Diciembre

Je Jesús kui kisingósonkao josʼin tjentʼale je chjotatjenngile kʼoa josʼin tsjentʼale je barréle je chjota xi cho̱ koʼnda (Juan 10:14). Nʼio nda majinná choa̱ jebi, nga̱ je barré be ʼyani xi koʼnda kʼoa nrʼoé jta̱le. Ñaki xkoon tsabeni jngo chjota nga kʼoasʼín kjoaixi je barré, i kitso: “Fotografía chʼa̱sjelaijin tsakai je barré, nga kinokjoalaijin alikui kinroanrʼoenajin nga̱ tsín bexkonnajin. Nga jaʼai je ti xi koʼnda, nga kinchja̱le tokjoan kinrʼoéle kʼoa kitjenngile”. Jmeni xi kitso je chjota xi foto kʼoasjele tsakai je barré kui síkjaʼaitsjenjinná nga kʼoakitso je Jesús nga kʼoati sʼin je chjotatjenngile. I kitso: “Kjuinrʼoé jta̱na”. Tonga jósʼin kuinóʼyanilee je Jesús nga ya ngʼajmi tíjna. Jngo koya xi koa̱n sʼiaan kʼiaa nga si̱tjosoán jme xi kitsoya (Mat. 7:24, 25). w21.12 16 párr. 1, 2

Je Pablo nʼio kitjenngike je chjotale Cristo. Nga jeki nichxin koanjinle nga tsín ndatjín jmeni xi kisʼin, kisikʼantjaiya yaole kʼoa tsín tikʼoakisʼinni (1 Tim. 1:12-16). Jé Jeobá tsakasenkao Pablo nga nda chjota koan, nga nangitokon koan kʼoa nga nda kisikuinda je chjotale Cristo. Ñaki kʼoatsakʼé kon nga jekisichatʼale Jeobá kʼoa alikui tikui kisikjaʼaitsjenni jmeni xi kisʼin (Rom. 7:21-25). Koanjinle nga chjotajée ma kʼoa tsakʼénele yaole nga kʼoakoankjoan jotjínnele koa̱nkjoan je chjotale Cristo, nangitokon koan kʼoa jé Jeobá kisinʼiotʼa nga kitjosonle je xá xi kisʼenele (1 Cor. 9:27; 2 Cor. 4:7). Ali tsa kuijin nga tsín jña saténgi je ndsʼee nga kui xá bʼainile nga chjotajchínga sʼin batio, je Jeobá kui xi mele nga katamajinle nga chjotajée ma kʼoa nga tjínnele sindaya yaole (Efes. 4:23, 24). Kʼianga kʼoexkia Biblia tjínnele sikjaʼaitsjenjin jñani machjén nga sindaya yaole kʼoa machjén nga tokjoan kʼoasʼin. Tsa kʼoasʼin, jé Jeobá koasenkao nga tsjoa sa̱tío kon kʼoa nda kuitjosonle je xá xi kjinele (Sant. 1:25). w22.03 29, 30 párr. 13-15

Jméni xi machjén nga sʼiaan kʼiatsa chʼaosʼin tinikʼaxkiaa jngo ndsʼee. Kuenta sʼiaan nga tjínnele tsjoacha koaan je ndsʼee (Sant. 2:8). Nʼio machjén nga kʼoétsʼoalee je Jeobá nga kʼoakʼuínlee nga katabasenkaoná nga tsín tosi tonda chʼaosʼin si̱kʼaxkiaa xíngiaa. Kʼianga si̱tjosoán jmeni xi kaʼmilee je Jeobá koaan chja̱kaonajmiá je ndsʼee. Koaan kʼoakʼuínlee nga ñatjen kʼuínyasoán kʼoa tsa ñatjen kuichaa. Nga ngisa nda jchaxkoaan je ndsʼee ­koaan kjuintjenngiaa je choa̱le Jeobá kao Jesús nga kui kuenta sʼiaan jñani nda sʼín. Kʼoasʼin koakoñá nga tinitjosoán je kjoatéxomale Jesús nga kʼoatso nga tsín koa̱n tosi tonda chʼaosʼin si̱kʼaxkiaa xíngiaa. Tojo sʼín je barré nga nrʼoé jta̱le je xi koʼnda, kʼoatisʼin noʼyá je jta̱le Jesús xi chjotatjenngile maa. Ni ya tiyojinlee je barré xi “tochoa mani” kʼoa tsa xi “kjaʼaí barré” tosi tonda kuinóʼyalee kʼoa si̱tjosoán jotsoná je Jesús, je xi tíbándiaaná (Luc. 12:32; Juan 10:11, 14, 16). w21.12 19 párr. 11; 20, 21 párr. 17, 18

Kʼianga rey koan je Rehoboam, je naxinandá kʼoakitsole nga tsín kʼoasikji ai chʼá katabánele jokisʼin je Salomón, xi nʼaile koanni. Je Rehoboam nda kisʼin nga je kisijéle kjoafaʼaitsjen chjotajchínga xi tsakatio ya naxinandá Israel. Je chjotajchínga jebi kʼoakitsole Rehoboam nga tsjoánganʼiole je naxinandá tsa sitjoson jme xi kitsole (1 Rey. 12:3-7). Tonga Rehoboam alikui kisasenle kjoafaʼaitsjen xi tsakʼaile, kuinga je kikon ijngokʼanile je xti xi ñatjen koanjchá kʼoa jé kisijéle kjoafaʼaitsjen. Xti jebi kʼoakitsole nga ngisa nʼio katabʼénele naxinandá jmeni xi sʼin (1 Rey. 12:9-11). Koanjin nga je Jeobá kiskonangile tsakai jñanile kjoafaʼaitsjen xi koaitjenngi, tonga tosa kui kjoafaʼaitsjen kitjenngi je xi kitsjoale xti xi ñatjen koanjchínga. Alikui nda kichomani nga kʼoakisʼin. Kʼoa ñá jónʼia, tsakui nichxin tsínkjoan kui kjoafaʼaitsjen kʼoainá xi sa̱sénná, tonga tsa ya Biblia yʼangini jmeni xi kʼuínná, machjén nga si̱tjosoán. w22.02 9 párr. 6

