Énndiso xi tso nga tsínle jaʼaín je Niná

JOSʼIN MAKJAINLE CHJOTA

Je chjota xi David Cunningham tsakʼin xi tʼatsʼe relijión kiski i kitso: “Kje sʼendajinjinnajin kʼiatsa koa̱n kʼoakuixoán tsa tjínle jaʼaín je Niná. Kʼoa ninga tjínlanile jaʼaín, lijojinsʼin jchanijin jñánile jaʼaínle” (Theological Studies).

JE BIBLIA ITSO

Je Niná i kitso: “Anña Jeobá. Kui jebi jaʼaínna” (Isaías 42:8). Je én xi Jeobá tso én hebreo jaʼaini kʼoa isʼin tsoyanile: “Jé xosʼín nga kʼoasʼin katabitjoson” (Génesis 2:4, nota).

Je Jeobá kui xi mele nga si̱chjén jaʼaínle. Je Biblia itso: “Tinókjoaño je jaʼaínle. Tʼinyalao jotjín naxinandá tjín jme xi tísʼín. Tikʼaxkio nga ngʼa tíjna jaʼaínle” (Isaías 12:4).

Je Jesús kisichjén je jaʼaínle Niná. Kʼianga tsakʼétsʼoale Jeobá i kitso: “Kataʼyaxkón jaʼaínli” (Mateo 6:9). Je Jesús kitsoyale jaʼaínle Niná je chjotale. Ánni nga kʼoakisʼinsíni. I kitso: “Jméni nga sʼe̱sínile kjoatsjoacha, josʼin nga koantsjoachanái, kʼoa an koatejnajian ni̱ma̱le” (Juan 17:26).

ÁNNI NGA MACHJÉNSÍNI NGA KATAʼYAA JEBI

Jngo chjota xi Walter Lowrie tsakʼin xi tʼatsʼe relijión kiski i kitso: “Je chjota xi tsín be joʼmi Niná alikuini ñaki be je Niná [...] kʼoa likui josʼin koa̱ntsjoakeni tsa tsín koa̱njinle nga ñaki tíjna Niná”.

Je chjota xi Victor ʼmi ntsjaintsjai fi tsakai ya yo̱ngo̱ nga xki̱ jin nichxin, tonga likuini majinle jotjínni xi tʼatsʼe Niná. Itso: “Kʼianga tsaʼbe nga Jeobá ʼmi jaʼaínle Niná, kʼoakoanna jomaná kʼianga ñaki nga̱ʼa nga̱ʼa ʼyaxkoaan tsa ʼyani. Kʼiaani saʼnda tsaʼbe xi tʼatsʼe Niná. Ñaki tsen koanna nga tíjna kʼoa miyona koan saʼnda nga kʼia”.

Je Jeobá kʼoati chrian bʼejnale je xi “kʼoasʼin síkjaʼaitsjen je jaʼaínle” kʼoa itsole: “Kʼoasʼin skoema̱no josʼín jngo chjota xi bakóle kjoamatokon je tile nga síxále” (Malaquías 3:16, 17). Je Niná síchikontʼain je xi síchjén jaʼaínle nga nchja̱le. Je Biblia itso: “Toʼyani xi sikʼaxki̱ je jaʼaínle Jeobá, kuitjontjainí” (Romanos 10:13, TNM).