuinga Jeobá kiskoejin nga ya koai ngʼajmi. Kʼoa kuinga tsjoa tjínsínile kʼoa tsjoásíni kjoanda. Kʼoatjío kon jokitso je Pedro, kitso: “Jó tondale Niná Nʼaile Jesucristo Nainá, xi kʼoasʼin totse kjoamatakon tjínle nga kisichjotseyangániná, jméni nga chóyasínilee xi tíjnakon nga jaʼáyajinnile kʼen Jesucristo. Kui kʼoasʼin kʼoaikjoatjaono xi nikʼiajin kjuitsónyani, xi nikʼiajin koa̱njndíni, nixíndsójin, xi tíjnatjaono ya ngʼajmi” (1 Ped. 1:3, 4). Kʼianga bʼéxkia én jebi je xi ya koai ngʼajmi, bení kʼianga je xotíʼmile. w16.01 3:11, 12

    Xo̱n xi énná faʼaitʼa (2002-2025)
    Tʼechjoalai cuentali
    Titjásʼain cuentali
    • énná
    • Tikasénlai tsa ʼyani
    • Josʼin meli nga katamatsen
    • Copyright © 2025 Watch Tower Bible and Tract Society of Pennsylvania
    • Josʼin koa̱n koa̱nchjén
    • Josʼin sʼejnatjao én xi faʼainajin
    • Josʼin machjén jme xi betʼai
    • JW.ORG
    • Titjásʼain cuentali
    Tikasénlai tsa ʼyani