Jngo chjota xi nangitokon kʼoa xi be nga tsín toje kʼoakoa̱nyejele, alikui kui fini jokji kjoafaʼaitsjen tjínle xi sʼa xti, tosaa kui kuenta sʼín nga kuitjosonle je xá xi sʼe̱nele. Je ndsʼee xi jekoanjchínga alikui maxinkonke je xi sʼa xti, tosaa tsjoa satío kon nga ñatjen síxá. Kʼoasʼin síkjaʼaitsjen nga je ndsʼee xi sʼa xti jngoo kjoatjao xi tʼatsʼe Jeobá nroani, kʼoa tsjoá kjoanda tʼatsʼe jmeni xi sʼín ndsʼee jebi. Kʼianga jenroajen nganʼiole je ndsʼee xi jekoanjchínga, nʼio chjí bekon je ndsʼee xi sʼa xti, nga tjínle nganʼio kʼoa nga mele sitjoson je xá xi tjín ya jinjtín. Nʼio nda choa̱ tsakʼéjna je Noemí nga kitsjoa kjoanda nga tsakasenkao je Rut, jngo chjoón xi ngisa xti tikʼoajinni je. Kʼianga jekʼien tile, je Noemí kʼoakitsole Rut nga katafikonnile xínkjín. Tonga je Rut kʼoakitso nga koaikao Noemí saʼnda ya Belén, kʼoa je Noemí koanjyole nga kikao Rut (Rut 1:7, 8, 18). Kʼoa nʼio tse kjoanda kisokole nga jao (Rut 4:13-16). Kui choa̱le Noemí fitjenngi je ndsʼee xi jekoanjchínga kʼianga nangitokon ma. w21.09 10, 11 párr. 9-11

Je Jeobá majinle jokji tjen bichó nganʼioná nga jngó jngoá. Tsakui nichxin ngisa tse si̱xálai Jeobá tikʼoajinni xi ngikʼa, kʼoa tsakui nichxin ngisa choa xi totʼatsʼe nga jekoanjchíngai, tsa chʼin tjínli kʼoa tsakuije̱ nga ji kjineli bijnyiʼai je familiali. Tonga ali nikinroajenjin tokuin (Gál. 6:4). Je Jeobá alikui chajinle jmeni xi tinʼiai. Tsa kʼoénelai yaoli jokji tjen bichó nganʼioli nga si̱xálai kʼoa tsakui kʼoasʼianni nga tsjoachai, je Jeobá nda sʼe̱ kon. Je Jeobá be jotjín je ni̱ma̱li. Kui xi mele nga tsjoa sʼe̱ tokuin josʼin nga ʼyaxkuín. Nda tjío tokoán ndʼaibi nga̱ ʼyañá nga je Jeobá basenkaoná kʼianga kjoa bitjatojiaan (Is. 41:9, 10). Tsjoa satío tokoán kʼianga je Jeobá ʼyaxkoán, nga̱ tojé xi bakinle nga kuitjojeya kʼoa nga jchaxkón (Apoc. 4:11). w22.03 24 párr. 16; 25 párr. 18

Tjínnele chjénngilee Jesús, tonga alikui si̱kinroajeen tokoán tsa tsínkjoan kʼoasʼin kuitjosonná jokisʼin je (Sant. 3:2). Tsa ʼyani xi kui tíkotʼaya josʼin manda dibujo, alikuijinkʼia kʼoakjoán sikjoan josíkjoan je xi tíbakóyale, tonga tsa kuenta sʼin jñani machjén nga sindayasa josʼin sinda je dibujo kʼoa tsa skénngile je maestrole sa nda sa ndajin sikjoan je dibujo xi sinda. Tikʼoasʼinni, tsa mangíntjenngiaa je kjoafaʼaitsjen xi majinná kʼianga chotʼayá Biblia kʼoa tsa bʼenelee yaoná nga tosi tonda nindayaa yaoná, kʼoasʼin mangíntjenngiñá je choa̱le Jesús (Sal. 119:59). Nichxin xi tiyoaa ndʼaibi to yaole fini je chjota, tonga ñá xi choʼndale Jeobá maa alikui kʼoanʼia. Ñaki kʼoatjín tokoán nga mená chjénngilee jokisʼin je Jesús nga tsakasenkao xi kjaʼaí (1 Ped. 2:21). Tsa kʼoénelee yaoná nga kuinyakoaa xi kjaʼaí, tsjoa sa̱tío tokoán nga̱ ʼyañá nga kui xi sasénle je Jeobá. w22.02 24 párr. 16; 25 párr. 18

Je Jeobá kui Biblia tísíchjén ndʼaibi nga tíbándiaale je naxinandále. Kʼiatsa si̱kʼayaa nichxin nga si̱kjaʼaitsjenjiaan jmeni xi bakóyaná je Jeobá kʼoasʼin koakoñá nga je tíbándiaaná kʼoa kuitjosonná je xá xi tíbánená (1 Tim. 4:15, 16). Ijngo koya xi síchjén je Jeobá nga bándiaale naxinandále jé “choʼnda xi nʼiotʼakon, xi nda be xá” (Mat. 24:45). Sakʼoajin tsín koa̱njinyejená jmeni xi kuitsoná je choʼnda jebi. Tobʼelañá, tsakui kʼoakuitsoná jmeni xi tjínnele sʼiaan tsa totsejinni kjoaxkón kjoaʼaínená, kʼoa tsa kʼoasʼin si̱kjaʼaitsjeen nga tsín kʼoakoa̱n ya jñani tsaan. Jméni xi tjínnele sʼiaan kʼiatsa kʼoasʼin si̱kjaʼaitsjeen nga tsín nʼio kui­nyakaoná jmeni xi kʼuínná. Koaan si̱kjaʼaitsjenjiaan jmeni xi masjainá nga bʼexkiaa Biblia. Nichxin kjoatse, tjínkʼa choʼndale Niná xi kʼoasʼin kisikjaʼaitsjen nga tsín josʼin kuinyakao jmeni xi tsakʼinle, tonga kuini xi tsakʼasjentjai nga jekoanni (Juec. 7:7; 8:10). w22.03 18 párr. 15, 16

