Aon koya jmeni xi sʼiaan kʼianga sʼe̱ná estudio
1. Jméni xi koa̱n sʼiaan kʼiatsa tsín sokóná chjota xi koa̱n kʼuínyalee Biblia.
1 A tsín sokóli chjota xi koa̱n kʼuínyalai Biblia. Ali nikinroajenjin tokuin, tosi tonda tjasjai. Je Jeobá síchikontʼain je xi kʼoatjíosʼín josʼin mele, xi tsín chóbele (Gál. 6:9). Aon koya kjoafaʼaitsjen chótʼayá ibi xi nʼio koasenkaoná.
2. Jméni xi koa̱n sʼiaan kʼiatsa tosa chjónangilee je chjota tsa mele skótʼaya Biblia.
2 Chjónangilee je chjota tsa mele skótʼaya. Nʼio nkjín chjota xi be nga kui nikʼabísoán je rebista La Atalaya kao ¡Despertad!, tonga likui be nga kʼoati ʼmiyalee Biblia chjota ya niʼyale. Nga kʼuínkʼinyasuin xi ngindia, koaan tosa kʼoakʼuínkixilai chjota tsa mele skótʼaya Biblia. Kʼoati koa̱n chjónangilai je chjota xi kjitʼa nixatʼai. Ninga mai kuitso, koaan tosi tonda kjoáyolai xo̱n kʼoa tosi tonda chja̱kaonajmíni énle Niná. Jngo ndsʼee tíjna xi jenkjín nó nga fáyole rebista jngo chjota kʼoa kao chjoónle. Ñandia i̱ koan. Kikaole je rebista xi chrian kʼia kitjo kʼoa nga toje tífi toʼikoan i̱ kitsole: “A tsín meno chótʼayao Biblia”. Je ndsʼee jebi tokʼoakoanle nga jaon kitso chjotabe. Kʼoa je chjota jebi kao chjoónle jekʼoati testigole Jeobá ma ndʼaibi.
3. Ánni nga tsín kʼoasʼin si̱kjaʼaitsjensíñá tsa jetjíoʼmiyale Biblia ngatsʼi chjota xi bichó kjoajtínná.
3 Chjota xi bichó kjoajtín. Ali kʼoajinsʼin nikjaʼaitsjain tsa jetjíoʼmiyale Biblia ngatsʼi chjota xi bichó kjoajtínná. Jngo ndsʼee xi i̱ tso: “Jojetjín mani chjota xi kixinyale Biblia, tsʼatola basen xi ya kisokona ya kjoajtínná”. Kʼoati jngo chjoón tíjna xi jexjaʼaon nó tjínle nga ntsjaintsjai bichó ya Ndʼia jña chotʼayá kao xtiyánchjínle. Kʼoa je xtiyánchjínle jekisʼenngindá nga kʼia. Chjoón jebi me tsín nanda nchja̱. Kʼiaa bichó kjoajtín nga jetífitsʼia kʼoa kjoan bitjo nga jefetʼa. Ñandia jngo tichjaa tsakjákao xi kʼoakitsole tsa mele nga je kuitsoyale Biblia. Je chjoón jebi koanjyole kʼoa xi jeki nichxin chan kisʼenngindá. Je tichjaa xi kitsoyale kitso: “Tokui xi kʼoamana ánni nga xjaʼaon nó kiskoyakaosíña nga kʼoakixinle tsa mele skótʼaya Biblia”.
