Jméni xi tsjoa katabáya tokoán
1. Jméni xi tsjoa fáya tokoán kʼianga nikʼasʼeen je informená nga xki̱ sá.
1 Kʼianga nikʼasʼeen je informená nga xki̱ sá, jméni xi tsjoa fáya tokoán (Gál. 6:4, NM). Kuinga ñaki kao ni̱ma̱ná nixánilee Jeobá jotjín ora nikʼasʼeen. Ninga je xi precursor especial tjíosíxá, xi jngo siento kao kante ora tsoyason nga xki̱ sá, kʼoa ninga je xíngiaa xi to xjaʼaon minuto ma síkʼasʼen nga xki̱ sá machjénní nga tsjoa katasatíole (Sal. 100:2).
2. Ánni nga kui kʼoaisínilee Jeobá xi ngisasa chjíle xi tjínná.
2 Jé Jeobá batéxomale ngayeje xi tjín kʼoa kuinga machjénsíni nga kui kʼoailee xi ngisasa chjíle xi tjínná (Mal. 1:6). Kʼoa mani nga tsjoachaa kʼoatsakʼinlee kʼianga tsakʼaitʼalee yaoná nga je si̱xálee tokʼia saʼndani. Kuinga nʼio tsjoa maniná kʼianga jenikjáyaa nga manjio kʼoa kʼianga nikʼasʼeen informená nga xki̱ sá nga̱ kui tibʼailee Jeobá xi ngisasa chjíle xi tjínná, jolani tsa nichxinná, nganʼioná kao jmeni xi maná nʼia (Pro. 3:9). Tonga tsa kʼoatso kjoafaʼaitsjenná nga koa̱nsa tse si̱xálee je Niná, si̱kjaʼaitsjeen jméni xi koa̱n sʼiaan (Rom. 2:15).
3. Ánni nga tsín ndatjínsíni tsa je xíngiaa si̱ngósonkoaa yaoná josʼin tinixá.
3 Alikui xíngiaa si̱ngósonkoaa yaoná josʼin tinixá. Alikui ndatjín nga je xíngiaa ningósonkoaa yaoná josʼin tinixálee Niná kʼoa tsakui si̱kjaʼaitsjenje̱ josʼin kinixá kʼianga sʼa tjínsaná nganʼio. Ánni. Kuinga likui tonda tiyontsjé kʼoa alikui tongóson jmeni xi maná nʼia nga jngó jngoá. Kʼianga tjín xi ningósonkoaa yaoná yaa nroani nga maxíntokonchaa xíngiaa, kʼoa nga tsín jme chjíná ñá maná (Gál. 5:26; 6:4). Je Jesús alikui kʼoakisʼin, tosa nda tsʼasje je chjota xi nda kisʼin (Mar. 14:6-9).
4. Jmé xi bakóyaná je choa̱ xi kisikʼéjna Jesús tʼatsʼe jngo chjota xi kitsjoale tao̱n xi sixákao je choʼndale.
4 Je Jesús jngo choa̱ kisikʼéjna tʼatsʼe jngo chjota xi kitsjoale tao̱n xi sixákao je choʼndale. “Nga jngójngó kitsjoale josʼin nga koanle.” (Mat. 25:15.) Kʼianga jaʼaini chjota jebi, kinchjale choʼndale kʼoa kisijéle kuenta. Nda tsʼasje nga jao choʼndale xi nda kisixá kʼoa xi kʼoakisʼin jokji tje̱n kicho nganʼiole, kʼoa kitsole: “Titjásʼenjin kjoatsjoale naili” (Mat. 25:21, 23). Kʼoatisʼinni tsanda ñá, tsa kjitʼa kʼuínyasoán kʼoati nda sʼe̱le Niná xi tʼatsaan kʼoa nʼio tsjoa sʼe̱ tokoán.