Ñaki kʼoatjín kon je Jesús kʼianga kʼoakitso je én xi kamaxkia ndʼaibi. Je Jesús be nga toje Jeobá xi koa̱nle sikjaʼáyanile kʼoa ñaki kʼoatsakʼé kon nga kjoaʼaítsjenle Nʼaile xi tʼatsʼe. Jméni xi bakóyaná. Kixi kjuintʼalee je Jeobá ningalani ni̱kʼienná. Kʼianga kixi kjuintʼalee je Jeobá machjén nga ni̱ma̱ná kjuinroajinni nga je si̱nʼiotʼaa (Prov. 3:⁠5). Kataʼyala choa̱le jngo ndsʼee xi Joshua ʼmi, xi 15 nóle kʼoa xi nʼio táo chʼin kisʼele. Alikui kʼoasʼin kisixki jokitsole je chjinexki, nga̱ tsa kʼoalani kisʼin jaʼatonejin je kjoatéxomale Niná. Kʼianga tojeme kuiyá, i kitsole je male: “Yaa ntsja Jeobá sikʼéjnaya je kjoabijnachonna”. “Ñaki kʼoatjín tokoan kʼianga sikjaʼáyanina je Jeobá. Be jotjín je ni̱ma̱na kʼoa be nga tsjoake̱ kjoaixia”. Machjén nga si̱kjaʼaitsjenjiaan ngatsʼiaa jebi: “Tsa kjoalani kjoaʼatojian kʼoa tsa xkónlani jekoatejna, a kixi kjuítʼale je Jeobá, a ñaki kʼoatjín tokoan nga kjoaʼaítsjenle xi tʼatsʼan kʼoa nga sikjaʼáyanina”. w21.04 12, 13 párr. 15, 16

Nʼio tsjoa satío tokoán nga ʼmiyasoán je Énle Niná, ni kjuinrʼoéná je chjota kʼoa ninga mai. Tsakui nichxin kʼoasʼin nikjaʼaitsjeen nga tsín nʼio tse jmeni xi nʼia nga ʼmiyasoán. Tonga tsa kʼoénelee yaoná jokji tjen kʼoakoa̱nná, tsjoa sʼe̱ kon je Jeobá. Ninga tsín ma bitjoaa ndʼianá, je Jeobá majinle kʼoa nʼio chjí be nga mená kʼuínyasoán. Tsakui nichxin koa̱n chja̱kaonajmíñá Énle Niná je xi síkuindaná kʼoa kao je chjinexki. Kjuinroajenjin tokoán tsakui si̱kjaʼaitsjeen jokinʼia ngasʼa kʼoa nga tsín tikʼoakji bichóni nganʼioná ndʼaibi. Kʼiatsa kuenta sʼiaan josʼin tíbasenkaoná je Jeobá ndʼaibi, kui xi koasenkaoná nga tsjoa sʼe̱ tokoán kʼoa nga chókjoajinná tojme kjoa xi kuitjátojiaan. Alikui ʼyaa ʼyani xi koasenkao jmeni xi tinʼia nga tiʼmiyasoán je Énle Niná (Ecl. 11:6). w21.05 24, 25 párr. 14-17

Nga xkaiʼa koan je rey David kui xokisikao nga kisichajinni jme xi kitsjoale Jeobá. Jolani nga nyiná koan kʼoa nga kisikinjele je chjotakontrale. Nʼio tsjoa kisʼe kon kʼoa kʼoakitso nga je Niná kitsjoale ngayeje jmeni xi kisʼele (Sal. 40:5). Tonga ñandia kʼianga tsín tikuenta kisʼinni je Jeobá. Ningalani nkjín koan je yánchjínle, jé kisimekon jngo chjoón xi xʼin tjínle. Chjoón jebi Bat-Seba tsakʼin kʼoa Urías tsakʼin je xʼinle. Je David jé tsakajnakao Bat-Seba kʼoa jngo ʼndí kisʼele. Kʼoa xi jekoanni, je David tsakʼéndajin nga kinikʼien je Urías (2 Sam. 11:2-15). Ánni nga kʼoakisʼinni je David. A kʼoasʼin kisikjaʼaitsjen nga tsín tíbe je Jeobá jmeni xi kisʼin. Ningalani nkjín nó nga kixi kitʼale Jeobá, chaan ngʼakon koan kʼoa xkaiʼa koan. Nʼio tse kjoa kichomani jmeni xi kisʼin je David. Nga jeki nichxin, chaan tsakʼéjnatsen je jée xi tsakajngi kʼoa tsjoa kisʼe ijngokʼa kon nga kisichatʼale je Jeobá (2 Sam. 12:7-13). w21.06 17 párr. 10

