Jejngo siento nó nga tísʼejinkon chjota xi tʼatsʼe Chjotaxále Niná
1. Nichxin kjoan jngo siento nóján, jméni xi tsakʼinle je naxinandále Jeobá nga sʼin.
1 “¡Koeni, je Rey jetíbatéxoma! Kʼoa jonño xi koanngínkaoson én. Kuinga, kʼoatixónsíño, kʼoatixón, kʼoatixón nga jetíbatéxoma je Rey.” Jeme jngo siento nó tjínle nga kʼoakitsole je ndsʼee Rutherford je naxinandále Jeobá nga katatsoyason xi tʼatsʼe Chjotaxále Niná jngo tjíjtsa Sonʼnde. Kʼoa tíbitjosonná jebi. Tojo kisʼin je chjotale Cristo xi tsakatio nga siglo I, kʼoatisʼin tiʼmiyasonlee je énnda chjotse xi tsʼe Chjotaxále Niná “ngatsʼi xi tjío i̱ sonʼndebi” (Col. 1:23). Jméni xi tinʼia nga tinokjoañá xi tʼatsʼe Chjotaxále Niná je xi jeme jngo siento nó jejaʼato. Jméni xi sʼiaan nga tosi tonda kjoájinkoaan chjota xi tʼatsʼe Chjotaxále Niná nga jeme jngo siento nó tjínle nga jetíbatéxoma.
2. Je xo̱n xi tíbʼasje naxinandále Niná, jósʼin tjíobájinkon chjota xi tʼatsʼe Chjotaxále Niná.
2 Nichxin xi tífaʼato. Je xo̱n xi tíbʼasje je naxinandále Niná jenʼio nkjín nó nga tjíobájinkon chjota xi tʼatsʼe Chjotaxále Niná. Je rebista xi nʼio kjimachjén saʼnda nó 1939 kuiní je xi Xo̱n xi Bájinkonná tʼatsʼe Chjotaxále Jeobá sʼin ʼyale ndʼaibi. Xo̱n jebi kui xi ngisa nchja̱ni tʼatsʼe Chjotaxále Niná kʼoa jmeni xi sʼin. Kʼoa je rebista ¡Despertad! kʼoati kui nchja̱ni nga toje Chjotaxále Niná xi koa̱nle nga ndasʼin sikatío chjota. Nʼio tsjoa maná nga kui nga jao rebista jebi xi ngisasa nkjín én tífaʼatoya kʼoa xi ngisasa tíbʼabíson (Apoc. 14:6).
3. Tikʼaxki̱ kʼai josʼin tiʼmiyasoán xi tʼatsʼe Chjotaxále Niná.
3 Je naxinandále Jeobá nkjín koya josʼin títsoyason xi tʼatsʼe Chjotaxále Niná. Nga títjon, kisichjén karro xi bocina tsatíotʼale, kinchja̱ya ya radio kʼoa kisichjén xi gramófono ʼmi. Nga kʼoakisʼin nʼio nkjín chjota kinrʼoé je énnda chjotse ninga sʼa choa mani xi tsoyason nga kʼia (Sal. 19:4). Kʼoa je nó xi tífaʼato nʼio nkjín koya jmeni xi tísatíotʼa ya jw.org kʼoa miyón chjota tjíobe xi tʼatsʼe Chjotaxále Niná, saʼnda je chjota xi ya tjío ya naxinandá jña tsín tjoʼndená nga ʼmiyasoán.
4. Jósʼin tísʼendajin nga tíʼmiyason Énle Niná.
4 Kʼoa je naxinandále Jeobá kʼoati toxá bʼéndajinni josʼin kaníbasonsa Énle Niná. Tobʼelañá, nga jejaʼato nó 1990 alikui tsa tito xki̱ niʼya tsakʼinyasonni, kʼoati tsakʼinyason ya jña sʼeyo karro, jña tjín negosio kʼoa kao jña tjín parque. Kʼoa chriansʼaa nga kʼoati kisʼendajin nga tíʼmiyason ya jña nʼio tjín chjota ngakjijnda naxinandáyʼai xi tjín jngo tjíjtsa Sonʼnde. Kʼoa nʼio nkjín jtín xi kʼoatisʼin tsoyason ya territorio jñani bʼakaole, binyá yámixa̱ kʼoa kao xi ma xinyáya xo̱n ya jñani nʼio nkjín chjota faʼa. Tonga josʼin nga ngisasa ʼmiyasoán kʼiaa nga xki̱ niʼya. (Hech. 20:20).
5. Jmé kjoanda xi sʼejnabasenná fitsʼiakjoanni sá septiembre nó 2014.
5 Nichxin xi sʼa nroa. Koaitsʼiakjoanni sá septiembre nó 2014, nʼiojin nkjín je xi precursor regular sʼin sixá. A kʼoakoa̱nli nga kʼoatisʼin si̱xái. Kʼiatsa mai, a tibʼendajinni nga sakʼoa precursor auxiliar sʼin si̱xái. Ningalani tsín precursor sʼin ni̱xái, je Jeobá sichikontʼainli kʼiatsa kʼoénelai yaoli nga kʼuínyasuin xi tʼatsʼe Chjotaxále jokji tje̱n kʼoakoa̱nli (Mal. 3:10).
6. Ánni nga nʼio tse kjoandosin tjínnile je sá octubre nó 2014.
6 Nga sá octubre xi tsʼe nó jebi, jejngo siento nó kuicho nga tíbatéxoma je Chjotaxále Niná. Kuinga je Xo̱n xi Bájinkonná xi tsʼe sá octubre kui ngisa kuinchja̱ni xi tʼatsʼe Chjotaxále Niná. Kʼoénelee yaoná nga nʼio nkjín chjota si̱káyolee xo̱n jebi. Jokji nga koaisa nichxin, tosi tonda kʼuínyasonlee je chjota xi kjuinrʼoéná “je énnda xi tʼatsʼe kjoatéxomale Niná” (Hech. 8:12).