Jñá koa̱nsjainá xi kjoakixi

Jmi nó nga tsín tsabe chjota xi tʼatsʼe jebi, kʼoa nkjín millón chjota jeson. Nga jejaʼato nichxin, je chjotachjine koansjaile jmeni xi tsjoáchʼinná. Tobʼelañá, koansjaile nga kui xi bacterias kʼoa xi virus ʼmi tsjoáchʼinná. Kʼianga tjíokotʼayason xi tʼatsʼe jebi, kjimasjaile josʼin nga tsín tinʼio chʼin katasʼeni, kʼoa jmi millón chjota xi ngisa tse tjíobatio kʼoa tsín nanda chʼin tjíosʼele.

Tonga jósʼin nikjaʼaitsjeen tʼatsʼe kjoachjonangi xi nʼio tjínle kjoandosin. A koasenkaoli josʼin tinijchái yaoli kʼiatsa jchai jotjínni xi tʼatsʼe jebi.

• ʼYáni je Niná.

• ʼYáni Jesucristo.

• Jmé xi sʼin je Chjotaxále Niná.

• Jméni xi choyalee nichxin xi nroaján.

Millón chjota xi kjimajinle xi tʼatsʼe jebi kʼoa tjíobinyakao nga ndasʼin tjíobatio. Kʼianga koa̱njinli jokjoantjínni jebi kʼoati koasenkaoli nga ndasʼin kuijnai.

A TJÍN JE XI ÑAKI KJOAKIXI ʼMI

Tsakui nichxin kʼoasʼin nikjaʼaitsjain nga machjén nga jchaa tsa ñaki kʼoatjín tsa jmeni. Jokji tífaʼato nichxin, ñʼai maná nga ʼyaa tsa kʼoatjín kʼoa tsa mai jmeni xi tso chjota. Ánni.

Nʼio nkjín xi tsín timakjainnile jmeni xi tso je chjota xi xá tjínle, xi negosioyʼai tjínle kʼoa tsakuije̱ jmesani xi ʼmile je chjota. Ñʼai male nga makjainle je chjota nga̱ tsín be tsa kʼoatjín jmeni xi tíʼmile kʼoa tsa to énndiso.

Ninga kʼoalani, kʼianga kjoásjaiyai jmeni xi nʼio tjínle kjoandosin koa̱njinli nga ñaki kʼoatjín.

JMÉ XI SʼIAAN NGA KOA̱NSJAINÁ XI KJOAKIXI

Fasjaiyañá jmeni xi nʼio tjínle kjoandosin. Tobʼelañá, je Jessica nʼio kuenta sʼín nga tsín ngʼióʼnde tjínjin je tsojmi xi batse. Itso: “Je tsotiʼndína nʼio síkiʼaon ninga toʼi̱natjín ngʼióʼnde tjínjin jmeni xi kjine, kʼoa tsakui nichxin saʼnda sikʼienje̱. Kʼianga jme xi batse títjonkjoanla bʼexkia je xo̱n xi kjitʼa. Kʼoa saʼnda basjaiyaña jñani manda ánni nga skoeña nga tsín ngʼióʼnde tjínjin. Kʼoati kjonangia jña xin tsa ñaki kʼoatjín jmeni xi tsona jñani manda je tsojmi xi batse”.

Tsakui nichxin tsínkjoan nyaon nyaon kjoásjaiyai tsa jmeni, tonga koaan kʼoasʼiain josʼín je Jessica nga jchasai jmesani xi nʼio tjínle kjoandosin:

• Chótʼayajin.

• Nda tjasjaiyai.

• Ya tjasjaiyai jñani ʼyale nga ñaki kʼoatjín jmeni xi tso.

Kʼianga kʼoasʼiain kui xi koasenkaoli nga jchai jmeni xi nʼio tjínle kjoandosin. Kataʼyala.

JNGO LIBRO XI ÑAKI KʼOATJÍN JME XI TSO

Kʼianga koanjinle Jessica jme kjoanni xi bakóya je Biblia, kʼoati sʼin tsakásjaiya josʼín kʼianga básjaiya je tsojmi nga tsín ngʼióʼnde tjínjin. Itso: “Kʼianga bʼexkia kʼoa nga nda basjaiya kui xi tíbasenkaona nga kjimajinna jme kjoanni xi bakóya je Biblia”. Millón mani chjota xi kʼoati tjíosʼín joni je Jessica, nga tjíobásjaiya jotso je Biblia xi tʼatsʼe kjoachjonangi jebi:

• Jmé xá tiyochonñá.

• Jméni xi maná nga jebiyaa.

• Ánni nga kʼoasikji kjoañʼai tjínsíni.

• Jmé xi tísʼín Niná nga kjoaʼaxin je kjoañʼai.

• Jósʼin nga nda kuiyoaa ya yaniʼyaná.

Kʼianga kʼoéxkiai Biblia koa̱nsjaili jmeni xi tso xi tʼatsʼe jebi kʼoa kao xi kjaʼaísa kjoachjonangi, kʼoati koa̱n kjoásjai ya Internet ya www.jw.org/mau.