Tsa kʼoasʼin nikjaʼaitsjeen nga tsín koa̱nná nga Biblia kʼuínyalee je chjota. Tsakui nichxin kʼoasʼin nikjaʼaitsjeen nga chasaná kjoankjíntokon kʼoa tsakuije̱ nga tsín maná nga ʼmiyaa. Janla koya kataʼyaa xi koasenkaoná. Xi títjon, je Jeobá be nga koa̱nná kʼuínyalee xi kjaʼaí. Xi majaoni, je Jesús tjínle kjoatéxoma ya ngʼajmi kao i̱ Sonʼnde, kʼoa jé xotsoná nga kʼuínyalee chjota (Mat. 28:18). Xi majanni, alikui toñá tiyoaa. Tojo koan je Jesús, jé Jeobá koasenkaoná jmeni xi sʼiaan kʼoa jmeni xi kuixoán (Juan 8:28; 12:49). Koaan chja̱kaonajmiá je superintendente xi tsʼe grupo, tsa jngo precursor kʼoa tsa jngo ndsʼee xi nʼio nda male tsoyason nga katabasenkaoná nga kʼuínyalee Biblia je chjota. Kʼiatsa kjuinkoaa je ndsʼee nga Biblia fitsoyale chjota, ngisajin nda koa̱nná nga kʼuínyaa Biblia. w21.07 6 párr. 12

Nga jenʼio koanchrianle nga kjoetʼa jme xi chon sonʼnde, nʼio machjén nga kʼoéjngoaa tokoán nga kui xi kixi tjín kʼoasʼín je Jeobá. Machjén nga je Jeobá si̱nʼiotʼaa kʼianga jetíjna kjoañʼai xi nʼio tse, tsakui nichxin kui kʼoakʼuínná jmeni xi tsín ndi̱to̱n koa̱njinná kʼoa tsakuije̱ xi kʼoasʼin si̱kjaʼaitsjeen nga tsín koasenkaoná kʼoa ñʼai koa̱nná nga si̱tjosoán. Alikui jesoa Jeobá kjoakaoná nga kui nichxin, jéjin sichjén je chjota xi kjoéjin nga bándiaaná. Nga kui nichxin alikuijin koa̱n nga kuila si̱kjaʼaitsjeen tsa tʼatsʼe Jeobá tínroani je kjoafaʼaitsjen xi tíbʼainá kʼoa tsa totsʼe kjoafaʼaitsjen tjíosíchjén xi tjíobándiaaná. A jé Jeobá si̱nʼiotʼaa nga kʼia, kʼoa a koa̱nkjainná jme xi kuitso naxinandále. Kʼianga jchaa xi tʼatsʼe jebi kuenta sʼiaan jonʼia ndʼaibi kʼianga jme kjoafaʼaitsjen tsjoáná je naxinandále Niná. Tsa makjainná jmeni xi tso naxinandále Niná ndʼaibi kʼoa tsa tokjoan nitjosoán kʼoajin tisʼiaan kʼianga jetíjna kjoañʼai xi nʼio tse. w22.02 6 párr. 15

Jé Jeobá tsakasenkao je Gedeón kao chjotale xi 300 mani nga kinjele kjoajchán, kʼoa koanjin ngʼa tsakʼasje yaole tsakai. Je chjota xi ntje̱le Efraín kitjenni, ʼndele nga nda tso én koaikjákao Gedeón tosaa tokinchja̱ti. Kuinga koanjtinile nga tsín jokitsole Gedeón nga kikján (Juec. 8:1). Je Gedeón tsakʼéyanajmíle josʼin kisichikontʼain je Jeobá. Kʼoa chjota jebi alikui jme xi tikitsoni (Juec. 8:3). Je Gedeón alikui ngʼakon koan, nga̱ kui xi koanmele nga ndasʼin kʼoéjna kao naxinandále Niná. Jokisʼin je chjota xi ntje̱le Efraín kitjenni kui bakóyaná nga tsín koa̱n nga kui ngisa kʼoailee kjoandosin josʼin bʼaxkiaa ʼndele nga je Jeobá chʼa̱sjengʼaa. Je Gedeón nʼio nda choa̱ bʼéjnale xi jko̱ tjíole yaniʼya kao xi chjotajchínga sʼin tjío. Kʼiatsa ʼya xi koa̱njtile, koaan si̱kjaʼaitsjeen jotjín kon. Kʼoati koa̱n kʼoakʼuínlee jñani nda tísʼín. Kuinga machjénni nga nangitokon koaan. Je xi ngisa chjíle kuinga ndasʼin biyoaa kao xíngiaa tikʼoajinni nga kʼoakuixoán nga tsín ñá tjínná jée. w21.07 16, 17 párr. 10-12

Je Jeobá kʼoasʼin kisindaná jokjoan je. Kʼianga kʼoasʼin kisindaná je Niná jokjoan, koaan chjénngilee nga koakoá kjoatsjoacha, nga kixi koaan, nga koakoá kjoamatokon kao kjoatéxomakixi (Sal. 86:15; 145:17). Kʼianga bʼenelee yaoná nga kʼoanʼia, ʼyaxkónñá je Jeobá kʼoa bʼailee kjoanda (1 Ped. 1:14-16). Kʼianga kʼoanʼia jmeni xi sasénle tsjoa sʼe tokoán. Xi ijngosani, nga kʼoasʼin kisindaná Jeobá jokjoan, koaan kʼoakoa̱nkjoaan josʼin mele ánni nga ya kuiyojinñá je familiale. Je Jeobá jngo ʼnde xi nʼio naskáchon kitsjoaná. Nga kjesa síndajin Niná je chjota, títjonkjoanla je Sonʼnde kisinda (Job 38:4-6; Jer. 10:12). Nga nda chjota kʼoa nga ndʼé je Niná, nʼio nkjín koya tsojmi kisinda xi tsjoa báya tokoán (Sal. 104:14, 15, 24). Je Niná sakʼoa kisikjaʼaitsjenjin jmeni xi kisinda kʼoa “tsabe nga ñaki nda” (Gén. 1:10, 12, 31). w21.08 3 párr. 5, 6

