Je Jeobá bechjí nga “kʼoakatama” bixoán

NGATSʼI NAXINANDÁ TJÍNNELE “KʼOAKAMA” KUITSO

Je én xi kʼoakatama tso én hebreo kinroani kʼoa “xi kixi” kʼoa tsa “xi ma ninʼiotʼaa” sʼin tsoyanile. Je én jebi kʼoati koanchjén ngixko̱n chjotaxá. Tobʼelañá, kʼianga kitsjoa énle je chjota “kʼoakatama” kitso, ánni nga jchanile nga ñaki kʼoatjín je én xi kitsjoa, kʼoa nga je kjinele josʼin kuichomani jmeni xi kitso (Núm. 5:22). Kʼianga kitsjoa énle jngo chjota, tsa nkjín mani xi kinrʼoéle nga “kʼoakatama” kitso, ngisaa tinʼio tjínnengánile nga kisitjoson je énle (Neh. 5:13).

Ya capítulo 27 xi tsʼe Deuteronomio, jngo koya faʼaitʼa josʼin koanchjén je én xi kʼoakatama tso. Kʼianga jejaʼasʼen je chjota israelita ya ʼNde jña tsakʼinle nga kʼoaile yaa tsakatíojtín ya nindo xi Ebal ʼmi kʼoa kao ya nindo xi Guerizim ʼmi nga kinrʼoé kʼianga koanxkia je kjoatéxomale Niná, kʼoa nga kʼoakitso nga sitjoson. Kʼoa nga jngó jngó kʼa kʼoatsakʼinle josʼin kuichomani tsa tsín sitjoson je kjoatéxoma, “kʼoakatama” kitso (Deut. 27:15-26). A fiyaa jkoaa jokji nʼio kinoʼyale nga tojngo kisʼin jta̱le ngatsʼi je xi jmi mani, xi xʼin, xi yánchjín kao xtiʼndí (Jos. 8:30-35). Alikui jao tjínná kʼianga tsínkʼia kisichajin jmeni xi kitso nga kui nichxin je chjota israelita. Kʼoa ʼyañá nga kisitjoson, nga̱ ya Biblia itso: “Je chjota israelita tosi tonda je Jeobá kisixále jokjitse tsakʼejna je Josué kʼoa jokjitse tsakatio je chjotajchínga xi tsabe ngayeje jmeni xi kisʼin je Jeobá tʼatsʼe naxinandá Israel” (Jos. 24:31).

Je Jesús kʼoati kisichjén je én xi “kʼoakatama” tso nga kataʼyale nga ñaki kʼoatjín jmeni xi kitso, tonga ʼndele nga skan kʼoakuitso tosaa tongini kʼoakitso ánni nga kataʼyanile nga ñaki kʼoatjín jmeni xi kitso.a Kʼoa kʼoasʼin tsakakóni nga ñaki kʼoatjín je én xi kinchja̱. Tjínjngo kon nga kʼoakitso nga̱ tojé xi koa̱nle kʼoasʼin nga kuitjoson jmeni xi tjínndajinle je Niná (2 Cor. 1:20; Apoc. 3:14).

JE NAXINANDÁ “KʼOAKATAMA” KITSO KʼOA KISELE JE JEOBÁ

Je chjota israelita kʼoati “kʼoakatama” kitso kʼianga kisele kʼoa nga tsakʼétsʼoale je Jeobá (Neh. 8:6; Sal. 41:13). Kʼianga jekisʼejna jngo kjoabʼetsʼoa, kʼoa nga “kʼoakatama” kitso je xi kinrʼoé kʼoasʼin tsakakóni nga kʼoati tjío kon tsanda je jokitso je xi tsakʼétsʼoa. Nʼio tsjoa kisatio kon ngatsʼi nga kʼoasʼin tsabexkón je Jeobá kʼianga kisʼejna je kjoabʼetsʼoa. Kʼoakoan kʼianga kikao je rey David je kaxa̱ jña kixinya je kjoa xi kisʼendajin. Kʼianga jekoanni, kise kʼianga tsakʼéjna je kjoabʼetsʼoa (1 Crón. 16:8-36). Jmeni xi kitso je David ñaki kichokajin ni̱ma̱le je naxinandá, kʼoa i kitso: “Kʼoakatama kʼoa kisele je Jeobá”. Nʼiojin tsjoa kisatio kon nga tojngo kisʼin jta̱le ngatsʼi nga kʼoakitso.

