JMENI XI CHJONANGIAA XI TʼATSʼE BIBLIA

Ánni nga ʼNdíle Niná ʼmisíni je Jesús

Je Niná ali tsa chjoónjin tjínle, joni tsa chjota nga xti sʼele. Jé kisinda ngatsʼi je xi tjíokon. Tonga ñá xi chjotaa kʼoasʼin kisindaná nga koa̱n chjénngilee jokjoan kʼoa kuinga “ʼndíle Niná” tsakʼinsínile je Adán, je chjota xi títjon koannda. Kʼoa je Jesús kʼoati “ndíle Niná” ʼmi nga kʼoasʼin koannda jokjoan je Nʼaile. (Tʼexkiai Lucas 3:38 kao Juan 1:14, 49.)

Kʼiáni koannda je Jesús

Je Niná, jé títjon Jesús kisinda tikʼoajinni je Adán. Kʼoa saʼnda jé tsakasenkao Niná nga kisinda ngayeje tsojmi xi ngikʼa, saʼnda je ánkje. Kʼoa kuinga “je xi tíjnatítjonle ngayije xi kisʼenda” tsosínile ya Biblia. (Tʼexkiai Colosenses 1:15, 16.)

Kʼianga kjesa tsinjin Jesús ya naxinandá Belén, tokʼoa yaa tíjna ngʼajmi kʼoa espírituní. Kʼianga kichoka nichxin, je Niná yaa kisikʼéjnaya yatsʼoa̱ María kʼianga jo chjota sʼin kitsin i̱ Sonʼnde. (Tʼexkiai Lucas 1:30-32; Juan 6:38 kao 8:23.)

Ánni i̱ kisikasénsíni Niná je Jesús nga jo chjota sʼin kitsin. Jmé xá jaʼaini. Kʼiatsa ya kjoásjaijin ya Biblia xi tʼatsʼe jebi, koa̱nchoyasali kʼoa ngisa kʼoailai kjoanda je Niná kʼoa kao je Jesús jmeni xi kisʼin xi tʼatsaan.