Ngatsʼiñá xi chjotale Cristo maa nga kui xá kjinená nga ʼmiyasoán kʼoa nga chjotatjenngile Cristo nikoaa je chjota (Mat. 28:19, 20; Rom. 10:14). Tsa mená nga ngisa nda kuitjosonná xá jebi, koaan chótʼayá je folleto Nda takoyai. Jngo koya xi nʼio chjíle nga sʼiaan kuinga tosi tonda si̱ndayaa yaoná nga kʼoakoa̱nkjoaan josʼin mele Niná (Col. 3:12; 2 Ped. 1:5-8). Kuijin xi mená tsakai ndʼaibi nga ngisasa tse si̱xálee je Jeobá tonga sakʼoa likui kʼoamaná. Tonga kʼianga jekjoaʼaí sonʼnde chjotse, ñaki tojé Jeobá si̱xálee, kʼoa nga kjesa faʼaijin nichxin jebi, tsa kʼoénelee yaoná jokji tjen kʼoakoa̱nná nga si̱xálee Jeobá, tsjoa sʼe̱ tokoán kʼoa likui nʼio si̱kjáojiaan. Tonga xi ngisa chjíle kuinga je Jeobá jchaxkoán kʼoa je chʼa̱sjengʼaa, “je Niná xi tsjoa tjínle” (1 Tim. 1:11). Kuinga tsjoa kʼoéñá tokoán jmeni xi tinʼia nga tinixálee Jeobá. w21.08 25 párr. 18-20

Tsa tokʼoa jetestigole Jeobá je xijcháli nga kitsin, kʼiajin saʼnda nga sʼa ʼndí tisui tsaʼyani xi tʼatsʼe Jeobá. Tsakʼinyajinli nga je kisinda ngayeje jmeni xi tjín, nga nʼio nda chjota, kʼoa nga kui xi mele nga i̱ kuiyoaa sonʼnde nga jeʼndenaxó koa̱n (Gén. 1:1; Hech. 17:24-27). Nkjín chjota xi tsín makjainle nga tíjna Niná kʼoa tjínkʼa xi tsín makjainle tsa je kisinda ngayeje jmeni xi tjín. Kʼoasʼin makjainle nga toxijña tsʼatsen je kjoabijnachon kʼoa tobijbi tsʼantjaiya ngayeje. Tjínkʼa chjota jebi xi skuelangʼa kiskotʼaya kʼoa kʼoatso nga tsín kʼoatjín jmeni xi tso Biblia, kʼoatso nga toje xi makjainle tʼatsʼe Niná je xi tsín jme xi majinle, xi tsínle kjoachjine kʼoa xi tomakjainyejele jme xi ʼmile. Ni jekjoatse kʼoa ni chriansʼa nga tinixálee je Jeobá machjén nga tosi tonda si̱tajaa kjoamakjainná. Tsa kʼoasʼiaan, alikui je kʼoanachaná je xi kʼoatso nga to énndiso jme xi bakóya je Biblia, nga̱ je Énle Niná kʼoatso nga niʼyajin xi katabʼanachaná “kao kjoachjine xi tokjoandiso xi tsínjme chjíle” (Col. 2:8). w21.08 14 párr. 1-3

Je Abel, Noé, Abrahán kao Job tsabexkón je Jeobá kʼoa tsjoake koan. Kʼoasʼin tsakakóni nga tsakʼaʼén jmeni xi kitsole, nga koankjainle xi tʼatsʼe kʼoa nga kisitjosonle. Jmeni xi kisʼin chjota jebi kisasenle Jeobá. Kʼianga jeki nichxin, je Niná kitsjoale kjoatéxoma je ntje̱le Abrahán. Kjoatéxoma jebi kʼoatso josʼin tjínnele jchaxkón je Jeobá. Kʼianga jekʼien kʼoa jaʼáyanile Jesús, je Jeobá alikui tikʼoakitsonile naxinandále nga kui kjoatéxomale Moisés katasítjoson (Rom. 10:4). Je chjotale Cristo tjínnele kui kjoatéxomale Cristo koaitjenngi (Gál. 6:2). Kui choa̱le Jesús tjínnele koaitjenngi kʼoa kao jmeni xi tsakakóya, ali tsakuijin jotso je kjoatéxoma kao jmeni xi bʼéchjoa. Nichxin xi tiyoaa ndʼaibi, ñá xi chjotale Cristo maa bʼenelee yaoná nga kʼoanʼia jokisʼin Jesús ánni nga nda kuiyosíñá ngixko̱n Jeobá kʼoa nga nda sa̱tíoni tokoán (Mat. 11:29). w22.03 20, 21 párr. 4, 5

Je Jeobá nrʼoéle je xtile. Kinrʼoéle kʼianga tsakʼétsʼoale Jesús nga tsakʼejna i̱ Sonʼnde. Kinrʼoéle kʼianga kisijéle nganʼio nga kui kʼoasʼin xi nʼio tjínle kjoandosin, jolani kʼianga kiskoéjin xi 12 pastrole (Luc. 6:12, 13). Kʼoati kinrʼoéle kʼianga kisijéle nganʼio nga nʼio tse kjoa tífaʼatojin. Kʼianga tojeme yátsʼi̱n koasejnale Judas, kisijéle nganʼio je Nʼaile nga katachókjoajinle je kjoa xi kjoaʼatojin. Nga tsakasenkao Jeobá je ʼNdíle ali tsa tokinrʼoéjinle, jngoo ánkje kisikasén nga kisinʼiojin (Luc. 22:41-44). Je Jeobá kʼoati nrʼoéná kʼianga bʼetsʼoalee kʼoa kʼiakjoán basenkaoná nga nganʼio machjénná (Sal. 116:1, 2). Jngo tichjaa xi India tsʼe kʼoatso josʼin tsakasenkao Jeobá kʼianga tsakʼétsʼoale. Tichjaa jebi nʼio kisikjáojin kʼoa kisijéle nganʼio je Jeobá nga katabasenkao. Itso: “Nʼio tsakasenkaona jmeni xi jaʼa ya JW Broadcasting^® xi tsʼe sá mayo nó 2019 nga̱ kui kinchja̱ni jméni xi koa̱n sʼiaan kʼianga nʼio nikjáojiaan kʼoa nga ansiedad bʼetʼaná, kʼoa kuikjoán xi machjénna nga kʼia. Kʼoasʼin tsaʼbeña nga kinrʼoéna je Jeobá nga tsakʼetsʼoale”. w21.09 21, 22 párr. 6, 7