4. Jméni xi koa̱n sʼiaan kʼiatsa mená nga so̱koná chjota xi kʼuínyalee Biblia.
4 A koaan tsa ji kʼuínyalai chjota. Jngo tichjaa tíjna xi fikao xíngiaa xi tjínle estudio. Je tichjaa jebi títjon kjoanla kʼoatsole xíngiaa jebi tsa koa̱n skónangile je chjota xi títsoyale Biblia tsa bexkon kʼa chjota xi kʼoati mele skótʼaya. Ijngosa tíjna jmeni xi koa̱n sʼiaan. Je chjota xi jenkjín kʼa mangínnixatʼaa kʼoa tsa jeje̱ xi jekisʼeyole je libro Jmé kjoanni xi bakóya je Biblia koaan chjónangilee tsa bexkon kʼa chjota xi koa̱ntsjoake je libro. Kʼoa tsamaije̱ tjíokʼa je ndsʼee kʼoa tsa precursor xi tsín kʼoakoa̱nle nga je kuitsoyale jngo chjota xi mele skótʼaya. A koaan kʼoakʼuínlai xíngiaa jebi nga koa̱n ji kʼuínyalai chjota jebi.
5. Ánni nga koa̱n chjónangisínilee je xʼinle kʼoa tsa chjoónle xíngiaa tsa mele skótʼaya.
5 Xíngiaa xi tsín kotʼaya tsa xʼinle kʼoa tsa chjoónle. A tjíokʼa ndsʼee kʼoa tsa tichjaa ya jinjtínli xi tsín kotʼaya tsa xʼinle kʼoa tsa chjoónle. Tjíokʼa chjota xi tsín mele nga tije kuitsoyanile énle Niná je xʼinle kʼoa tsa chjoónle. Tonga skótʼaya kʼiatsa kjaʼaí xi kuitsoyale. Tonga ngisa nda tsa je kjoanla títjon chjónangilee je ndsʼee kʼoa tsa tichjaa jósʼin koa̱n chja̱koaa je xʼinle kʼoa tsa chjoónle.
6. Ánni nga nʼio machjénsíni nga kʼoétsʼoalee Jeobá kʼiatsa mená nga so̱koná je chjota xi kʼuínyalee Biblia.
6 Kʼoatʼinlai Jeobá nga katabasenkaoli. Nikʼiajinla kʼoakuixoán tsa choa basenkaoná kʼianga bʼetsʼoaa (Sant. 5:16). Je Jeobá kʼoatso nga kjuinrʼoéná tsa si̱jé tojmeni josʼin nga mele nga je (1 Juan 5:14). Jngo ndsʼee tíjna xi me tsín maʼale. Ndsʼee jebi kʼoakitsole Jeobá nga katabasenkao nga so̱kole jngo chjota xi kuitsoyale Biblia. Kʼoa je chjoónle ndsʼee jebi kui koankjaojinle tsa tsínni kʼoakoa̱nle ndsʼee nga kuitsoyale je chjota xi so̱kole, ngisakjoán tsa je so̱kole jngo chjota xi kjoa tíjnajin. Kʼoa tichjaa jebi tsakʼétsʼoale Jeobá xi tʼatsʼe jebi. Je Jeobá kinrʼoéle kjoabʼetsʼoa xi tsakatíole xíngiaa jebi, kʼoa xi koanni xjaʼaon nichxin jngo precursora tíjna xi jngo chjota koansjaile xi mexóle skótʼaya kʼoa kʼoakitsole je ndsʼee nga je katatsoyale. Je chjoónle ndsʼee jebi i kitso: “Tsa ʼyani xi kʼoasʼin síkjaʼaitsjen nga ñaki tsín kʼoakoa̱nle nga kuitsoyale jngo chjota, tosi tonda katabʼétsʼoale Jeobá kʼoa ñaki kʼoakjoán katatsole jme xi mele. Nikʼiajinla kiya jkuijin tsa kʼoasikji kjoatsjoa sʼe̱najin”. Kʼiatsa tsín chóbeli nga tosi tonda kjoásjai je chjota xi mele skótʼaya Biblia, chan so̱koli. Kʼoa kʼoati nʼio tse kjoatsjoa sʼe̱li nga kuisenkoai nga ya kʼoámjeya “je ndiaa xi fini kjoabijnachon” (Mat. 7:13, 14).