Tikʼoasʼinni, je chjotale Cristo xi tsakatio kʼianga siglo 1, “kʼoakatama” kitso kʼianga tsakʼasjengʼa je Jeobá. Xi ijngosani, tjínkʼa je choʼndale Niná xi kʼoati kui én kisichjén kʼianga kiski je carta xi faʼaitʼa ya Biblia (Rom. 1:25; 16:27; 1 Ped. 4:11). Ya libro xi tsʼe Apocalipsis bʼaxki̱ kʼa je ánkje xi ya tjen ngʼajmi tjíobʼasjejeyani je Jeobá, xi i̱ tso: “Kʼoa katama” (Apoc. 19:1, 4). Je chjotale Cristo xi títjon tsakatio “kʼoakatama” kitso kʼianga jefetʼale nga batío je kjoabʼetsʼoa nga kisatiole kjoajtín (1 Cor. 14:16). Tonga ñaki ni̱ma̱le kinroajinni nga kʼoakitso.

ÁNNI NGA NʼIO TJÍNNILE KJOANDOSIN NGA “KʼOAKATAMA” BIXOÁN

Tojosʼin jekaʼyaa majinná ánni nga nʼio tjínnile kjoandosin nga “kʼoakatama” bixoán nga jefetʼa jngo kjoabʼetsʼoa. Kʼianga ñá bʼejnaa je kjoabʼetsʼoa kʼoa nga “kʼoakatama” bixoán nga jenikjetʼaa, kʼoasʼin bakoñá nga ñaki kʼoatjín tokoán jmeni xi kabixoán. Kʼoa kʼianga “kʼoakatama” bixoán nga kjaʼaí xi bʼéjna je kjoabʼetsʼoa, tsa ñaki kuinókjoaa kʼoa ninga toya jinni̱ma̱ná kʼoakuixoán kʼoasʼin bakoñá nga kʼoatjín tokoán tsanda ñá. Kataʼyalasaa ánni nga nʼio chjínile nga “kʼoakatama” bixoán.

Kʼoasʼin bakoñá nga noʼyalee je xi bʼéjna kjoabʼetsʼoa kʼoa kʼoasʼin ʼyaxkónñá je Jeobá. Kʼianga ʼyaxkoán je Jeobá ali tsa tokʼoajinsʼin bakoñá nga “kʼoakatama” bixoán nga sʼejna je kjoabʼetsʼoa, kʼoati ya bakoñá jonʼia. Tsa ñaki kʼoatjín tokoán nga “kʼoakatama” kuixoán kui xi koasenkaoná nga nda koasenñoaa nga tísʼejna je kjoabʼetsʼoa.

Kui xi jtín sʼin síkatíoná kao ndsʼee. Nga sʼejna je kjoabʼetsʼoa ya jinjtín, ngatsʼiaa xi ya tiyoaa kui noʼyá jmeni xi títso je xi tíbʼétsʼoa (Hech. 1:14; 12:5). Ngisaa jtín biyoaa kao ndsʼee kʼianga tojngo nʼia jta̱ná ngatsʼiaa nga “kʼoakatama” bixoán. Ninga ñaki kuinókjoaa kʼoa ninga toya jinni̱ma̱ná kʼoakuixoán, kʼoaʼmilee ngatsʼiaa je Jeobá nga katasítjoson jmeni xi kanijélee.

Kʼoasʼin chʼasjengʼañá je Jeobá. Kuenta sʼín je Jeobá ninga tochoa jmeni xi nʼia kʼianga bʼetsʼoalee (Luc. 21:2, 3). Je Niná be ánni nga kʼoanʼiañá tsa jmeni kʼoa male kotʼajin je ni̱ma̱ná. Ninga tokao teléfono kuinóʼyañá je kjoajtín, je Jeobá nrʼoé kʼianga “kʼoakatama” bixoán. Nga kʼoabixoán kʼoatisʼin chʼasjengʼaa je Jeobá ya jinjtín.

Tojosʼin tiʼyaa, kʼianga “kʼoakatama” bixoán nʼio tjínle kjoandosin. Je Perspicacia, enciclopedia xi tʼatsʼe Biblia nchja̱ni kʼoatso nga “kʼoakatama” bixoán kʼoasʼin machjén nga kʼoabixoán nga “tjínná kjoanʼiotʼa, nga ñaki tjínjngo tokoán kʼoa nga tjínná kjoachoya ya jinni̱ma̱ná”. Kʼianga ñandia ñandia “kʼoakatama” kuixoán, tsjoa sʼe̱ kon je Jeobá (Sal. 19:14).