Si̱kjaʼaitsjenla jokji ñʼai koanle je chjotale Cristo xi tsakatio nga siglo 1 nga xin naxinandá kikatio, nga kisikatío ngayeje xi kisʼele. Tjínnele kʼoatsakatío kon nga je Jeobá tsjoále jme xi koa̱nchjénle. Aon nó tongini nga kjesa bichókationdaijin ya Jerusalén je sondado romano, je pastro Pablo kʼoakitsole je chjotale Cristo jme xi tjínnele sʼin. I kitsole: “Ali kjoanyinájin nimetakon. Tʼejngo takon kao xi jetjínno, nga̱ Niná kʼoakitso: Likui xin koatejnale, nitsjionkonjinle. Kʼoasʼin nga kʼoakuixónnía nga nʼiotakoán: Jé Nainá xi basenkaona, likui tsakjonnia. Jmé xi koa̱n sikaona chjota” (Heb. 13:5, 6). Je chjotale Cristo xi kisitjoson je kjoafaʼaitsjen xi kitsjoale Pablo ngisajin choa ñʼai koanle nga xin naxinandá kikatio. Ñaki kʼoatsakatío kon nga je Jeobá tsjoále jme xi koa̱nchjénle. w22.01 4 párr. 7, 9

Kʼianga je nikjaʼaitsjeen jngo chjota xi tjínle kjoamatokon, jé fiya jkoaa jngo chjota xi ndʼé kʼoa xi tjotʼa jme xi tjínle. Kʼoa tsakui nichxin je faʼaitsjennáje̱ je chjota samaritano xi kinchja̱ni Jesús. Chjota jebi tsakakóle kjoamatokon je chjota judío xi chjotaché kisikiʼaon. Je chjota samaritano koanmake je chjota judío, kʼoa nga tjínle kjoatsjoacha kikao tsʼe chjinexki (Luc. 10:29-37). Choa̱ jebi kui bakóná jokjoan je Niná nga tjínle kjoatsjoacha kʼoa nga nyaon nyaon bakóná kjoamatokon. Kʼoati kui bakóyaná nga jngo chjota xi tjínle kjoamatokon alikui kjoañʼai tsjoále jngo chjota ninga bakinle nga kʼoanikao. Je Jeobá kʼoasʼín, tojo kitso je xi kiski jngo salmo, tsín kʼoasíkaoná “josʼin bakinná tʼatsʼe jée xi tibijnyaa” (Sal. 103:10). Tonga kʼianga ai jée xi bajngi jngo chjota, je Jeobá batekjáyale josʼin tjen ndiaale. w21.10 8 párr. 1, 2

Je Jeobá tojé bakóle xi ñaki kjoatsjoacha je xi nʼio miyole, xi tsonile je choʼndale. Yaa tsoyaná jebi jmeni xi kitso je rey David kao profeta Daniel. Tobʼelañá, je David i kitso: “Tosi tonda takolai xi ñaki kjoatsjoacha je xi bexkonli”. I kitsosa: “Bakóle Jeobá xi ñaki kjoatsjoacha ngantsjai nichxin je xi tsokjónke”. Kʼoa je Daniel i kitso: “Ji Jeobá, xi ñaki Ninání, [...] bakolai xi ñaki kjoatsjoacha je xi tsjoakeli kʼoa xi sítjoson kjoatéxomali” (Sal. 36:10; 103:17; Dan. 9:4). Tojo tso texto jebi, je Jeobá bakóle xi ñaki kjoatsjoacha je choʼndale, nga̱ bexkon, tsokjónke, tsjoake kʼoa sítjoson kjoatéxomale. Tojé naxinandále Jeobá xi bakóle xi ñaki kjoatsjoacha, nga̱ kʼoasʼin bexkón josʼin mele. Kʼianga kjesa je Jeobá nixájinlee, tokʼoa jebakóná kjoatsjoacha xi bakóle ngatsʼi chjota (Sal. 104:14). Tonga kʼianga jetsaʼyaa Jeobá tsakakóná xi ñaki kjoatsjoacha. w21.11 3, 4 párr. 8, 9

Ninga tojme kjoa xi kuitjátojiaan, ñaki kʼoakʼoé tokoán nga si̱tjosoán jokitso je Jesús. Nichxin xi tiyoaa ndʼaibi, nʼio nkjín chjota xi ya fitʼale xi nyatítjonle religión kʼoa saʼnda síkʼatone choa̱le josʼin bexkón. Nʼio nkjín chjota fi ya yo̱ngo̱, batse libro kʼoa nʼio tse tao̱n batío. Tjínkʼa xi makjainle ngayeje jmeni xi ʼmile. Tosajin tsín kʼoasʼin kʼiatsa ñaki xko̱n tjíobeni je Jesús. Tonga ñá xi choʼndale Jeobá maa nijngojinla chjota mangíntjenngilee. Ningalani bakolee kjoaxkóntokon je xi bándiaaná, kui mangíntjenngiaa nga i̱ kitso je Jesús: “Ngatsʼio nga jon ndsʼe manio” (Mat. 23:8-10). Alikui chjota bʼetsʼoalee, nijejinla chjota xi nyatítjonle religión kʼoa tsa chjotaxá. Alikui ya bʼainganʼiolee jmeni xi sʼín kʼoa tsín ya nojiaan yaoná jme xi chon sonʼnde. Alikui kʼoanʼia josʼín je religión xi chjotale Cristo tsole yaole (Juan 18:36). w21.10 20 párr. 6, 7

