Koaan ndasʼin kuiyoaa

JE Niná alikui kʼoasʼin koanmele nga kʼoasʼin kuiyoaa jochon ndʼaibi. Kui xi koanmele nga je koatio chjota xi skoe̱xkón josʼin batéxoma, xi koaitjenngi kjoafaʼaitsjenle kʼoa xi kʼoasʼin koaikao yaole josʼin mele Niná. Kʼoati kui xi koanmele nga nyʼán sʼin koatiokao xínkjín je chjota, nga nda koatio yaniʼyale, nga sa tse sa tse jmeni xi skoe̱ kʼoa nga ʼndenaxó sikao i̱ Sonʼnde.

JE NINÁ KʼOATSO NGA KʼOASʼIN KUIYOAA JOSʼIN KOANMELE SAʼNDA NGA TÍTJON

• “Kjoaʼaxin kjoajchán ngakjijnda sonʼnde” (Salmo 46:9).

• Jejaʼai “nichxin nga si̱kitsuín je xi sikitsón sonʼnde” (Apocalipsis 11:18).

• “Nijngojin xi ya kʼoéjna kʼoakuitso: Timʼeña” (Isaías 33:24).

• “Je xá xi sʼin je xi an kiskoejian ñaki tsjoa koaya kon” (Isaías 65:22).

Jósʼin kuitjoson én jebi. Je Niná, jé ʼNdíle kitsjoale xá ya ngʼajmi nga koatexomasonle Sonʼnde. Je Biblia Chjotaxále Niná tsole (Daniel 2:44). Kʼoa itso xi tʼatsʼe Jesús: “Je Nainá Niná tsjoále yáxilele [...]. Kʼoa je kjoatéxomale likui kjoetʼa” (Lucas 1:32, 33).

Kʼianga tsakʼejna i̱ Sonʼnde je Jesús, nʼio nkjín kjoaxkón tsakatío xi bakó nga ndasʼin kuiyoaa kʼianga jekoatexoma.

JE JESÚS TSAKAKÓ JMENI XI SʼIN TʼATSʼE CHJOTA XI SITJOSON

• Nga kisindaya tojme chʼin xi tjínle chjota, kʼoasʼin tsakakóni nga koa̱nle kjoaʼaxin ngayeje chʼin (Mateo 9:35).

• Nga koanle tsakʼéchjoale “ntjao̱xkón”, kʼoasʼin tsakakóni nga koa̱nle kʼoechjoale tojme kjoaxkón xi sʼe̱ (Marcos 4:36-39).

• Nga nkjín jmi chjota kisikjen, kʼoasʼin tsakakóni nga koa̱nle tsjoáná jmeni xi machjénná (Marcos 6:41-44).

• Nga vino kisikʼóya nandá, kʼoasʼin tsakakóni nga tsjoáná jmeni xi tsjoa koaya tokoán (Juan 2:7-11).

Jméni xi sʼiain nga sʼe̱li je kjoanichikontʼain xi tsjoále Niná je chjota xi tsjoake. Je Biblia kʼoatso nga tjínnele kui kjuinyaa “je ndiaa xi fini kjoabijnachon”, kʼoa kʼoatso nga tochoa mani xi masjaile ndiaa jebi (Mateo 7:14).

JE NDIAA XI TJÍNNELE KJUINYAA NGA NDA KUIYOAA

Jñánile je ndiaa xi kjuinyaa nga so̱koná kjoabijnachon. Je Niná itso: “An, Jeobá, anña Nináli, je xi kʼoasʼin bakóyali ánni nga ji xi nda kuijnasíni, je xi kʼoasʼin síkasényali ya ndiaa xi tjínnele kuitómjeyai” (Isaías 48:17). Ndasʼin kuiyoaa tsakui ndiaa jebi kjuinyaa.

Je Jesús i̱ kitso: “An nía xi ndiaa, an nía xi kjoakixi, an nía xi kjoabijnachon” (Juan 14:6). Tsa koa̱nkjainná jmeni xi kitso je Jesús kʼoa chjénngilee ngisaa koa̱nchriantʼalee Niná kʼoa ngisaa nda kuiyoaa.

Jósʼin koa̱n koa̱nsjainá je ndiaa xi tsʼe kjoabijnachon. Ninga nʼio nkjín religión tjín, je Jesús i kitso: “Likui kjoaʼasʼen kjoatéxomale ngʼajmi ngatsʼi xi Señor, Señor, tsona. Tojé xi kʼoasʼin josʼin mele Nʼaina xi tíjna ngʼajmi xi kjoaʼasʼen” (Mateo 7:21). Kʼoati i̱ kitsosa: “Kao xále jchanile chjotabe” (Mateo 7:16). Je Biblia koasenkaoná nga jchaa jñánile je religión xi kixi (Juan 17:17).

Jmé xi tjínnele sʼiaan nga ya kuitómjeyaa je ndiaa xi tsʼe kjoabijnachon. Tjínnele jchaa ʼyá tʼatsʼeni nga tiyochoán, jóʼmi, jókjoan, jméni xi tísʼín kʼoa jmé xi mele nga sʼiaan.a

Je Jeobá alikui tokui xi mele nga si̱xá, nga kuichaa, nga kʼoétsaojiaan kʼoa nga familia sʼe̱ná. Kui xi mele nga jchaxkoaan kʼoa nga miyole koaan. Kʼianga nitjosonlee kʼoasʼin bakoñá nga tsjoachaa. Je Jesús i kitso: “Jé xi kjoabijnachon ngantsjai, nga kʼoasʼin skoe̱li xi tojngo ji Niná xi ñaki kjoakixi” (Juan 17:3).

XI TÍTJON SʼIAAN

Kʼianga tsjoa kʼoé kon je Niná, tsakui nichxin machjén nga si̱kʼantjaiyajiaan josʼin tinijchá yaoná. Ninga ñʼai koa̱nná, tsa kʼoasʼiaan ngisaa nda kuiyoaa. Tsa meli nga jchasai xi tʼatsʼe Niná koaan tijái nga kataʼmiyali je Biblia ya dirección xi tsainjin ya Internet ya www.jw.org/mau kʼoa jngo testigole Jeobá kuichokonli jme orani kʼoa jñani nga skénndiaali.