Je chjotale Cristo xi mele nga tsje sʼin kʼoéjna ngixko̱n Niná, machjén nga kui ngisa tsjoále kjoandosin nga simiyo Niná. Nga testigole Jeobá maa alikui kui mená kʼoasʼiaan jmeni xi sijndí je jaʼaín­tsjele Niná (Lev. 19:12; Is. 57:15). Kʼianga kisitjoson je chjota israelita je kjoatéxomale Niná, kʼoasʼin tsakakóni nga je Jeobá Ninále. Ya Levítico 18:4 itso: “Titjoson je kjoatéxomana, kʼoa kʼoasʼin tangínkao yaono jotso kjoatéxomana kʼoa titjoson. Anña Jeobá Nináno”. Ya capítulo 19 kui faʼaitʼa kʼa je kjoatéxoma xi kitsjoale Niná je naxinandá Israel. Tobʼelañá, ya versículo 5 saʼnda 8, 21 kao 22 kui nchja̱ni nga cho̱ tsakʼaitʼale Niná. Tjínnele kʼoasʼin tsakʼaitʼa cho̱ jebi josʼin nga tsín kisijndí jmeni xi tsje tíjna. Kʼianga bʼexkiaa versículo jebi, kui síkjaʼaitsjenná nga tjínnele kui kʼoasʼiaan kʼoa kui kʼoaitʼalee Niná jmeni xi sasénle tojo tso Hebreos 13:15. w21.12 5 párr. 14, 15

Xi chriansʼa chixaon kʼoati koasenkaono jotjíosʼín je ndsʼee xi jekjoatse chixan xi je Jeobá tjíosínʼiotʼa. Tjínkʼa je ndsʼee xi jechixan xi nʼio nkjín nó nga ñaki to xále Niná tjíosʼín. Koaan tijélao kjoafaʼaitsjen tsa nganʼio machjénno josʼin koa̱n si̱xálao Niná. Tsa kʼoasʼiaon, koakoño nga je Jeobá ninʼiotʼao (Prov. 22:17, 19). Je kjoabixan jngoo kjoatjao xi tʼatsʼe Jeobá nroani, kʼoa je Niná kui xi mele nga tsjoa sa̱tío kon je xi bixan (Mat. 19:5, 6). Xi chriansʼa chixaon, koaan si̱kjaʼaitsjenjion jméni xi sʼiaon. A tibakolao Jeobá nga bʼailao kjoanda tʼatsʼe kjoanichikontʼain xi títsjoáno. Tʼetsʼoalao je Jeobá, kʼoa tjasjaijion ya Biblia je kjoafaʼaitsjen xi koa̱nchjénno kʼoa titjoson jmeni xi tso. Ali jaojin bʼao tokon nga nʼio nda kuiyo kʼoa nʼio tsjoa sa̱tío tokon kʼiatsa kui xále Jeobá títjon si̱kʼéjnao. w21.11 19 párr. 16, 18

Je Santiago ndasʼin kisikjaʼaitsjen. Alikui kʼoasʼin kisikjaʼaitsjen nga ngisa chjíle je xá xi kisʼin tikʼoajinni ndsʼe̱, kʼoa alikui ngisa ngʼa tsakʼasje yaole tokuini nga ndsʼe̱ koanni je Jesús. Tosaa “ʼndíndsʼe, xi kjaí tsjoake̱no” kitsole kʼianga kiskile (Sant. 1:16, 19; 2:5). Alikui nʼio kixi tsakʼasje yaole. Xi bakóyaná: Kuenta sʼiaan nga chjotajée maa ngatsʼiaa. Alikui kʼoasʼin si̱kjaʼaitsjeen nga ngisa ngʼa tiyolee chjota xi ʼmiyalee Biblia. Tsa nʼio kixi chʼa̱sjee yaoná ngixko̱n chjota xi ʼmiyalee, kʼoajinsʼin sikjaʼaitsjen nga tsínkʼia kuitjosonle jmeni xi tso je Énle Niná. Tonga kʼianga bʼeyanajmílee nga ñʼai ma sakʼoaná nga nitjosoán je Énle Niná kʼoa nga kʼoaʼmilee josʼin tíbasenkaoná Jeobá nga tinindayaa yaoná, kʼoasʼin binyakaoñá nga kʼoati Jeobá katasíxále tsanda je. w22.01 11 párr. 13, 14

Kʼianga tosi tonda kʼoénelee yaoná nga kʼoasʼin si̱kjaʼaitsjeen josʼin síkjaʼaitsjen je Jesús, ngisaa nda chjénngilee josʼín kʼoa jokjoan (Heb. 1:3). Tsakui nichxin i̱si: “Nga chjotatsje je Jesús, alikuijinkʼia kʼoakjoansʼin skenngile”. Tsa kʼoasʼin nikjaʼaitsjain, jan koya tjínni xi kuenta tʼiain. Xi títjon, kuinga kʼoasʼin kisindaná Jeobá nga koa̱n chjénngilee jokjoan je kʼoa nga koa̱n chjénngilee je Jesús. Ninga tsínkjoan ñaki kʼoakoa̱nkjoain jokjoan je, tonga koaan chjénngilai (Gén. 1:26). Xi majaoni, jé nganʼiotsjele Niná koasenkaoli jmeni xi tsín bele tokuin nga kʼoakoa̱nli nga toji. Xi majanni, je Jeobá be nga tsín kuitjoson tsjetsjeli nichxin xi tiyoaa ndʼaibi nga koakui je kjoanda xi tsjoá nganʼiotsje. Kuenta tʼiain nga jngo jmi nó tíjnaná nga tosi tonda si̱ndayaa yaoná saʼnda nga chjotatsje koaan josʼin mele Jeobá (Apoc. 20:1-3). Je xi mele Jeobá kuinga tosi tonda si̱ndayaa yaoná kʼoa nga kʼoakʼoé tokoán nga je koasenkaoná. w22.03 9, 10 párr. 5, 6

Kʼianga bʼetsʼoaa machriantʼalee je Jeobá. Kʼoa xi kʼoati basenkaoná kʼiaa nga bʼexkiaa je Biblia kʼoa nga mangián kjoajtín. Jméni xi sʼiaan nga ngisa nda chótʼayá kʼoa nga ngisa nda koa̱njinná jmeni xi faʼa ya kjoajtín. Si̱kjaʼaitsjenjiaan jméni xi bʼéchjoaná nga tsín nda chotʼayá kʼoa nga tsín nda bi­nyañoaa nga satíoná kjoajtín. A kuinga teléfono nokjoaná, tsa correo kjoaʼaíná kʼoa tsa mensaje kjoaʼaíná ya teléfono kʼoa tsa xinsa. Nʼio machjénná je teléfono kʼoa tsa jmesani xi nichjén. Tonga tsa xin koai kjoafaʼaitsjenná nga tichotʼayá kʼoa nga tiyoaa kjoajtín, kʼoakʼuínlee je Jeobá nga katabasenkaoná. Nʼio chjíle nga yala sisian xi tʼatsʼe Niná ninga ñʼai koa̱nná. Kʼoétsʼoalee je Jeobá kʼoa kui kjoanyʼántokonle sikuinda ni̱ma̱ná kao kjoafaʼaitsjenná (Filip. 4:6, 7). w22.01 29 párr. 12-14

Je rey Uzías tsín tsakʼaʼén jotsakʼinle. Yaa kicho jngo ʼnde jñani toje naʼmi xi tiʼndele faʼasʼen nga tsjoátʼa xongó. Je naʼmi i kitsole: “Uzías alikui ji bʼakaoli nga xongó koakalai je Jeobá. Tojé naʼmi xi tiʼndele baká xongó”. Je Biblia kʼoatso nga tokoanjtile je Uzías nga kʼoatsakʼinle. Ánni nga tsín tsakʼaʼénni. Tsakui nichxin tokui kini nga je batéxoma kʼoa tsa kʼoasʼin kisikjaʼaitsjen nga tiʼndele kʼoasʼin tojmeni xi mele. Tonga je Jeobá alikui kʼoasʼin kisikjaʼaitsjen. Tsa nangitokonlani koan je Uzías, tsa kisitjoson jotsakʼinle kʼoa tsa tokjoan kitjoni ya yo̱ngo̱ tsakui nichxin kisichatʼale je Jeobá. Tonga nga tsín tsakʼaʼén, jé Jeobá jtsé kisikajon yaole, kʼoa kʼoakisʼe saʼnda nga kʼien (2 Crón. 26:16-21). Jmé xi bakóyaná jokoan je Uzías. Toʼyani xi tsín sitjoson je kjoafaʼaitsjen xi tsjoá Biblia, alikui nda kʼoéjna ngixko̱n Jeobá. w22.02 9 párr. 7

Je xi tsjoáʼndele yaole nga tojo kʼoasʼín jokisʼin ngasʼa tokui fini jmeni xi símekon yaole (Col. 3:9). Tsa ngotjo majtinile, tsa to yaole fini, tsa tsín tsjoá kjoanda kʼoa tsa ngʼakon. Tsakui kotsenle je sén jñani tokjiojti chjota, película xi kjoachajngi bakó kʼoa tsakuije̱ jñani kján chjota. Ningalani kʼoasʼín, tsakui nichxin tjín jñani nda sʼín kʼoa chʼao sʼe kon nga kui kʼoasʼín kʼoa nga kui kʼoatso xi chʼaotjín, tonga tsín síkʼantjaiya yaole josʼin síkjaʼaitsjen kʼoa josʼín (Gál. 5:19-21; 2 Tim. 3:2-5). Nga chjotajée maa alikuijin kʼoakoa̱nná nga tsínkʼia tikui si̱kjaʼaitsjenñá xi chʼaotjín kʼoa nga tsín tikui nimetokonñá ya jinni̱ma̱ná kao jinkjoafaʼaitsjenná. Sakʼoajin kui kʼoakuixoán kʼoa kui kʼoasʼiaan jmeni xi skanni kʼoakoa̱nná (Jer. 17:9; Sant. 3:2). Tonga kʼianga chjaʼaxinlee yaoná jokinʼia ngasʼa alikui tikui bándiaaniná jmeni xi símekon yaoná kʼoa alikui tikʼoamakjoanñá jokoankjoaan ngasʼa (Is. 55:7). w22.03 3 párr. 4, 5

Xi chjotajchínga sʼin tiyo, kui kuenta tʼiaon jñani nda sʼín je ndsʼee. Ningalani chjotajée ma kʼoati tjín jñani nda sʼín. Sakʼoajin machjén nga kjoafaʼaitsjen kʼoailao je ndsʼee, kʼoatʼiaon jokisʼin je Pablo, ali tokuijin mangínño jmeni xi tso kʼoa jñani chʼao sʼín. Kuenta tʼiaon nga je Jeobá tsjoake ndsʼee jebi, nga tjíobʼénele yaole nga kixi tjíofitʼale kʼoa nga koa̱n sindaya yaole jñani chale. Kʼianga kui fini je xi chjotajchínga sʼin tjío jñani nda sʼín je ndsʼee, tsjoake ma kʼoa nda fikao xínkjín je ndsʼee. Xi chjotajchínga sʼin tiyo kuenta tʼiaon nga tsín tokui koyale Jeobá nga chjotatsje koa̱on, je xi mele kuinga kixi koanngíntʼalao (1 Cor. 4:2). Tʼejngo tokon nga chjí be Jeobá je xá xi tinʼiao. Ya Hebreos 6:10, itso: “Likui chajinle xáno kao je kjoatjaocha xi tsen tsaʼyanino xi tʼatsʼe jaʼaínle. Koantsen kjoatjaochabe nga kinisinlao je chjotale Cristo, kʼoa nga tojo nisinlao”. w22.03 31 párr. 19, 21